1 Korin 4:6 - Yesus Aqa Anjam Bole

⁶ O was qu, aqo Apolos wo gago kumbra qa agi e na niŋgi merŋgonum. Niŋgi gago kumbra deqa are qalsib Qotei aqa anjam neŋgreŋq di unu qaji di niŋgi geregere dauryosib olo gotraŋyaib deqa niŋgi merŋgonum. Deqa was qu, niŋgi diqoqnsib tamo qudei naŋgo ñam soqtetnjroqnsib olo tamo qudei naŋgo ñam aguq atoqnaib.

1 Korin 4:6 ပူးပေါင်းရင်းမြစ်များ

Aposel 18:24

Onaqa bati bei Juda tamo bei aqa ñam Apolos aqa qure utru Aleksandria a bosiqa Efesus qureq di wauoqnej. A Qotei aqa anjam maro qaji tamo. A Qotei aqa anjam tulaŋ qaliedamu. Deqa a na Qotei aqa anjam kalil nami neŋgreŋyeb qaji di geregere plaltoqnej.

Aposel 19:1

Apolos a Korin qureq di sonaqa Pol a Esia sawa yambaŋ naŋgo qure qureq na walweloqnej. A walwelosi aisiq Efesus qureq di brantosiqa tamo qudei Yesus dauryoqneb qaji naŋgi sonab itnjrsiqa endegsi nenemnjrej, “Nami niŋgi Yesus qa nuŋgo areqalo siŋgilatosib bati deqa Qotei aqa Mondor eb e?” Onaqa naŋgi na saideb, “Eo. Iga Qotei aqa Mondor osai. Qotei aqa Mondor unu kio sai kio di iga nami quosaioqnem.”

Rom 12:3

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

1 Korin 1:12

O was qu, niŋgi segi segi anjam na qoteqnub qaji nuŋgo utru agiende. Niŋgi qudei mareqnub, “E Pol dauryo qaji tamo.” Niŋgi qudei mareqnub, “E Apolos dauryo qaji tamo.” Niŋgi qudei mareqnub, “E Pita dauryo qaji tamo.” Ariya niŋgi qudei mareqnub, “E Kristus dauryo qaji tamo.” Niŋgi anjam na qoteqnub qaji nuŋgo utru agide.

1 Korin 1:19

Agi Qotei aqa anjam bei nami endegsib neŋgreŋyeb unu, “Tamo naŋgi powo ti qa mareqnub qaji naŋgo powo di e na taqal atetnjrqai. Qalie tamo naŋgo qalie dego e na kobotetnjrqai.”

1 Korin 1:31

Deqa iga gago segi ñam soqtqa keresai. Agi Qotei aqa anjam bei nami endegsib neŋgreŋyeb unu, “Tamo bei a ñam bei soqtqa marsimqa a Tamo Koba Qotei aqa ñam segi soqteme.”

1 Korin 13:4

Tamo naŋgi qalaqalaiyo kumbra dauryqab di naŋgi naŋgo was naŋgi qa urur minjiŋ oqoqnqasai. Naŋgi lawo na tamo kalil naŋgi kumbra bole enjroqnqab. Naŋgo was bei a iŋgi iŋgi koba ti soqnim naŋgi a qa are ugeinjrqasai. Naŋgi naŋgo segi ñam soqtoqnqasai dego.

1 Korin 3:19

Di kiyaqa? Tamo naŋgi mandam qaji powo ti unub qaji naŋgi Qotei aqa ŋamgalaq di nanari tamo unub. Agi Qotei aqa anjam bei nami endegsib neŋgreŋyeb unu, “Tamo naŋgi powo ti unub qaji naŋgi naŋgo kumbra uge na tamo qudei naŋgi ugeugeinjrqa are qaleqnub. Deqa Qotei a kamba naŋgo kumbra uge dena naŋgi olo padaltnjreqnu.”

1 Korin 3:21

Deqa niŋgi na tamo naŋgo ñam soqtoqnaib. Iŋgi iŋgi kalil di nuŋgo.

