1 Pita 4:11 - Yesus Aqa Anjam Bole

¹¹ Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.

1 Pita 4:11 ပူးပေါင်းရင်းမြစ်များ

Matyu 6:13

Satan na iga walawalaigosim uneq waigwa laqnimqa ni na Satan getentime. Yim kumbra uge bei na iga ugetetgwasai.’

Jon 13:31

Judas a oqedonaqa Yesus a endegsi marej, “Bini e Tamo Aŋgro ñam koba oqai. E ñam koba otqa dena Qotei a dego ñam koba oqas.

Aposel 7:38

Moses qujai dena Israel tamo uŋgasari naŋgi joqsiq wadau sawaq dia korooqneb. Di gago moma naŋgi. Moses qujai di Sainai manaq oqsiqa dia laŋ aŋgro na anjam minjej qaji a ombla soqneb. Sosibqa Moses na ŋambile gaigai sqajqa anjam Qotei aqaq dena yaiyosiqa gago moma naŋgi enjrej.

Rom 11:36

O was qu, Qotei a iŋgi iŋgi kalil ateleŋej. A iŋgi iŋgi kalil qa utru. Iŋgi iŋgi kalil di aqa segi. Deqa iga bati gaigai aqa ñam soqtoqnqom. Bole.

Rom 12:3

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

Rom 16:27

Qotei qujai di a powo koba ti unu. Kumbra kalil a Yesus Kristus aqa baŋ na yoqnej qaji iga deqa are qaloqnsim aqa ñam gaigai soqtoqnqom. Bole.

Rom 3:2

Deqa e niŋgi kamba endegsi merŋgwai. Qotei a na iŋgi tulaŋ bole bole Juda naŋgi enjrej. Iŋgi bole bei agiende. A na Juda naŋgi aqa anjam taqatqajqa deqa wau enjrej.

1 Korin 10:31

Deqa niŋgi iŋgi ti ya ti uyqa oqnsib niŋgi Qotei aqa ñam soqtetoqnsib uyoqniye. Niŋgi kumbra bei yqa oqnsib niŋgi Qotei aqa ñam soqtetoqnsib yoqniye.

1 Korin 12:4

O was qu, Qotei aqa Mondor na iga kumbra segi segi egeqnu. Ariya Qotei aqa Mondor qujai segi unu.

1 Korin 3:10

Qotei a e qa are boleiyosiq wau ebej deqa e tal gereiyo qaji tamo bulosim e tal gereiyqajqa qalie bole. Deqa e tal aqa utru atem. Ariya bini tamo qudei naŋgi kamba olo tal aqa ai gogeq di tal ateqnub. Ariya e na tamo kalil naŋgi endegsi minjreqnum, “Niŋgi tal ateqnub deqa niŋgi geregere atoqniye.”

1 Korin 6:20

Qotei a awai kobaquja na niŋgi awaiŋgej. Deqa kumbra kalil niŋgi yeqnub qaji di niŋgi Qotei aqa ñam soqtqa maroqnsib yoqniye.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 9:13

Niŋgi naŋgi degsib aqaryainjreqnub deqa nuŋgo wau dena nuŋgo kumbra bole kalil boleq atekritqas. Yim naŋgi unsib qalieqab, niŋgi Kristus aqa anjam bole siŋgila na ojejunub deqa niŋgi aqa anjam geregere dauryeqnub. Iŋgi bole bole niŋgi na oqnsib naŋgi ti tamo uŋgasari kalil naŋgi ti enjreqnub qaji di naŋgi unoqnsib Qotei aqa ñam soqtoqnqab.

Efesus 1:19

Qotei a siŋgila koba ti unu. Siŋgila dena a na gaigai iga tamo uŋgasari a qa gago areqalo siŋgilateqnum qaji iga aqaryaigeqnu. Aqa siŋgila di tulaŋ kobaquja deqa iga na ubtsim marqa keresai. Aqa siŋgila koba di gagoq di waueqnu. Niŋgi siŋgila di qalieqajqa deqa e niŋgi qa Qotei pailyeqnum.

Efesus 4:29

Niŋgi nuŋgo medabu waqtoqnsib anjam uge uge maroqnaib. Niŋgi anjam bole segi maroqnsib dena tamo naŋgi gulube ti unub qaji naŋgi olo siŋgilatnjroqniye. Yoqnim naŋgi nuŋgo anjam di quoqnib dena Qotei a naŋgi qa are tulaŋ boleiyoqnsim kumbra bole bole enjroqnqas.

Efesus 5:20

Kumbra bole kio uge kio nuŋgoq di brantoqnimqa, uŋgum, niŋgi bati gaigai gago Tamo Koba Yesus Kristus aqa ñam na Qotei biŋiyoqniye.

Efesus 6:10

Ariya e ijo anjam getentqai. Niŋgi Tamo Koba Yesus beteryejunub deqa niŋgi aqa siŋgila kobaquja qa are qaloqnsib siŋgila na tigelesoqniye.

Filipai 1:11

O was qu, kumbra bole kalil Yesus Kristus a segi na babteqnu qaji di nuŋgoq di tulaŋ kobaoqnqajqa deqa e niŋgi qa pailyeqnum. Yim tamo uŋgasari naŋgi nuŋgo kumbra di unsib Qotei aqa ñam soqtoqnqab.

Filipai 2:11

Osib naŋgo medabu qujaitosib maroqnqab, “Yesus Kristus a segi Tamo Koba.” Yim kumbra dena naŋgi na Abu Qotei aqa ñam tulaŋ soqtoqnqab.

Kolosi 4:6

Niŋgi anjam bole segi gaigai maroqniye. Yim nuŋgo anjam dena tamo naŋgo are siŋgilatetnjroqnqas. Tamo naŋgi na niŋgi anjam bei nenemŋgibqa niŋgi kamba anjam bei minjrqa oqnsib geregere are qaloqnsib minjroqniye.

