1 Korin 9:5 - Yesus Aqa Anjam Bole

⁵ Iga uŋa oqa are soqnim Kristen uŋa osim laqnqa kere e? Agi Tamo Koba Yesus aqa wau tamo qudei naŋgi ti aqa was naŋgi ti Pita ombla na uŋa oqnsib laqnub.

1 Korin 9:5 ပူးပေါင်းရင်းမြစ်များ

Matyu 13:55

Iga qalie, aqa siqali a laŋa tal gereiyo qaji tamo. Aqa aniqali Maria. A Jems na Josep na Saimon na Judas na naŋgo was.

Matyu 8:14

Onaqa Yesus a Pita aqa tal gogetosiqa Pita aqa mimibe makobaiyonaqa jejamu kaŋkaŋyonaq bijalq di ŋeiesonaq unej.

Mak 1:30

Tal gogetosibqa Saimon aqa mimibe makobaiyonaq jejamu tulaŋ kaŋkaŋyonaqa ŋeiesonaq uneb. Deqa Yesus aqa aŋgro naŋgi na Yesus minjeb, “Ni na uŋa di boletqa kere e?” Onaqa minjrej, “Od, e na boletqa kere.”

Mak 6:3

Iga qalie, a laŋa tal gereiyo qaji tamo. A Maria aqa ŋiri. A Jems na Joses na Judas na Saimon na naŋgo was. Aqa nawi kalil naŋgi agi iga koba na endi unum.” Naŋgi degsib yomu anjam marsib Yesus qa ugeeb.

Luk 6:15

Ariya Matyu wo Tomas wo. Bei Alfias aqa ŋiri Jems. Bei Saimon agi Rom naŋgi winjrqajqa maroqnej qaji.

Jon 1:42

Degsi minjsiqa Saimon osiq Yesus aqa areq osi gilej. Onaqa Yesus na Saimon unsiqa minjej, “Ni Saimon, Jon aqa ŋiri. Bunuqna ino ñam Sifas mermoqnqab.” Ñam “Sifas” di Hibru anjam. Gago anjam, “Pita.” Aqa damu, “Meniŋ.”

Jon 2:12

Ariya uŋa baŋ ojo bati di koboonaqa Yesus aqa aube naŋgi ti aqa aŋgro naŋgi ti aqa aniqali koba na Kana qure uratosib Kaperneam qureq aieb. Aisib dia bati qudei soqneb.

Aposel 1:14

Naŋgi ti uŋgasari qudei ti Yesus aqa was naŋgi ti aqa aniqali Maria dego naŋgi koba na gaigai warum dia korooqnsibqa are qujaitoqnsib Qotei pailyoqneb.

Rom 16:1

Niŋgi gago jaja Fibi osib geregereiyiye. A na Kristen tamo uŋgasari Senkria qureq di unub qaji naŋgi qa waueqnu.

1 Korin 1:12

O was qu, niŋgi segi segi anjam na qoteqnub qaji nuŋgo utru agiende. Niŋgi qudei mareqnub, “E Pol dauryo qaji tamo.” Niŋgi qudei mareqnub, “E Apolos dauryo qaji tamo.” Niŋgi qudei mareqnub, “E Pita dauryo qaji tamo.” Ariya niŋgi qudei mareqnub, “E Kristus dauryo qaji tamo.” Niŋgi anjam na qoteqnub qaji nuŋgo utru agide.

1 Korin 7:15

Ariya Kristen tamo bei aqa uŋa a Yesus qa aqa areqalo siŋgilatosai. Deqa uŋa dena tamo di uratqa marsim uratem. Tamo a deqa une saiqoji. A uratqasai di a tonto talq di sobulqas. Kristen uŋa dego aqa tamo a Yesus qa aqa areqalo siŋgilatosai. Deqa tamo dena uŋa di uratqa marsim uratem. A dego une saiqoji. A uratqasai di a tonto talq di sobulqas. Qotei a niŋgi nuŋgo Kristen was qu naŋgi koba na geregere sqajqa metŋgeqnu. Deqa niŋgi ijo anjam di dauryiye.

1 Korin 7:39

Uŋa bei aqa tamo a moiosaisoqnimqa uŋa dena tamo di uratqa keresai. Ariya a moiimqa di a olo tamo bei oqa osim em. Ariya a na Kristen tamo segi olo em.

1 Korin 7:7

E are qalonum, tamo kalil naŋgi e bul laŋa sqab di bole. Ariya Qotei na tamo naŋgi siŋgila segi segi enjreqnu. A na tamo qudei naŋgi siŋgila bei enjreqnu. Osiqa olo tamo qudei naŋgi siŋgila bei enjreqnu.

1 Korin 7:8

Ariya tamo uŋgasari uŋa ti tamo ti sosai qaji naŋgi e na anjam endegsi minjrqai. Uŋa qobul naŋgi dego e na anjam endegsi minjrqai. Niŋgi e bul laŋa sqab di bolequja.

Galesia 1:19

E Jerusalem di soqnem bati di e Yesus aqa anjam maro tamo bei unosai. E Tamo Koba Yesus aqa aube Jems a segi unem.

1 Timoti 3:2

Deqa ni unime. Tamo bei a Kristen naŋgo gate sqajqa marsimqa a kumbra tiŋtiŋ segi dauryoqnem. Yim tamo naŋgi aqa jejamuq di une bei unqasai. Tamo di a uŋa aiyeltaiq. A uŋa qujai segi esoqnem. Osim aqa segi so geregere taqatosim areqalo bole ti sosim kumbra bole bole yoqnem. Tamo laŋaj naŋgi aqa meq boqnibqa oqnsim geregereinjroqnem. A Qotei aqa anjam palontqajqa wau geregere poiyim anjam palontoqnem.

1 Timoti 4:3

Tamo naŋgi di anjam uge endegsib tamo uŋgasari naŋgi minjroqnqab, “Niŋgi uŋataib. Niŋgi tamotaib. Niŋgi damu uyaib. Di getento kalil.” O Timoti, anjam di gisaŋ. Qotei a na iŋgi iŋgi kalil ateleŋej. Deqa iga a qa gago areqalo siŋgilateqnum qaji iga iŋgi iŋgi kalil di oqa marsim Qotei biŋiyosim oqom. Iga Qotei aqa anjam bole qalieonum deqa iga iŋgi di oqom.

1 Timoti 5:2

Uŋa qeli naŋgi dego tingitnjrqa osimqa naŋgi ino ai bul lawo na tingitnjroqne. Duŋgeŋge naŋgi dego tingitnjrqa osimqa naŋgi ino jaja bul lawo na tingitnjroqne. Ni Qotei aqa ŋamgalaq di kumbra bole na duŋgeŋge naŋgi tingitnjroqne.

Taitus 1:6

Deqa ni unime. Ni tamo bei a gate atqa osimqa a peleiyosim aqa kumbra kalil unsim di ni a gate ate. Tamo di a tamo uŋgasari kalil naŋgo ŋamgalaq di une saiqoji soqnem. A uŋa aiyeltaiq. Aqa aŋgro naŋgi Kristus qa naŋgo areqalo siŋgilatosib soqneb. Naŋgi kumbra uge uge yoqnaib. Naŋgi diqoqnsib naŋgo ai wo abu wo naŋgo anjam gotraŋyoqnaib.

Hibru 13:4

Tamo a uŋatqajqa di kumbra bole. Uŋa a tamotqajqa di dego kumbra bole. Deqa niŋgi kumbra di ugetaib. Niŋgi kumbra di geregere taqatosib dena niŋgi Qotei aqa ŋamgalaq di jiga saiqoji sqab. Niŋgi qalie, tamo uŋgasari sambala kumbra yeqnub qaji naŋgi Qotei na awai uge enjrqas.