1 Pita 1:3 - Yesus Aqa Anjam Bole

³ Iga gago Tamo Koba Yesus Kristus aqa Abu Qotei aqa ñam soqtoqnqom. Qotei a iga qa tulaŋ dulosiqa Yesus Kristus olo subq na tigeltej. Gam dena Qotei na iga ŋambile bunuj egej. Ŋambile bunuj dena iga siŋgilatgejunu deqa iga iŋgi bole bole Qotei na mondoŋ egwas qaji deqa tariŋoqnsim unum.

1 Pita 1:3 ပူးပေါင်းရင်းမြစ်များ

Jon 1:13

Naŋgo meani na ŋambabtnjro qaji dena naŋgi Qotei aqa aŋgro brantosai. Naŋgo segi areqalo na naŋgi Qotei aqa aŋgro brantosai. Tamo bei aqa areqalo na dego naŋgi Qotei aqa aŋgro brantosai. Qotei a segi na marej deqa naŋgi aqa aŋgro tiŋtiŋ branteb.

Rom 12:12

Mondoŋ Tamo Koba Qotei na niŋgi laŋ qureq osi oqwas. Niŋgi deq oqwajqa tariŋoqnsib areboleboleiŋgoqneme. Osib gulube niŋgi qa boqnimqa siŋgila na tigeloqnsib qoboiyoqniye. Osib gaigai Qotei pailyoqniye.

Rom 15:13

O was qu, Qotei a nami iŋgi bole bole di iga egwajqa marej deqa iga bini tariŋoqnsim unum. Niŋgi a qa nuŋgo areqalo siŋgilateqnub deqa a na nuŋgo are boletetŋgimqa niŋgi tulaŋ areboleboleiŋgim lawo na sqab. Yim Qotei aqa Mondor na niŋgi siŋgilatŋgimqa niŋgi iŋgi bole bole a na eŋgwa marej qaji deqa tariŋoqnsib sqab.

Rom 4:25

Qotei na Yesus uratonaqa naŋgi na a qalnab moiej. Yim a gago une kobotqajqa deqa. Onaqa Qotei na Yesus olo subq na tigeltosiq dena iga tamo bole une saiqoji qa mergej.

Rom 5:10

Iga Qotei ti jeu sonamqa aqa Ŋiri a jeu kobotqa marsiq moiej. Deqa aqa wau dena iga bini Qotei ombla geregere unum. Ariya Qotei aqa Ŋiri a olo ŋambile unu. Deqa iga bole qalieonum, aqa ŋambile dena Qotei na iga olo oqas.

Rom 8:11

Qotei a na aqa Ŋiri Kristus Yesus subq na olo tigeltej. Qotei aqa Mondor a nuŋgo are miligiq di unu deqa Qotei na aqa Mondor aqa siŋgila na nuŋgo jejamu moiqas qaji di dego olo subq na tigeltosim niŋgi ŋambile eŋgwas.

Rom 8:24

Qotei na iga eleŋej deqa bini iga Qotei qa gago areqalo siŋgilatosim a na iga jejamu bunuj egwajqa deqa tariŋoqnsim unum. Iga mareqnum, iga iŋgi deqa tariŋeqnum. Di kiyaqa? Iga iŋgi di osaiunum deqa. Ariya tamo bei a iŋgi bei osimqa a kiyaqa iŋgi deqa olo tariŋqas?

1 Korin 13:13

Iga Qotei qa gago areqalo siŋgilateqnum kumbra di a gaigai sqas. Qotei na iga oqajqa deqa iga tariŋoqnsim unum kumbra di dego gaigai sqas. Qalaqalaiyo kumbra di dego gaigai sqas. Ariya qalaqalaiyo kumbra di tulaŋ bolequja. Qalaqalaiyo kumbra dena kumbra kalil tulaŋ buŋnjrejunu.

1 Korin 15:20

Ariya iga degsi sqasai. Kristus a moinaqa Qotei na a olo subq na tigeltej. A tamo kalil nami moreŋeb qaji naŋgi qa namoosiq subq na tigelej.

