1 Korin 4:2 - Yesus Aqa Anjam Bole

² Niŋgi qalie. Tamo bei na tamo bei aqa wau taqatqas di a na aqa medabu geregere dauryqas.

1 Korin 4:2 ပူးပေါင်းရင်းမြစ်များ

Matyu 25:21

Onaqa aqa tamo koba na minjej, ‘Ni kaŋgal tamo bolequja. Ni wau kiñala geregere taqatonum deqa e na wau gargekoba olo ino baŋq di uratitqa ni na taqatoqnqam. Deqa ni bosim e ombla areboleboleigim sqom.’

Matyu 25:23

Onaqa aqa tamo koba na minjej, ‘Ni dego kaŋgal tamo bolequja. Ni wau kiñala geregere taqatonum deqa e na wau gargekoba olo ino baŋq di uratitqa ni na taqatoqnqam. Deqa ni bosim e ombla areboleboleigim sqom.’

Luk 12:42

Onaqa Tamo Koba Yesus na minjej, “Wau tamo yai a areqalo bole ti sosiqa gaigai wau bole yeqnu? Wau tamo di tal lanja a na minjeqnu, ‘Ni na ijo wau tamo kalil naŋgi geregere taqatnjroqnsimqa naŋgo iŋgi uyqajqa batioqnimqa iŋgi anainjroqnsim soqne.’ Tamo di a wau tamo bole. Deqa tal lanja na a degsi minjqas.

1 Korin 4:1

O was qu, aqo Apolos wo Kristus aqa wau tamo. Iga Qotei aqa uli anjam taqatejunum. Niŋgi iga qa degsib are qaliye.

1 Korin 4:17

Utru deqa e Timoti qariŋyonumqa a niŋgi qa bqas. E nami Tamo Koba Yesus aqa anjam Timoti minjnam a are bulyosiqa siŋgilaej. Deqa a ijo aŋgro bole. E na a tulaŋ qalaqalaiyeqnum. A Tamo Koba Qotei aqa wau geregere taqateqnu. A niŋgi qa bosim ijo kumbra qa niŋgi saiŋgim niŋgi quqwab. Ijo kumbra agiende. E Kristus beteryejunum. Ijo kumbra di e na sawa sawa kalilq dia Kristen tamo uŋgasari naŋgi osornjreqnam naŋgi dauryeqnub.

1 Korin 4:3

Deqa niŋgi na kio anjam pegiyo tamo qudei naŋgi na kio ijo kumbra tenemtosib e pegibqab di e deqa yala are qalqasai. E segi dego ijo kumbra tenemtosaieqnum.

1 Korin 7:25

Ariya e na tamo naŋgi uŋa ti sosai qaji naŋgi Tamo Koba Qotei aqa dal anjam bei minjrqasai. E ijo segi areqalo na naŋgi anjam bei endegsi minjrqai. Tamo Koba Qotei a e qa tulaŋ dulej deqa e qalieonum, ijo anjam endi bole.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

Kolosi 1:7

Kristus aqa anjam bole di Epafras a na niŋgi merŋgnaq qusib poiŋgej. Epafras a iga ti Kristus aqa wau tamo. Iga Epafras tulaŋ qalaqalaiyeqnum. A siŋgila na niŋgi aqaryaiŋgoqnsiqa Kristus aqa wau bole ojeqnu.

Kolosi 4:17

Ariya niŋgi na Arkipus endegsib minjiye, “Qotei a na ni wau emqo deqa wau di ni na taqatosim geregere wauoqne.”

Kolosi 4:7

E na Tikikus qariŋyonum niŋgi qa bqo. A ijo wau kalil qa niŋgi saiŋgwas. Tikikus a gago wau qujai. A gago Kristen was bole. A Tamo Koba Yesus aqa wau tamo bolequja.