1 Pita 5:2 - Yesus Aqa Anjam Bole

² Qotei aqa tamo uŋgasari naŋgi kaja du du bul deqa a na naŋgi joqsiqa nuŋgo baŋq di atej unub. Deqa niŋgi na naŋgi geregere taqatnjroqniye. Qotei na niŋgi wau di eŋgej deqa niŋgi are bole na wau di yoqniye. Tamo qudei naŋgi siŋgila na niŋgi waiŋgibqa niŋgi deqa wau di yaib. Niŋgi silali qa osib wau di yaib. Niŋgi are bole na wau di yoqniye.

1 Pita 5:2 ပူးပေါင်းရင်းမြစ်များ

Luk 12:32

Osiqa Yesus a olo anjam endegsi minjrej, “O ijo kaja du du niŋgi ulaaib. Nuŋgo Abu a nami niŋgi qa osiqa endegsi merŋgej, ‘E nuŋgo Mandor Koba sosiy niŋgi taqatŋgwai.’ Qotei a nami degsi merŋgej.

Aposel 20:29

E qalie, e niŋgi uratŋgitqa gisaŋ anjam maro tamo qudei naŋgi nuŋgo ambleq aiqab. Bauŋ juwaŋ na kaja ugeugeinjreqnub dego kere gisaŋ anjam maro tamo naŋgi di nuŋgo ambleq aisib Qotei aqa tamo uŋgasari naŋgi ugeugeinjroqnqab.

Aposel 21:13

Onaqa Pol na iga mergej, “Niŋgi kiyaqa akamoqnsib are gulubetetbeqnub? E Tamo Koba Yesus aqa ñam qa tonto talq waibqab di kere. Aqa ñam qa e lubib moiqai di dego kere. E gulube di uratqasai. E itqai.”

Rom 1:15

Deqa niŋgi Rom qureq di unub qaji niŋgi dego Yesus aqa anjam bole merŋgoqnit quqwajqa deqa are prugbeqnu.

1 Korin 9:7

O was qu, qoto tamo naŋgi qoteqnub dena naŋgi awai eqnub. Naŋgi naŋgo segi silali wau ojosaieqnub. Tamo naŋgi iŋgi yageqnub dena naŋgi iŋgi meli olo oqnsib uyeqnub. Tamo naŋgi kaja naŋgi taqatnjreqnub dena naŋgi muŋgum qaq olo oqnsib uyeqnub.

1 Timoti 3:3

A ya uyoqnsim nanarioqnaiq. A urur minjiŋ oqim qotoqnaiq. A lawo soqnem. A silali koba ti sqajqa are qaloqnaiq.

1 Timoti 3:8

Kristen naŋgo wau tamo naŋgi dego areqalo bole ti sosib wauoqnebe. Naŋgi medabu aiyeltaib. Naŋgi ya uysib nanarioqnaib. Naŋgi na tamo naŋgo silali yainjrqajqa are koba qalaib.

Taitus 1:11

Tamo naŋgi di tamo uŋgasari naŋgo silali ti ñoro ti yainjrqajqa deqa marsib kumbra uge uge iga yqa keresai qaji di naŋgi yqajqa minjreqnub. Kumbra dena naŋgi na tamo uŋgasari qudei naŋgo aŋgro ti naŋgo was naŋgi ti areqalo ugetetnjreqnabqa naŋgi Qotei aqa gam bole olo urateqnub. Deqa Taitus, ni na tamo uge uge deqaji naŋgo medabu getentsim saidnjre.

Taitus 1:7

Ni qalie, Kristen naŋgo gate naŋgi Qotei aqa wau taqateqnub. Deqa ni tamo bei a gate atqa osimqa ni aqa kumbra endeqaji unsim ate. A tamo uŋgasari naŋgo ŋamgalaq di une saiqoji unu. A aqa segi ñam soqtosiq tamo uŋgasari naŋgi siŋgila na taqatnjro-saieqnu di ni unsim a gate ate. A urur minjiŋ oqetosaieqnu. A ya uysiq nanariosaieqnu. A qoto ani tamo sai. A silali koba oqnqajqa tulaŋ arearetosaieqnu.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

Taitus 3:1

O Taitus, ni na tamo uŋgasari naŋgi anjam endegsim minjroqne, “Mandor kokba ti sawa taqato qaji tamo kokba ti naŋgo sorgomq di niŋgi geregere sosibqa naŋgo anjam dauryoqniye. Osib gaigai wau bole yqajqa are qaloqniye.

Filemon 1:14

Ariya ni na e odbosaiunum deqa e a qariŋyonum ni qa olo bqo. E endegsi are qalonum. Ni na e aqaryaibqa are soqnim ni ino segi areqalo na e odbosim aqaryaibe. E siŋgila na ni mermqasai.

Hibru 12:15

Niŋgi geregere ŋam atsib soqniye. Qotei a niŋgi qa are tulaŋ boleiyeqnu aqa kumbra di niŋgi qudei olo uloŋosib urato uge. Ŋamtaŋ oqsiq gei uge ateleŋeqnu dego kere nuŋgo ambleq di tamo bei a kumbra uge uge babtoqnimqa niŋgi na saidyiye. Tamo dena niŋgi gulube eŋgimqa niŋgi Qotei aqa ŋamgalaq di jiga ti so uge.

2 Pita 2:3

Tamo naŋgi di mamaul ani. Deqa naŋgi na bosib gisaŋ anjam gargekoba niŋgi merŋgoqnsib dena nuŋgo silali iŋgi iŋgi yaiŋgoqnqab. Ariya tulaŋ nami Qotei na tamo naŋgi di peginjrqa bati atsiqa naŋgi qa endegsi marej, “E na tamo naŋgi di padaltnjrougetqai.” Od, tamo naŋgi di bole padalqab. Qotei a naŋgo padalqa bati qa tariŋeqnu.