1 Korin 3:10 - Yesus Aqa Anjam Bole

¹⁰ Qotei a e qa are boleiyosiq wau ebej deqa e tal gereiyo qaji tamo bulosim e tal gereiyqajqa qalie bole. Deqa e tal aqa utru atem. Ariya bini tamo qudei naŋgi kamba olo tal aqa ai gogeq di tal ateqnub. Ariya e na tamo kalil naŋgi endegsi minjreqnum, “Niŋgi tal ateqnub deqa niŋgi geregere atoqniye.”

1 Korin 3:10 ပူးပေါင်းရင်းမြစ်များ

Matyu 24:45

Osiqa Yesus a olo anjam endegsi minjrej, “Wau tamo yai a areqalo bole ti sosiqa gaigai wau bole yeqnu? Wau tamo di tal lanja a na endegsi minjqas, ‘Ni na ijo wau tamo kalil naŋgi geregere taqatnjroqnsimqa naŋgo iŋgi uyqajqa batioqnimqa iŋgi anainjroqnsim soqne.’

Matyu 7:24

Osiqa Yesus a olo anjam endegsi minjrej, “Tamo a ijo anjam endi qusim dauryqas di a tal gereiyo qaji tamo bul sqas. Tal gereiyo qaji tamo a areqalo powo ti deqa a na tal utru atqa osimqa tal ai sub bogeleŋosim guma koba aieleŋosim meniŋ qura iteleŋqas.

Luk 11:35

Deqa niŋgi geregere ŋam atsib soqniye. Nuŋgo jejamu suwaŋejunu di olo ambruo uge.

Luk 21:8

Onaqa Yesus na minjrej, “Niŋgi geregere ŋam atsib soqniye. Tamo qudei naŋgi na niŋgi gisaŋgo uge. Bunuqna gisa gisaŋ tamo gargekoba naŋgi ijo ñam na boqnsib maroqnqab, ‘E Kristus.’ Qudei na maroqnqab, ‘Kristus bqajqa bati agi jojomqo.’ Degsib gisaŋosib maroqnibqa niŋgi naŋgi daurnjraib.

Aposel 18:27

Onaqa bunuqna Apolos a marej, “E Akaia sawaq gilqai.” A degsi marnaqa Yesus aqa tamo uŋgasari Efesus qureq di soqneb qaji naŋgi na odosib minjeb, “Di kere. Ni gilime.” Degsib minjsibqa anjam bei neŋgreŋyosib Apolos yonab a na osi gilsiqa Yesus aqa tamo uŋgasari Akaia sawaq di soqneb qaji naŋgi enjrej. Endegsib neŋgreŋyeb, “O gago was niŋgi quiye. Apolos a nuŋgoq bqo. Deqa niŋgi a osib geregereiyiye.” Ariya Apolos a Akaia sawaq dia Yesus aqa tamo uŋgasari naŋgi itnjrnaqa naŋgi na a osib geregereiyeb. Onaqa a na naŋgi Qotei aqa anjam minjreqnaqa aqa anjam dena naŋgo are siŋgilatetnjroqnej. Qotei a nami naŋgi qa are tulaŋ boleiyosiqa naŋgo areqalo waqtetnjrnaqa naŋgi are bulyosib Yesus qa naŋgo areqalo siŋgilateb. Apolos a bosiqa tamo uŋgasari naŋgi di are siŋgilatetnjroqnej.

Rom 1:5

Yesus Kristus aqa wau na Qotei a iga qa are tulaŋ boleiyosiqa aqa ñam na iga aqa anjam maro tamo sqajqa deqa wau egej. Tamo uŋgasari sawa sawa kalilq di unub qaji naŋgi Yesus qa naŋgo areqalo siŋgilatosib aqa anjam dauryqajqa deqa are qalsiq wau egej.

Rom 12:3

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

Rom 15:15

Ijo anjam mutu qudei e neŋgreŋyonum qaji endi anjam siŋgila. Qotei a e qa are boleiyonaq wau ebej niŋgi deqa olo are walŋgaim deqa e anjam endi neŋgreŋyonum.

Rom 15:20

Ariya e na tamo uŋgasari Kristus aqa ñam qaliesai qaji naŋgo sawaq dia aqa anjam bole palontqajqa are qaleqnum. Tal aqa ai utru tamo bei na tigeltej qaji dia e olo tal atqajqa are qalosaieqnum.

1 Korin 3:11

O was qu, niŋgi qalie, Qotei a na Yesus Kristus osiq a tal aqa ai tuma qaji bul tigeltej unu. Deqa tamo bei na olo tal aqa ai tuma qaji bei ataiq.

1 Korin 9:2

Tamo qudei naŋgi mareqnub, “Pol a Yesus aqa anjam maro tamo bolesai.” Naŋgi degsib mareqnub di uŋgum. Niŋgi segi e qa qalie. E nami Tamo Koba Yesus aqa anjam niŋgi merŋgeqnam qusib are bulyeb. Dena niŋgi qalieeb, e Tamo Koba Yesus aqa anjam maro tamo bole.

2 Korin 10:15

Wau Qotei na egej qaji di iga buŋyosim tamo qudei naŋgo wau qa gago segi ñam soqtosaieqnum. Wau Qotei na egej qaji di segi iga yqajqa siŋgilaeqnum. Di kiyaqa? Gago wau dena nuŋgo areqalo Yesus qa siŋgilato qaji di siŋgilaamqa gago wau nuŋgo ambleq di yoqnem qaji di tulaŋ kobaqas.

Efesus 2:20

Niŋgi Qotei aqa tal bul unub. Qotei a segi na tal di gereiyej. Qotei aqa anjam maro tamo naŋgi ti aqa medabu o qaji tamo naŋgi ti tal aqa ai bul tigelejunub. Qotei a segi na tal di tigeltej unu. Kristus Yesus a segi tal aqa ai tuma qaji. A segi na tal di siŋgilatejunu.

Kolosi 1:29

Deqa Kristus aqa siŋgila kobaquja Qotei na e ebej qaji dena e wau koba yoqnsim unum.

Kolosi 4:17

Ariya niŋgi na Arkipus endegsib minjiye, “Qotei a na ni wau emqo deqa wau di ni na taqatosim geregere wauoqne.”

1 Tesalonaika 3:2

Marsimqa Timoti qariŋyonam niŋgi qa bej. Timoti a gago Kristen was bole. A Qotei aqa wau tamo. A Kristus aqa anjam bole maro qaji tamo. Iga na a qariŋyonam niŋgi qa bej. A na niŋgi aqaryaiŋgosim nuŋgo areqalo Yesus qa siŋgilateqnub qaji di olo siŋgilatetŋgwajqa deqa marsim a qariŋyonam niŋgi qa bej.

1 Timoti 4:16

Ni ino segi kumbra ti ino anjam maro ti geregere taqatosim siŋgila na Qotei aqa wau yoqne. Yimqa ino wau dena Qotei na ni ti tamo uŋgasari kalil ino anjam qusib dauryeqnub qaji naŋgi ti oqas.

2 Timoti 2:15

Ni Qotei aqa wau tamo boledamu sqajqa siŋgilaoqnim Qotei a nuŋgo wau qa tulaŋ arearetoqnqas. Deqa ni Qotei aqa anjam bole geregere palontoqne. Ni degyqam di ni aqa ŋamgalaq di jemaimqasai.

Jems 3:1

O ijo was qu, nuŋgo ambleq di tamo gargekoba naŋgi Qotei aqa anjam plaltqa wau ojaib. Di kiyaqa? Mondoŋ tamo peginjrqa batiamqa Qotei na iga anjam plalto tamo gago wau di geregere tenemtosim iga pegigwas.

1 Pita 4:11

Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.

2 Pita 3:15

Tamo Koba Yesus a jiŋga na iga qa tariŋeqnu. Deqa niŋgi endegsi poiŋgem. Yesus a na iga eleŋqajqa deqa iga qa tariŋeqnu. Qotei a na gago was bole Pol powo yonaqa a dego anjam deqaji neŋgreŋyoqnsiq niŋgi qa qariŋyoqnej.

Uli Anjam 21:14

Meniŋ kokba 12-pela na dadaŋ aqa utru siŋgilateb. Meniŋ quraq di tamo 12-pela Kaja Du na qariŋnjrnaq aqa anjam marsib laqneb qaji naŋgo ñam atnab soqneb.

Uli Anjam 21:19

Meniŋ boledamu segi segi na dadaŋ aqa utru walatej. Meniŋ boledamu namba 1 aqa ñam jaspa. Meniŋ namba 2 aqa ñam sapaia. A qenjent. Meniŋ namba 3 aqa ñam aget. Meniŋ namba 4 aqa ñam emeral. A ŋam baŋga gesgi bul.