1 Pita 2:12 - Yesus Aqa Anjam Bole

¹² Bini niŋgi sawa bei bei qaji tamo naŋgo ambleq di sosib deqa niŋgi naŋgo ŋamgalaq dia kumbra bole bole dauryoqniye. Yimqa mondoŋ tamo uŋgasari peginjrqa batiamqa naŋgi nuŋgo kumbra bole di unsibqa naŋgo yomu anjam niŋgi qa maroqneb qaji di uratosib Qotei aqa ñam soqtoqnqab.

1 Pita 2:12 ပူးပေါင်းရင်းမြစ်များ

Matyu 10:25

Aŋgro a kobaqujaosimqa di aqa abu ombla kerekereqab. Kaŋgal tamo a powo koba osimqa di aqa tamo koba ombla kerekereqab. Jeu tamo naŋgi na tal aqa abu a ñam Belsebul waiyeqnub. Deqa iga qalieonum, naŋgi na aqa aŋgro naŋgi ñam tulaŋ ugedamu wainjrqab.”

Matyu 5:11

“Niŋgi na ijo ñam oqnsib e daurbeqnub deqa bunuqna tamo qudei naŋgi na niŋgi misiliŋgoqnsib niŋgi ugeugeiŋgoqnsib nuŋgo jejamu laŋa gisaŋyoqnqab. Di uŋgum. Niŋgi tulaŋ areboleboleiŋgeme.

Matyu 5:16

Dego kere niŋgi puloŋ bul sosibqa boleq di kumbra bole bole yoqnibqa tamo uŋgasari naŋgi na nuŋgo kumbra di unoqnsib nuŋgo Abu laŋ qureq di unu qaji aqa ñam soqtoqnqab.”

Matyu 9:8

Onaqa tamo uŋgasari kalil naŋgi Yesus aqa siŋgila di unsibqa naŋgi tulaŋ ulaosib Qotei aqa ñam soqteb. Di kiyaqa? Qotei na siŋgila kobaquja Yesus yej deqa.

Luk 1:68

“Iga gago Tamo Koba Qotei aqa ñam tulaŋ koba soqtqom. A Israel gago Qotei. Iga aqa segi tamo uŋgasari unum deqa a na bosim iga eleŋam iga padalqasai.

Luk 6:22

“Niŋgi ijo ñam oqnsib e daurbeqnub deqa bunuqna tamo qudei naŋgi na niŋgi jeutŋgoqnsib misiliŋgoqnsib nuŋgo ñam ugeugeiyoqnqab. Nami naŋgo moma naŋgi na Qotei aqa medabu o qaji tamo naŋgi degsib ugeugeinjroqneb. Dego kere bunuqna naŋgi niŋgi dego ugeugeiŋgoqnqab. Di kiyaqa? Niŋgi na e Tamo Aŋgro daurbeqnub deqa. Di uŋgum. Naŋgi niŋgi ugeugeiŋgibqa niŋgi tulaŋ areboleboleiŋgeme. Niŋgi quiye. Nuŋgo awai bole agi laŋ goge di unu. Bunuqna niŋgi oqsib awai di itqab.

Jon 13:31

Judas a oqedonaqa Yesus a endegsi marej, “Bini e Tamo Aŋgro ñam koba oqai. E ñam koba otqa dena Qotei a dego ñam koba oqas.

Aposel 15:14

Saimon a mergwo, ‘Qotei a nami sawa bei bei qaji tamo naŋgo ambleq dena aqa segi tamo uŋgasari naŋgi oqa marsiq giltnjrej.’ Saimon a iga degsi mergwo.

Aposel 24:13

Deqa anjam kalil Juda naŋgi na ijo jejamuq di qameqnub qaji di bolesai. Naŋgi ijo une bole bei ubtsib marqa keresai.

Aposel 25:7

Onaqa Juda tamo kokba Festus dauryosib beb qaji naŋgi Pol kalilyosib Festus aqa ulatamuq dia tigelosib anjam gargekoba laŋa laŋa Pol aqa jejamuq di qameleŋoqneb. Naŋgo anjam di utru saiqoji.

Aposel 28:22

Deqa ni segi na ino anjam mergim iga quqwom. Iga qalieonum, sawa sawa kalilq dia tamo uŋgasari naŋgi Yesus aqa anjam bunuj di misiliŋyeqnub.” Juda tamo kokba naŋgi na Pol degsib minjeb.