2 Korin 1:3

Iga gago Tamo Koba Yesus Kristus aqa Abu Qotei aqa ñam soqtoqnqom. A gago Abu deqa a iga qa are tulaŋ boleiyeqnu. A iga qa dulqajqa utru. A tamo kalil gulube ti unub qaji naŋgo are latetnjro qaji Qotei.

Galesia 6:16

Tamo kalil areqalo di ojsib dauryeqnub qaji naŋgi qa Qotei a tulaŋ are boleiyoqnsim sqas. Osim naŋgo are latetnjroqnqas. Tamo naŋgi di Qotei aqa tamo bole. Naŋgi Israel tamo tiŋtiŋ.

Efesus 1:17

A gago Tamo Koba Yesus Kristus aqa Qotei. A gago Abu riaŋ koba ti siŋgila ti unu qaji. Deqa e niŋgi qa endegsi pailyeqnum, “O Abu, ni na Efesus naŋgi areqalo bole enjrimqa naŋgi ino anjam aqa utru geregere poinjrim ni qa bole qalieoqnqab.”

Efesus 1:3

Iga Qotei aqa ñam soqtoqnqom. A gago Tamo Koba Yesus Kristus aqa Abu Qotei. A Kristus aqa wau na laŋ qaji iŋgi bole bole iga egej. A gago qunuŋ qa are qalsiq deqa iŋgi di iga egej.

Efesus 1:7

Qotei a iga qa are boleiyej aqa kumbra di tulaŋ kobaquja. Aqa kumbra di aqa utru agiende. A na Kristus qariŋyonaqa a iga awaigwa marsiqa moiej. Moisiqa aqa leŋ aiej dena Qotei na gago une kalil kobotetgej.

Efesus 2:4

Bole, iga une yoqnsim laqnem deqa iga moreŋesoqnem. Iga moio tamo bulem. Ariya bati deqa Qotei a iga qa are tulaŋ boleiyosiq qalaqalaigej deqa a na iga Kristus ombla ŋambile egej. A iga qa are boleiyej aqa kumbra dena qujai a na iga eleŋej.

Efesus 3:20

Qotei aqa siŋgila a gago are miligiq di waueqnu. Aqa siŋgila dena gago areqalo kalil tulaŋ buŋyejunu. Gago pail kalil dego aqa siŋgila de ti keresai. A na tulaŋ buŋyejunu.

Kolosi 1:23

Ariya une bei na niŋgi titŋgimqa Kristus aqa anjam bole niŋgi nami queb qaji di nuŋgo areqaloq di olo siŋgilatqa urataib deqa niŋgi nuŋgo areqalo Yesus qa bole siŋgilatoqnsib siŋgila na tigelesoqniye. E Pol. E Yesus aqa wau tamo deqa e anjam bole di tamo uŋgasari kalil mandamq endi unub qaji naŋgi minjroqnsim laqnum.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

1 Tesalonaika 1:3

Niŋgi Kristus qa nuŋgo areqalo siŋgilateqnub deqa niŋgi kumbra bole bole yeqnub. Agi niŋgi na tamo kalil naŋgi tulaŋ qalaqalainjroqnsib naŋgi qa wau bole yeqnub. Mondoŋ gago Tamo Koba Yesus Kristus a olo bqas anjam di niŋgi nuŋgo are miligiq di siŋgilatoqnsib a qa tariŋeqnub. Iga nuŋgo kumbra deqa are qaloqnsim deqa iga nuŋgo ñam maroqnsim gago Abu Qotei biŋiyeqnum.

1 Tesalonaika 4:13

Ariya was qu, tamo uŋgasari nami moreŋeb qaji naŋgi mondoŋ kumbra kie turqab di niŋgi qalieqajqa deqa merŋgwom. Tamo uŋgasari Qotei qaliesai qaji naŋgi subq na tigelqa bati qa tariŋosaieqnub. Deqa naŋgo was bei a moiqas di naŋgi tulaŋ are ugeinjrqas. Ariya niŋgi degsib tulaŋ are ugeiŋgaim deqa anjam endi merŋgwom.

2 Tesalonaika 2:16

Gago Tamo Koba Yesus Kristus wo gago Abu Qotei wo naŋgi aiyel na iga tulaŋ qalaqalaigeqnub. Qotei a iga qa are boleiyoqnsiq deqa a gaigai gago are boletetgeqnu. Osiqa a na iga siŋgilatgeqnu. Deqa mondoŋ a na iga boletgwajqa deqa iga tariŋoqnsim unum.

1 Timoti 1:14

Osiqa a e qa are tulaŋ boleiyosiq ijo are tigeltetbej deqa bini e gago Tamo Koba Kristus Yesus qa ijo areqalo siŋgilatoqnsimqa tamo uŋgasari naŋgi qalaqalainjreqnum.

Taitus 2:13

Osim iŋgi tulaŋ boledamu iga mondoŋ oqom qaji di unqajqa areboleboleigoqnimqa tariŋoqnsim sqom. Yesus Kristus a segi Qotei. A siŋgila koba. A na iga eleŋej. Mondoŋ a wala bole ti riaŋ koba ti Qotei aqa siŋgila ti di osim laŋ qureq dena bqas. Iga di unqajqa tariŋoqnsim unum.

Hibru 3:6

Ariya Kristus a Qotei aqa Ŋiri. Deqa Qotei na a wau yonaqa a na Qotei aqa tamo uŋgasari naŋgi taqatnjroqnej. Tamo uŋgasari naŋgi di Qotei aqa tal bul. Kristus a Qotei aqa anjam geregere dauryoqnsiq wau di yoqnej. Deqa iga gaigai Kristus qa gago areqalo siŋgilatoqnsim a olo bqajqa deqa tariŋoqnsim sqom. Iga degyqom di iga dego Qotei aqa tal bul sqom.

Jems 1:18

A aqa segi areqalo na iga gereigej. Deqa a gago Abu. A aqa segi anjam bole na iga gereigej. Yim iga na iŋgi iŋgi kalil a gereinjrej qaji di buŋnjrsim naŋgo namoq di sqajqa deqa.

1 Pita 1:13

Deqa niŋgi gaigai ijo anjam di dauryqajqa are qaloqnsib nuŋgo walwel geregere taqatosib soqniye. Sosib Yesus Kristus qa nuŋgo areqalo siŋgilatoqnsibqa mondoŋ a olo laŋ qureq dena brantosim kumbra tulaŋ boledamu niŋgi eŋgwajqa deqa tariŋoqnsib soqniye.

1 Pita 1:21

Kristus a na niŋgi aqaryaiŋgej deqa niŋgi Qotei qa nuŋgo areqalo siŋgilatosib unub. Kristus agi moinaqa Qotei na olo subq na tigeltosiqa metonaq a laŋ qureq oqsiq dia ñam kobaquja ej. Utru deqa niŋgi Qotei qa nuŋgo areqalo siŋgilatoqnsib anjam a nami marej qaji di aqa damu brantqajqa deqa tariŋoqnsib unub.

1 Pita 1:23

Niŋgi iŋgi meli bunuj bulosib ŋambile bunuj eb. Iŋgi meli ugeqas qaji dena niŋgi ŋambile osai. Iŋgi meli gaigai sqas qaji dena niŋgi ŋambile eb. Iŋgi meli bunuj di Qotei aqa anjam. Anjam di ŋambile ti. A gaigai sqas.

1 Pita 2:2

Iga qalie, aŋgro mom naŋgi muŋgum qaq uyqajqa qarnjreqnu. Dego kere niŋgi muŋgum qaq boledamu Qotei aqaq dena beqnu qaji di oqajqa are qaloqniye. Muŋgum qaq di agi Qotei aqa anjam. Muŋgum qaq di jiga bei saiqoji. Muŋgum qaq dena nuŋgo qunuŋ aqaryaiyimqa niŋgi tulaŋ boleosib siŋgilaqab. Yim Qotei na niŋgi oqas.

