1 Korin 1:30 - Yesus Aqa Anjam Bole

³⁰ Qotei a segi na niŋgi eleŋosiqa Kristus Yesus aqa baŋq di atej unub. Deqa Kristus aqa wau na iga Qotei aqa areqalo bole ti aqa powo ti unum. Aqa wau na iga tamo bole tiŋtiŋo unum. Aqa wau na iga Qotei aqa segi kumbra boleq di sosim walweleqnum. Aqa wau na Qotei na iga gago uneq dena olo awaigej deqa gago une na iga olo taqatgosai.

1 Korin 1:30 ပူးပေါင်းရင်းမြစ်များ

Matyu 1:21

Deqa aqa aŋgro mel ŋambabqas. A na aqa segi tamo uŋasari naŋgo une kalil kobotetnjrsim naŋgi eleŋqas. Deqa ni aqa ñam Yesus waiyqam.”

Luk 11:49

“Utru deqa Qotei a endegsi marqo, ‘E na ijo medabu o qaji tamo naŋgi ti tamo naŋgi ijo anjam mare mare laqnub qaji naŋgi ti qariŋnjritqa tamo uŋgasari bini bati endeqa unub qaji naŋgoq giloqnibqa naŋgi na naŋgi jeutnjroqnsib tulaŋ ugeugeinjroqnqab. Qudei ñumoqnib moreŋoqnqab.’ Qotei a powo koba ti unu deqa a degsi marqo.

Luk 21:15

Di kiyaqa? E segi na nuŋgo medabu siŋgilatetŋgsiy areqalo eŋgitqa niŋgi kamba anjam minjroqnqab. Minjroqnibqa naŋgi na anjam bei nuŋgo jejamuq di qametŋgwa yoqnib ugeinjroqnqas.

Jon 1:18

Tamo bei na Qotei aqa ulatamu unosai. Qotei aqa Ŋiri qujai a segi Qotei. A aqa Abu Qotei aqa areq di sosiqa beteryejunu. A na qujai iga Qotei osorgej.

Jon 14:6

Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai.

Jon 17:26

E na ino ñam naŋgi osornjroqnem. Naŋgi olo osornjrqai. Yimqa ni na e tulaŋ qalaqalaibeqnum dego kere naŋgi dego ino qalaqalaiyo kumbra ti sqab. Amqa e segi naŋgi ti sqai.”

Jon 17:8

Anjam kalil ni na e merboqnem qaji di e na kamba naŋgi minjreqnam naŋgi quoqnsib endegsi poinjrej, e nami ni ombla sosim dena bem. Deqa naŋgi e qa naŋgo areqalo siŋgilatosib qalieeb, ni na e qariŋbonam bem.

Jon 8:12

Yesus a uŋa degsi minjnaq gileqnaqa a na tamo uŋgasari naŋgi olo endegsi minjrej, “E mandam endeqa puloŋ. Tamo a e daurbqas di a ambruq di walwelqasai. A suwaŋoq di walweloqnsim ŋambile gaigai sqas.”

Aposel 26:18

Ni naŋgoq gilsim ijo anjam minjroqnimqa naŋgi e qa poinjroqnim ambru uratosib suwaŋoq bqab. Satan a na naŋgi joqej unu. Deqa ni na naŋgi are bulyetnjroqnimqa naŋgi Satan aqa siŋgila uratosib Qotei aqaq giloqnqab. Amqa e na naŋgo une kalil kobotetnjritqa naŋgi tamo uŋgasari nami e qa naŋgo areqalo siŋgilateb qaji naŋgi ti koba na ijo segi tamo uŋgasari boledamu sqab.’

Rom 1:17

Anjam bole dena Qotei na aqa kumbra iga osorgej. Aqa kumbra agiende. A na iga tamo bole une saiqoji qa mergej. Iga Yesus qa gago areqalo siŋgilatem dena a na iga tamo bole une saiqoji qa mergej. Di kiyaqa? Iga Yesus qa gago areqalo siŋgilatqom gam dena qujai iga Qotei aqa ŋamgalaq di tamo bole une saiqoji sqom. Agi Qotei aqa anjam bei nami endegsib neŋgreŋyeb unu, “Qotei na tamo uŋgasari a qa naŋgo areqalo siŋgilateqnub qaji naŋgi tamo bole une saiqoji qa minjrqas. Yim deqa naŋgi ŋambile gaigai sqab.”

