1 Korin 13:4 - Yesus Aqa Anjam Bole

⁴ Tamo naŋgi qalaqalaiyo kumbra dauryqab di naŋgi naŋgo was naŋgi qa urur minjiŋ oqoqnqasai. Naŋgi lawo na tamo kalil naŋgi kumbra bole enjroqnqab. Naŋgo was bei a iŋgi iŋgi koba ti soqnim naŋgi a qa are ugeinjrqasai. Naŋgi naŋgo segi ñam soqtoqnqasai dego.

1 Korin 13:4 ပူးပေါင်းရင်းမြစ်များ

Matyu 27:18

Pailat a naŋgi degsi minjrej. Di kiyaqa? A qalieej, atra tamo kokba naŋgi Yesus qa are tulaŋ minjiŋ oqetnjrnaqa deqa ojsib Pailat aqa baŋq di ateb.

Aposel 7:9

“Onaqa bati bei Jekop aqa aŋgro 11-pela naŋgi naŋgo was Josep qa ugeosib a ojsib tamo qudei naŋgo baŋq di atnabqa naŋgi na silali enjrsib Josep osi sumsib Isip sawaq dia uratonab soqnej. Ariya Josep a Isip sawaq di sosiqa a tamo kobaquja bei wauetoqnej. Josep a gulube ti sonaqa Qotei na aqaryaiyoqnsiqa geregereiyoqnej. Osiqa Josep powo koba yeqnaqa a Isip naŋgo mandor koba aqa ulatamuq dia kumbra tulaŋ boledamu yeqnaqa unoqnsiqa Josep qa are tulaŋ boleiyonaq soqnej. Deqa a na Josep minjej, ‘Ni Isip naŋgo gate koba sqam.’ Degsi minjej deqa Josep a Isip sawa taqatoqnej. Isip naŋgo mandor koba aqa tal dego taqatoqnej.

Rom 1:29

Naŋgo kumbra uge agiende. Naŋgi kumbra bole tiŋtiŋ yqajqa torei urateqnub. Naŋgi ñoro koba oqajqa mamaulnjreqnu. Naŋgi tamo naŋgi jeutnjreqnub. Naŋgi tamo qudei iŋgi koba ti unub qaji naŋgi qa are ugeinjreqnu. Naŋgi tamo naŋgi ñumsib moiotnjreqnub. Naŋgi laŋa laŋa ŋiriŋoqnsib gisaŋ anjam mareqnub. Naŋgi tamo qudei naŋgo iŋgi iŋgi laŋa yainjreqnub. Naŋgi tamo qudei naŋgi ugeugeinjreqnub. Kumbra di naŋgoq di tulaŋ koba unu. Naŋgi yomueqnub.

Rom 13:13

Tamo a qanam walweleqnu dego kere iga kumbra bole tiŋtiŋ na walweloqnqom. Deqa iga diqoqnsim alaŋkobaoqnsim ya uge uyoqnsim nanarioqnqasai. Iga sambala kumbra dego yoqnqajqa are pruggoqnim kumbra uge jigat yoqnqasai. Iga laŋa laŋa ŋiriŋoqnsim tamo qudei naŋgi qa are ugegoqnqasai.

1 Korin 3:3

Di kiyaqa? Niŋgi nuŋgo areqalo namij dauryeqnub deqa. Agi niŋgi nuŋgo was naŋgi qa are ugeiŋgeqnaqa ombla anjam na qotoqnsib laqnub. Nuŋgo kumbra di jejamu qa kumbra uge. Di mandam qaji tamo naŋgo kumbra.

1 Korin 4:18

Ariya niŋgi qudei are qaleqnub, e niŋgi qa bqasai. Osib deqa niŋgi diqoqnsib laqnub.

1 Korin 4:6

O was qu, aqo Apolos wo gago kumbra qa agi e na niŋgi merŋgonum. Niŋgi gago kumbra deqa are qalsib Qotei aqa anjam neŋgreŋq di unu qaji di niŋgi geregere dauryosib olo gotraŋyaib deqa niŋgi merŋgonum. Deqa was qu, niŋgi diqoqnsib tamo qudei naŋgo ñam soqtetnjroqnsib olo tamo qudei naŋgo ñam aguq atoqnaib.

1 Korin 5:2

Tamo di a sambala kumbra di yeqnu deqa niŋgi are ugeiŋgonaq akamosaieqnub. Niŋgi diqoqnsib laqnub. Niŋgi are ugeiŋgej qamu niŋgi tamo di osib nuŋgo ambleq dena taqal waiyeb qamu.

