1 Korin 14:3 - Yesus Aqa Anjam Bole

³ Ariya tamo naŋgi Qotei aqa medabu oqnsib anjam palonteqnub qaji naŋgi anjam aqa damu geregere babteqnab tamo naŋgi quoqnsib poinjreqnu. Deqa anjam dena naŋgo areqalo siŋgilatetnjroqnsiq naŋgi kumbra bole yqajqa are tigeltetnjroqnsiq naŋgo are miligi boletetnjreqnu.

1 Korin 14:3 ပူးပေါင်းရင်းမြစ်များ

Luk 3:18

Jon a tamo uŋgasari naŋgi anjam degsi minjroqnsiqa anjam gargekoba dego naŋgo are qametnjrqajqa deqa minjroqnej. A Qotei aqa anjam utru bole bole babtoqnsiqa naŋgi minjroqnej.

Aposel 14:22

Naŋgi aiyel degsib giloqnsibqa tamo uŋgasari Yesus dauryoqneb qaji naŋgo are siŋgilatetnjroqnsib minjroqneb, “Niŋgi Yesus qa nuŋgo areqalo siŋgilatosib soqniye. Bole, niŋgi gulube gargekoba iteleŋoqnqab. Di uŋgum. Gulube nuŋgoq boqnibqa Qotei a nuŋgo Mandor Koba sosim niŋgi taqatŋgoqnqas.”

Aposel 15:32

Judas wo Sailas wo naŋgi Qotei aqa medabu o qaji tamo. Deqa naŋgi aiyel anjam olekoba Yesus aqa tamo uŋgasari naŋgi minjrnab qunabqa anjam dena naŋgo are siŋgilatetnjrej.

Aposel 4:36

Naŋgo ambleq di tamo bei soqnej aqa ñam Josep. Aqa ñam bei Barnabas. Yesus aqa aŋgro 12-pela naŋgi na ñam di waiyeb. Aqa ñam di aqa damu, “Tamo are siŋgilatetnjro qaji.” Barnabas a Juda naŋgo moma utru Jekop aqa aŋgro Livai aqa leŋ. A Saiprus nui qaji.

Aposel 9:31

Bati deqa Judia sawaq dia, Galili sawaq dia, Samaria sawaq dia dego tamo uŋgasari Yesus qa naŋgo areqalo siŋgilateb qaji naŋgi geregere lawo na soqneb. Naŋgi bati gaigai Tamo Koba Qotei aqa ñam biŋiyoqnsibqa aqa anjam dauryeqnabqa Qotei aqa Mondor na naŋgo are siŋgilatetnjreqnaqa tamo uŋgasari tulaŋ gargekoba are bulyoqnsib naŋgo miligiq aieqnab naŋgi tulaŋ kobaoqneb.

Rom 12:8

A na tamo qudei naŋgi aqa segi tamo uŋgasari naŋgo areqalo siŋgilatetnjrqajqa powo enjrej deqa naŋgi naŋgo areqalo geregere siŋgilatetnjroqnebe. A na tamo qudei naŋgi silali iŋgi iŋgi jeisib tamo uŋgasari iŋgi qa truqueqnub qaji naŋgi enjrqajqa powo enjrej deqa naŋgi silali iŋgi iŋgi koba koroiyosib jeisib enjroqnebe. A na tamo qudei naŋgi aqa wau taqatqajqa powo enjrej deqa naŋgi na wau di geregere taqatoqnebe. A na tamo qudei naŋgi aqa segi tamo uŋgasari naŋgi qa dulosib geregereinjrqajqa powo enjrej deqa naŋgi arebolebole na naŋgi geregereinjroqnebe.

Rom 14:19

Deqa iga kalil lawo na sqajqa ti gago Kristen was naŋgo are siŋgilatetnjrqajqa ti deqa are qaloqnsim wauoqnqom.

Rom 15:2

Iga segi segi na gago Kristen was naŋgi aqaryainjroqnqom. Osim dena iga naŋgo are siŋgilatetnjrim naŋgi bole sqab.

