1 Korin 14:37 - Yesus Aqa Anjam Bole

³⁷ Nuŋgo ambleq di tamo bei a endegsi are qalqas, “Qotei na e wau ebej deqa e aqa medabu o qaji tamo bole.” O a endegsi are qalqas, “E Qotei aqa Mondor ti unum.” Di a kere are qalqo. Ariya tamo di a olo endegsi poiyem, “Anjam Pol na neŋgreŋyosiq iga qa qariŋyqo qaji endi Tamo Koba Qotei aqa segi dal anjam.”

1 Korin 14:37 ပူးပေါင်းရင်းမြစ်များ

Luk 10:16

Yesus a anjam degsi marsiqa aqa aŋgro naŋgi endegsi minjrej, “Tamo bei a nuŋgo anjam qusim dauryqas di a ijo anjam dego qusim dauryqas. Ariya tamo a niŋgi qoreiŋgwas di a e dego qoreibqas. Tamo a e qoreibqas di ijo Abu e qariŋbej qaji a dego qoreiyqas.”

Rom 12:3

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

1 Korin 14:29

Tamo aiyel kio tamo qalub kio naŋgi segi Qotei aqa medabu oqnsib anjam palontoqnebe. Tamo gargekoba naŋgi anjam palontoqnaib. Ariya naŋgi anjam palontosib merŋgoqnibqa naŋgo anjam bole kio sai kio deqa osib pegiyoqniye.

1 Korin 14:36

O was qu, Qotei aqa anjam nuŋgoq dena brantej e? Niŋgi segi na Qotei aqa anjam eb e? Sai.

1 Korin 14:38

Ariya tamo bei a ijo anjam endi qusim uratimqa niŋgi na endegsib minjiye, “Ni Qotei aqa medabu o qaji tamo bolesai.”

1 Korin 2:15

Deqa tamo naŋgi Qotei aqa Mondor ti unub qaji naŋgi laŋ qaji iŋgi iŋgi kalil geregere pegiyeqnub. Ariya tamo bei na naŋgo kumbra pegiyqa keresai.

1 Korin 3:1

O was qu, e nuŋgo ambleq di soqnem bati deqa niŋgi Kristus aqa kumbra geregere qalieosaisoqneb deqa niŋgi aŋgro mom bul soqneb. Deqa anjam e na tamo uŋgasari Qotei aqa Mondor dauryeqnub qaji naŋgi minjreqnum di niŋgi olo merŋgwa keresai. Anjam e na tamo uŋgasari naŋgo areqalo namij dauryeqnub qaji naŋgi minjreqnum di segi niŋgi merŋgoqnem.

1 Korin 7:25

Ariya e na tamo naŋgi uŋa ti sosai qaji naŋgi Tamo Koba Qotei aqa dal anjam bei minjrqasai. E ijo segi areqalo na naŋgi anjam bei endegsi minjrqai. Tamo Koba Qotei a e qa tulaŋ dulej deqa e qalieonum, ijo anjam endi bole.

1 Korin 7:40

Ariya ijo areqalo agiende. Uŋa di a olo tamo bei oqa uratosim laŋa sqas di a areboleboleiyim sqas. Qotei aqa Mondor a ijoq di unu deqa e anjam di niŋgi merŋgonum.

1 Korin 8:2

Tamo bei a marqas, “E powo ti unum.” A degsi marqo deqa iga qalieonum, aqa powo kereosaiunu.

2 Korin 10:12

Tamo qudei naŋgi diqoqnsib naŋgo segi ñam soqteqnub qaji iga naŋgi unub dego sai. Gago kumbra ti naŋgo kumbra ti kerekere unub iga degsi marqa keresai. Tamo naŋgi di naŋgo segi kumbra na naŋgo kumbra laŋa pegiyeqnub. Osib tamo qudei naŋgo kumbra na dego naŋgo segi kumbra olo pegiyeqnub. Tamo naŋgi kumbra degyeqnub qaji naŋgi tulaŋ powo saiqoji.

2 Korin 10:7

Niŋgi laŋa babaŋ na tamo naŋgo kumbra unsib tenemtaib. Niŋgi geregere tenemtiye. Tamo bei a endegsi marqas, “E Kristus aqa tamo bole.” Ariya a endegsi poiyem, a Kristus aqa tamo qa marqo deqa iga dego Kristus aqa tamo. A degsi poiyem.

2 Korin 11:4

E ulaonum. Di kiyaqa? E qalieonum, tamo qudei naŋgi niŋgi qa boqnsib gisaŋgoqnsib Yesus bei qa anjam palontosib merŋgeqnub. Yesus deqa iga nami anjam palontosaioqnem. Tamo naŋgi di mondor bei qa dego niŋgi merŋgeqnub. Di gisaŋ mondor. Mondor deqa iga nami niŋgi merŋgosaioqnem. Yesus aqa anjam bole iga nami niŋgi merŋgoqnem qaji di dego tamo qudei naŋgi bulbulyoqnsib olo anjam bei niŋgi merŋgeqnub. E qalieonum, naŋgi anjam di niŋgi merŋgeqnab niŋgi quoqnsib bole edegoqnsib dauryeqnub. O was qu, niŋgi degaib.

Galesia 6:8

Tamo bei na aqa areqalo namij dauryqas di aqa areqalo namij dena kumbra uge babtqas. Yim a padalqas. Ariya tamo bei a Qotei aqa Mondor aqa kumbra dauryqas di Mondor na a ŋambile yimqa a so bole gaigai sqas.

1 Jon 4:6

Ariya iga Qotei aqa tamo. Deqa tamo naŋgi Qotei qa qalieonub qaji naŋgi gago anjam queqnub. Ariya tamo naŋgi Qotei qa qaliesai qaji naŋgi gago anjam quosaieqnub. Kumbra dena iga anjam bole qa Mondor ti gisaŋ mondor ti qalieonum.

Jut 1:17

Ariya ijo was bole, niŋgi kumbra mondoŋ brantqas qaji deqa are qaloqniye. Nami gago Tamo Koba Yesus Kristus a na aqa anjam maro tamo naŋgi qariŋnjreqnaqa niŋgi qa boqnsib anjam merŋgoqneb. Naŋgo anjam deqa niŋgi olo are qaloqniye.