1 Korin 8:1

Ariya e na sulum atrainjro qaji iŋgi iŋgi uyqajqa kumbra qa niŋgi merŋgwai. Tamo qudei naŋgi endegsib mareqnub, “Iga kalil powo ti unum.” Di naŋgi bole mareqnub. Ariya naŋgo powo dena naŋgi olo tulaŋ diqoqnsib naŋgo segi ñam soqtoqnsib laqnub. Ariya iga qalaqalaiyo kumbra dauryqom dena iga Kristen tamo uŋgasari naŋgo areqalo siŋgilatetnjroqnqom.

2 Korin 12:20

Di kiyaqa? E niŋgi qa ulaeqnum. E niŋgi qa bosiy nuŋgo kumbra unsiy e niŋgi qa areboleboleibqas kio sai kio? Niŋgi dego ijo kumbra unsib niŋgi e qa areboleboleiŋgwas kio sai kio? E deqa ulaeqnum. E niŋgi qa bosiy nuŋgo kumbra endegsi unqai kio? Niŋgi anjam na qoteqnub. Niŋgi nuŋgo was naŋgi qa are ugeiŋgeqnu. Niŋgi minjiŋ oqeqnu. Niŋgi pupoeqnub. Niŋgi nuŋgo was qudei naŋgi misiliŋnjreqnub. Niŋgi yomueqnub. Niŋgi diqeqnub. Niŋgi Qotei aqa wau ugeugeiyeqnub. E degsi unqai kio?

2 Korin 6:6

Iga gaigai kumbra bole jiga saiqoji dauryeqnum. Iga Qotei qa qalie bole unum. Iga urur minjiŋ oqosaieqnu. Iga na tamo uŋgasari naŋgi kumbra bole enjreqnum. Iga Qotei aqa Mondor Bole aqa siŋgila oqnsim unum. Iga na tamo kalil naŋgi qalaqalaiyo kumbra osornjreqnum. Iga laŋa medabu na naŋgi qalaqalainjrosaieqnum.

Galesia 5:26

Iga gago segi ñam laŋa soqtqasai. Iga Kristen tamo qudei naŋgo are ugetetnjroqnsim qotoqnqasai. Iga gago was iŋgi koba ti unub qaji naŋgi qa are ugeigwasai dego.

Efesus 4:2

Osib niŋgi Kristen tamo uŋgasari naŋgo sorgomq di geregere sosibqa naŋgi lawo kumbra enjroqniye. Naŋgi niŋgi une bei eŋgibqa niŋgi kamba olo naŋgi qa urur minjiŋ oqaiq. Niŋgi olo naŋgi qalaqalainjroqnsib gulube naŋgi na niŋgi eŋgeqnub qaji di qoboiyetnjroqniye.

Efesus 4:32

Osib nuŋgo Kristen was naŋgi kumbra bole bole enjroqnsib naŋgi qalaqalainjroqnsib naŋgo une kobotetnjroqniye. Qotei a Kristus aqa ñam na nuŋgo une kalil kobotetŋgej deqa niŋgi na kamba olo nuŋgo was naŋgo une dego kobotetnjroqniye.

Filipai 1:15

Bole, tamo qudei naŋgi na ijo ñam tentib aguq aiqajqa deqa are qaloqnsib naŋgo are uge na Kristus aqa anjam mare mare laqnub. Ariya tamo qudei naŋgi are bole na Kristus aqa anjam mare mare laqnub.

Kolosi 1:11

O was qu, iga niŋgi qa degsim Qotei pailyeqnum. Osim olo endegsi pailyeqnum, “O Abu, ni na ino segi siŋgila kobaquja osim Kolosi Kristen naŋgi enjroqnim naŋgi siŋgila na tigeloqnsib gulube kalil qoboiyoqnqab. Osib lawo na sosib gulube di koboqajqa bati qa tariŋoqnsib tulaŋ areboleboleinjroqnim sqab.”

Kolosi 2:18

Tamo qudei naŋgi na niŋgi endegsib merŋgwab, “Niŋgi nuŋgo segi ñam tentoqnsib olo laŋ aŋgro naŋgi qa louoqniye. Iga ŋeiobilqei na kumbra di unsim deqa niŋgi degsi merŋgonum.” O was qu, niŋgi tamo di naŋgo anjam quetnjraib. Tamo deqaji naŋgi naŋgo areqalo namij dauryoqnsib endegsib mareqnub, “Iga powo bole ti unum.”

Kolosi 3:12

Qotei a niŋgi aqa segi tamo uŋgasari sqa marsiq giltŋgej deqa a na niŋgi tulaŋ qalaqalaiŋgeqnu. Deqa niŋgi kumbra endegyoqniye. Niŋgi nuŋgo Kristen was naŋgi qa duloqnsib kumbra bole bole enjroqniye. Osib niŋgi nuŋgo segi ñam tentoqnsib tamo naŋgi lawo na gereinjroqniye. Tamo qudei naŋgi na niŋgi une bei eŋgibqa niŋgi kamba olo naŋgi qa urur minjiŋ oqaiq.