Rom 11:36

O was qu, Qotei a iŋgi iŋgi kalil ateleŋej. A iŋgi iŋgi kalil qa utru. Iŋgi iŋgi kalil di aqa segi. Deqa iga bati gaigai aqa ñam soqtoqnqom. Bole.

Rom 12:5

Dego kere iga tamo uŋgasari gargekoba unum. Ariya iga kalil Kristus aqa jejamu qujai. Deqa iga segi segi kalil koba na korooqnsim jejamu qujaiq di turtejunum.

Rom 16:11

Osib ijo kadoi Herodion a dego ijo kaiye anjam endi minjiye. Ariya niŋgi ijo kaiye anjam endi osib Narsisus a ti aqa leŋ naŋgi ti dego minjriye. Naŋgi Tamo Koba Yesus aqa tamo bole.

Rom 16:7

Niŋgi na ijo kaiye anjam endi osib Andronikus wo Junias wo naŋgi aiyel dego minjriye. Naŋgi aiyel ijo leŋ naŋgi. Jeu tamo naŋgi na naŋgi aiyel e ombla na ojeleŋosib tonto talq breigonab soqnem. Qotei na naŋgi aiyel wau enjrej deqa naŋgi aqa anjam maroqnsib laqnub. Deqa naŋgi aiyel dego ñam ti. Nami e are bulyosaisonam naŋgi namoqna are bulyosib Kristus qa naŋgo areqalo siŋgilateb.

Rom 4:25

Qotei na Yesus uratonaqa naŋgi na a qalnab moiej. Yim a gago une kobotqajqa deqa. Onaqa Qotei na Yesus olo subq na tigeltosiq dena iga tamo bole une saiqoji qa mergej.

Rom 4:6

Devit a dego nami anjam deqaji maroqnej. Agi a marej, “Tamo naŋgi kumbra bole bei yosaiibqa Qotei a laŋa naŋgi tamo bole une saiqoji qa minjrqas di naŋgi tulaŋ areboleboleinjrqas.”

Rom 5:19

Tamo qujai Adam a Qotei aqa anjam gotraŋyej. Aqa kumbra dena tamo uŋgasari gargekoba naŋgi dego une eleŋeb. Dego kere tamo qujai Kristus a Qotei aqa anjam dauryej. Aqa kumbra dena tamo uŋgasari gargekoba naŋgi tamo bole une saiqoji sqab.

Rom 5:21

Une aqa kumbra na moio babtej deqa une na iga siŋgila na taqatgesoqnej. Ariya bini Qotei a iga qa are tulaŋ boleiyeqnu aqa kumbra dena iga olo taqatgejunu. Gago Tamo Koba Yesus Kristus aqa wau na Qotei a iga qa are tulaŋ boleiyoqnsiqa iga tamo bole une saiqoji qa mergeqnu. Kumbra dena iga ŋambile gaigai sqom.

Rom 8:1

O was qu, iga Kristus Yesus beteryejunum deqa dal anjam na gago une qa iga olo mergwa keresai. Deqa iga gago une qa olo awai uge oqasai.

Rom 8:23

Iŋgi iŋgi kalil di naŋgi segi akamosai. Iga Qotei aqa Mondor ejunum deqa iga dego akamoqnsim unum. Qotei na aqa Mondor iga namo egej. Iga Qotei aqa aŋgro unum deqa iga dego jaqatiŋ oqnsim akamoqnsim unum. Mondoŋ Qotei na iga aqa segi aŋgro qa boleq na endegsi marqas, “Naŋgi ijo aŋgro kalil.” O was qu, bati di brantqajqa deqa iga tariŋoqnsim unum. Bati di brantimqa Qotei na gago jejamu bulyetgosim jejamu bunuj egwas.