Rom 12:17

Tamo qudei naŋgi na niŋgi kumbra uge eŋgibqa niŋgi na kamba kumbra uge enjraib. Niŋgi tamo kalil naŋgo ŋamgalaq dia kumbra bole segi yoqniye.

Rom 13:13

Tamo a qanam walweleqnu dego kere iga kumbra bole tiŋtiŋ na walweloqnqom. Deqa iga diqoqnsim alaŋkobaoqnsim ya uge uyoqnsim nanarioqnqasai. Iga sambala kumbra dego yoqnqajqa are pruggoqnim kumbra uge jigat yoqnqasai. Iga laŋa laŋa ŋiriŋoqnsim tamo qudei naŋgi qa are ugegoqnqasai.

Rom 14:18

Tamo naŋgi kumbra dena Kristus aqa wau ojoqnqab di Qotei a naŋgi qa tulaŋ arearetoqnqas. Yim tamo kalil naŋgi na naŋgi unjrsib marqab, “Naŋgi tamo bole.”

Rom 15:9

Ariya Kristus a sawa bei bei qaji naŋgi qa dego wauoqnej. Di kiyaqa? Qotei a naŋgi qa dego are tulaŋ boleiyej. Aqa kumbra di naŋgi unsib aqa ñam soqtqajqa deqa Kristus a wauoqnej. Agi Qotei aqa anjam bei nami endegsib neŋgreŋyeb unu, “E sawa bei bei qaji naŋgo ambleq dia ino ñam soqtqai. E ino ñam soqtqa osiy ni qa louoqnqai.”

1 Korin 14:25

Osim aqa areqalo uge kalil aqa are miligiq di uliejunu qaji di boleq atsim siŋga pulutosim Qotei aqa ñam soqtosim niŋgi merŋgwas, “Bole, Qotei a nuŋgo ambleq di unu.”

2 Korin 1:12

O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.

2 Korin 13:7

O was qu, niŋgi kumbra uge yoqnaib deqa iga niŋgi qa Qotei pailyeqnum. Niŋgi iga nugsib iga Kristus aqa wau tamo bole degsib are qalqajqa iga deqa pailyosai. Niŋgi iga gisaŋ wau tamo degsib are qalqab di uŋgum. Gago areqalo qujai agiende. Niŋgi kumbra bole tiŋtiŋ yoqnqajqa deqa iga Qotei pailyeqnum.

2 Korin 8:21

Di kiyaqa? Iga kumbra bole segi dauryqajqa deqa. Iga Tamo Koba Qotei aqa ŋamgalaq di segi kumbra bole yqajqa are qalosai. Iga tamo uŋgasari naŋgo ŋamgalaq di dego kumbra bole yqajqa are qaleqnum.

Efesus 2:3

Nami iga kalil dego tamo naŋgi di koba na laqnem deqa iga gago areqalo namij dauryoqnem. Iga gago jejamu qa areqalo uge uge dauryosim laqnem deqa Qotei aqa minjiŋ tamo uge uge naŋgoq di unu qaji di gagoq di dego soqnej.

Efesus 4:22

Nami niŋgi dego so namijq di sosib walweloqneb. So namij dena niŋgi gisa gisaŋgeqnaqa niŋgi kumbra uge uge yqajqa are prugŋgoqnej. Nuŋgo kumbra dena niŋgi padalqa gamq di soqneb. Ariya bini niŋgi so namij di torei uratosib

Filipai 1:27

Ijo anjam kobaquja bei agiende. Niŋgi Kristus aqa anjam bole di geregere dauryosib walweloqniye. Yim e olo niŋgi qa bosiy nuŋgwai kio endi sosiy niŋgi qa anjam laŋa quqwai kio di uŋgum, e qalieqai, niŋgi siŋgila na tigeloqnsib areqalo qujai na wauoqnsib tamo uŋgasari naŋgo are tigeltetnjreqnabqa naŋgi Kristus aqa anjam bole quoqnsib naŋgo areqaloq di siŋgilateqnub.

Filipai 4:8

Ariya was qu, e anjam qujai bei unu. Anjam agiende. Niŋgi gaigai kumbra endeqa are qaloqniye. Kumbra bole ti kumbra tiŋtiŋ ti kumbra jiga saiqoji deqa ti kumbra Qotei a tulaŋ qalaqalaiyeqnu qaji deqa ti kumbra tamo naŋgi yeqnab iga unoqnsim deqa areboleboleigeqnu qaji kumbra deqa ti kalil are qaloqnsib soqniye.

