1 Korin 3:23 - Yesus Aqa Anjam Bole

²³ Ariya niŋgi Kristus aqa. Ariya Kristus a Qotei aqa.

1 Korin 3:23 ပူးပေါင်းရင်းမြစ်များ

Matyu 17:5

Pita a degsi mareqnaqa laŋbi tulaŋ suwaŋo aisiqa naŋgi kabutnjrej. Onaqa laŋbi miligiq dena anjam bei endegsi brantonaq naŋgi queb, “Endi ijo Aŋgro qujai e na tulaŋ qalaqalaiyeqnum qaji. E a qa tulaŋ areboleboleibeqnu. Deqa niŋgi aqa anjam quetoqniye.”

Jon 17:18

Nami ni na e qariŋbonam mandamq aisim tamo uŋgasari naŋgo ambleq di soqnem. Deqa e na kamba ijo segi tamo uŋgasari naŋgi qariŋnjritqa mandam endeqa tamo uŋgasari naŋgo ambleq di sqab.

Jon 17:21

O Abu, ni ijoq di unum. E dego inoq di unum. Aqo aiyel are qujaitosim unum. Ijo segi tamo uŋgasari kalil naŋgi dego aqo aiyel koba na are qujaitosib sqajqa deqa e ni pailmonum. Soqnibqa mandam endeqa tamo uŋgasari naŋgi na unjrsibqa naŋgi dego e qa naŋgo areqalo siŋgilatqab. Osib qalieqab, ni na e qariŋbonam bem.

Rom 14:8

Iga ŋambile sqom di Tamo Koba Yesus aqa segi. Ariya iga moiqom di dego Tamo Koba Yesus aqa segi. Deqa iga ŋambile sqom kio iga moiqom kio di iga Tamo Koba Yesus aqa segi tamo uŋgasari sqom.

1 Korin 11:3

Ariya niŋgi ijo anjam bei dego qusib poiŋgem. Tamo kalil naŋgo gate agi Kristus. Uŋa naŋgo gate agi naŋgo tamo naŋgi. Ariya Kristus aqa gate di Qotei.

1 Korin 15:23

Ariya iga gago segi segi bati dauryosim subq na olo tigelosim ŋambile oqom. Namoqna Kristus a subq na tigelej. Ariya mondoŋ Kristus a olo laŋ qureq na bamqa bati deqa iga aqa segi tamo uŋgasari iga dego subq na olo tigelqom.

1 Korin 15:28

Ariya mondoŋ Qotei na iŋgi iŋgi kalil di olo eleŋosim Kristus aqa sorgomq di atim soqnim Qotei aqa Ŋiri a kamba dego Qotei aqa sorgomq di sqas. Soqnim Qotei na iŋgi iŋgi kalil di tulaŋ buŋnjrsimqa a segi naŋgo Mandor Koba sosim naŋgi bati gaigai taqatnjroqnqas.

1 Korin 7:22

Tamo naŋgi kaŋgal tamo sonabqa Qotei na metnjrej qaji naŋgi Tamo Koba Yesus aqa. Deqa naŋgi aqa ŋamgalaq di kaŋgal tamo sosai. Dego kere tamo naŋgi kaŋgal tamo sosai sonabqa Qotei na metnjrej qaji naŋgi olo Kristus aqa kaŋgal tamo bul unub.

1 Korin 8:6

Iga qalieonum, Qotei qujai unu. A gago Abu. A iŋgi iŋgi kalil qa utru. Iga aqa segi tamo uŋgasari tiŋtiŋ unum. Tamo Koba qujai dego unu. Di Yesus Kristus. A iŋgi iŋgi kalil ateleŋej. Iga kalil aqaq dena ŋambile em.

2 Korin 10:7

Niŋgi laŋa babaŋ na tamo naŋgo kumbra unsib tenemtaib. Niŋgi geregere tenemtiye. Tamo bei a endegsi marqas, “E Kristus aqa tamo bole.” Ariya a endegsi poiyem, a Kristus aqa tamo qa marqo deqa iga dego Kristus aqa tamo. A degsi poiyem.

Galesia 3:29

Niŋgi Kristus aqa segi tamo unub deqa niŋgi Abraham aqa aŋgro tiŋtiŋ dego unub. Agi niŋgi segi na iŋgi bole bole Qotei a nami Abraham aqa leŋ naŋgi enjrqajqa marej qaji di oqab.

Galesia 5:24

Tamo kalil Kristus Yesus beteryejunub qaji naŋgi na naŋgo areqalo namij ti naŋgo are prugnjrqajqa kumbra ti kalil ŋamburbasq di qamnab moiej.

Efesus 1:10

Deqa a kumbra endegyqas. A na iŋgi iŋgi kalil mandam ti laŋ ti di unub qaji naŋgi taqatnjroqnsim gilsi gilsim bati a nami atej qaji di brantimqa a na iŋgi iŋgi kalil di olo osim Kristus aqa baŋq di atim a naŋgo gate sqas.