1 Korin 4:5 - Yesus Aqa Anjam Bole

⁵ Qotei na tamo naŋgo une qa peginjrqa bati brantosaiunu deqa niŋgi na tamo qudei naŋgi une ti qa minjraib. Niŋgi mati tariŋesoqnibqa mondoŋ Tamo Koba Yesus a bosimqa a segi na iŋgi iŋgi kalil ambruq di uliejunub qaji di suwaŋoq di atqas. Osim tamo kalil naŋgo areqalo dego boleq atqas. Yim bati deqa Qotei a gago segi segi kumbra geregere pegiyosim mergwas.

1 Korin 4:5 ပူးပေါင်းရင်းမြစ်များ

Matyu 10:26

Osiqa Yesus a olo anjam endegsi minjrej, “Niŋgi jeu tamo naŋgi di ulainjraib. Kumbra kalil uliejunu qaji di boleq dqas. Uli anjam kalil dego tamo naŋgi qusib poinjrqas.

Matyu 24:30

Bati deqa e Tamo Aŋgro bqai. Ijo toqor a laŋ goge dia brantimqa tamo uŋgasari sawa sawa kalilq di unub qaji naŋgi e qa akamugetqab. E Tamo Aŋgro siŋgila ti riaŋ ti laŋbiq na boqnit tamo uŋgasari kalil naŋgi e nubqab.

Matyu 24:46

Tamo di a wau tamo bole. Deqa tal lanja na a degsi minjsimqa sawa beiq gilsim di sqas. Olo puluosim bosim wau kalil a na aqa wau tamo nami yej qaji di kalil keretsi soqnimqa a bosi unimqa wau tamo di a tulaŋ areboleboleiyqas.

Matyu 25:21

Onaqa aqa tamo koba na minjej, ‘Ni kaŋgal tamo bolequja. Ni wau kiñala geregere taqatonum deqa e na wau gargekoba olo ino baŋq di uratitqa ni na taqatoqnqam. Deqa ni bosim e ombla areboleboleigim sqom.’

Matyu 25:23

Onaqa aqa tamo koba na minjej, ‘Ni dego kaŋgal tamo bolequja. Ni wau kiñala geregere taqatonum deqa e na wau gargekoba olo ino baŋq di uratitqa ni na taqatoqnqam. Deqa ni bosim e ombla areboleboleigim sqom.’

Luk 6:37

“Niŋgi tamo qudei naŋgo kumbra laŋa uge qa minjraib. Yimqa Qotei a kamba dego nuŋgo kumbra uge qa niŋgi merŋgwasai. Niŋgi tamo qudei naŋgo jejamuq di anjam laŋa qametnjraib. Yimqa Qotei a kamba dego nuŋgo jejamuq di anjam bei qametŋgwasai. Niŋgi na tamo naŋgo une kalil taqal atetnjroqniye. Yimqa Qotei a dego nuŋgo une kalil taqal atoqnqas.

Jon 21:22

Onaqa Yesus na Pita minjej, “Aŋgro di a moiosaisoqnimqa e olo bqai degsi minjitqa ni deqa are koba qalaim. Di ino wau sai. Di ijo wau. Ni e daurbe.”

Jon 21:23

Yesus a na Pita degsi minjej. Deqa Yesus aqa aŋgro di a moiqasai anjam di sawa sawaq gileqnaqa Kristen was qu kalil naŋgi quoqneb. Aŋgro di a moiqasai Yesus na Pita degsi minjosai. A na minjej, “Aŋgro di a moiosaisoqnimqa e olo bqai degsi minjitqa ni deqa are koba qalaim.”

Jon 5:44

Niŋgi nuŋgo segi was naŋgoq dena ñam koba oqajqa are qaleqnub. Ariya Qotei a segi qujai unu. Niŋgi aqaq dena ñam koba oqajqa are qalosaieqnub. Niŋgi kumbra degyeqnub deqa niŋgi kiersib e qa nuŋgo areqalo siŋgilatqab? Di keresai.

Rom 14:4

Ni tamo kiero deqa ni na tamo bei aqa wau tamo a uge qa minjqam? A siŋgila na wau bole yqas kio aqa wau uloŋqas kio di aqa wau qa gate a segi na pegiyqas. Ariya e qalieonum, a siŋgila na tigelosim wau bole yqas. Di kiyaqa? Tamo Koba Qotei na a siŋgilatimqa a siŋgila na tigelesqas.

Rom 2:1

Niŋgi qudei tamo naŋgo jejamuq di anjam qametnjreqnub qaji niŋgi segi segi e na endegsi merŋgwai. Ni segi une saiqoji qa marqa keresai. Ni que. Ni na tamo naŋgo jejamuq di anjam qametnjreqnum di ni segi dego ino jejamuq di anjam qameqnum. Di kiyaqa? Kumbra uge naŋgi yeqnub qaji di ni segi dego yeqnum.