1 Tesalonaika 4:12

Niŋgi kumbra bole degsib yoqnibqa niŋgi iŋgi bei qa truquiŋgoqnqasai. Deqa qala qaji tamo naŋgi nuŋgo kumbra di unsib deqa tulaŋ areboleboleinjrqas.

1 Timoti 2:2

Ni na Kristen tamo uŋgasari naŋgi minjroqnimqa naŋgi mandor kokba ti sawa taqato qaji tamo kalil naŋgi qa ti Qotei pailyoqnib a na naŋgi aqaryainjroqnqas. Yim deqa iga kalil are lawo sosim kumbra Qotei a areareteqnu qaji di dauryoqnqom.

1 Timoti 4:12

Tamo qudei naŋgi ni qa mareqnub, ni aŋgro kiñala. O Timoti, tamo naŋgi dena ino ñam ugetetmaib. Ni kumbra bole segi yoqnimqa Kristen tamo naŋgi na ni numoqnsib daurmoqnqab. Ino anjam maro na ti ino walwel na ti ni kumbra bole segi yoqne. Osim qalaqalaiyo kumbra dauryoqnsim Qotei qa ino areqalo siŋgila-toqnsim Qotei aqa ŋamgalaq di tamo bole une saiqoji soqne.

1 Timoti 5:10

Naŋgi nami wau bole bole yoqneb deqa naŋgi tamo uŋgasari naŋgo ŋamgalaq di uŋa bole. Naŋgi na naŋgo aŋgro naŋgi geregere-injroqnsib boletnjroqneb. Tamo laŋaj naŋgi naŋgo meq beqnabqa oqnsib geregereinjroqneb. Naŋgi na Kristen tamo uŋgasari naŋgo siŋga yansetnjroqneb. Tamo uŋgasari naŋgi gulube ti sonabqa naŋgi na aqaryainjroqneb. O Timoti, ni na uŋa qobul deqaji naŋgo ñam neŋgreŋyim Kristen tamo uŋgasari naŋgi na iŋgi iŋgi qa aqaryainjroqnqab.

Hibru 13:18

Niŋgi iga qa Qotei pailyoqniye. Iga qalieonum, iga Qotei aqa ŋamgalaq di are gulube saiqoji unum. Iga gaigai kumbra bole dauryqajqa are qaleqnum.

Hibru 13:5

Niŋgi silali qa mamaulŋgaiq. Niŋgi endegsib maroqniye, “Iga silali ti iŋgi ti yala eqnum di kere.” Agi Qotei na iga segi segi endegsi mergej, “E ni uratmqasai. E ni qoreimqasai dego.”

Jems 3:13

Nuŋgo ambleq di tamo qudei naŋgi areqalo bole ti powo ti unub kio? Tamo deqaji qudei naŋgi sosibqa naŋgo walwel bole yoqnebe. Naŋgi diqoqnsib naŋgo segi ñam soqtoqnaib. Naŋgi areqalo bole ti powo ti sosib kumbra bole bole yoqnebe. Yim tamo naŋgi naŋgo kumbra di unsib marqab, “Naŋgi tamo bole.”

1 Pita 2:15

Qotei aqa areqalo agiende. Niŋgi kumbra bole segi yoqnibqa nanari tamo niŋgi yomuiŋgeqnub qaji naŋgi nuŋgo kumbra bole di unsibqa naŋgo anjam uge di olo uratosib mequmesqab.

1 Pita 3:16

Ariya niŋgi anjam siŋgila na minjraib. Niŋgi lawo kumbra na ti kumbra bole na ti naŋgi anjam minjroqniye. Osib niŋgi gaigai Qotei aqa ŋamgalaq di une saiqoji soqniye. Bole, niŋgi Kristus dauryoqnib jeu tamo naŋgi nuŋgo kumbra bole di unsib deqa niŋgi anjam uge merŋgoqnsib misiliŋgoqnqab. Ariya bunuqna naŋgi naŋgo anjam deqa olo jemainjrqas.

1 Pita 4:11

Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.

2 Pita 3:11

Ariya niŋgi are qaliye. Iŋgi iŋgi kalil degsi koboqas deqa niŋgi kumbra kie dauryqajqa merŋgwai? Niŋgi kumbra endegyiye. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye.