1 Korin 6:9 - Yesus Aqa Anjam Bole

^9-10 Tamo naŋgi kumbra uge uge yeqnub qaji naŋgi Qotei na joqsim taqatnjrqasai. Osim a naŋgo Mandor Koba sqasai dego. Di niŋgi qaliesai kio? O was qu, niŋgi na nuŋgo segi jejamu gisaŋyaib. Tamo naŋgi sambala kumbra yeqnub qaji naŋgi ti tamo naŋgi gisaŋ qotei qa loueqnub qaji naŋgi ti tamo naŋgi was bei aqa ŋauŋ jejamu ojeteqnub qaji naŋgi ti tamo naŋgi uŋa wo ŋereŋqa uratoqnsib olo tamo bei wo bei wo ŋereŋoqnsib sambala kumbra yeqnub qaji naŋgi ti tamo naŋgi bajiŋeqnub qaji naŋgi ti tamo naŋgi was bei aqa iŋgi iŋgi qa mamaulnjreqnu qaji naŋgi ti tamo naŋgi ya uge uyoqnsib nanarieqnub qaji naŋgi ti tamo naŋgi was bei yomuiyeqnub qaji naŋgi ti tamo naŋgi was bei aqa silali gisaŋ na yaiyeqnub qaji naŋgi ti tamo deqaji kalil naŋgi Qotei na joqsim taqatnjrqasai. Osim a naŋgo Mandor Koba sqasai dego.

1 Korin 6:9 ပူးပေါင်းရင်းမြစ်များ

Matyu 19:29

Deqa tamo uŋgasari naŋgi ijo ñam qa are qaloqnsib naŋgo segi tal uratosib naŋgo was naŋgi, naŋgo jaja naŋgi, naŋgo ai wo abu wo naŋgi, naŋgo aŋgro naŋgi ti naŋgo wau kalil dego uratnjrsib e daurbqab tamo uŋgasari naŋgi di Qotei na iŋgi bole bole tulaŋ gargekoba olo enjrqas. Yimqa mondoŋ naŋgi ŋambile gaigai sqab.

Matyu 25:34

Osiyqa tamo bole ijo baŋ woq di unub qaji naŋgi endegsi minjrqai, ‘Ijo Abu a niŋgi qa tulaŋ areboleboleiyqo. Nami a mandam atej bati deqa a nuŋgo Mandor Koba sosim niŋgi taqatŋgwajqa marej. Deqa niŋgi ijoq boiye. Babqa ijo Abu a nuŋgo Mandor Koba sosim niŋgi taqatŋgwas.

Luk 21:8

Onaqa Yesus na minjrej, “Niŋgi geregere ŋam atsib soqniye. Tamo qudei naŋgi na niŋgi gisaŋgo uge. Bunuqna gisa gisaŋ tamo gargekoba naŋgi ijo ñam na boqnsib maroqnqab, ‘E Kristus.’ Qudei na maroqnqab, ‘Kristus bqajqa bati agi jojomqo.’ Degsib gisaŋosib maroqnibqa niŋgi naŋgi daurnjraib.

Aposel 20:32

“Bini e niŋgi Qotei aqa baŋq di ateleŋitqa a na niŋgi geregere taqatŋgoqnqas. Qotei a niŋgi qa are boleiyosiqa eleŋej anjam di niŋgi siŋgila na ojesoqnibqa anjam dena nuŋgo are siŋgilatetŋgoqnqas. Niŋgi Qotei aqa segi tamo uŋgasari a na nami gilteleŋej qaji. Deqa mondoŋ a na niŋgi iŋgi bole bole eŋgoqnqas.

Aposel 24:25

Kumbra bole bole dauryoqnqajqa deqa ti gago segi segi so geregere taqatoqnqajqa deqa ti Feliks minjnaq quej. Mondoŋ Qotei na tamo uŋgasari naŋgo une qa peginjrqajqa deqa ti Pol na Feliks minjnaq quej. Qusiqa ulaosiq Pol minjej, “Ni mati aisim ino warumq di soqne. Bunuqna e bati atsiy olo ni metmit bosim anjam di merbqam.”

Rom 1:18

Iga qalie, Qotei a laŋ goge di sosiqa aqa minjiŋ boleq ateqnu. A na tamo uŋgasari a qoreiyoqnsib kumbra uge uge yeqnub qaji naŋgi awai uge enjreqnu. Naŋgo kumbra uge dena naŋgi Qotei aqa anjam bole olo tenteqnub.

1 Korin 15:33

O was qu, tamo qudei naŋgi na niŋgi gisaŋgaib deqa niŋgi geregere ŋam atsib soqniye. Anjam bei unu di niŋgi qalie. Anjam agiende, “Iga tamo uge naŋgi ti laqnqom di naŋgi na gago areqalo ugetetgibqa iga kumbra bole uratosim naŋgi daurnjrqom.” Anjam degsi unu.

1 Korin 15:50

O was qu, e na niŋgi endegsi merŋgwai. Qotei na mandam qaji tamo naŋgi oqa keresai. Deqa a naŋgo Mandor Koba sosim naŋgi taqatnjrqa keresai dego. Gago jejamu moisim qusaqas qaji di ŋambile gaigai sqa keresai.

1 Korin 3:16

Niŋgi Qotei aqa segi tal bul. Qotei aqa Mondor a nuŋgo miligiq di unu. Di niŋgi qaliesai kio?

1 Korin 5:1

O was qu, e anjam bei endegsi quem. Nuŋgo ambleq di tamo bei a sambala kumbra yeqnu. Aqa sambala kumbra di tulaŋ ugedamu. Tamo naŋgi Qotei qaliesai qaji naŋgi sambala kumbra deqaji yosaieqnub. Aqa sambala kumbra agiende. A na aqa abu aqa ŋauqali olo oqnsiq ombla sambalaeqnub.

1 Korin 5:10

Ariya niŋgi tamo naŋgi Yesus qaliesai qaji naŋgi koba na laqnaib e degsi niŋgi merŋgosai. Niŋgi naŋgi koba na laqnqa kere. Tamo naŋgi sambala kumbra yeqnub qaji ti mandam qa ñoro qa maulnjreqnu qaji naŋgi ti gisaŋ na tamo naŋgo silali yainjreqnub qaji naŋgi ti gisaŋ qotei qa loueqnub qaji naŋgi ti niŋgi naŋgi koba na laqajqa e deqa niŋgi saidŋgosai. Niŋgi naŋgi koba na laqasai di niŋgi torei mandam uratqab. Di keresai.

1 Korin 5:11

Ariya tamo bei a marqas, “E nuŋgo Kristen was bole.” Osim a olo sambala kumbra yqas kio tamo bei aqa ñoro qa maulyqas kio gisaŋ qotei qa louqas kio tamo naŋgi misiliŋnjrqas kio ya uge uyoqnsim nanarioqnqas kio gisaŋ na tamo naŋgo silali yainjrqas kio Kristen tamo di niŋgi koba na laqnaib. Niŋgi a ombla iŋgi uyoqnaib dego. Agi e nami anjam deqa neŋgreŋyosim niŋgi qa qariŋyem.

1 Korin 6:18

Deqa was qu, niŋgi gaigai sambala kumbra uratoqnsib isaq giloqniye. Une kalil tamo naŋgi yeqnub qaji di naŋgo jejamuq di beterosaieqnu. Ariya tamo naŋgi sambala kumbra yeqnub di kumbra dena naŋgo jejamuq di beteroqnsiq naŋgo jejamu ugeteqnu.

1 Korin 6:19

Nuŋgo jejamu di Qotei aqa Mondor aqa segi tal. Qotei a segi na Mondor di niŋgi eŋgej deqa a nuŋgo miligiq di unu. Niŋgi di qaliesai kio? Nuŋgo jejamu di nuŋgo segi jejamu sai. Di Qotei aqa jejamu.