Rom 2:29

Tamo a are bulyosim aqa are miligiq na Juda tamo sqas di a Juda tamo bole. A are miligiq na muluŋ aiqas di aqa muluŋ bole. A na aqa jejamu laŋa osim dal anjam dauryqas di keresai. Ariya Qotei aqa Mondor na siŋgila yimqa dena aqa are miligiq na muluŋ aiqas di a muluŋ bole aiqo. Deqa a Qotei aqa ŋamgalaq di ñam bole ti sqas. A mandam tamo naŋgo ŋamgalaq di ñam bole ti sqasai.

Rom 2:7

Tamo uŋgasari qudei naŋgo kumbra tulaŋ boledamu. Naŋgi siŋgila na kumbra bole bole dauryoqnsib laŋ qure qa gam itqajqa waukobaeqnub. Naŋgi laŋ qureq dia ñam koba oqajqa ti ŋambile gaigai sqajqa ti waukobaeqnub. Deqa Qotei na tamo uŋgasari naŋgi di ŋambile enjrim naŋgi so bole gaigai sqab.

1 Korin 1:7

Deqa niŋgi gago Tamo Koba Yesus Kristus a olo bqajqa tariŋoqnsib unub. Niŋgi Qotei aqa Mondor aqa siŋgila ti unub. Niŋgi aqa siŋgila bei qa truquosaieqnub.

1 Korin 11:16

O was qu, tamo bei a ijo anjam deqa ŋiriŋosim gotraŋyqas di a endegsi poiyem. Iga kumbra bei dauryosaieqnum. Qotei aqa tamo uŋgasari qure qure kalilq di unub qaji naŋgi dego kumbra bei dauryosaieqnub.

1 Korin 11:26

O was qu, niŋgi Yesus aqa anjam deqa are qaloqnsib bati gaigai niŋgi bem ti wain gambaŋ ti di uyoqnsib niŋgi anjam endegsib marsib laqniye, “Tamo Koba Yesus a iga qa jaqatiŋ osiq moiej.” Marsib laqnib mondoŋ a olo bqas.

1 Korin 15:23

Ariya iga gago segi segi bati dauryosim subq na olo tigelosim ŋambile oqom. Namoqna Kristus a subq na tigelej. Ariya mondoŋ Kristus a olo laŋ qureq na bamqa bati deqa iga aqa segi tamo uŋgasari iga dego subq na olo tigelqom.

1 Korin 3:13

Ariya mondoŋ tamo naŋgi peginjro batiamqa Qotei na tamo kalil naŋgo wau segi segi boleq atsim ŋamyuo na pegiyosim naŋgo wau bole kio uge kio di unqas.

1 Korin 3:14

Tamo qudei naŋgo tal ateb qaji di ŋamyuo na yugwasai di naŋgi awai bole oqab.

1 Korin 3:8

Tamo a iŋgi yageqnu qaji wo tamo a wau taqateqnu qaji wo naŋgi aiyel ombla Qotei aqa wau ojeqnub. Ariya mondoŋ Qotei a na naŋgo wau segi segi pegiyosim awai enjrqas.

2 Korin 10:18

Iga qalie, tamo bei a aqa segi ñam soqtqas di a Qotei aqa ŋamgalaq di ñam saiqoji sqas. Ariya Tamo Koba Qotei na tamo bei aqa ñam soqtetqas di a ñam bole oqas.

2 Korin 10:9

Ariya niŋgi endegsib are qalaib, “Pol a na iga ula egwajqa deqa anjam siŋgila na neŋgreŋyosiq iga qa qariŋyeqnu.” Niŋgi degsib are qalaib.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

2 Korin 5:10

Di kiyaqa? Iga qalieonum, mondoŋ iga kalil Kristus aqa ulatamuq dia tigelimqa a na gago kumbra qa iga pegigwas. Iga mandamq endia kumbra bole kio kumbra uge kio yoqnem di a unsim awai segi segi egwas.

1 Tesalonaika 5:2

Niŋgi segi qalie, Tamo Koba Yesus bqajqa bati di bajiŋ tamo bul brantqas. Bajiŋ tamo naŋgi qolo beqnub dego kere Yesus bqajqa bati di lumu bosim tamo naŋgi pruqtnjrqas.

Hibru 4:13

Iŋgi bei a Qotei qa uliqa keresai. Iŋgi iŋgi kalil Qotei na gereinjrej qaji di a na ŋam atsiq geregere uneqnu. Deqa mondoŋ a na qujai gago kumbra kalil qa iga pegigwas.

Jems 4:11

O was qu, niŋgi na Qotei aqa tamo uŋgasari naŋgi uge qa minjraib. Tamo bei na aqa was naŋgi uge qa minjrsim naŋgo jejamuq di une qametnjrqas di a dal anjam dego uge qa marsiq qamqo. Niŋgi dal anjam uge qa marsib qamqab di niŋgi dal anjam aqa sorgomq di sqa uratonub. Osib laŋa pegiyonub.

Jems 5:7

Deqa was qu, niŋgi nuŋgo are miligi siŋgilatosib gulube qoboiyoqnsib Tamo Koba Yesus a olo bqajqa tariŋoqniye. Niŋgi tariŋqa asgiŋgaiq. Niŋgi qalie, wau lanja naŋgi asginjrosaieqnu. Naŋgi iŋgi yagoqnsib awa qa tariŋeqnub. Awa beqnaqa iŋgi melieqnaqa naŋgi iŋgi meli di oqnsib uyeqnub.

Jems 5:9

O was qu, niŋgi Qotei aqa tamo uŋgasari naŋgi qa ŋiriŋoqnsib yomuoqnaib. Qotei na kamba nuŋgo une deqa niŋgi olo pegiŋgo uge. Niŋgi quiye. Une pegiyo tamo agi bqa jojomqo. A siraŋmeq di tigelejunu.

1 Pita 1:7

Niŋgi gulube eqnub dena Qotei a nuŋgo areqalo uneqnu. Niŋgi Kristus qa nuŋgo areqalo bole siŋgilateqnub kio sai kio di Qotei a uneqnu. Iga qalie, gol a iŋgi tulaŋ boledamu. Ariya tamo naŋgi ŋamyuo na gol koitoqnsib dena qalieeqnub, gol di bole kio sai kio. Dego kere nuŋgo areqalo Kristus qa siŋgilateqnub qaji di tulaŋ bolequja. Areqalo dena gol tulaŋ buŋyejunu. Di kiyaqa? Gol a ugeosim koboqas. Deqa gulube bei bei niŋgi qa boqnsim dena niŋgi osorŋgwas, niŋgi Kristus qa nuŋgo areqalo bole siŋgila-teqnub. Niŋgi bole siŋgilatqab di mondoŋ diŋo batiamqa Yesus Kristus a boleq dosim bati deqa a niŋgi qa tulaŋ areboleboleiyim ñam kobaquja niŋgi eŋgwas.

1 Pita 5:4

Niŋgi kumbra degyibqa mondoŋ kaja naŋgo Mandor Koba Yesus a laŋ qureq na olo brantimqa bati deqa niŋgi awai tulaŋ boledamu oqab. Awai di ugeqa keresai. Gaigai sqas.

2 Pita 3:12

Osib nuŋgo kumbra dena niŋgi Qotei aqa bati koba brantim unqajqa deqa tariŋoqniye. Osib bati di urur brantqajqa deqa niŋgi siŋgila na wauoqniye. Bati di brantimqa laŋ a ŋamyuo na yusim koboqas. Mandam ti iŋgi iŋgi kalil Qotei na atej qaji de ti dego ŋamyuo na tulaŋ kaŋkaŋam yusib ya bulosib koboqab.

2 Pita 3:4

“Qotei a nami marej, ‘Mondoŋ Kristus a olo bqas.’ Ariya a qabi unu? A bqa keresai. Niŋgi uniye. Gago moma utru naŋgi nami moreŋoqneb bosi bosiq agi bini iga degsi unum. Qotei a nami mandam atej agi bini mandam a degsi unu. Deqa Kristus a olo bqa keresai.”

Jut 1:14

Nami Enok a soqnej. A Adam aqa silei 7q dena ŋambabej. A Qotei aqa medabu osiqa tamo uge deqaji naŋgi qa endegsi marej, “Niŋgi uniye. Mondoŋ Tamo Koba Qotei a na aqa segi laŋ aŋgro tulaŋ gargekoba naŋgi joqsim bqas.

Uli Anjam 1:7

Niŋgi uniye. Yesus a laŋbi ambleq na boqnimqa tamo kalil naŋgi a unqab. Tamo kalil nami a qaja na qameb qaji naŋgi dego a unqab. Tamo uŋgasari kalil mandamq endi unub qaji naŋgi a qa are ugeinjrimqa tulaŋ akamugetqab. Od, kumbra di brantqas. Bole.

Uli Anjam 20:12

Onaqa e olo ŋam atem di tamo uŋgasari nami moreŋeb qaji naŋgi Qotei aqa awo jaram namoq di tigelesonab unjrem. Tamo ñam ti tamo laŋaj ti kalil unjrem. Unjreqnam laŋ aŋgro qudei naŋgi na buk qudei osi bosib waqteleŋeb. Buk miligiq di kumbra kalil tamo uŋgasari naŋgi nami yoqneb qaji di Qotei na neŋgreŋyonaq soqneb. Buk bei dego laŋ aŋgro naŋgi osi bosib waqteb. Buk di ŋambile gai-gai sqajqa buk. Ariya Qotei a awo jaram kobaqujaq di aweso-siqa anjam kalil buk qudei miligiq di neŋgreŋyonaq soqnej qaji di sisiyosiq anjam dena tamo uŋgasari moreŋo qaji naŋgo kumbra kalil qa naŋgi peginjrej.