1 Pita 3:15

Niŋgi nuŋgo are miligiq di Kristus atsib sosibqa a segi qujai nuŋgo Tamo Koba degsib are qaloqniye. Yimqa tamo qudei naŋgi nuŋgo kumbra di unsib endegsib nenemŋgoqnqab, “Niŋgi iŋgi bole kie qa tariŋoqnsib deqa niŋgi tulaŋ areboleboleiŋgeqnu?” Degsib nenemŋgoqnibqa niŋgi na kamba olo naŋgi anjam minjrqajqa gam gereiysib soqniye. O was qu, niŋgi bati gaigai degyoqniye.

1 Pita 3:21

Dego kere niŋgi ya na yanso eb deqa Qotei a niŋgi dego eleŋej. A ya dena nuŋgo jejamu qaji jiga di yansetŋgosai. Niŋgi yanso eb bati deqa niŋgi Qotei pailyonab a na nuŋgo are miligi qaji jiga yansetŋgej. Qotei na Yesus Kristus olo subq na tigeltej gam dena a na niŋgi eleŋej.

1 Pita 3:5

Agi Qotei aqa uŋgasari nami soqneb qaji naŋgi naŋgo are miligi degsib walatoqneb. Osib naŋgo segi jejamu Qotei yekritosib a qa tariŋoqneb. Osib naŋgo tamo naŋgo sorgomq di soqneb.

1 Jon 2:29

Niŋgi qalie, Kristus aqa kumbra kalil tiŋtiŋo. Deqa niŋgi endegsib qalieoiye. Tamo kalil kumbra tiŋtiŋ yeqnub qaji naŋgi Qotei aqa segi aŋgro bole tiŋtiŋ unub.

1 Jon 3:3

Tamo kalil Kristus qa tariŋeqnub qaji naŋgo kumbra dena naŋgi naŋgo segi une olo uratoqnsib Qotei aqa ŋamgalaq di jiga saiqoji unub. Agi Kristus a segi jiga saiqoji unu dego kere.

1 Jon 3:9

Qotei na tamo bei ŋambabtqas di a une atoqnqasai. Qotei aqa segi ŋambile aqaq di unu deqa a une atoqnqa keresai. Di kiyaqa? A Qotei aqa segi aŋgro tiŋtiŋ unu deqa.

1 Jon 4:7

O ijo kadoi bole, Qotei a qalaqalaiyo kumbra qa utru. Deqa iga gago Kristen was naŋgi qalaqalainjroqnqom. Tamo a qalaqalaiyo kumbra dauryqas di a Qotei aqa aŋgro tiŋtiŋ sqas. Osim a Qotei qa bole qalieqas.

1 Jon 5:1

Yesus a segi Kristus. Tamo kalil degsib maroqnsib Yesus qa naŋgo areqalo siŋgilateqnub qaji naŋgi Qotei aqa aŋgro tiŋtiŋ unub. Tamo kalil Abu Qotei qalaqalaiyeqnub qaji naŋgi na aqa aŋgro naŋgi dego qalaqalainjreqnub.

1 Jon 5:18

Iga qalie, tamo kalil Qotei aqa aŋgro tiŋtiŋ unub qaji naŋgi une atosaieqnub. Tamo kalil Qotei aqa aŋgro tiŋtiŋ unub qaji naŋgi Qotei na geregere taqatnjreqnu deqa tamo uge Satan a na naŋgi ugeugeinjrqa keresai.

1 Jon 5:4

Tamo kalil Qotei aqa aŋgro tiŋtiŋ unub qaji naŋgi mandam endeqa siŋgila gotraŋyoqnsib siŋgila na tigelejunub. Iga Qotei qa gago areqalo siŋgilateqnum deqa iga qoto qa siŋgilaoqnsim mandam endeqa siŋgila gotraŋyeqnum.