1 Korin 2:12 - Yesus Aqa Anjam Bole

¹² O was qu, iga mandam qaji mondor osai. Iga Mondor Bole Qotei aqaq dena bej qaji di em. Deqa iŋgi iŋgi kalil Qotei na iga egeqnu qaji di Mondor na iga osorgeqnu deqa iga qalie.

1 Korin 2:12 ပူးပေါင်းရင်းမြစ်များ

Rom 8:1

O was qu, iga Kristus Yesus beteryejunum deqa dal anjam na gago une qa iga olo mergwa keresai. Deqa iga gago une qa olo awai uge oqasai.

Rom 8:32

Qotei na aqa segi Ŋiri Yesus getentosai. A na qariŋyonaq iga kalil aqaryaigwa bosiq moiej. A na aqa segi Ŋiri Yesus iga egej deqa iga qalieonum, a na iŋgi iŋgi kalil dego iga egoqnqas.

1 Korin 1:27

Tamo Qotei na giltnjrej qaji naŋgo utru agiende. Tamo naŋgi mandam endeqa powo ti unub qaji naŋgi na olo tamo Qotei na giltnjrej qaji naŋgi nanari qa minjreqnub. Ariya tamo nanari qa minjreqnub qaji naŋgi di Qotei na giltnjrej deqa tamo naŋgi mandam endeqa powo ti unub qaji naŋgi di Qotei na olo jemai enjreqnu. Tamo naŋgi mandam endeqa siŋgila ti unub qaji naŋgi na olo tamo Qotei na giltnjrej qaji naŋgi siŋgila saiqoji qa minjreqnub. Ariya tamo siŋgila saiqoji qa minjreqnub qaji naŋgi di Qotei na giltnjrej deqa tamo naŋgi mandam endeqa siŋgila ti unub qaji naŋgi di Qotei na olo jemai enjreqnu.

1 Korin 2:6

Bole, tamo naŋgi Qotei aqa kumbra qa tulaŋ siŋgilaeqnub qaji naŋgi iga na anjam minjreqnam quoqnsib dena naŋgi powo bole ejunub. Ariya powo di mandam qaji tamo naŋgo powo sai. Powo di mandam qaji tamo kokba padalqa gamq di unub qaji naŋgo powo sai.

1 Korin 3:22

E Pol ti Apolos ti Pita ti mandam ti ŋambile ti moio ti iŋgi iŋgi kalil bini unub qaji naŋgi ti iŋgi iŋgi kalil bunuqna brantqab qaji naŋgi ti di kalil nuŋgo.

2 Korin 4:4

Mandam endeqa qotei gisaŋ Satan a na tamo uŋgasari Kristus qa naŋgo areqalo siŋgilatosaieqnub qaji naŋgo areqalo getentejunu deqa Kristus aqa anjam bole naŋgo are miligiq aiqa keresai. Deqa naŋgi Kristus aqa suwaŋ unosaieqnub. Kristus a segi Qotei. A segi ñam koba ti unu.

Efesus 2:2

Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu.

Jems 4:5

Agi Qotei aqa anjam bei nami endegsib neŋgreŋyeb unu, “Qotei a na aqa Mondor Bole gago are miligiq di atej unu. Mondor di a iga qa tulaŋ areareteqnu. Deqa iga a qoreiyqom di a are ugeiyqas.” O was qu, anjam di laŋa sa anjam niŋgi degsib are qalonub kio?

1 Jon 2:20

Niŋgi Qotei aqa Mondor Bole ejunub. Deqa niŋgi kalil powo ti unub.

1 Jon 2:27

Ariya niŋgi Kristus aqa Mondor Bole eb agi nuŋgoq di unu. Deqa niŋgi powo bei qa truquosaieqnub. Deqa e anjam bei totoryosiy niŋgi merŋgwasai. Qotei aqa Mondor a segi na anjam kalil niŋgi merŋgeqnaqa qusib poiŋgeqnu. Qotei aqa Mondor aqa anjam di gisaŋ sai. Di anjam bole. Deqa niŋgi Mondor aqa anjam di qusib poiŋgim Kristus beteryosib soqniye.

Uli Anjam 12:9

Qotei aqa laŋ aŋgro naŋgi na amal di osib waiyonab mandamq aiej. Amal di nami soqnej qaji. Aqa ñam Satan. Aqa ñam bei, “Tamo Uŋgasari Kalil Naŋgo Ñam Ugetetnjro Qaji Tamo.” A na tamo uŋgasari kalil mandamq di so qaji naŋgi gisa gisaŋnjroqnej. A ti aqa laŋ aŋgro naŋgi ti kalil wainjrnab mandamq aieb.

Uli Anjam 22:6

Onaqa laŋ aŋgro dena olo merbej, “Anjam endi bole kalil. Tamo kalil naŋgi qusib marqab, ‘Bole.’ Tamo Koba Qotei a na aqa medabu o qaji tamo naŋgi are tigeltetnjreqnaqa naŋgi aqa anjam marsib laqnub. Ariya bini Qotei na aqa laŋ aŋgro qariŋy-qoqa bosiq aqa wau tamo kalil naŋgi kumbra urur brantqas qaji endi osornjrqo.