1 Tesalonaika 2:4

Qotei a segi gago are miligi peleiyoqnsiq une bei unosai deqa a na iga wau egsiqa mergej. “Niŋgi ijo anjam bole mare mare laqniye.” Deqa iga endegsi are qalosaioqnem, “Iga Qotei aqa anjam maroqnimqa tamo naŋgi na iga nugoqnsib gago ñam soqtetgoqnqab.” Iga degsi are qalosaioqnem. Gago areqalo agiende. Qotei a segi na gago are miligi peleiyoqnsim gago wau qa areboleboleiyoqnqajqa deqa are qalem.

1 Timoti 1:17

Qotei a gaigai gago Mandor Koba sqas. A moiqa keresai. Iga a unqa keresai dego. A segi Qotei bole. Deqa iga kalil bati gaigai aqa ñam soqtoqnsim a biŋiyoqnqom. Bole.

1 Timoti 6:16

A segi qujai moiosaieqnu. A suwaŋoq di unu. Aqa suwaŋ di kobaquja. Deqa iga aqa areq di brantqa keresai. Tamo bei na nami aqa ulatamu unosaioqnej. Tamo bei na a unqa keresai dego. Deqa iga kalil gaigai aqa ñam soqtoqnqom. A bati gaigai siŋgila koba ti sqas. Bole.

Taitus 2:1

Ariya Taitus, ni na tamo uŋgasari naŋgi anjam endegsim minjroqne, “Niŋgi Qotei aqa anjam kalil geregere dauryosib kumbra bole bole yoqniye.”

Taitus 2:15

O Taitus, ni gaigai tamo uŋgasari naŋgi anjam di minjroqnimqa naŋgi qusib dauryoqnqab. Tamo uŋgasari anjam gotraŋyeqnub qaji naŋgi dego siŋgila na minjroqnimqa naŋgi kumbra uge uratoqnqab. Tamo bei na ino anjam di uge qa maraiq.

Hibru 13:7

Ariya was qu, niŋgi Kristen gate naŋgi qa are qaloqniye. Nami naŋgi Qotei aqa anjam palontsib niŋgi merŋgoqneb. Osib Qotei qa naŋgo areqalo siŋgilatoqnsib kumbra bole bole yoqnsib laqneb. Deqa niŋgi naŋgo kumbra deqa are qaloqnsib dauryoqniye.

Hibru 5:12

Niŋgi nami are bulyeb bati olekoba gilqo. Deqa niŋgi Qotei aqa anjam plaltosib Kristen tamo uŋgasari naŋgi minjrqa kere. Ariya nuŋgo powo kobaosaiunu deqa niŋgi Qotei aqa anjam plaltsib marqa keresai. Tamo qudei naŋgi na olo niŋgi Qotei aqa anjam utruq na merŋgwab di niŋgi poiŋgwas. Niŋgi aŋgro mom muŋgum uyeqnub dego bul. Niŋgi iŋgi siŋgila uyqa kereosaiunu.

Jems 1:19

O ijo was bole, niŋgi ijo anjam endi geregere qalieosib soqniye. Niŋgi anjam bei marqa osib urur medabu waqtaib. Mati didaboqniye. Urur minjiŋ oqaiq.

Jems 1:26

Tamo bei a endegsi are qalqas, “E gaigai Qotei qa loueqnum. Deqa e Kristen tamo bole.” Ariya tamo di a aqa segi medabu geregere taqatosaieqnu. Aqa kumbra dena a na aqa segi jejamu gisaŋyeqnu. Deqa a Qotei qa loueqnu di a laŋa loueqnu.

1 Pita 2:12

Bini niŋgi sawa bei bei qaji tamo naŋgo ambleq di sosib deqa niŋgi naŋgo ŋamgalaq dia kumbra bole bole dauryoqniye. Yimqa mondoŋ tamo uŋgasari peginjrqa batiamqa naŋgi nuŋgo kumbra bole di unsibqa naŋgo yomu anjam niŋgi qa maroqneb qaji di uratosib Qotei aqa ñam soqtoqnqab.

1 Pita 2:5

Niŋgi dego tal aqa ai bul ŋambile unub. Qotei na niŋgi aqa segi tal sqa marsiq deqa aqa Mondor aqa siŋgila na niŋgi gereiŋgeqnu. Yim niŋgi aqa segi atra tamo boledamu sosib Yesus Kristus aqa ñam na nuŋgo segi jejamu Qotei atraiyoqnib a niŋgi qa tulaŋ arearetoqnqajqa deqa.

1 Pita 4:10

Qotei a niŋgi segi segi kalil qa are tulaŋ boleiyosiq wau segi segi eŋgej. Deqa niŋgi segi segi Qotei aqa wau tamo boledamu sosibqa Qotei aqa tamo uŋgasari naŋgi qa wauoqnsib aqaryainjroqniye.

1 Pita 4:16

Ariya tamo bei a Kristen tamo unu deqa a jaqatiŋ oqas a deqa jemaiyaiq. A ñam Kristen ojejunu deqa a tulaŋ areboleboleiyim Qotei aqa ñam soqtoqneme.

1 Pita 5:11

Qotei a bati gaigai siŋgila koba ti sqas. Bole.

Jut 1:25

Qotei a segi qujai Qotei bole. A gago Tamo Koba Yesus Kristus aqa wau na iga olo eleŋej. Deqa iga aqa ñam soqtoqnqom. A gago Mandor Koba siŋgila koba ti unu qaji. A na iŋgi iŋgi kalil taqatejunu. A nami degsi soqnej. A bini degsi unu. A bati gaigai degsi sqas. Bole.