1 Korin 5:2

Tamo di a sambala kumbra di yeqnu deqa niŋgi are ugeiŋgonaq akamosaieqnub. Niŋgi diqoqnsib laqnub. Niŋgi are ugeiŋgej qamu niŋgi tamo di osib nuŋgo ambleq dena taqal waiyeb qamu.

1 Korin 5:6

Niŋgi nuŋgo segi ñam soqteqnub di kumbra bolesai. Niŋgi qalie, tamo naŋgi sum kiñala oqnsib bem ti bulyeqnab bem tiyekritoqnsiq tulaŋ kobaqujaeqnu.

1 Korin 8:1

Ariya e na sulum atrainjro qaji iŋgi iŋgi uyqajqa kumbra qa niŋgi merŋgwai. Tamo qudei naŋgi endegsib mareqnub, “Iga kalil powo ti unum.” Di naŋgi bole mareqnub. Ariya naŋgo powo dena naŋgi olo tulaŋ diqoqnsib naŋgo segi ñam soqtoqnsib laqnub. Ariya iga qalaqalaiyo kumbra dauryqom dena iga Kristen tamo uŋgasari naŋgo areqalo siŋgilatetnjroqnqom.

1 Korin 9:23

E kumbra kalil yeqnum qaji di e Yesus aqa anjam bole di siŋgilatqa marsim deqa yeqnum. Yimqa mondoŋ anjam bole di aqa awai Tamo Koba Yesus na e ebqas. Agi tamo kalil Yesus aqa anjam bole deqa naŋgo areqalo siŋgilateqnub qaji naŋgi awai di oqab.

2 Korin 10:12

Tamo qudei naŋgi diqoqnsib naŋgo segi ñam soqteqnub qaji iga naŋgi unub dego sai. Gago kumbra ti naŋgo kumbra ti kerekere unub iga degsi marqa keresai. Tamo naŋgi di naŋgo segi kumbra na naŋgo kumbra laŋa pegiyeqnub. Osib tamo qudei naŋgo kumbra na dego naŋgo segi kumbra olo pegiyeqnub. Tamo naŋgi kumbra degyeqnub qaji naŋgi tulaŋ powo saiqoji.

2 Korin 10:15

Wau Qotei na egej qaji di iga buŋyosim tamo qudei naŋgo wau qa gago segi ñam soqtosaieqnum. Wau Qotei na egej qaji di segi iga yqajqa siŋgilaeqnum. Di kiyaqa? Gago wau dena nuŋgo areqalo Yesus qa siŋgilato qaji di siŋgilaamqa gago wau nuŋgo ambleq di yoqnem qaji di tulaŋ kobaqas.

2 Korin 10:7

Niŋgi laŋa babaŋ na tamo naŋgo kumbra unsib tenemtaib. Niŋgi geregere tenemtiye. Tamo bei a endegsi marqas, “E Kristus aqa tamo bole.” Ariya a endegsi poiyem, a Kristus aqa tamo qa marqo deqa iga dego Kristus aqa tamo. A degsi poiyem.

2 Korin 11:4

E ulaonum. Di kiyaqa? E qalieonum, tamo qudei naŋgi niŋgi qa boqnsib gisaŋgoqnsib Yesus bei qa anjam palontosib merŋgeqnub. Yesus deqa iga nami anjam palontosaioqnem. Tamo naŋgi di mondor bei qa dego niŋgi merŋgeqnub. Di gisaŋ mondor. Mondor deqa iga nami niŋgi merŋgosaioqnem. Yesus aqa anjam bole iga nami niŋgi merŋgoqnem qaji di dego tamo qudei naŋgi bulbulyoqnsib olo anjam bei niŋgi merŋgeqnub. E qalieonum, naŋgi anjam di niŋgi merŋgeqnab niŋgi quoqnsib bole edegoqnsib dauryeqnub. O was qu, niŋgi degaib.

