1 Korin 16:16 - Yesus Aqa Anjam Bole

¹⁶ Niŋgi tamo deqaji naŋgo sorgomq di soqniye. Sosib tamo naŋgi tamo deqaji naŋgi aqaryainjroqnsib waueqnub qaji naŋgo sorgomq di dego soqniye.

1 Korin 16:16 ပူးပေါင်းရင်းမြစ်များ

Rom 16:12

Niŋgi Trifina wo Trifosa wo naŋgi aiyel dego ijo kaiye anjam endi minjriye. Naŋgi aiyel Tamo Koba Yesus qa waukobaeqnub. Niŋgi ijo kaiye anjam endi osib Persis dego minjiye. A ijo kadoi bole. A Tamo Koba Yesus aqa wau siŋgila na ojeqnu.

Rom 16:3

Niŋgi na ijo kaiye anjam endi osib Prisila wo Akwila wo naŋgi aiyel minjriye. Naŋgi aiyel e koba na Kristus Yesus aqa wau ojeqnum.

Rom 16:6

Niŋgi na ijo kaiye anjam endi osib Maria dego minjiye. A niŋgi aqaryaiŋgwa are qaloqnsiq waukobaoqnej.

Rom 16:9

Niŋgi Urbanus dego ijo kaiye anjam endi minjiye. A iga ti koba na Kristus aqa wau ojeqnum. Ariya niŋgi Stakis dego ijo kaiye anjam endi minjiye. A ijo kadoi bole.

1 Korin 12:28

Qotei na Kristen tamo uŋgasari naŋgi wau segi segi enjreqnu. Naŋgi qudei a na qariŋnjreqnaqa naŋgi aqa anjam osi walweloqnsib mare mare laqnub. Naŋgi qudei a na wau enjreqnu deqa naŋgi aqa medabu oqnsib anjam geregere palonteqnub. Naŋgi qudei a na wau enjreqnu deqa naŋgi aqa anjam plaltoqnsib kumbra Qotei a tulaŋ areareteqnu qaji di tamo uŋgasari naŋgi osornjreqnub. Naŋgi qudei a na siŋgila enjreqnu deqa naŋgi aqa maŋwa babteleŋeqnub. Naŋgi qudei a na siŋgila enjreqnu deqa naŋgi tamo mainjro qaji naŋgi olo boletnjreqnub. Naŋgi qudei a na wau enjreqnu deqa naŋgi na tamo uŋgasari naŋgi aqaryainjreqnub. Naŋgi qudei a na Kristen gate ateqnu deqa naŋgi na Kristen tamo uŋgasari naŋgi geregere taqatnjreqnub. Naŋgi qudei a na meŋ bulyetnjreqnu deqa naŋgi qure utru segi segi naŋgo anjam mareleŋeqnub.

1 Korin 3:9

Aqo aiyel Qotei ombla na wau ojeqnum. Qotei aqa iŋgi wau agi niŋgi segi. Niŋgi segi Qotei aqa tal bul a na gereiyej qaji.

Efesus 5:21

Kristus a nuŋgo Tamo Koba unu deqa niŋgi a qa ulaoqnsibqa kumbra dena Qotei aqa tamo uŋgasari naŋgo sorgomq di soqniye.

Filipai 4:3

O was, e ni dego endegsi mermqai. Aqo ombla wau qujai deqa ni na uŋa aiyel naŋgi di aqaryainjrimqa naŋgi are qujaitosib sqab. Naŋgi aiyel uŋa bole. Naŋgi e daurbosib ombla na Yesus aqa anjam mare mare laqnub qaji. E na tamo qudei e koba na waueqnub qaji naŋgi ti Klemem ombla na naŋgi dego minjritqa naŋgi na uŋa aiyel naŋgi di aqaryainjrebe. Naŋgo ñam di agi Qotei na ŋambile qa buk miligiq di neŋgreŋyej unu.

1 Tesalonaika 1:3

Niŋgi Kristus qa nuŋgo areqalo siŋgilateqnub deqa niŋgi kumbra bole bole yeqnub. Agi niŋgi na tamo kalil naŋgi tulaŋ qalaqalainjroqnsib naŋgi qa wau bole yeqnub. Mondoŋ gago Tamo Koba Yesus Kristus a olo bqas anjam di niŋgi nuŋgo are miligiq di siŋgilatoqnsib a qa tariŋeqnub. Iga nuŋgo kumbra deqa are qaloqnsim deqa iga nuŋgo ñam maroqnsim gago Abu Qotei biŋiyeqnum.

1 Tesalonaika 2:9

O was qu, niŋgi qalie, iga niŋgi koba na sosim Qotei aqa anjam bole niŋgi merŋgoqnem bati deqa iga waukobaoqnem. Iga na niŋgi gulube eŋgwa uratosim deqa iga gago segi baŋ na qanam ti qolo ti tulaŋ siŋgila na wauoqnsim dena gago segi iŋgi iŋgi awaiyosim uyoqnem. Niŋgi na iga silali qa aqaryaigwajqa iga deqa merŋgosaioqnem.

1 Tesalonaika 5:12

Ariya was qu, iga niŋgi endegsi merŋgwom. Niŋgi nuŋgo Kristen gate naŋgo sorgomq di soqniye. Tamo Koba Yesus a na naŋgi gate ateleŋej deqa naŋgi niŋgi aqaryaiŋgwajqa wauoqnsib Qotei aqa anjam niŋgi merŋgoqnsib nuŋgo kumbra tingitetŋgeqnub.

1 Timoti 5:17

Kristen gate naŋgi wau bole yeqnub deqa ni na tamo uŋgasari naŋgi minjrimqa naŋgi na Kristen gate naŋgo ñam soqtetnjroqnsib naŋgi iŋgi iŋgi qa aqaryainjroqnebe. Kristen gate qudei naŋgi Qotei aqa anjam palontqajqa waukobaoqnsib Qotei aqa gam bole tamo uŋgasari naŋgi osornjreqnub. Deqa ni na tamo uŋgasari naŋgi minjrimqa naŋgi na Kristen gate naŋgi di tulaŋ geregereinjroqnebe.

Hibru 13:17

Nuŋgo Kristen gate naŋgi na nuŋgo qunuŋ taqateqnub. Deqa mondoŋ Qotei a naŋgo wau deqa nenemnjrimqa naŋgi kamba a minjqab. Deqa niŋgi naŋgo medabu geregere dauryoqnsib naŋgo sorgomq di soqniye. Niŋgi degyqab di naŋgi arebolebole na niŋgi taqatŋgwab. Naŋgi are gulube ti niŋgi taqatŋgwasai. Ariya naŋgi are gulube ti niŋgi taqatŋgwab di naŋgi na niŋgi geregere aqaryaiŋgwa keresai.

Hibru 13:24

Niŋgi na ijo kaiye anjam endi osib Kristen gate kalil naŋgi ti Qotei aqa tamo uŋgasari kalil naŋgi ti minjriye. Itali tamo qudei bosib endia unub qaji naŋgi na dego niŋgi kaiyeiŋgonub.

Hibru 6:10

Niŋgi wau bolequja yoqnsib Qotei tulaŋ qalaqalaiyoqnsib aqa segi tamo uŋgasari naŋgi geregereinjroqneb. Niŋgi nami degyoqneb agi bini niŋgi degyeqnub. Qotei a tamo uge sai. A tamo bole deqa a nuŋgo kumbra di unoqnsiq olo are walyosaieqnu.

1 Pita 5:5

O aŋgro wala, niŋgi Kristen gate naŋgo sorgomq di soqniye. Sosib niŋgi kalil nuŋgo segi ñam aguq atoqnsib Qotei aqa tamo uŋgasari naŋgo sorgomq di soqniye. Agi Qotei aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.”

3 Jon 1:8

Deqa iga na tamo deqaji naŋgi aqaryainjroqnqom. Iga degyqom di iga naŋgi koba na wau qujai sosim Qotei aqa anjam bole siŋgilatoqnqom.

Uli Anjam 2:3

Ni ijo ñam ojejunum deqa tamo qudei naŋgi na ni numoqnsib ugeugei-meqnub. Ariya e qalieonum, ni siŋgila na tigeloqnsimqa gulube di qoboiyeqnum. Ni asgimosaieqnu.