1 Pita 3:18 - Yesus Aqa Anjam Bole

¹⁸ Niŋgi Kristus qa are qaloqniye. Kristus a tamo tiŋtiŋo. Ariya a na tamo uŋgasari uge uge naŋgo sawa osiq naŋgo une qa osiq moiej. A na niŋgi joqsim Qotei aqaq oqwajqa deqa osiq niŋgi qa moiej. A bati qujai qa moiej deqa a olo moiqa keresai. A tamo bulyosiqa mandamq endi soqnej. Sonaqa jeu tamo naŋgi na a qalnab moiej. Ariya a olo subq na tigelosiqa a mondor ti soqnej.

1 Pita 3:18 ပူးပေါင်းရင်းမြစ်များ

Matyu 27:19

Ariya Pailat a une pegiyo qaji awo jaramq di awesonaqa aqa ŋauqali na anjam bei pepa mutu kiñalaq di neŋgreŋyosiq Pailat aqaq qariŋyej. A endegsi neŋgreŋyej, “Yesus aqa jejamuq di une bei saiqoji. Deqa ni a kumbra uge bei yaim. Qolo e ŋeiobilqeiosim Yesus unonum. Deqa e are tulaŋ gulubekobaibqo.”

Matyu 27:24

Naŋgi Pailat degsib waiŋyosib minjnabqa a qusiqa endegsi poiyej, “Tamo uŋgasari naŋgi ijo anjam quetbqasai. E naŋgi saidnjrqai di naŋgi ŋiriŋosib qoto tigelqab.” Pailat a degsi poiyej deqa a tamo uŋgasari naŋgo ulatamuq dia ya bei tabirq di qamsiqa ya dena aqa baŋ yansosiqa minjrej, “Yesus a moiqas di nuŋgo une. Ijo une sai.”

Jon 16:10

Kumbra bole aqa utru agiende. E ijo Abu aqaq oqitqa niŋgi e olo nubqasai.

Aposel 22:14

Onaqa Ananaias na olo merbej, ‘Gago moma naŋgo Qotei a na ni giltmqo. Ni aqa areqalo dauryosim Yesus unimqa a na ni anjam bei mermim quqwajqa deqa ni giltmqo. Yesus agi kumbra tiŋtiŋ yeqnu qaji tamo.

Aposel 3:14

Yesus a Qotei aqa segi Tamo Boledamu. A une saiqoji. Ariya niŋgi na Yesus uratosib saidosib Pailat minjeb, ‘Leŋ ojo tamo Barabas tonto talq dena oqeq atsim ege.’ Niŋgi na Pailat degsib minjnabqa a nuŋgo anjam di dauryosiqa leŋ ojo tamo Barabas osiqa oqeq atsiq eŋgej.

Rom 1:4

Ariya bunuqna Qotei na a olo subq na tigeltonaqa bati deqa Qotei aqa Mondor na iga endegsi osorgej, Yesus a Qotei aqa Ŋiri siŋgila koba. O was qu, a gago Tamo Koba Yesus Kristus.

Rom 4:25

Qotei na Yesus uratonaqa naŋgi na a qalnab moiej. Yim a gago une kobotqajqa deqa. Onaqa Qotei na Yesus olo subq na tigeltosiq dena iga tamo bole une saiqoji qa mergej.

Rom 5:2

Yesus a na iga tamo uŋgasari a qa gago areqalo siŋgilateqnum qaji gam waqtetgej deqa Qotei a iga qa are tulaŋ boleiyonaqa iga eleŋej. Qotei na kumbra di iga egej deqa bini iga kumbra di osim tigelejunum. Deqa bini iga Qotei na laŋ qureq osi oqsim dia iga a ombla geregere sqajqa deqa tariŋeqnum. Iga deqa tulaŋ areboleboleigeqnaq unum.

Rom 8:11

Qotei a na aqa Ŋiri Kristus Yesus subq na olo tigeltej. Qotei aqa Mondor a nuŋgo are miligiq di unu deqa Qotei na aqa Mondor aqa siŋgila na nuŋgo jejamu moiqas qaji di dego olo subq na tigeltosim niŋgi ŋambile eŋgwas.

Rom 8:3

Dal anjam na gago une kobotqa keresai. Di kiyaqa? Iga areqalo namijq di unum deqa iga dal anjam dauryqa keresai. Ariya dal anjam na gago une kobotqa keresai deqa Qotei a segi na gago une kobotej. A gam endena gago une kobotej. A na aqa segi Ŋiri Yesus qariŋyonaqa a une tamo bulosiqa gago une kobotqa bonaqa aqa segi jejamuq di Qotei na gago une aqa awai uge atsiqa une aqa siŋgila kobotej.

2 Korin 1:24

Niŋgi Yesus qa nuŋgo areqalo siŋgilateqnub nuŋgo areqalo di iga na taqatgwajqa e deqa merŋgosai. Iga qalieonum, niŋgi nuŋgo areqalo di siŋgila na ojsib tigelejunub. O was qu, niŋgi tulaŋ areboleboleiŋgwajqa deqa iga niŋgi ti waueqnum.

2 Korin 13:4

Bole, Kristus a ŋamburbasq di gaiŋesoqnej bati deqa a siŋgila saiqoji soqnej. Ariya bini a olo Qotei aqa siŋgila na ŋambile unu. Iga Kristus beteryejunum deqa iga dego siŋgila saiqoji unum. Ariya iga Qotei aqa siŋgila na olo Kristus ombla ŋambile sqom. Iga niŋgi qa bosim siŋgila di niŋgi osorŋgwom.

2 Korin 5:21

Kristus a une yosaieqnu. Ariya Qotei na iga aqaryaigwa marsiq deqa a gago une kalil osiqa Kristus aqa qawarq di atnaqa a une tamo bulej. Iga Yesus beteryosim aqa siŋgila na iga Qotei aqa segi tamo uŋgasari tiŋtiŋ sqajqa deqa osiq gago une kalil osiqa Kristus aqa qawarq di atej.

Galesia 1:4

Kristus a gago Abu Qotei aqa areqalo dauryosiq deqa a gago une kobotqa marsiqa aqa segi ŋambile uratosiq moiej. A na iga eleŋamqa iga mandam qa kumbra uge kalil uratqajqa deqa marsiq iga qa moiej.

Galesia 3:13

Ariya dal anjam a marqo, iga dal anjam kalil torei dauryqasai di Qotei na iga tamo uge qa marsim padaltgwas. Ariya Kristus a na iga aqaryaigwa marsiq deqa a gago sawa osiqa a segi Qotei aqa ŋamgalaq di tamo uge bulosiqa iga qa padalej. Agi Qotei aqa anjam bei nami endegsib neŋgreŋyeb unu, “Tamo kalil ŋamtaŋ goge di gaiŋejunub qaji naŋgi di Qotei na tamo uge qa marsim padaltnjrqas.”

Efesus 3:12

Iga Kristus qa gago areqalo siŋgilateqnum deqa iga iŋgi bei qa ulaosaieqnum. Iga bole qalieonum, iga Qotei aqa ulatamuq di brantqajqa gam agi Kristus a segi qujai.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

Hibru 10:10

Yesus Kristus a Qotei aqa areqalo dauryosiq deqa a bati qujai qa aqa segi jejamu osiqa Qotei atraiyej. Kumbra dena a na iga Qotei aqa segi tamo uŋgasari boledamu sqa marsiq giltgej.

Hibru 9:14

Ariya Kristus aqa leŋ na wagme naŋgo leŋ tulaŋ buŋyejunu. Kristus aqa jejamuq di jiga bei saiqoji. Qotei aqa Mondor gaigai sqas qaji a na Kristus siŋgilatonaqa aqa segi jejamu ŋambile sonaqa osiqa Qotei atraiyej. Osiqa aqa leŋ na gago are miligi yansetgej. A gago jejamu segi yansetgosai. A gago une kobotetgej deqa iga qalieonum, iga Qotei aqa ŋamgalaq di une saiqoji unum. Deqa iga olo dal anjam dauryqajqa are qalqasai. Di kiyaqa? Dal anjam dena iga ŋambile sqa keresai. Ariya iga Qotei ŋambile gaigai unu qaji a qa are qaloqnsim wauetoqnqom di iga ŋambile sqom.

Hibru 9:26

A bati gargekoba degyoqnej qamu Qotei na nami mandam atej bati deqa a jaqatiŋ oqnsiq bosi bosiq agi bini a olo jaqatiŋ eqnu qamu. Ariya diŋo bati jojomqo deqa Kristus a bati qujai qa mandamq aisiq a gago une kobotqa marsiq aqa segi jejamu osiq Qotei atraiyej.

Hibru 9:28

Dego kere Kristus a bati qujai qa tamo gargekoba naŋgo une qoboiyetnjrqa marsiqa aqa segi jejamu osiq Qotei atraiyej. Ariya mondoŋ a olo laŋ qureq dena bosimqa a tamo uŋgasari naŋgo une olo kobotetnjrqasai. A bosim tamo uŋgasari a qa tariŋeqnub qaji naŋgi oqas.

Jems 5:6

Nuŋgo kumbra uge bei agiende. Tamo naŋgi kumbra bole bole yeqnab niŋgi na kamba naŋgi une ti qa minjroqnsib ñumeqnub. Yeqnab naŋgi na kamba olo niŋgi lawo kumbra eŋgeqnub. Naŋgi na niŋgi kumbra uge bei eŋgosaieqnub.

1 Pita 3:19

A mondor ti sosiqa a moio sawaq aisiq tamo nami moreŋeb qaji naŋgo mondor Qotei aqa anjam palontosiq minjroqnej.

1 Pita 4:1

Kristus a na aqa segi jejamu osiqa jaqatiŋ koba osiqa moiej. Dego kere niŋgi dego Kristus aqa areqalo di siŋgila na ojsib nuŋgo segi jejamu osib jaqatiŋ oqniye. Di kiyaqa? Tamo bei na aqa segi jejamu osim jaqatiŋ oqnqas di a une uratqas.

1 Pita 4:6

Utru deqa Kristus na aqa anjam bole palontosiq tamo uŋgasari nami moreŋeb qaji naŋgi minjroqnej. Bole, naŋgi moreŋeb. Agi tamo uŋgasari kalil une yeqnub qaji naŋgi moreŋeqnub. Ariya a na aqa anjam bole palontosiq naŋgi minjrej deqa naŋgi olo ŋambile osib Qotei bulosib mondor ti sqab.

1 Jon 1:9

Ariya iga gago segi une babtosim marqom, “Od, e une ti.” Degsi marqom di Qotei a aqa segi anjam nami marej qaji di dauryosim kumbra tiŋtiŋ na gago une kobotetgwas. Osim gago kumbra uge kalil taqal waiyimqa iga aqa ŋamgalaq di tamo bole sqom.