2 Korin 12:19

Niŋgi gago anjam kalil endi sisiyosib iga qa endegsib are qalaib, “Naŋgi anjam neŋgreŋyeqnub di naŋgo segi jejamu une saiqoji qa marsib deqa neŋgreŋyeqnub.” Di sai. Iga Kristus aqa tamo deqa iga Qotei aqa ŋamgalaq di anjam endi neŋgreŋyeqnum. O ijo was bole, anjam kalil iga neŋgreŋyeqnum qaji endi niŋgi siŋgilatŋgwajqa deqa neŋgreŋyeqnum.

2 Korin 12:20

Di kiyaqa? E niŋgi qa ulaeqnum. E niŋgi qa bosiy nuŋgo kumbra unsiy e niŋgi qa areboleboleibqas kio sai kio? Niŋgi dego ijo kumbra unsib niŋgi e qa areboleboleiŋgwas kio sai kio? E deqa ulaeqnum. E niŋgi qa bosiy nuŋgo kumbra endegsi unqai kio? Niŋgi anjam na qoteqnub. Niŋgi nuŋgo was naŋgi qa are ugeiŋgeqnu. Niŋgi minjiŋ oqeqnu. Niŋgi pupoeqnub. Niŋgi nuŋgo was qudei naŋgi misiliŋnjreqnub. Niŋgi yomueqnub. Niŋgi diqeqnub. Niŋgi Qotei aqa wau ugeugeiyeqnub. E degsi unqai kio?

2 Korin 12:6

Bole, e ijo segi ñam soqtqai di e nanari tamo sqasai. Di kiyaqa? E anjam bole segi marqai. Ariya e ijo segi ñam soqtqa uratonum. Di kiyaqa? Tamo naŋgi ijo areqalo dauryosib ijo ñam laŋa soqtetbo uge. Ariya naŋgi ijo kumbra unoqnsib anjam e palonteqnum qaji di quoqnsib dena ijo ñam soqtetbqab di kere.

2 Korin 4:15

E degsi maronum. Di kiyaqa? E qalieonum, kumbra kalil gagoq di branteqnu qaji di niŋgi aqaryaiŋgwajqa deqa. Qotei a iga qa are tulaŋ boleiyeqnu aqa kumbra di tamo uŋgasari gargekoba naŋgi qa gileqnu. Deqa tamo uŋgasari naŋgi di Qotei aqa kumbra di unsib a tulaŋ biŋiyoqnsib aqa ñam soqtoqnqab.

Kolosi 2:18

Tamo qudei naŋgi na niŋgi endegsib merŋgwab, “Niŋgi nuŋgo segi ñam tentoqnsib olo laŋ aŋgro naŋgi qa louoqniye. Iga ŋeiobilqei na kumbra di unsim deqa niŋgi degsi merŋgonum.” O was qu, niŋgi tamo di naŋgo anjam quetnjraib. Tamo deqaji naŋgi naŋgo areqalo namij dauryoqnsib endegsib mareqnub, “Iga powo bole ti unum.”

1 Tesalonaika 1:5

Iga nami Kristus aqa anjam bole nuŋgoq osi bem. Iga laŋa anjam maro na osi bosai. Iga Qotei aqa siŋgila na ti aqa Mondor Bole aqa kumbra na ti osi bem. Bati deqa iga gago areqalo Kristus qa siŋgilatonamqa niŋgi di uneb. Iga nuŋgo ambleq di sosimqa niŋgi aqaryaiŋgoqnem. Gago kumbra di niŋgi segi qalie.

2 Timoti 2:10

Deqa e na ijo are miligi siŋgilatoqnsim gulube kalil di qoboiyoqnsim unum. E tamo uŋgasari Qotei na aqa segi qa giltnjrej qaji naŋgi aqaryainjrqajqa deqa osim gulube di qoboiyeqnum. Yimqa Qotei na naŋgi eleŋamqa naŋgi dego Kristus Yesus aqa ñam na ŋambile osib a ombla gaigai sqajqa deqa.