Rom 8:9

Ariya niŋgi areqalo namij na walwelosaieqnub. Qotei aqa Mondor a nuŋgo are miligiq di unu deqa niŋgi aqa kumbra na walweleqnub. Tamo a Kristus aqa Mondor ti sqasai di a Kristus aqa tamo sqa keresai.

1 Korin 1:2

Niŋgi Korin qureq dia Qotei qa loueqnub qaji. Kristus Yesus a na niŋgi osiqa Qotei aqa segi kumbra boleq di atej. Osiqa niŋgi aqa segi tamo sqa marsiqa giltŋgej. Niŋgi ti Kristen tamo uŋgasari kalil qure qure kalilq dia gago Tamo Koba Yesus Kristus aqa ñam qa louoqnsib pailyeqnub qaji naŋgi ti Qotei na turtŋgosiqa aqa segi tamo sqa marsiqa niŋgi giltŋgej. Yesus a gago Tamo Koba. A Kristen tamo kalil dego naŋgo Tamo Koba.

1 Korin 1:24

Ariya tamo uŋgasari Qotei na metnjrej qaji agi Juda ti Grik ti naŋgi qalieonub, Kristus a Qotei aqa siŋgila ti unu. A Qotei aqa powo ti dego unu.

1 Korin 12:18

Ariya gago jejamu a degsi sosai. Qotei na gago baŋ ti siŋga ti ŋamdamu ti dabkala ti kalil osiqa jejamu qujaiq di ateleŋej unub. A aqa segi areqalo na degyej.

1 Korin 12:27

Ariya niŋgi kalil Kristus aqa jejamu qujai. Niŋgi segi segi aqa jejamu sarqei unub.

1 Korin 12:8

Qotei aqa Mondor na tamo qudei naŋgi siŋgila enjreqnu deqa naŋgi areqalo bole babtoqnsib tamo uŋgasari naŋgi minjreqnub. Mondor qujai dena tamo qudei naŋgi siŋgila enjreqnaqa naŋgi Qotei aqa qalie bole babtoqnsib tamo uŋgasari naŋgi osornjreqnub.

1 Korin 4:15

Tamo 10,000 naŋgi na Kristus aqa kumbra niŋgi osorŋgoqnqab di uŋgum. Niŋgi abu gargekoba sai. Agi e segi qujai nuŋgo abu. E qujai namo Kristus Yesus aqa anjam niŋgi merŋgonam qusib are bulyeb. Dena e nuŋgo abuem.

1 Korin 6:11

Nami niŋgi qudei tamo deqaji soqneb. Ariya bunuqna niŋgi are bulyeb deqa Qotei na nuŋgo are miligi yansetŋgosiqa niŋgi aqa segi kumbra boleq di atsiqa Tamo Koba Yesus Kristus aqa ñam na ti gago Qotei aqa Mondor aqa siŋgila na ti niŋgi gereiŋgej. Deqa bini niŋgi aqa ŋamgalaq di tamo bole une saiqoji unub.

2 Korin 12:2

Ŋeiobilqei agiende. Nami wausau 14 koboej endi Qotei na Kristus aqa tamo bei osi oqsiqa torei laŋ qureq oqej. Laŋ qure di tulaŋ goge koba. Tamo oqej qaji di e qalie. Tamo di agi e segi. A jejamu korbi oqej kio aqa jejamu uratosiq oqej kio di e qaliesai. Qotei a segi qalie.

2 Korin 4:6

Tulaŋ nami Qotei a iŋgi iŋgi kalil gereiyqa osiqa a endegsi marej, “Ambruq dena suwaŋ brantqas.” Ariya bunuqna Qotei aqa suwaŋ di iga qa bosiqa gago are miligi suwantetgej deqa iga Kristus aqa ulatamu uneqnum. Dena iga suwaŋ bole unsimqa Qotei aqa riaŋ ti aqa siŋgila ti geregere poigeqnu.

