1 Korin 2:14 - Yesus Aqa Anjam Bole

¹⁴ Ariya tamo naŋgi Qotei aqa Mondor ti sosai qaji naŋgi laŋ qa iŋgi iŋgi di oqa keresai. Di kiyaqa? Naŋgi mareqnub, “Iŋgi iŋgi di bolesai. Di nanari tamo naŋgo iŋgi.” O was qu, iŋgi iŋgi di iga Qotei aqa Mondor aqaq dena eleŋeqnum. Deqa tamo naŋgi Qotei aqa Mondor ti sosai qaji naŋgi iŋgi iŋgi deqa poinjrqa keresai. Tamo naŋgi Mondor ti unub qaji naŋgi segi iŋgi iŋgi deqa poinjrqa kere.

1 Korin 2:14 ပူးပေါင်းရင်းမြစ်များ

Matyu 16:23

Onaqa Yesus a bulosiqa Pita koqyosiqa ŋiriŋtosiq minjej, “Ni Satan bul. Deqa ni ijo qoreq gile. Ni ijo gam getentetbaim. Ni Qotei aqa areqalo dauryosai. Ni mandam tamo naŋgo areqalo dauryonum. Dauryosim agi ni na anjam di merbonum.”

Jon 10:20

Osib tamo gargekoba naŋgi endegsib mareb, “Yesus a mondor uge ti unu. Deqa a tulaŋ nanariqo. Niŋgi kiyaqa aqa anjam queqnub?”

Jon 12:37

Yesus a Qotei aqa maŋwa gargekoba naŋgo ŋamgalaq di yoqnej. Yeqnaqa naŋgi unoqnsib deqa naŋgo areqalo siŋgilatosai.

Jon 14:17

Aqaryaiŋgo tamo di a anjam bole qa Mondor. Tamo uŋgasari mandamq endi unub qaji naŋgi Mondor di oqa keresai. Naŋgi a unosaieqnub. Naŋgi a qa qaliesai dego. Ariya niŋgi a qa qalie. A niŋgi koba na unub. Bunuqna a bosim nuŋgo are miligiq di sqas.

Jon 14:26

Bunuqna Aqaryaiŋgo tamo a niŋgi qa bosim siŋgilatŋgwas. A Qotei aqa Mondor Bole. Ijo Abu na a qariŋyim ijo ñam na bosim anjam kalil niŋgi merŋgekritqas. Osim nuŋgo areqalo tigeltetŋgimqa anjam kalil e nami niŋgi merŋgoqnem qaji deqa olo are qalqab.

Jon 15:26

“Niŋgi siŋgilatŋgwajqa Mondor a ijo Abu ombla unub. E na a qariŋyit niŋgi qa bqas. A anjam bole qa Mondor. A ijo Abu aqaq dena bqas. Bosim ijo wau qa ti ijo kumbra qa ti anjam babtqas.

Jon 5:44

Niŋgi nuŋgo segi was naŋgoq dena ñam koba oqajqa are qaleqnub. Ariya Qotei a segi qujai unu. Niŋgi aqaq dena ñam koba oqajqa are qalosaieqnub. Niŋgi kumbra degyeqnub deqa niŋgi kiersib e qa nuŋgo areqalo siŋgilatqab? Di keresai.

Jon 8:43

“Kiyaqa niŋgi ijo anjam endi poiŋgosai? Utru endegsi merŋgwai. Niŋgi ijo anjam quqwa keresai deqa.

Aposel 16:14

Naŋgo ambleq di uŋa bei soqnej aqa ñam Lidia. A gara lent oqnsiq qariŋyeqnaqa tamo naŋgi na awaiyoqneb. Di aqa silali wau. Aqa qure utru Taiataira. A Qotei qa louoqnej qaji uŋa. A ya qalaq di sonaqa Pol na bosiq itej. Bati deqa Qotei na aqa areqalo waqtetonaqa a Pol aqa anjam qusiq poiyonaqa are bulyosiqa aqa areqalo Yesus qa siŋgilatej.

Aposel 17:18

Bati bei Grik naŋgo qalie tamo Atens qureq di soqneb qaji naŋgi Pol ombla anjam na qoteb. Naŋgi qudei qalie tamo koba Epikurias aqa skulq dena qalie eb. Naŋgi qudei skul bei aqa ñam Stoik dena qalie eb. Pol a na naŋgi endegsi minjroqnej, “Yesus a moisiq olo subq na tigelej. Deqa mondoŋ tamo kalil naŋgi dego subq na olo tigelqab.” Pol a na naŋgi degsi minjroqnej deqa naŋgi Pol ombla anjam na qotoqnsib segi segi maroqneb, “Pol a anjam laŋa laŋa mareqnu. A anjam kie mergwajqa bqo?” Ariya tamo qudei naŋgi endegsib maroqneb, “Pol a qure bei naŋgo qotei qa mergeqnu kio?”

Aposel 17:32

Pol a Atens qureq dia tamo uŋgasari naŋgi anjam degsi minjrnaqa naŋgi Yesus subq na tigelej anjam di qusibqa naŋgi qudei Pol kikiyeb. Ariya naŋgi qudei na Pol minjeb, “Anjam di bunuqna ni na olo mergim iga quqwom.”

Aposel 18:15

Ariya niŋgi bosib nuŋgo segi dal anjam qa ti nuŋgo segi moma naŋgo ñam qa ti maronub deqa e na nuŋgo anjam di gereiyqasai. Di ijo wau sai. Niŋgi segi na gereiyiye.”

Aposel 25:19

Naŋgi naŋgo Qotei louqa kumbra deqa segi ŋiriŋosibqa Pol aqa jejamuq di anjam qamoqneb. Pol a maroqnej, ‘Tamo bei aqa ñam Yesus a moisiq olo subq na tigelej.’ Deqa ti naŋgi ŋiriŋosibqa Pol aqa jejamuq di anjam laŋa qamoqneb.

1 Korin 1:18

Tamo naŋgi padalqa gamq di unub qaji naŋgi mareqnub, “Kristus a ŋamburbasq di moiej anjam di nanari anjam.” Ariya iga Qotei na eleŋeqnu qaji iga mareqnum, “Kristus a ŋamburbasq di moiej anjam di Qotei aqa siŋgila ti unu.”

1 Korin 1:21

Qotei aqa segi powo na a endegsi qalieej. Tamo naŋgi mandam endeqa powo ti unub qaji naŋgo powo dena naŋgi Qotei qalieqa keresai. Qotei a degsi qalieosiq deqa a na tamo uŋgasari naŋgi oqajqa gam bei endegsi osornjrej. Anjam iga palonteqnum qaji di tamo naŋgi nanari qa mareqnub. Ariya tamo uŋgasari naŋgi anjam di qusib Qotei qa naŋgo areqalo siŋgilatqab gam dena qujai a na naŋgi oqas.

1 Korin 1:23

Ariya Kristus a ŋamburbasq di moiej anjam di iga palontsim laqnam Juda naŋgi quoqnsib gisaŋ qa mareqnub. Grik naŋgi dego anjam di quoqnsib nanari qa mareqnub.

1 Korin 1:25

Mandam tamo naŋgi mareqnub, “Qotei aqa anjam di nanari anjam.” Di sai. Anjam di Qotei aqa powo ti unu deqa anjam dena mandam tamo naŋgo powo tulaŋ buŋyejunu. Mandam tamo naŋgi mareqnub, “Qotei aqa anjam di siŋgila saiqoji.” Di sai. Anjam di Qotei aqa siŋgila ti unu deqa anjam dena mandam tamo naŋgo siŋgila tulaŋ buŋyejunu.

1 Korin 15:44

Tamo naŋgi moreŋonub naŋgo jejamu subq atonub qaji di mandam qaji jejamu. Ariya tamo naŋgi subq na tigelqab qaji naŋgo jejamu di laŋ qaji jejamu. Iga bini mandam qaji jejamu ti unum. Deqa iga qalieonum, mondoŋ gago laŋ qaji jejamu dego brantqas.

1 Korin 15:46

Ŋambile Mondor na iga egej qaji di nami brantosai. Mandam qaji ŋambile di nami brantej. Ariya ŋambile Mondor na iga egej qaji di bunuqna brantej.

1 Korin 2:12

O was qu, iga mandam qaji mondor osai. Iga Mondor Bole Qotei aqaq dena bej qaji di em. Deqa iŋgi iŋgi kalil Qotei na iga egeqnu qaji di Mondor na iga osorgeqnu deqa iga qalie.

1 Korin 3:1

O was qu, e nuŋgo ambleq di soqnem bati deqa niŋgi Kristus aqa kumbra geregere qalieosaisoqneb deqa niŋgi aŋgro mom bul soqneb. Deqa anjam e na tamo uŋgasari Qotei aqa Mondor dauryeqnub qaji naŋgi minjreqnum di niŋgi olo merŋgwa keresai. Anjam e na tamo uŋgasari naŋgo areqalo namij dauryeqnub qaji naŋgi minjreqnum di segi niŋgi merŋgoqnem.

Jems 3:15

Niŋgi degyqab di niŋgi powo bole ti sqasai. Niŋgi powo uge ti sqab. Powo deqaji laŋ goge dena bosai. Di mandam qaji powo. Di gago areqalo namij aqa powo. Powo di aqa abu Satan a segi.

1 Jon 2:20

Niŋgi Qotei aqa Mondor Bole ejunub. Deqa niŋgi kalil powo ti unub.

1 Jon 2:27

Ariya niŋgi Kristus aqa Mondor Bole eb agi nuŋgoq di unu. Deqa niŋgi powo bei qa truquosaieqnub. Deqa e anjam bei totoryosiy niŋgi merŋgwasai. Qotei aqa Mondor a segi na anjam kalil niŋgi merŋgeqnaqa qusib poiŋgeqnu. Qotei aqa Mondor aqa anjam di gisaŋ sai. Di anjam bole. Deqa niŋgi Mondor aqa anjam di qusib poiŋgim Kristus beteryosib soqniye.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.

Jut 1:19

Tamo naŋgi di Kristen tamo uŋgasari naŋgi potoaiyeltnjreqnub. Osib mandam qa iŋgi iŋgi qa are koba qaleqnub. Qotei aqa Mondor naŋgoq di sosai deqa naŋgi kumbra uge degyeqnub.