1 Korin 3:16 - Yesus Aqa Anjam Bole

¹⁶ Niŋgi Qotei aqa segi tal bul. Qotei aqa Mondor a nuŋgo miligiq di unu. Di niŋgi qaliesai kio?

1 Korin 3:16 ပူးပေါင်းရင်းမြစ်များ

Jon 14:17

Aqaryaiŋgo tamo di a anjam bole qa Mondor. Tamo uŋgasari mandamq endi unub qaji naŋgi Mondor di oqa keresai. Naŋgi a unosaieqnub. Naŋgi a qa qaliesai dego. Ariya niŋgi a qa qalie. A niŋgi koba na unub. Bunuqna a bosim nuŋgo are miligiq di sqas.

Rom 6:16

Niŋgi quiye. Niŋgi nuŋgo segi jejamu tamo bei yosib aqa anjam dauryoqnqab di niŋgi aqa wau tamo sqab. Dego kere niŋgi une aqa wau tamo sqab di niŋgi moreŋqab. Ariya niŋgi Qotei aqa wau tamo sosib aqa anjam dauryoqnqab di niŋgi tamo bole une saiqoji sqab. Di niŋgi qaliesai kio?

Rom 6:3

Iga Kristus Yesus beteryosim aqa ñam na yanso em. Kumbra dena iga a beteryosim a koba na moiobulem. Niŋgi di qaliesai kio?

Rom 8:11

Qotei a na aqa Ŋiri Kristus Yesus subq na olo tigeltej. Qotei aqa Mondor a nuŋgo are miligiq di unu deqa Qotei na aqa Mondor aqa siŋgila na nuŋgo jejamu moiqas qaji di dego olo subq na tigeltosim niŋgi ŋambile eŋgwas.

Rom 8:9

Ariya niŋgi areqalo namij na walwelosaieqnub. Qotei aqa Mondor a nuŋgo are miligiq di unu deqa niŋgi aqa kumbra na walweleqnub. Tamo a Kristus aqa Mondor ti sqasai di a Kristus aqa tamo sqa keresai.

1 Korin 3:17

Qotei aqa tal di aqa segi getento tal. Qotei aqa tal di agi niŋgi segi. Deqa tamo bei na Qotei aqa tal di ugeugeiyqas di Qotei na kamba tamo di ugeugeiyqas.

1 Korin 3:9

Aqo aiyel Qotei ombla na wau ojeqnum. Qotei aqa iŋgi wau agi niŋgi segi. Niŋgi segi Qotei aqa tal bul a na gereiyej qaji.

1 Korin 5:6

Niŋgi nuŋgo segi ñam soqteqnub di kumbra bolesai. Niŋgi qalie, tamo naŋgi sum kiñala oqnsib bem ti bulyeqnab bem tiyekritoqnsiq tulaŋ kobaqujaeqnu.

1 Korin 6:16

Tamo bei a sambala uŋa wo beterqab di a uŋa de wo jejamu qujaitosib sqab. Di niŋgi qaliesai kio? Agi Qotei aqa anjam bei nami endegsib neŋgreŋyeb unu, “Tamo bei aqa ŋauqali wo beterosib naŋgi jejamu qujaitosib sqab.”

1 Korin 6:19

Nuŋgo jejamu di Qotei aqa Mondor aqa segi tal. Qotei a segi na Mondor di niŋgi eŋgej deqa a nuŋgo miligiq di unu. Niŋgi di qaliesai kio? Nuŋgo jejamu di nuŋgo segi jejamu sai. Di Qotei aqa jejamu.

1 Korin 6:9

Tamo naŋgi kumbra uge uge yeqnub qaji naŋgi Qotei na joqsim taqatnjrqasai. Osim a naŋgo Mandor Koba sqasai dego. Di niŋgi qaliesai kio? O was qu, niŋgi na nuŋgo segi jejamu gisaŋyaib. Tamo naŋgi sambala kumbra yeqnub qaji naŋgi ti tamo naŋgi gisaŋ qotei qa loueqnub qaji naŋgi ti tamo naŋgi was bei aqa ŋauŋ jejamu ojeteqnub qaji naŋgi ti tamo naŋgi uŋa wo ŋereŋqa uratoqnsib olo tamo bei wo bei wo ŋereŋoqnsib sambala kumbra yeqnub qaji naŋgi ti tamo naŋgi bajiŋeqnub qaji naŋgi ti tamo naŋgi was bei aqa iŋgi iŋgi qa mamaulnjreqnu qaji naŋgi ti tamo naŋgi ya uge uyoqnsib nanarieqnub qaji naŋgi ti tamo naŋgi was bei yomuiyeqnub qaji naŋgi ti tamo naŋgi was bei aqa silali gisaŋ na yaiyeqnub qaji naŋgi ti tamo deqaji kalil naŋgi Qotei na joqsim taqatnjrqasai. Osim a naŋgo Mandor Koba sqasai dego.

1 Korin 9:13

Atra tamo naŋgi atra tal miligiq di wauoqnsib dena naŋgi iŋgi iŋgi oqnsib uyeqnub. Tamo naŋgi atra bijal taqateqnub qaji naŋgi dego atra bijalq dena atraiyqa wagme oqnsib uyeqnub. Niŋgi di qaliesai kio?

1 Korin 9:24

E mandam tamo naŋgo alaŋ qa merŋgwai. Tamo naŋgi gurguroqnsib bubuŋeqnub di naŋgi awai oqajqa. Ariya tamo qujai a segi na naŋgi kalil buŋnjrsimqa awai oqas. Dego kere niŋgi awai oqa marsib siŋgila na gurguroqniye.

2 Korin 6:16

Qotei aqa atra tal ti qotei gisaŋ naŋgo atra tal ti beterosib ombla sqa kere e? Di keresai. Niŋgi qalie, Qotei ŋambile gaigai unu qaji aqa atra tal agi iga segi unum. Agi Qotei aqa anjam bei nami endegsib neŋgreŋyeb unu, “E naŋgo ambleq di sosiy walweloqnqai. E naŋgo Qotei sqai. Naŋgi ijo segi tamo uŋgasari sqab.”

1 Timoti 3:15

Deqa e ni qa urur bosaiotqa ijo anjam neŋgreŋyonum qaji endi ni sisiyosim kumbra bole kalil Qotei na Kristen naŋgi dauryqa are qaleqnu qaji di ni qalieqam. Kristen naŋgo utru agiende. Naŋgi Qotei ŋambile gaigai unu qaji aqa segi tamo uŋgasari unub deqa naŋgi tal aqa ai bul tigelesosib Qotei aqa anjam bole siŋgila na ojejunub.

2 Timoti 1:14

Qotei na aqa anjam bole ino baŋq di atej. Qotei aqa anjam di tulaŋ bolequja. Deqa ni na anjam di geregere taqatesoqne. Qotei aqa Mondor Bole agi gago are miligiq di unu qaji a na ni aqaryaimoqnimqa ni Qotei aqa wau di geregere ojsim laqne.

Hibru 3:6

Ariya Kristus a Qotei aqa Ŋiri. Deqa Qotei na a wau yonaqa a na Qotei aqa tamo uŋgasari naŋgi taqatnjroqnej. Tamo uŋgasari naŋgi di Qotei aqa tal bul. Kristus a Qotei aqa anjam geregere dauryoqnsiq wau di yoqnej. Deqa iga gaigai Kristus qa gago areqalo siŋgilatoqnsim a olo bqajqa deqa tariŋoqnsim sqom. Iga degyqom di iga dego Qotei aqa tal bul sqom.

Jems 4:4

Uŋa bei na aqa gumbuluŋ uratosiq olo tamo bei ombla sambala kumbra yeqnub dego kere niŋgi Qotei uratobuloqnsib kumbra uge uge yeqnub. Niŋgi quiye. Tamo bei a mandam qa kumbra qa tulaŋ areboleboleiyqas di a olo Qotei jeutqas. Niŋgi di qaliesai kio? Deqa tamo bei na mandam qa kumbra kadoiyqas di a Qotei ti jeu sqas.

1 Pita 2:5

Niŋgi dego tal aqa ai bul ŋambile unub. Qotei na niŋgi aqa segi tal sqa marsiq deqa aqa Mondor aqa siŋgila na niŋgi gereiŋgeqnu. Yim niŋgi aqa segi atra tamo boledamu sosib Yesus Kristus aqa ñam na nuŋgo segi jejamu Qotei atraiyoqnib a niŋgi qa tulaŋ arearetoqnqajqa deqa.

1 Jon 4:12

Tamo bei a nami Qotei aqa ulatamu unosaioqnej. Ariya iga na Kristen tamo uŋgasari naŋgi qalaqalainjrqom di Qotei a gagoq di beteresoqnimqa aqa qalaqalaiyo kumbra di gago are miligiq di tulaŋ kobaoqnsim siŋgilaoqnqas.