1 Tesalonaika 5:14

O was qu, iga na nuŋgo are tigeltetŋgimqa niŋgi na tamo naŋgi wauqajqa asginjreqnu qaji naŋgo kumbra olo tingi-tetnjroqniye. Osib tamo naŋgi ulaeqnub qaji naŋgo are siŋgila-tetnjroqniye. Osib tamo siŋgila saiqoji unub qaji naŋgi olo aqaryainjroqniye. Osib tamo kalil naŋgi lawo na geregereinjroq-niye.

1 Timoti 6:4

Deqa iga qalieonum, tamo deqaji naŋgi naŋgo segi areqalo dauryqajqa tulaŋ arearetnjreqnaqa diqoqnsib laqnub. Deqa naŋgi powo saiqoji sosibqa anjam kiñilala qudei qa laŋa ŋiriŋoqnsib ñam qudei qa anjam na qotoqnsib unub. Naŋgi anjam degsib mareqnub deqa naŋgi tamo naŋgi qa are ugeinjreqnaqa laŋa qoto itnjroqnsibqa misiliŋ anjam koba minjroqnsib naŋgi qa areqalo uge ti laqnub.

2 Timoti 2:25

Ni na Qotei aqa wau tamo naŋgi minjrimqa naŋgi lawo na tamo naŋgi Qotei aqa anjam gotraŋyeqnub qaji naŋgo areqalo tingitetnjroqnebe. Yimqa Qotei na naŋgo are bulyetnjrimqa naŋgi aqa anjam bole poinjroqnim dauryoqnqab.

2 Timoti 3:10

Ariya Timoti, ni nami e ombla soqnem deqa ijo anjam kalil e na tamo uŋgasari naŋgi minjre minjre laqnem qaji di ni qalie. Ijo walwel ti ijo kumbra ti di ni qalie. E Qotei qa ijo areqalo siŋgilatoqnsim ijo are miligi dego gaigai siŋgilatoqnsim waukobaoqnsim tamo uŋgasari naŋgi qalaqalainjroqnsim siŋgila na tigeloqnsim gulube qoboiyeqnum di dego ni qalie.

2 Timoti 4:2

Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne.

Taitus 3:3

Ni qalie, iga dego nami areqalo uge ti sosimqa Qotei aqa anjam gotraŋyoqnem. Bati di Satan a na iga gisa gisaŋgeqnaqa iga Qotei aqa gam bole dauryqa uratosim kumbra uge dauryqajqa are pruggeqnaqa gago segi jejamu qa tulaŋ areboleboleigoqnej. Kumbra dena iga siŋgila na ojesoqnej. Deqa iga minjiŋ ti are uge ti sosim walweloqnem. Tamo naŋgi na iga jeutgeqnabqa iga na kamba dego naŋgi jeutnjroqnem.

Jems 4:5

Agi Qotei aqa anjam bei nami endegsib neŋgreŋyeb unu, “Qotei a na aqa Mondor Bole gago are miligiq di atej unu. Mondor di a iga qa tulaŋ areareteqnu. Deqa iga a qoreiyqom di a are ugeiyqas.” O was qu, anjam di laŋa sa anjam niŋgi degsib are qalonub kio?

1 Pita 2:1

Niŋgi ŋambile bunuj eb deqa niŋgi kumbra uge kalil uratiye. Gisaŋ anjam ti maqu kumbra ti are uge ti yomu anjam ti kalil di niŋgi torei uratekritiye.

1 Pita 3:8

Ariya e na ijo anjam endi kobotqa osiy niŋgi endegsi merŋgwai. Niŋgi kalil koba na geregere are qujaitosib soqniye. Sosibqa tamo kalil naŋgi qa duloqnsib Qotei aqa tamo uŋgasari naŋgi dego qalaqalainjroqnsib naŋgi qa are boleiŋgoqneme. Osib nuŋgo segi ñam aguq atoqniye.

1 Pita 4:8

E anjam kobaquja bei dego niŋgi merŋgit quiye. Niŋgi Qotei aqa tamo uŋgasari naŋgi tulaŋ qalaqalainjroqniye. Di kiyaqa? Qalaqalaiyo kumbra na une gargekoba kabutoqnsiqa tulaŋ buŋye-junu.

2 Pita 1:7

Osib dena niŋgi nuŋgo Kristen was qu naŋgi kadoinjrsib geregereinjroqniye. Osib dena niŋgi qalaqalaiyo kumbra dauryosib soqniye.

1 Jon 4:11

O ijo kadoi bole, Qotei aqa kumbra dena iga osorgej, a na iga tulaŋ qalaqalaigeqnu. Deqa iga na kamba Kristen tamo uŋgasari naŋgi dego qalaqalainjroqnqom.