1 Korin 9:17 - Yesus Aqa Anjam Bole

¹⁷ E ijo segi areqalo na Yesus aqa anjam marsim laqnum qamu e dena awai eqnum qamu. Ariya e ijo segi areqalo na wau di yosaieqnum. Qotei na wau ebej deqa e wau di yoqnsim laqnum.

1 Korin 9:17 ပူးပေါင်းရင်းမြစ်များ

Matyu 10:41

Tamo bei a endegsi are qalqas, ‘Tamo di a Qotei aqa medabu o qaji tamo bei. Deqa e na a aqaryaiyqai.’ A degsi are qalsimqa tamo di osim aqa talq di gereiyqas di Qotei na kamba awai bole a yqas. Di kiyaqa? A Qotei aqa medabu o qaji tamo gereiyqo deqa. Tamo bei a endegsi are qalqas, ‘Tamo di a Qotei aqa anjam dauryeqnu qaji tamo bole. Deqa e na a aqaryaiyqai.’ A degsi are qalsimqa tamo di osim aqa talq di gereiyqas di Qotei na kamba awai bole yqas. Di kiyaqa? A na Qotei aqa anjam dauryeqnu qaji tamo bole gereiyqo deqa.

Matyu 24:25

“Niŋgi quiye. Kumbra kalil di brantosaisonaqa agi e namoqna merŋgonum.

Luk 12:42

Onaqa Tamo Koba Yesus na minjej, “Wau tamo yai a areqalo bole ti sosiqa gaigai wau bole yeqnu? Wau tamo di tal lanja a na minjeqnu, ‘Ni na ijo wau tamo kalil naŋgi geregere taqatnjroqnsimqa naŋgo iŋgi uyqajqa batioqnimqa iŋgi anainjroqnsim soqne.’ Tamo di a wau tamo bole. Deqa tal lanja na a degsi minjqas.

Jon 4:36

Tamo naŋgi iŋgi meli gentoqnsib koroiyoqnsib awai eqnub. Naŋgo awai agiende. Naŋgi ŋambile gaigai sqab. Deqa tamo naŋgi iŋgi yageqnub qaji ti tamo naŋgi iŋgi meli genteqnub qaji ti koba na areboleboleinjrqas.

1 Korin 3:14

Tamo qudei naŋgo tal ateb qaji di ŋamyuo na yugwasai di naŋgi awai bole oqab.

1 Korin 3:8

Tamo a iŋgi yageqnu qaji wo tamo a wau taqateqnu qaji wo naŋgi aiyel ombla Qotei aqa wau ojeqnub. Ariya mondoŋ Qotei a na naŋgo wau segi segi pegiyosim awai enjrqas.

1 Korin 4:1

O was qu, aqo Apolos wo Kristus aqa wau tamo. Iga Qotei aqa uli anjam taqatejunum. Niŋgi iga qa degsib are qaliye.

1 Korin 9:16

E Yesus aqa anjam bole marsim laqnum ijo wau deqa e ijo segi ñam soqtqa keresai. Qotei na e wau ebej deqa e wau di yoqnqai. E uratqa keresai. Uratqai di Qotei na e gulube ebqas.

1 Korin 9:18

Deqa e awai kie oqai? Ijo awai agiende. E Yesus aqa anjam bole maroqnsiy dena silali oqnqasai. Ijo awai bole agide. Bole, e silali oqa kere. Ariya e oqa uratem. E tamo uŋgasari naŋgi Qotei aqa anjam qa laŋa aqaryainjroqnqai. Ijo awai bole agide.

2 Korin 8:12

Niŋgi silali koroiyqa are soqnim niŋgi koroiyiye. Yim Qotei a niŋgi qa tulaŋ areboleboleiyqas. Niŋgi silali saiamqa di uŋgum. Koroiyaib. Qotei a deqa ŋiriŋqasai. Niŋgi silali soqnim di niŋgi koroiyiye.

Galesia 2:7

Pita aqa wau agiende. A Juda naŋgo ambleq di wauoqnsiqa Kristus aqa anjam bole naŋgi minjre minjre laqnu. Qotei na wau di Pita yej. Dego kere e dego wau ti. Ijo wau agi e na tamo uŋgasari sawa bei beiq di unub qaji naŋgo ambleq di wauoqnsimqa Kristus aqa anjam bole naŋgi minjre minjre laqnum. Wau di Qotei na e ebej. Tamo ñam ti naŋgi degsib unsib ariya naŋgi e kamba olo anjam bei merbosai.

Kolosi 1:25

Qotei a segi na e giltbej deqa e aqa segi tamo uŋgasari naŋgi qa waueqnum. Osim olo niŋgi dego aqaryaiŋgeqnum. E Qotei aqa anjam kalil marsiy laqajqa wau ti.

1 Tesalonaika 2:4

Qotei a segi gago are miligi peleiyoqnsiq une bei unosai deqa a na iga wau egsiqa mergej. “Niŋgi ijo anjam bole mare mare laqniye.” Deqa iga endegsi are qalosaioqnem, “Iga Qotei aqa anjam maroqnimqa tamo naŋgi na iga nugoqnsib gago ñam soqtetgoqnqab.” Iga degsi are qalosaioqnem. Gago areqalo agiende. Qotei a segi na gago are miligi peleiyoqnsim gago wau qa areboleboleiyoqnqajqa deqa are qalem.

Filemon 1:14

Ariya ni na e odbosaiunum deqa e a qariŋyonum ni qa olo bqo. E endegsi are qalonum. Ni na e aqaryaibqa are soqnim ni ino segi areqalo na e odbosim aqaryaibe. E siŋgila na ni mermqasai.