1 Korin 10:23

Iga kumbra kalil yqa kere. Ariya iga kumbra kalil di yqom dena iga aqaryaigwa keresai. Bole, iga kumbra kalil yqa kere. Ariya kumbra kalil dena gago areqalo siŋgilatetgwa keresai.

1 Korin 14:12

O was qu, niŋgi qure utru segi segi naŋgo anjam maroqnqab di niŋgi kumbra di itqab. E qalieonum, niŋgi Qotei aqa Mondor aqa kumbra oqajqa tulaŋ siŋgilaeqnub. Ariya niŋgi na Kristen tamo uŋgasari naŋgo areqalo siŋgilatetnjrqa maroqnsib deqa Qotei aqa Mondor aqa kumbra oqajqa olo tulaŋ siŋgila na wauoqniye.

1 Korin 14:17

Bole, ni Qotei pailyosim biŋiyonum di bolequja. Ariya tamo di a ino pail qusiq poiyosai deqa ino pail dena aqa areqalo siŋgilatetosai.

1 Korin 14:26

Deqa was qu, niŋgi Qotei louqa korooqnsibqa niŋgi endegyoqniye. Niŋgi kalil segi segi wau ti deqa niŋgi qudei louoqniye. Niŋgi qudei Qotei aqa anjam plaltoqniye. Niŋgi qudei Qotei aqa uli anjam ubtoqniye. Niŋgi qudei meŋ bulyosib qure utru segi segi naŋgo anjam maroqniye. Niŋgi qudei qure utru segi segi naŋgo anjam aqa damu poiŋgim bulyosib palontoqniye. O was qu, nuŋgo wau segi segi dena niŋgi na Kristen tamo uŋgasari naŋgi siŋgilatnjroqniye.

1 Korin 14:31

Niŋgi segi segi kalil kumbra di dauryosib Qotei aqa medabu oqnsib anjam palontoqniye. Palontoqnib Kristen tamo uŋgasari kalil naŋgi qusib qalie osib anjam dena naŋgo are siŋgilatetnjroqnqas.

1 Korin 8:1

Ariya e na sulum atrainjro qaji iŋgi iŋgi uyqajqa kumbra qa niŋgi merŋgwai. Tamo qudei naŋgi endegsib mareqnub, “Iga kalil powo ti unum.” Di naŋgi bole mareqnub. Ariya naŋgo powo dena naŋgi olo tulaŋ diqoqnsib naŋgo segi ñam soqtoqnsib laqnub. Ariya iga qalaqalaiyo kumbra dauryqom dena iga Kristen tamo uŋgasari naŋgo areqalo siŋgilatetnjroqnqom.

2 Korin 1:4

Deqa a gago gulube kalil qa gago are latetgeqnu. Yeqnaqa aqa kumbra dena iga na olo kamba tamo uŋgasari gulube ti unub qaji naŋgo are latetnjreqnum.

2 Korin 2:7

Deqa bini niŋgi olo kumbra bulyosib aqa une kobotetosib aqa are latetiye. Yim a are boleqas. Niŋgi degyqasai di a olo are tulaŋ gulube ti so uge.

Efesus 4:29

Niŋgi nuŋgo medabu waqtoqnsib anjam uge uge maroqnaib. Niŋgi anjam bole segi maroqnsib dena tamo naŋgi gulube ti unub qaji naŋgi olo siŋgilatnjroqniye. Yoqnim naŋgi nuŋgo anjam di quoqnib dena Qotei a naŋgi qa are tulaŋ boleiyoqnsim kumbra bole bole enjroqnqas.

Efesus 6:22

E na a qariŋyonum niŋgi qa bqo. Iga kiersim unum di a na niŋgi merŋgwas. Osim nuŋgo are siŋgilatetŋgwas.

Kolosi 4:8

E na a qariŋyonum niŋgi qa bqo. Di kiyaqa? Iga kiersi unum di a na niŋgi saiŋgim niŋgi qusib dena nuŋgo are siŋgilatqab.

1 Tesalonaika 2:11

Niŋgi qalie, abu naŋgi na naŋgo aŋgro naŋgi tingitnjroqnsib dalnjreqnub dego kere iga na niŋgi dego tingitŋgoqnsim dalŋgoqnem.

1 Tesalonaika 2:3

Bati deqa iga niŋgi metŋgosim endegsi merŋgoqnem, “Niŋgi Yesus qa nuŋgo areqalo siŋgilatiye.” Bati di iga anjam uge bei merŋgosaioqnem. Iga nuŋgo ambleq di sosim kumbra jiga ti gisaŋ kumbra ti yosaioqnem.

1 Tesalonaika 3:2

Marsimqa Timoti qariŋyonam niŋgi qa bej. Timoti a gago Kristen was bole. A Qotei aqa wau tamo. A Kristus aqa anjam bole maro qaji tamo. Iga na a qariŋyonam niŋgi qa bej. A na niŋgi aqaryaiŋgosim nuŋgo areqalo Yesus qa siŋgilateqnub qaji di olo siŋgilatetŋgwajqa deqa marsim a qariŋyonam niŋgi qa bej.

1 Tesalonaika 4:1

O was qu, kumbra bole kalil Qotei a tulaŋ areareteqnu qaji di iga nami niŋgi osorŋgoqnem agi niŋgi dauryeqnub. Ariya bini iga nuŋgo are miligi siŋgilatetŋgosim Tamo Koba Yesus aqa ñam na endegsi merŋgwom. Niŋgi kumbra di olo torei siŋgilatosib yoqniye.

1 Tesalonaika 4:18

Deqa niŋgi na anjam di Qotei aqa tamo uŋgasari naŋgi minjroqnsibqa dena naŋgo are siŋgilatetnjroqniye.

2 Tesalonaika 3:12

Deqa iga Tamo Koba Yesus Kristus aqa ñam na tamo naŋgi deqaji endegsi minjrqom, “Niŋgi lawo na sosib wauoqnsib nuŋgo segi iŋgi iŋgi awaiyosib uyoqniye.”

1 Timoti 1:4

O was qu, gisaŋ tamo naŋgi di laŋa sa anjam ti naŋgo moma naŋgo ñam qa ti anjam koba laŋa laŋa mareleŋeqnub. Deqa ni na tamo naŋgi di minjrim naŋgo kumbra di uratqab. Naŋgo anjam di tamo uŋgasari naŋgi minjroqnsib dena naŋgo areqalo tulaŋ ugeugeiyetnjreqnub. Deqa tamo uŋgasari naŋgi di Qotei qa naŋgo areqalo siŋgilatqa yeqnab anjam dena naŋgi aqaryainjrosaieqnu. Od, iŋgi bole bole Qotei na iga egwa mareqnu qaji di naŋgi qalieqa yeqnab anjam dena naŋgi yala aqaryainjrosaieqnu.

1 Timoti 4:13

E ni qa urur bosaiotqa Kristen tamo uŋgasari naŋgi louqa korooqnibqa ni tigeloqnsim Qotei aqa anjam sisiyoqnsim anjam aqa damu palontoqnsim Qotei aqa kumbra dauryqa gam osornjroqne.

1 Timoti 6:2

Kaŋgal tamo qudei naŋgo wau qa gate naŋgi Kristen tamo. Deqa ni na kaŋgal tamo naŋgi di minjrimqa naŋgi endegsib are qalaib, “Gago wau qa gate naŋgi gago Kristen was qu. Deqa uŋgum, iga naŋgo anjam gotraŋyoqnqom.” Naŋgi degsib are qalaib. Ni na naŋgi minjrimqa naŋgi endegsib are qalqab, “Gago wau qa gate naŋgi Kristen tamo bole. Deqa iga na naŋgi qalaqalainjroqnqom.” Naŋgi degsib are qalqab di naŋgi naŋgo wau qa gate naŋgi geregere wauetnjroqnqab. O Timoti, ni gaigai Kristen tamo uŋgasari naŋgi kumbra bole dauryqajqa minjroqnsim are tigeltetnjroqnimqa naŋgi kumbra bole kalil e nami mermonum qaji di yoqnqab.

2 Timoti 4:2

Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne.

Taitus 1:9

A Yesus aqa anjam bole iga na palonteqnum qaji di siŋgila na ojeqnu di ni unsim a gate ate. Atimqa a wau di ojsim a na kamba anjam bole kalil di palontoqnsim dena tamo uŋgasari naŋgo are tigeltetnjroqnim naŋgi dauryoqnqab. Tamo qudei naŋgi Yesus aqa anjam di gotraŋyoqnib a siŋgila na naŋgi minjroqnim naŋgi naŋgo segi une qa poinjroqnqas.

Taitus 2:15

O Taitus, ni gaigai tamo uŋgasari naŋgi anjam di minjroqnimqa naŋgi qusib dauryoqnqab. Tamo uŋgasari anjam gotraŋyeqnub qaji naŋgi dego siŋgila na minjroqnimqa naŋgi kumbra uge uratoqnqab. Tamo bei na ino anjam di uge qa maraiq.

Taitus 2:6

Ariya ni na aŋgro meli naŋgi dego are tigeltetnjroqnimqa naŋgi naŋgo kumbra geregere taqatoqnebe.

Taitus 2:9

Ariya Taitus, ni na kaŋgal tamo naŋgi anjam endegsim minjroqne, “Niŋgi gaigai nuŋgo wau qa gate naŋgo sorgomq di sosib wau bole bole naŋgi arearetnjreqnu qaji di yoqniye. Niŋgi nuŋgo wau qa gate naŋgo medabu ojoqnaib.

Hibru 10:25

Iga Qotei aqa tamo uŋgasari unum deqa iga aqa ñam qa korooqnqajqa uratqasai. Agi Kristen tamo qudei naŋgi korooqnqajqa asginjreqnu. Niŋgi qalie, Kristus olo bqajqa bati jojomqo. Deqa iga segi segi korooqnsimqa gago Kristen was naŋgo are siŋgilatetnjroqnqom.

Hibru 13:22

O was qu, e na nuŋgo are siŋgilatetŋgwajqa deqa marsim anjam endi neŋgreŋyonum. Deqa niŋgi ijo anjam endi geregere qusib dauryoqniye. Di kiyaqa? E anjam truquyala neŋgreŋyonum deqa.

Hibru 3:13

Bati gaigai iga mareqnum, “Bini bati endi”. Deqa niŋgi bati gaigai Qotei aqa tamo uŋgasari naŋgi anjam bole minjroqnsib naŋgo areqalo tigeltetnjroqniye. Nuŋgo ambleq di une aqa kumbra na tamo bei gisaŋyim aqa are miligi getento uge.

1 Pita 5:12

Anjam truquyala endi Sailas na e aqaryaibosiqa neŋgreŋyosiq niŋgi qa qariŋyqo. E qalieonum, Sailas a gago Kristen was bole. O was qu, Qotei a niŋgi qa are tulaŋ boleiyeqnu. E segi qalieo-num, Qotei a bati gaigai aqa kumbra di niŋgi osorŋgeqnu. E aqa kumbra deqa osim anjam endi neŋgreŋyonum. Deqa ijo anjam endena e na nuŋgo are tigeltetŋgitqa niŋgi siŋgila na tigelesoqniye.

Jut 1:20

Ariya ijo was bole, nuŋgo areqalo Qotei qa siŋgilateqnub qaji di niŋgi siŋgila na ojesoqnibqa dena nuŋgo are tulaŋ siŋgilaqas. Osib niŋgi bati gaigai Mondor Bole aqa siŋgila na pailyoqniye.