1 Korin 3:13 - Yesus Aqa Anjam Bole

¹³ Ariya mondoŋ tamo naŋgi peginjro batiamqa Qotei na tamo kalil naŋgo wau segi segi boleq atsim ŋamyuo na pegiyosim naŋgo wau bole kio uge kio di unqas.

1 Korin 3:13 ပူးပေါင်းရင်းမြစ်များ

Matyu 10:15

Niŋgi quiye. E bole merŋgwai. Mondoŋ Qotei na tamo uŋgasari naŋgo une qa peginjrqa batiamqa qure deqaji tamo uŋgasari naŋgi ijo anjam uratonub deqa Qotei na naŋgi tulaŋ padaltnjrougetqas. Ariya Sodom qure ti Gomora qure ti naŋgi Qotei na mondoŋ degsim padaltnjrqasai. A na naŋgi gulube kiñala enjrqas. Di kiyaqa? Naŋgi ijo ñam qaliesai deqa.”

Matyu 16:27

E Tamo Aŋgro. Mondoŋ e ijo Abu aqa riaŋ ti sosiy aqa laŋ aŋgro naŋgi joqsiy bosiy tamo uŋgasari kalil naŋgo kumbra segi segi qa peginjrsiy naŋgo segi segi awai keretsiy enjrqai.

Luk 2:35

Deqa tamo gargekoba naŋgo areqalo uliejunu qaji di olo boleq dqas. Yimqa serie na ino are qametmo bul are jaqatiŋ oqnqam.”

Rom 2:5

Ino are miligi geteŋejunu deqa ni are bulyosai. Ino kumbra dena ni na ino awai uge tombol ateqnum. Deqa mondoŋ diŋo batiamqa Qotei a kumbra tiŋtiŋ na tamo naŋgo une qa minjrsimqa aqa minjiŋ boleq atsim awai tulaŋ ugedamu ni emqas.

1 Korin 1:8

Yesus Kristus a na niŋgi siŋgilatŋgoqnqas deqa niŋgi siŋgila na tigelesosib gilsib gilsib diŋo bati itqab. Yimqa gago Tamo Koba Yesus Kristus a olo laŋ qureq na brantimqa bati deqa niŋgi Qotei aqa ŋamgalaq di une saiqoji sqab.

1 Korin 3:12

Tamo naŋgi tal aqa ai gogeq di tal atqa osibqa gol na ti silva na ti meniŋ naimyo na ti ŋamtaŋ na ti liki na ti wit aqa sau na ti tal ateqnub.

1 Korin 4:5

Qotei na tamo naŋgo une qa peginjrqa bati brantosaiunu deqa niŋgi na tamo qudei naŋgi une ti qa minjraib. Niŋgi mati tariŋesoqnibqa mondoŋ Tamo Koba Yesus a bosimqa a segi na iŋgi iŋgi kalil ambruq di uliejunub qaji di suwaŋoq di atqas. Osim tamo kalil naŋgo areqalo dego boleq atqas. Yim bati deqa Qotei a gago segi segi kumbra geregere pegiyosim mergwas.

2 Timoti 1:12

Deqa uŋgum, e gulube oqnsiy sqai. E deqa jemaibqasai. E Yesus qa ijo areqalo siŋgilateqnum deqa e a qa bole qalieonum. A segi na wau endi ijo baŋq di atej deqa e qalieonum, a na wau di geregere taqatoqnqas. Taqatsim gilsim a olo bqajqa bati brantqas.

2 Timoti 1:18

Deqa e a qa endegsi pailyeqnum, “O Tamo Koba Qotei, mondoŋ ni na tamo naŋgi peginjrqa batiamqa ni Onesiforus a qa dulame.” O Timoti, nami Efesus qureq dia dego Onesiforus a e qa wau gargekoba yoqnsiqa aqaryaiboqnej. Di ni qalie.

2 Timoti 3:9

Ariya naŋgo kumbra di tulaŋ kobaqasai. Nami Janes wo Jambres wo naŋgi aiyel nanari kumbra di yonabqa tamo uŋgasari naŋgi unsib maroqneb, “Naŋgo kumbra di nanari.” Dego kere bini tamo naŋgi di nanari kumbra di yoqnibqa tamo uŋgasari naŋgi unsib maroqnqab, “Naŋgo kumbra di nanari.” Yim deqa naŋgo kumbra di tulaŋ kobaqasai.

2 Timoti 4:8

Tamo naŋgi gurgu-roqnsib bubuŋeqnub di naŋgi awai oqajqa. Ariya ijo awai bole agi Qotei a laŋ goge dia atej unu. E awai di oqajqa deqa tariŋoqnsim unum. Ijo awai agiende. Mondoŋ Tamo Koba Qotei na e tamo bole une saiqoji qa merbqas. Di ijo awai bole. Tamo Koba Qotei a kumbra tiŋtiŋ na tamo uŋgasari naŋgo kumbra qa naŋgi peginjreqnu. Ariya Qotei na naŋgi peginjrqajqa batiamqa a na awai bole di e ebqas. A e segi awai ebqasai. Tamo kalil Yesus a laŋ goge dena brantim unqajqa deqa areboleboleinjreqnaqa tariŋeqnub qaji naŋgi ti awai bole egwas.

Hibru 10:25

Iga Qotei aqa tamo uŋgasari unum deqa iga aqa ñam qa korooqnqajqa uratqasai. Agi Kristen tamo qudei naŋgi korooqnqajqa asginjreqnu. Niŋgi qalie, Kristus olo bqajqa bati jojomqo. Deqa iga segi segi korooqnsimqa gago Kristen was naŋgo are siŋgilatetnjroqnqom.

1 Pita 1:7

Niŋgi gulube eqnub dena Qotei a nuŋgo areqalo uneqnu. Niŋgi Kristus qa nuŋgo areqalo bole siŋgilateqnub kio sai kio di Qotei a uneqnu. Iga qalie, gol a iŋgi tulaŋ boledamu. Ariya tamo naŋgi ŋamyuo na gol koitoqnsib dena qalieeqnub, gol di bole kio sai kio. Dego kere nuŋgo areqalo Kristus qa siŋgilateqnub qaji di tulaŋ bolequja. Areqalo dena gol tulaŋ buŋyejunu. Di kiyaqa? Gol a ugeosim koboqas. Deqa gulube bei bei niŋgi qa boqnsim dena niŋgi osorŋgwas, niŋgi Kristus qa nuŋgo areqalo bole siŋgila-teqnub. Niŋgi bole siŋgilatqab di mondoŋ diŋo batiamqa Yesus Kristus a boleq dosim bati deqa a niŋgi qa tulaŋ areboleboleiyim ñam kobaquja niŋgi eŋgwas.

1 Pita 4:12

O ijo was bole, gulube kobaquja bei ŋamyuo bulosiq niŋgi qa beqnu. Ariya niŋgi deqa tulaŋ prugosib endegsib are qalaib, “Gulube deqaji nami gagoq di brantosaioqnej.” Niŋgi degsib are qalaib. Qotei a nuŋgo areqalo tenemtqa osiq deqa gulube di qariŋyqoqa niŋgi qa bqo.

2 Pita 3:10

Ariya diŋo bati brantimqa Tamo Koba Yesus a bajiŋ tamo bul urur boqujatqas. Bamqa bati deqa laŋ a poŋosim koboqas. Iŋgi iŋgi kalil dego ŋamyuo na tulaŋ kaŋkaŋam yusib koboqab. Deqa mandam ti aqa iŋgi iŋgi ti kalil olo bunu sqasai.

2 Pita 3:7

Ariya bini laŋ ti mandam ti tariŋoqnsib unub. Mondoŋ Qotei a olo anjam marimqa laŋ ti mandam ti ŋamyuo na yusib koboqab. Bati deqa Qotei na tamo naŋgi a qoreiyeqnub qaji naŋgo une qa peginjrsim naŋgi torei padaltnjrqas.

Uli Anjam 20:12

Onaqa e olo ŋam atem di tamo uŋgasari nami moreŋeb qaji naŋgi Qotei aqa awo jaram namoq di tigelesonab unjrem. Tamo ñam ti tamo laŋaj ti kalil unjrem. Unjreqnam laŋ aŋgro qudei naŋgi na buk qudei osi bosib waqteleŋeb. Buk miligiq di kumbra kalil tamo uŋgasari naŋgi nami yoqneb qaji di Qotei na neŋgreŋyonaq soqneb. Buk bei dego laŋ aŋgro naŋgi osi bosib waqteb. Buk di ŋambile gai-gai sqajqa buk. Ariya Qotei a awo jaram kobaqujaq di aweso-siqa anjam kalil buk qudei miligiq di neŋgreŋyonaq soqnej qaji di sisiyosiq anjam dena tamo uŋgasari moreŋo qaji naŋgo kumbra kalil qa naŋgi peginjrej.