1 Korin 9:24

E mandam tamo naŋgo alaŋ qa merŋgwai. Tamo naŋgi gurguroqnsib bubuŋeqnub di naŋgi awai oqajqa. Ariya tamo qujai a segi na naŋgi kalil buŋnjrsimqa awai oqas. Dego kere niŋgi awai oqa marsib siŋgila na gurguroqniye.

2 Korin 12:21

E olo niŋgi qa bosiy nuŋgo ambleq di tamo gargekoba nami une yoqneb qaji naŋgi are bulyosaiunub degsi unqai kio? Degsi unqai di ijo Qotei a nuŋgo ŋamgalaq di e jemai ebqas. Tamo naŋgi di naŋgo une nami yoqneb qaji agiende. Naŋgi kumbra uge jiga ti yoqneb. Naŋgi sambala kumbra yoqneb. Naŋgi kumbra uge yqajqa are prugnjroqnej. E niŋgi qa bosiy tamo naŋgi di naŋgo une olo qoreiyosai degsi unqai di e naŋgi qa are gulubeibqas. E deqa ulaeqnum.

Galesia 6:7

Niŋgi nuŋgo segi jejamu gisaŋyosib endegsib are qalaib, “Iga Qotei maquiyimqa a gago une unqasai.” O was qu, niŋgi Qotei maquiyqa keresai. Ni iŋgi kie yagwam iŋgi di segi ni olo oqam.

Kolosi 3:5

Deqa niŋgi mandam qaji kumbra kalil nuŋgo are miligiq di unu qaji di moiotiye. Mandam qaji kumbra agi ubtsiy merŋgwai. Sambala kumbra ti kumbra jiga ti kumbra uge uge yqajqa are prugŋgoqa, mandam qa iŋgi iŋgi qa maulŋgoqa. Tamo naŋgi mandam qa iŋgi iŋgi qa mamaulnjreqnu qaji naŋgi gisaŋ qotei naŋgi qa louobuleqnub.

Hibru 12:14

Niŋgi tamo kalil naŋgi ti koba na geregere lawo na sqajqa wauoqniye. Ariya kumbra bei dego niŋgi dauryiye. Kumbra agiende. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. Tamo a Qotei aqa kumbra ti sqasai di a Tamo Koba Qotei unqa keresai.

Hibru 12:16

Niŋgi na tamo naŋgi saidnjribqa naŋgi sambala kumbra yaib. Osib tamo naŋgi Qotei qoreiyqajqa dego saidnjriye. Agi nami Iso na Qotei qoreiyosiqa a aŋgro matu soqnej deqa are qalosaiosiq iŋgi bole kalil aqa abu na nami a yqajqa minjej qaji di bati qujai qa qariŋyosiq dena iŋgi awaiyosiq uyej.

Hibru 13:4

Tamo a uŋatqajqa di kumbra bole. Uŋa a tamotqajqa di dego kumbra bole. Deqa niŋgi kumbra di ugetaib. Niŋgi kumbra di geregere taqatosib dena niŋgi Qotei aqa ŋamgalaq di jiga saiqoji sqab. Niŋgi qalie, tamo uŋgasari sambala kumbra yeqnub qaji naŋgi Qotei na awai uge enjrqas.

Jems 1:16

O ijo was bole, une aqa kumbra dena niŋgi gisaŋgaim deqa niŋgi une kalil uratiye.

1 Jon 3:7

O ijo aŋgro kalil, niŋgi geregere ŋam atoqniye. Tamo bei na bosim niŋgi gisaŋgo uge. Tamo a kumbra tiŋtiŋ dauryqas di a Qotei aqa ŋamgalaq di tamo tiŋtiŋo sqas. Kristus a tamo tiŋtiŋo unu dego kere.

Uli Anjam 21:8

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Uli Anjam 22:15

Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab.