1 Korin 5:11 - Yesus Aqa Anjam Bole

¹¹ Ariya tamo bei a marqas, “E nuŋgo Kristen was bole.” Osim a olo sambala kumbra yqas kio tamo bei aqa ñoro qa maulyqas kio gisaŋ qotei qa louqas kio tamo naŋgi misiliŋnjrqas kio ya uge uyoqnsim nanarioqnqas kio gisaŋ na tamo naŋgo silali yainjrqas kio Kristen tamo di niŋgi koba na laqnaib. Niŋgi a ombla iŋgi uyoqnaib dego. Agi e nami anjam deqa neŋgreŋyosim niŋgi qa qariŋyem.

1 Korin 5:11 ပူးပေါင်းရင်းမြစ်များ

Matyu 18:17

Ariya a naŋgo anjam dego quetnjrosaiamqa ni na Yesus aqa tamo uŋgasari kalil naŋgi metnjrim koroosib ni taqmosib ino was aqa une di olo minjqab. Ariya a naŋgo anjam dego quetnjrosaiamqa ni na a qoreiye. Une tamo ti takis o qaji tamo ti naŋgi qoreinjreqnub dego kere ni na ino was di qoreiye.

Matyu 23:25

“O dal anjam qalie tamo ti Farisi ti niŋgi ŋam atiye. Niŋgi anjam maro aiyelteqnub qaji tamo. Deqa niŋgi kap ti tabir ti qore segi yanseqnub. Niŋgi miligi yansosaieqnub. Dego kere niŋgi babaŋ na tamo bole. Ariya nuŋgo are miligi bajiŋ kumbra ti nuŋgo segi jejamu qa are qalqajqa kumbra ti dena maqejunu. Nuŋgo kumbra uge dena niŋgi tulaŋ padalougetqab.

Luk 18:11

Naŋgi atra tal miligiq gilsibqa Farisi tamo a namo tigelosiqa aqa segi jejamu soqtosiqa endegsi pailyej, ‘O Qotei, e tamo qudei naŋgi unub dego sai. E gisaŋ na tamo uŋgasari naŋgi silali yainjrosaieqnum. E sambala kumbra yosaieqnum. E kumbra uge bei dego yosaieqnum. E takis o qaji tamo di bul sai.

Luk 21:34

Osiqa Yesus a olo anjam endegsi minjrej, “Niŋgi geregere ŋam atsib soqniye. Niŋgi ya uge uyoqnsib nanarioqnqajqa are prugŋgoqnaiq. Nuŋgo segi jejamu qa iŋgi iŋgi qa areqalo kobaiyoqnaib. Niŋgi kumbra uge kalil deqaji yoqnibqa e urur mandamq aisiy niŋgi pruqtŋgo uge.

Aposel 1:15

Bati bei tamo uŋgasari 120 Yesus qa naŋgo areqalo siŋgilateb qaji naŋgi koroosib sonabqa Pita a naŋgo ambleq di tigelosiqa minjrej,

Aposel 9:17

Onaqa Ananaias na minjej, “Od, Tamo Koba, e ino anjam dauryqai.” Osiqa tigelosiq gilsiq Sol soqnej qaji tal di gogetosiqa Sol aqaq di baŋ atsiqa minjej, “O ijo was Sol, Tamo Koba Yesus agi gamq dia inoq di brantonaq unem qaji a na e endegsi merbej, ‘Ni gilsim Sol boletimqa aqa ŋamdamu olo poiyqas. Yimqa Qotei aqa Mondor Sol aqa are miligiq aisim a siŋgilatqas.’ Yesus na e degsi merbsiqa qariŋbqoqa agi e inoq bonum.”

Rom 13:13

Tamo a qanam walweleqnu dego kere iga kumbra bole tiŋtiŋ na walweloqnqom. Deqa iga diqoqnsim alaŋkobaoqnsim ya uge uyoqnsim nanarioqnqasai. Iga sambala kumbra dego yoqnqajqa are pruggoqnim kumbra uge jigat yoqnqasai. Iga laŋa laŋa ŋiriŋoqnsim tamo qudei naŋgi qa are ugegoqnqasai.

Rom 16:17

O was qu, nuŋgo ambleq di tamo qudei naŋgi Qotei aqa anjam niŋgi nami qusib dauryeb qaji di gotraŋyoqnsib olo bulbulyoqnsib naŋgo kumbra dena naŋgi na Kristen tamo uŋgasari naŋgi potoaiyeltnjroqnsib uneq breinjreqnub. Deqa e niŋgi siŋgila na endegsi merŋgwai. Niŋgi tamo deqaji naŋgi qa geregere ŋam atoqniye. Osib naŋgi qoreinjroqniye.

1 Korin 10:14

Deqa ijo was bole, niŋgi qotei gisaŋ naŋgi atsib naŋgi qa louoqnaib. Niŋgi naŋgi torei uratnjrsib isaq giliye.

1 Korin 11:21

Niŋgi qunjaŋ bolet deqa niŋgi namo boqnsib Qotei tal miligiq dia iŋgi uyekriteqnab was qudei naŋgi bunu boqnsib mamnjreqnu. Osib tamo qudei naŋgi wain koba dego uyoqnsib nanarieqnub.

1 Korin 5:13

Tamo naŋgi Yesus qaliesai qaji naŋgo une qa Qotei a segi na peginjrqas. Ariya Qotei aqa anjam bei nami endegsib neŋgreŋyeb unu, “Niŋgi na tamo uge di osib nuŋgo ambleq dena taqal waiyiye.”

1 Korin 6:6

Ariya kiyaqa Kristen was bei a was bei oqnsiq anjam pegiyo tamo naŋgi Kristus qa naŋgo areqalo siŋgilatosaieqnub qaji naŋgi qa giloqnsiq naŋgo ulatamuq di tigelteqnu?

1 Korin 6:9

Tamo naŋgi kumbra uge uge yeqnub qaji naŋgi Qotei na joqsim taqatnjrqasai. Osim a naŋgo Mandor Koba sqasai dego. Di niŋgi qaliesai kio? O was qu, niŋgi na nuŋgo segi jejamu gisaŋyaib. Tamo naŋgi sambala kumbra yeqnub qaji naŋgi ti tamo naŋgi gisaŋ qotei qa loueqnub qaji naŋgi ti tamo naŋgi was bei aqa ŋauŋ jejamu ojeteqnub qaji naŋgi ti tamo naŋgi uŋa wo ŋereŋqa uratoqnsib olo tamo bei wo bei wo ŋereŋoqnsib sambala kumbra yeqnub qaji naŋgi ti tamo naŋgi bajiŋeqnub qaji naŋgi ti tamo naŋgi was bei aqa iŋgi iŋgi qa mamaulnjreqnu qaji naŋgi ti tamo naŋgi ya uge uyoqnsib nanarieqnub qaji naŋgi ti tamo naŋgi was bei yomuiyeqnub qaji naŋgi ti tamo naŋgi was bei aqa silali gisaŋ na yaiyeqnub qaji naŋgi ti tamo deqaji kalil naŋgi Qotei na joqsim taqatnjrqasai. Osim a naŋgo Mandor Koba sqasai dego.

1 Korin 7:12

Ariya niŋgi qudei e na anjam endegsi merŋgwai. Tamo Koba Yesus a na niŋgi merŋgwasai. E segi na merŋgwai. Ni Kristen tamo. Ariya ino ŋauŋ a Kristen uŋa sai. Di uŋgum. Ni a urataim. A ni ombla sqa are soqnim ni a urataim.

1 Korin 7:15

Ariya Kristen tamo bei aqa uŋa a Yesus qa aqa areqalo siŋgilatosai. Deqa uŋa dena tamo di uratqa marsim uratem. Tamo a deqa une saiqoji. A uratqasai di a tonto talq di sobulqas. Kristen uŋa dego aqa tamo a Yesus qa aqa areqalo siŋgilatosai. Deqa tamo dena uŋa di uratqa marsim uratem. A dego une saiqoji. A uratqasai di a tonto talq di sobulqas. Qotei a niŋgi nuŋgo Kristen was qu naŋgi koba na geregere sqajqa metŋgeqnu. Deqa niŋgi ijo anjam di dauryiye.

1 Korin 8:11

Nuŋgo powo dena niŋgi na Kristen was bei di powo bole osai qaji a uneq waiyonub. Niŋgi qalie, Kristus a was deqa moiej.

Galesia 2:12

Aqa kumbra uge agiende. Jems a na Juda Kristen tamo qudei muluŋ aiqajqa siŋgilaoqneb qaji naŋgi qariŋnjrnaqa naŋgi Antiok beb. Ariya naŋgi bosaisonabqa Pita a sawa bei bei qaji tamo naŋgi koba na iŋgi uyoqneb. Ariya naŋgi bonabqa Pita a naŋgi qa ulaosiq deqa a sawa bei bei qaji tamo naŋgi olo tututnjrej.

Efesus 5:18

Niŋgi ya uge uyoqnsib nanarioqnaib. Kumbra dena niŋgi ugeugeiŋgwas. Deqa niŋgi Qotei aqa Mondor aqa kumbra dauryoqnibqa a na niŋgi taqatŋgesqas.

Efesus 5:5

Niŋgi endegsib qalieoiye. Tamo naŋgi sambala kumbra ti kumbra jiga ti yeqnub qaji naŋgi Qotei na oqasai. Tamo naŋgi mandam qa iŋgi iŋgi qa mamaulnjreqnu qaji naŋgi dego Qotei na oqasai. Tamo naŋgi mandam qa iŋgi iŋgi qa mamaulnjreqnu qaji naŋgo kumbra dena naŋgi gisaŋ qotei qa louobuleqnub. Deqa tamo naŋgi deqaji Kristus wo Qotei wo naŋgi na taqatnjrsib naŋgo Mandor Kokba sqasai.

Kolosi 3:5

Deqa niŋgi mandam qaji kumbra kalil nuŋgo are miligiq di unu qaji di moiotiye. Mandam qaji kumbra agi ubtsiy merŋgwai. Sambala kumbra ti kumbra jiga ti kumbra uge uge yqajqa are prugŋgoqa, mandam qa iŋgi iŋgi qa maulŋgoqa. Tamo naŋgi mandam qa iŋgi iŋgi qa mamaulnjreqnu qaji naŋgi gisaŋ qotei naŋgi qa louobuleqnub.

2 Tesalonaika 3:14

Was bei a gago anjam iga neŋgreŋyonum qaji endi uratimqa niŋgi na a taqal waiyib isaq gilem. Yimqa aqa kumbra uge deqa a jemaiyqas.

2 Tesalonaika 3:6

Ariya was qu, gago Tamo Koba Yesus Kristus aqa ñam na iga anjam bei niŋgi endegsi merŋgwom. Was qudei naŋgi gago anjam iga nami niŋgi merŋgoqnem qaji di dauryqa uratosib wauqajqa asginjreqnu. Deqa niŋgi na was naŋgi di qoreinjrsib isaq giliye. Niŋgi naŋgi koba na saib.

1 Timoti 3:3

A ya uyoqnsim nanarioqnaiq. A urur minjiŋ oqim qotoqnaiq. A lawo soqnem. A silali koba ti sqajqa are qaloqnaiq.

1 Timoti 6:5

Osib naŋgi gaigai ŋiriŋ anjam koba mareleŋeqnub. Tamo deqaji naŋgi areqalo tulaŋ uge na laqnub. Naŋgi Qotei aqa anjam bole qaliesai bolesai. Deqa naŋgi endegsib are qaleqnub, “Iga Qotei aqa kumbra dauryqom dena iga ñoro koba ti sqom.” O Timoti, naŋgo anjam di gisaŋ.

2 Jon 1:10

Tamo bei a niŋgi qa bosim ariya a Kristus aqa anjam ti bqasai di niŋgi a baŋ ojaib. Niŋgi a osib nuŋgo talq osi gilaib.

Uli Anjam 2:14

“‘Ariya ino kumbra uge qudei e ubtsiy mermqai. Tamo qudei Pergamum qureq di unub qaji naŋgi Balam aqa kumbra uge siŋgila na ojesonab ni na naŋgi saidnjrosaieqnum. Balam aqa kumbra agiende. Nami Balam na Balak gam osoryonaqa gilsiqa Israel tamo uŋgasari naŋgi gisa gisaŋnjroqnsiqa kumbra ugeq breinjroqnej. Breinjroqnsiqa areqalo tigeltetnjreqnaqa naŋgi qotei gisaŋ atrainjro qaji iŋgi uyoqnsib sambala kumbra yoqnsib laqneb.

Uli Anjam 2:20

“‘Ariya ino kumbra uge qujai agi ubtsiy mermqai. Uŋa Jesebel a ni ombla sosiq waueqnaqa ni na a wiyosaieqnum. A segi qa mareqnu, “E Qotei aqa medabu o qaji uŋa.” Di gisaŋ. A Qotei aqa medabu o qaji uŋa sai. A na ijo wau tamo naŋgi gisa gisaŋnjroqnsiqa gam osornjreqnaqa naŋgi na sambala kumbra yoqnsibqa qotei gisaŋ atrainjro qaji iŋgi uyeqnub.

Uli Anjam 21:8

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Uli Anjam 22:15

Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab.