1 Korin 4:11 - Yesus Aqa Anjam Bole

¹¹ Iga nami mam ti ya qar ti soqnem agi bini unum. Iga gara bolesai dego. Tamo qudei naŋgi na iga ugeugeigeqnub. Iga tal saiqoji.

1 Korin 4:11 ပူးပေါင်းရင်းမြစ်များ

Matyu 8:20

Onaqa Yesus na minjej, “Bauŋ juwaŋ naŋgi tal ti. Agi sub miligiq di ŋereŋeqnub. Qebari naŋgi simi ti. Deqa naŋgi simiq di ŋereŋeqnub. Ariya e Tamo Aŋgro ŋeiqajqa tal saiqoji. Deqa ni e daurbqajqa gulube koba.”

Aposel 14:19

Onaqa Juda tamo qudei naŋgi Antiok dena ti Aikoniam dena ti walwelosib Listra qureq beb. Bosib dia tamo uŋgasari naŋgo are ugetetnjrnabqa naŋgi tigelosib Pol meniŋ na qaleb. Osib a giriŋyosib gilsib qure qalaq di ateb. Naŋgi are qaleb, “A moiqo.”

Aposel 16:23

Naŋgi kumbaiŋnjrogargekobatosib tonto talq di breinjrsib tonto tal taqato tamo a minjeb, “Ni na naŋgi aiyel siŋgila na tontnjrsim geregere taqatnjresoqne.”

Aposel 23:2

Onaqa atra tamo gate aqa ñam Ananaias a Pol aqa anjam di qusiqa minjiŋ oqetonaqa tamo naŋgi Pol aqa areq di tigelesoqneb qaji naŋgi minjrej, “Niŋgi Pol aqa medabuq di qaliye.”

Rom 8:35

Kristus a segi na iga tulaŋ qalaqalaigeqnu. Deqa tamo yai na aqa qalaqalaiyo kumbra di olo getentimqa a na iga qalaqalaigwasai? Tamo dego bei sosai. O was qu, iga gulube osimqa kio, jaqatiŋ osimqa kio, tamo qudei na iga ugeugeigibqa kio, iga mam koba osimqa kio, gara saigimqa kio, kumbra uge bei na ugetgimqa kio, qoto bei gagoq di brantimqa kio Kristus a deqa iga qalaqalaigwasai e? Sai.

1 Korin 9:4

“Iga Yesus aqa wau ojeqnum dena iga awai osim gago segi iŋgi ti ya ti uyqa kere e?

2 Korin 11:20

Nuŋgo kumbra agiende. Tamo bei na niŋgi ojsim wau koba eŋgimqa kio nuŋgo iŋgi iŋgi saitimqa kio nuŋgo iŋgi iŋgi gisaŋ na yaiŋgimqa kio aqa segi ñam soqtimqa kio nuŋgo ula poŋyimqa kio niŋgi a odyibqa aqa segi areqalo dauryoqnsim degyoqnqas.

2 Korin 4:8

Sawa sawa kalilq dia gulube gargekoba iga qa beqnu. Ariya gulube dena gago siŋgila kobotetgosaieqnu. Iŋgi iŋgi gargekoba na gago areqalo niñaqyetgeqnu. Ariya iŋgi iŋgi dena gago areqalo torei ugetetgosaieqnu.

Filipai 4:12

E iŋgi saiqoji sqai kio e iŋgi koba ti sqai kio di uŋgum, e are lawo na sqai. E lawo kumbra qalieonum deqa e iŋgi kere sqas kio e mambqas kio e iŋgi koba ti sqai kio e iŋgi qa truquoqnqai kio di uŋgum, e are lawo na sqai. Kumbra kie ijoq di brantqas di uŋgum, e are lawo na sqai.

2 Timoti 3:11

Ni qalie, Antiok qure ti Aikoniam qure ti Listra qure ti dia jeu tamo naŋgi na e kumbra uge uge ebeqnabqa e jaqatiŋ koba oqnem. Qure dia kumbra uge kalil e qa brantoqnej qaji di ni qalie. Ariya bati deqa Tamo Koba Qotei na e aqaryaiboqnsiqa gulube kalilq dena e oqnsiq taqal atoqnej. Deqa bini e bole unum.