1 Pita 2:11 - Yesus Aqa Anjam Bole

¹¹ O ijo kadoi bole, nuŋgo qure bole agi laŋ goge di unu. Deqa niŋgi mandamq endia yauŋ tamo bulosib unub. Deqa e na niŋgi endegsi merŋgwai. Niŋgi nami nuŋgo areqalo namij dauryqajqa are prugŋgoqnej. Ariya areqalo namij di nuŋgo qunuŋ ti ombla qoteqnub. Deqa niŋgi nuŋgo areqalo namij di uratosib qoreiyiye.

1 Pita 2:11 ပူးပေါင်းရင်းမြစ်များ

Luk 21:34

Osiqa Yesus a olo anjam endegsi minjrej, “Niŋgi geregere ŋam atsib soqniye. Niŋgi ya uge uyoqnsib nanarioqnqajqa are prugŋgoqnaiq. Nuŋgo segi jejamu qa iŋgi iŋgi qa areqalo kobaiyoqnaib. Niŋgi kumbra uge kalil deqaji yoqnibqa e urur mandamq aisiy niŋgi pruqtŋgo uge.

Aposel 15:20

Iga anjam qujai endegsim neŋgreŋyosim naŋgoq qariŋyqom, ‘O was qu, niŋgi na qotei gisaŋ atrainjro qaji iŋgi bei uyaib. Niŋgi sambala kumbra yaib. Wagme sil na kakoro tontnjrnab moreŋeb qaji di niŋgi uyaib. Wagme leŋ ti dego uyaib.’ Iga anjam qujai di neŋgreŋyosim sawa bei bei qaji tamo naŋgoq qariŋyqom.

Aposel 15:29

Niŋgi na qotei gisaŋ atrainjro qaji iŋgi bei uyaib. Wagme leŋ ti uyaib. Wagme sil na kakoro tontnjrnab moreŋeb qaji di uyaib. Sambala kumbra dego yaib. Niŋgi kumbra di segi dauryqab di niŋgi geregere sqab. Koboqo.” Yesus aqa tamo uŋgasari Jerusalem qureq di soqneb qaji naŋgi na anjam degsib neŋgreŋyeb.

Rom 12:1

Ariya was qu, Qotei a iga qa are tulaŋ boleiyosiq eleŋej deqa e niŋgi siŋgila na endegsi merŋgwai. Niŋgi nuŋgo segi jejamu osib Qotei atraiyiye. Osib deqa niŋgi ŋambile sosib Qotei aqa segi tamo uŋgasari tiŋtiŋ sqab. Deqa niŋgi kumbra Qotei a tulaŋ areareteqnu qaji di yoqniye. Niŋgi degyoqnqab di niŋgi Qotei aqa kumbra na bole louoqnqab.

Rom 7:23

Ariya e endegsi unonum. Une a ijo baŋq di ijo siŋgaq di ijo jejamu kalilq dia wauoqnsiqa Qotei aqa dal anjam ijo areqaloq di unu qaji di qoto iteqnu. Une di siŋgila koba. Deqa a na e tonto talq waibobuloqnsiqa ijo baŋ ti ijo siŋga ti ijo jejamu ti kalil di siŋgila na taqateqnu.

Rom 8:13

Niŋgi areqalo namij na walwelqab di niŋgi moreŋqab. Ariya niŋgi Qotei aqa Mondor aqa kumbra na walwelosib aqa siŋgila na nuŋgo segi jejamu aqa kumbra uge uge moiotqab di niŋgi ŋambile sqab.

2 Korin 5:20

Deqa iga Kristus aqa medabu osim aqa anjam marsim laqnum. Qotei a gago medabu na tamo kalil naŋgi metnjreqnu. Iga na tamo kalil naŋgi Kristus aqa anjam palontosim endegsi minjreqnum, “Niŋgi jeu kumbra uratosib Qotei ombla are qujaitosib soqniye.”

2 Korin 6:1

Iga Qotei ombla waueqnum deqa iga niŋgi siŋgila na endegsi merŋgwom, “Qotei a niŋgi qa are boleiyeqnu aqa kumbra di niŋgi osib olo laŋa urataib.”

2 Korin 7:1

O ijo was bole, iŋgi bole kalil di Qotei a nami iga egwa marej. Agi a na bini iga egeqnu. Deqa iga kumbra jigat kalil gago jejamu ti gago are miligi ti di unub qaji di torei uratekritqom. Osim dena iga Qotei aqa ŋamgalaq di une saiqoji sosim a qa ulaoqnsim gago jejamu ti gago are miligi ti torei Qotei yekritosim aqa segi kumbra boleq di sosim dauryoqnqom.

Galesia 5:24

Tamo kalil Kristus Yesus beteryejunub qaji naŋgi na naŋgo areqalo namij ti naŋgo are prugnjrqajqa kumbra ti kalil ŋamburbasq di qamnab moiej.

Efesus 2:19

Deqa bini niŋgi olo yauŋ tamo sosai. Niŋgi Qotei aqa segi tamo uŋgasari naŋgi koba na unub. Niŋgi Qotei aqa tamo tiŋtiŋ unub.

Efesus 4:1

E Pol. E Tamo Koba Yesus aqa wau ojeqnum deqa e tonto talq endi unum. Qotei na niŋgi a dauryqa osiq metŋgej deqa e na nuŋgo are tigeltetŋgitqa niŋgi kumbra a tulaŋ areareteqnu qaji di dauryosib walweloqniye.

2 Timoti 2:22

Deqa areqalo uge uge kalil aŋgro wala naŋgo are miligiq dena branteqnu qaji di ni na qoreiye. Osim ni kumbra tiŋtiŋ yqajqa wauoqnsim Qotei qa ino areqalo siŋgilatoqnsim tamo kalil naŋgi qalaqalainjroqnsim are lawo na soqne. Ni ti tamo kalil are bole na Tamo Koba Qotei qa louoqnsib aqa ñam na pailyeqnub qaji naŋgi ti kumbra di yoqniye.

Hibru 11:13

O was qu, Abel na Enok na Noa na Abraham na Sara na naŋgi kalil Qotei qa naŋgo areqalo siŋgilatesosib gilsib moreŋeb. Naŋgi mandam endia sosibqa iŋgi bole bole Qotei na nami naŋgi enjrqa minjrej qaji di naŋgi eleŋosai. Ariya naŋgi iŋgi di oqajqa tariŋesosibqa tarosib laŋ qure koqyosib isaq na iŋgi di unsib deqa areboleboleinjrej. Deqa naŋgi maroqneb, “Iga mandam endi so boleiyqasai. Iga mandamq endia yauŋ tamo bulosim sokiñala sosim bunuqna iga mandam endi uratqom.” O was qu, naŋgi anjam di marqajqa jemainjrosai.

Hibru 6:9

O gago was bole, iga na anjam siŋgila niŋgi merŋgonum. Ariya iga qalieonum, niŋgi degsib padalqasai. Qotei na niŋgi aqaryaiŋgosim oqas.

Jems 4:1

O was qu, kiyaqa niŋgi segi segi anjam na qotoqnsib ŋiriŋkobaeqnub? Utru agiende. Niŋgi nuŋgo segi jejamu qa areboleboleiŋgeqnaqa kumbra uge uge yqajqa are prugŋgeqnu. Kumbra di nuŋgo jejamu qa sarqei kalilq di siŋgila na waueqnu. Utru deqa niŋgi anjam na qotoqnsib ŋiriŋkobaeqnub.

1 Pita 1:1

E Pita. Yesus Kristus na e qariŋbej deqa e aqa anjam marsim laqnum. E na anjam endi neŋgreŋyosim niŋgi Qotei aqa segi tamo uŋgasari niŋgi qa qariŋyonum. Niŋgi nuŋgo qure utru segi segi uratosib jaraiosib sawa sawa kalil keretosib unub. Niŋgi Pontus sawa ti Galesia sawa ti Kapadosia sawa ti Esia sawa ti Bitinia sawa ti dia unub.

1 Pita 1:17

Niŋgi Qotei metoqnsib minjeqnub, “O gago Abu.” Abu di a gago ñam qa are qalsiq iga pegigosaieqnu. A gago segi segi kumbra unoqnsiq dena iga pegigeqnu. Deqa bati niŋgi mandamq endi sosibqa niŋgi endegsib maroqniye, “Mandam endi gago qure utru sai.” Degsib maroqnsib Qotei qa ulaoqnsib aqa sorgomq di geregere soqniye.

1 Pita 4:12

O ijo was bole, gulube kobaquja bei ŋamyuo bulosiq niŋgi qa beqnu. Ariya niŋgi deqa tulaŋ prugosib endegsib are qalaib, “Gulube deqaji nami gagoq di brantosaioqnej.” Niŋgi degsib are qalaib. Qotei a nuŋgo areqalo tenemtqa osiq deqa gulube di qariŋyqoqa niŋgi qa bqo.

1 Pita 4:2

Deqa a mandamq endia jejamu korbi sosimqa a aqa areqalo namij olo dauryqasai. A Qotei aqa areqalo segi dauryoqnqas.

2 Pita 3:1

O ijo was bole, e nami anjam neŋgreŋyosim niŋgi qa qariŋyem agi bini olo anjam qariŋyonum. E nuŋgo are tigeltetŋgitqa niŋgi iŋgi bole bole mondoŋ brantqas qaji deqa olo are qalqajqa deqa osim neŋgreŋyonum. Nami Qotei aqa medabu o qaji tamo naŋgi iŋgi deqa anjam palontoqnsib laqneb. Tamo Koba Yesus agi iga eleŋej qaji aqa dal anjam qa dego niŋgi are qalqajqa deqa e anjam endi neŋgreŋyonum. Dal anjam di Yesus aqa wau tamo naŋgi nami niŋgi qa bosib palontosib niŋgi merŋgeqnab quoqneb.