Galesia 1:4

Kristus a gago Abu Qotei aqa areqalo dauryosiq deqa a gago une kobotqa marsiqa aqa segi ŋambile uratosiq moiej. A na iga eleŋamqa iga mandam qa kumbra uge kalil uratqajqa deqa marsiq iga qa moiej.

Galesia 3:13

Ariya dal anjam a marqo, iga dal anjam kalil torei dauryqasai di Qotei na iga tamo uge qa marsim padaltgwas. Ariya Kristus a na iga aqaryaigwa marsiq deqa a gago sawa osiqa a segi Qotei aqa ŋamgalaq di tamo uge bulosiqa iga qa padalej. Agi Qotei aqa anjam bei nami endegsib neŋgreŋyeb unu, “Tamo kalil ŋamtaŋ goge di gaiŋejunub qaji naŋgi di Qotei na tamo uge qa marsim padaltnjrqas.”

Efesus 1:10

Deqa a kumbra endegyqas. A na iŋgi iŋgi kalil mandam ti laŋ ti di unub qaji naŋgi taqatnjroqnsim gilsi gilsim bati a nami atej qaji di brantimqa a na iŋgi iŋgi kalil di olo osim Kristus aqa baŋq di atim a naŋgo gate sqas.

Efesus 1:14

Iga Qotei aqa Mondor ejunum deqa iga qalieonum, bunuqna iga na iŋgi bole bole kalil Qotei a nami aqa segi tamo uŋgasari naŋgi enjrqajqa marej qaji di oqom. Mondoŋ Qotei na iga awaigosim sawa boleq di atim bati deqa iga na iŋgi bole bole kalil di oqom. Iga deqa bini tariŋoqnsim unum. O was qu, iga Qotei aqa wau deqa are qaloqnsim aqa ñam soqtoqnqom.

Efesus 1:7

Qotei a iga qa are boleiyej aqa kumbra di tulaŋ kobaquja. Aqa kumbra di aqa utru agiende. A na Kristus qariŋyonaqa a iga awaigwa marsiqa moiej. Moisiqa aqa leŋ aiej dena Qotei na gago une kalil kobotetgej.

Efesus 2:10

Kristus Yesus aqa wau na Qotei na iga tamo uŋgasari bunuj gereigosiqa ŋambile egej. Di kiyaqa? Kumbra bole qa gam a na nami iga gereiyetgej qaji di iga dauryosim walweloqnqajqa deqa.

Efesus 4:30

Niŋgi na Qotei aqa Mondor Bole are gulube yaib. Mondor di Qotei aqa segi toqor. Mondor di a na niŋgi eŋgej. Deqa niŋgi qalieonub, niŋgi aqa segi tamo uŋgasari tiŋtiŋ unub. Mondoŋ Qotei na niŋgi awaiŋgosim sawa boleq di atim bati deqa niŋgi so bole gaigai sqab. Niŋgi di qalieqajqa deqa Qotei na aqa Mondor Bole niŋgi eŋgej.

Efesus 5:26

Kristus a ya na ti aqa segi anjam na ti iga yansgej deqa iga aqa ŋamgalaq di tamo bole une saiqoji unum. Kumbra dena iga Kristus aqa segi tamo uŋgasari tiŋtiŋ unum.

Filipai 3:9

Osiy a segi beteryesqai. E dal anjam dauryqai gam dena e Qotei aqa ŋamgalaq di tamo bole sqa keresai. Gam bei na e tamo bole sqai. Gam agiende. E Kristus qa ijo areqalo siŋgilatqai. Od, iga Kristus qa gago areqalo siŋgilatqom gam dena qujai Qotei na iga mergwas, “Niŋgi ijo ŋamgalaq di tamo bole une saiqoji unub.”

Kolosi 1:14

Agi Qotei aqa Ŋiri a nami iga awaigosiqa gago une kobotetgej.

