1 Korin 2:10 - Yesus Aqa Anjam Bole

¹⁰ O was qu, anjam di nami uliesonaqa Qotei na aqa Mondor aqa wau na babtosiq mergej. Mondor a iŋgi iŋgi kalil qa qalie. Qotei aqa areqalo kalil uliejunu qaji di Mondor a qalie.

1 Korin 2:10 ပူးပေါင်းရင်းမြစ်များ

Matyu 13:11

Onaqa Yesus na kamba minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Anjam di aqa utru uliejunu. Di e na babtitqa ijo aŋgro niŋgi segi utru qalieqab. Ariya Qotei na tamo uŋgasari naŋgi di yawo anjam aqa utru osornjrqasai.

Matyu 16:17

Pita na kamba Yesus degsi minjnaqa a na minjej, “O Saimon, Jona aqa ŋiri, ni tulaŋ areboleboleimeme. Di kiyaqa? Ino anjam merbonum di mandam tamo bei na babtosiq mermosai. Ijo Abu laŋ qureq di unu qaji a segi na anjam di babtosiq mermqo.

Luk 10:21

Bati deqa Qotei aqa Mondor a Yesus aqaq aisiq aqa areqalo siŋgilatetonaqa a tulaŋ areboleboleiyonaqa Qotei endegsi pailyej, “O Abu, ni segi laŋ qa ti mandam qa ti Koba. Deqa e ni biŋimosim ino ñam soqtonum. Ijo anjam e na tamo uŋgasari naŋgi minjreqnum qaji di ni na tamo powo ti unub qaji naŋgi qa ulitoqnsimqa tamo aŋgro du du bul naŋgi segi qa babteqnam naŋgi poinjreqnu. O Abu, ni degsim yeqnum di kere. Ni ino segi areqalo dauryosim agi degyeqnum.”

Luk 2:26

Qotei aqa Mondor na nami Simion minjej, “Ni mati moiqasai. Ni moiosaisoqnimqa Tamo Koba Qotei a na aqa Kristus qariŋyim bamqa ni unsim moiqam.”

Jon 14:26

Bunuqna Aqaryaiŋgo tamo a niŋgi qa bosim siŋgilatŋgwas. A Qotei aqa Mondor Bole. Ijo Abu na a qariŋyim ijo ñam na bosim anjam kalil niŋgi merŋgekritqas. Osim nuŋgo areqalo tigeltetŋgimqa anjam kalil e nami niŋgi merŋgoqnem qaji deqa olo are qalqab.

Jon 16:13

Ariya anjam bole qa Mondor a bosimqa nuŋgo areqalo gereiyetŋgimqa niŋgi anjam bole kalil poiŋgekritqas. A aqa segi areqalo na anjam merŋgwasai. A anjam quoqnsim di segi niŋgi merŋgoqnqas. Osim kumbra mondoŋ branteleŋqas qaji di dego ubtsim merŋgoqnqas.

1 Korin 14:30

Tamo bei a tigelosim Qotei aqa anjam palontoqnim ariya Qotei na tamo bei awejunu qaji a anjam bei osoryim tamo nami anjam palonteqnu qaji a mati medabu getentosim olo awoamqa tamo di kamba tigelosim anjam palontqas.

1 Korin 2:11

Tamo bei a tamo bei aqa areqalo qalieqa keresai. Aqa segi mondor aqa are miligiq di unu qaji a segi aqa areqalo qalie. Dego kere tamo bei a Qotei aqa areqalo qalieqa keresai. Qotei aqa Mondor a segi Qotei aqa areqalo qalie.

Galesia 1:12

E anjam di tamo bei aqa baŋq dena osai. Tamo bei na e osorbosai dego. Yesus Kristus a segi na anjam bole di babtosiq osorbej.

Efesus 3:3

Qotei aqa anjam di nami ulitesoqnej. Ariya a na olo boleq atsiqa e osorbej. Agi e deqa anjam truquyala endego neŋgreŋyonum.

Efesus 3:5

Qotei na aqa uli anjam di tamo uŋgasari nami soqneb qaji naŋgi minjrosaioqnej. Ariya bini a na aqa Mondor aqa siŋgila na anjam di babtoqnsiq aqa anjam maro tamo naŋgi ti aqa medabu o qaji tamo naŋgi ti minjreqnu.

1 Timoti 4:1

Qotei aqa Mondor a anjam endegsi babtej. Mondoŋ diŋo bati jojomoqnimqa tamo qudei naŋgi Kristus qa naŋgo areqalo siŋgilatqa uratqab. Di kiyaqa? Naŋgi gisaŋ mondor ti mondor uge uge ti naŋgo anjam qusib dauryqab deqa.

1 Pita 1:12

Ariya Qotei a na naŋgi kamba endegsi minjrej, “Anjam niŋgi mareqnub qaji di aqa damu nuŋgo bati qa brantqasai. A bunuqna brantqas.” O was qu, Qotei na niŋgi oqajqa anjam di Qotei aqa medabu o qaji tamo naŋgi maroqneb. Ariya bunuqna Qotei na aqa Mondor Bole qariŋyonaqa laŋ goge dena aisiq Qotei aqa anjam maro tamo naŋgi siŋgilatnjroqnej. Yeqnaqa naŋgi Kristus aqa anjam bole palontoqnsib niŋgi merŋgoqneb. Qotei aqa laŋ aŋgro naŋgi dego kumbra bole kalil Qotei na niŋgi eŋgeqnu qaji deqa geregere qalieqa osib utru ŋameqnub.

1 Jon 2:20

Niŋgi Qotei aqa Mondor Bole ejunub. Deqa niŋgi kalil powo ti unub.

1 Jon 2:27

Ariya niŋgi Kristus aqa Mondor Bole eb agi nuŋgoq di unu. Deqa niŋgi powo bei qa truquosaieqnub. Deqa e anjam bei totoryosiy niŋgi merŋgwasai. Qotei aqa Mondor a segi na anjam kalil niŋgi merŋgeqnaqa qusib poiŋgeqnu. Qotei aqa Mondor aqa anjam di gisaŋ sai. Di anjam bole. Deqa niŋgi Mondor aqa anjam di qusib poiŋgim Kristus beteryosib soqniye.

Uli Anjam 1:1

Nami anjam endi uliesonaqa Yesus Kristus na olo babtej. Qotei na anjam endi Yesus osoryej. Yimqa kumbra mondoŋ urur brantoqujatqas qaji di Yesus na kamba olo aqa wau tamo naŋgi osornjrqajqa deqa. Ariya Yesus a na aqa laŋ aŋgro qariŋyonaqa a e qa bosiqa anjam endi e ebej. Yim e na kamba olo aqa wau tamo qudei naŋgi minjrqajqa deqa. E Jon. E Yesus aqa wau tamo.

Uli Anjam 2:24

“‘Ariya niŋgi qudei Taiataira qureq di unub qaji nuŋgo kumbra bole agi ubtsiy merŋgwai. Niŋgi uŋa Jesebel aqa anjam dauryosaieqnub. Satan aqa kumbra dego niŋgi qaliesai. Satan aqa kumbra di tamo naŋgi ulioqnsib yeqnub. Osib mareqnub, “Di Satan aqa uli anjam.” Ariya kumbra di niŋgi qaliesai. Deqa e niŋgi gulube bei eŋgwasai.