1 Pita 1:20 - Yesus Aqa Anjam Bole

²⁰ Tulaŋ nami Qotei a mandam atosaisosiqa a Kristus qa qalieosiqa a giltej. Kristus na niŋgi awaiŋgwajqa deqa marsiq a giltej. Ariya bini bati endeqa diŋo bati jojomqo deqa Qotei a niŋgi qa osiqa Kristus qariŋyonaq bej.

1 Pita 1:20 ပူးပေါင်းရင်းမြစ်များ

Matyu 25:34

Osiyqa tamo bole ijo baŋ woq di unub qaji naŋgi endegsi minjrqai, ‘Ijo Abu a niŋgi qa tulaŋ areboleboleiyqo. Nami a mandam atej bati deqa a nuŋgo Mandor Koba sosim niŋgi taqatŋgwajqa marej. Deqa niŋgi ijoq boiye. Babqa ijo Abu a nuŋgo Mandor Koba sosim niŋgi taqatŋgwas.

Aposel 2:23

Qotei na tamo di osiq nuŋgo baŋq di atej. A nami kumbra degyqa are qalsiq deqa anjam keretej. Onaqa niŋgi na Yesus osib tamo uge naŋgo baŋq di atnabqa naŋgi na osib ŋamburbasq di qalnab moiej. Nuŋgo kumbra dena niŋgi segi na Yesus qalsib moioteb.

Rom 3:25

Agi Qotei a endegsi are qalej. A na Yesus qariŋyim a bosim moiim aqa leŋ aisim tamo uŋgasari kalil a qa naŋgo areqalo siŋgilateqnub qaji naŋgo une taqal waiysim aqa minjiŋ kobotqas. Kumbra dena a na iga tamo bole une saiqoji qa mergej. Aqa kumbra di a na iga osorgej. Nami Qotei a tamo naŋgi are bulyqajqa deqa marsiq naŋgi qa tariŋoqnsiqa naŋgo une qa urur kambatnjrosaioqnej.

Rom 8:29

Tamo naŋgi Qotei na nami oqa marej qaji naŋgi di a na giltnjrej dego. Yim naŋgi aqa Aŋgro Yesus a bulosib aqa segi kumbra bole dauryqajqa deqa. Gam dena Qotei aqa aŋgro gargekoba naŋgi brantoqnib Kristus a naŋgo was matu sqas.

Galesia 4:4

Ariya bati Qotei a nami atej qaji di brantonaqa a na aqa Ŋiri Yesus qariŋyonaq mandamq aiej. Aisiq aqa ai na ŋambabtonaqa a tamo brantosiqa dal anjam aqa sorgomq di soqnej.

Efesus 1:10

Deqa a kumbra endegyqas. A na iŋgi iŋgi kalil mandam ti laŋ ti di unub qaji naŋgi taqatnjroqnsim gilsi gilsim bati a nami atej qaji di brantimqa a na iŋgi iŋgi kalil di olo osim Kristus aqa baŋq di atim a naŋgo gate sqas.

Efesus 1:4

Tulaŋ nami Qotei a mandam atosaisosiqa a na iga Kristus beteryqajqa marsiq giltgej. Yim iga aqa segi kumbra boleq di sosim aqa ŋamgalaq di une saiqoji sqajqa deqa.

Efesus 3:11

Tulaŋ nami Qotei a kumbra bole di iga egwajqa are qalej. Ariya bini a gago Tamo Koba Kristus Yesus aqa wau na kumbra di agi iga egej.

Efesus 3:9

Niŋgi qalie, Qotei a na iŋgi iŋgi kalil ateleŋej unub. Ariya kumbra bole kalil a na iga egwajqa nami aqa areqaloq di soqnej qaji di a ulitosiq soqnej. Ariya bini e na aqa areqalo di olo boleq atqajqa deqa marsiq e wau ebej.

Kolosi 1:26

Tulaŋ nami Qotei aqa anjam di ulitesoqnej. Deqa tamo uŋgasari kalil naŋgi aqa anjam di qalieosaisoqneb. Uliesosiq bosi bosiq ariya bini Qotei na aqa anjam di olo boleq atnaqa aqa segi tamo uŋgasari naŋgi qusib poinjrej.

1 Timoti 3:16

Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

Hibru 1:2

Ariya bini bati endi diŋo bati jojomqo deqa Qotei na aqa Ŋiri Yesus aqa medabu na iga anjam mergeqnu. Qotei na aqa Ŋiri Yesus giltej deqa a na iŋgi iŋgi kalil oqas. Aqa baŋ na Qotei na mandam atej unu.

Hibru 2:14

Yesus aqa aŋgro naŋgi di mandam tamo. Deqa Yesus a naŋgi bulosiqa a dego mandam tamo bulyosiq moiej. A Satan aqa siŋgila kobotqa marsiq deqa moiej. Satan a moio qa utru. A na tamo uŋgasari naŋgi moiotnjreqnu.

Hibru 9:26

A bati gargekoba degyoqnej qamu Qotei na nami mandam atej bati deqa a jaqatiŋ oqnsiq bosi bosiq agi bini a olo jaqatiŋ eqnu qamu. Ariya diŋo bati jojomqo deqa Kristus a bati qujai qa mandamq aisiq a gago une kobotqa marsiq aqa segi jejamu osiq Qotei atraiyej.

1 Pita 1:2

Tulaŋ nami Qotei Abu a niŋgi qa qalieosiq deqa niŋgi aqa segi tamo uŋgasari sqa marsiqa niŋgi giltŋgej. Qotei aqa Mondor Bole a na niŋgi Qotei aqa segi kumbra boleq di atimqa niŋgi nuŋgo jejamu Qotei yekritosib Yesus Kristus aqa anjam geregere dauryosib sqajqa deqa osiqa niŋgi aqaryaiŋgej. Yim Yesus aqa leŋ na niŋgi yansŋgimqa niŋgi Qotei aqa ŋamgalaq di une saiqoji sqajqa deqa. Qotei a niŋgi qa are tulaŋ boleiyimqa niŋgi geregere lawo na soqniye.

1 Jon 1:2

Ŋambile di boleq donaqa iga unem. Iga ŋambile deqa mare mare laqnum. Ŋambile di gaigai sqas. Nami ŋambile di aqa Abu wo sosiqa boleq donaqa iga unem. Deqa iga a qa niŋgi merŋgeqnum.

1 Jon 3:5

Niŋgi qalie, Kristus a gago une kobotqa bej. A segi une saiqoji.

1 Jon 3:8

Satan a nami une atsiq boqnej agi bini degsi unu. Deqa tamo a une atoqnqas di a Satan aqa tamo sqas. Ariya Qotei aqa Ŋiri a Satan aqa wau kobotqa bej.

Uli Anjam 13:8

Deqa tamo uŋgasari kalil mandamq endi unub qaji naŋgi na wagme juwaŋ di biŋiyoqnsib aqa ñam tulaŋ koba soqtoqneb. Tamo uŋgasari naŋgi di Qotei a nami mandam atosaisosiqa naŋgi ŋambile gaigai sqajqa saidosiq ŋambile qa buk miligiq di naŋgo ñam neŋgreŋyosai. Buk di agi Kaja Du nami qalnab moiej qaji aqa segi buk.