Kolosi 3:16

Osib niŋgi Kristus aqa anjam osib nuŋgo are miligiq di siŋgilatib soqnem. Osib niŋgi na nuŋgo Kristen was qu naŋgi areqalo bole ti powo ti osornjroqniye. Yim naŋgi kumbra bole bole yoqnqajqa deqa. Niŋgi nuŋgo are miligiq di Qotei biŋiyoqnsib a qa louoqniye. Lou qudei neŋgreŋq di unu qaji dena ti lou qudei Qotei aqa Mondor na nuŋgo are miligiq di ateqnu qaji dena ti niŋgi Qotei qa louoqniye.

1 Tesalonaika 5:23

Qotei a are lawo qa utru. A na nuŋgo areqalo tigeltetŋgimqa niŋgi nuŋgo segi jejamu osib a yekritosib aqa segi kumbra boleq di sosib dauryoqniye. Qotei a na nuŋgo mondor ti nuŋgo qunuŋ ti nuŋgo jejamu ti kalil taqatesoqnimqa niŋgi so bole sqab. Sosib mondoŋ gago Tamo Koba Yesus Kristus a olo bqas bati deqa niŋgi torei une saiqoji sqab.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

Hibru 9:12

Ariya Kristus a bulmakau ti kaja du du ti naŋgo leŋ osiqa atra tal di miligiq gilosai. A aqa segi leŋ osiqa bati qujai qa atra tal miligiq gilej. Aqa wau dena a na iga olo awaigej. Deqa iga ŋambile gaigai sqom.

Jems 1:5

Nuŋgo ambleq di tamo bei a powo qa truquosimqa a Qotei pailyem. Yimqa Qotei na a powo yqas. Niŋgi qalie, Qotei a gaigai tamo kalil naŋgi iŋgi bole bole enjreqnu. Naŋgi pailyeqnab a naŋgi qa olo ŋiriŋosaieqnu.

1 Pita 1:2

Tulaŋ nami Qotei Abu a niŋgi qa qalieosiq deqa niŋgi aqa segi tamo uŋgasari sqa marsiqa niŋgi giltŋgej. Qotei aqa Mondor Bole a na niŋgi Qotei aqa segi kumbra boleq di atimqa niŋgi nuŋgo jejamu Qotei yekritosib Yesus Kristus aqa anjam geregere dauryosib sqajqa deqa osiqa niŋgi aqaryaiŋgej. Yim Yesus aqa leŋ na niŋgi yansŋgimqa niŋgi Qotei aqa ŋamgalaq di une saiqoji sqajqa deqa. Qotei a niŋgi qa are tulaŋ boleiyimqa niŋgi geregere lawo na soqniye.

2 Pita 1:1

E Saimon Pita. E Yesus Kristus aqa wau tamo. A na e qariŋbej deqa e aqa anjam marsim laqnum. Kristus a gago Qotei. A na iga padalo sawaq dena eleŋej. Niŋgi ti iga ti gago areqalo qujai. Agi iga kalil Yesus qa gago areqalo siŋgilateqnum. Yesus Kristus a kumbra tiŋtiŋ yeqnu qaji tamo. Aqa kumbra dena niŋgi a qa nuŋgo areqalo siŋgilateqnub. Agi iga a qa gago areqalo siŋgilateqnum dego kere.

1 Jon 5:6

Yesus Kristus a bosiqa ya na yanso ej. Osiq ŋamburbasq di moinaqa aqa leŋ aiej. A ya na yanso oqajqa deqa segi bosai. A moiimqa aqa leŋ aiqajqa deqa ti bej. Qotei aqa Mondor a anjam bole qa utru. A Yesus Kristus aqa kumbra qa anjam palonteqnu.

Uli Anjam 14:4

Tamo 144,000 naŋgi di nami uŋa ti sambalaosaioqneb. Deqa naŋgo jejamu yala jigatosai. Naŋgi une saiqoji. Kaja Du a walwelosiq sawa sawaq gileqnaqa naŋgi a dauryosib laqnub. Tamo uŋgasari kalil mandamq di unub qaji naŋgo ambleq dena Qotei na tamo 144,000 naŋgi di awaiyeleŋej. Tamo naŋgi di Qotei na eleŋej deqa naŋgi iŋgi meli bunuj bulosib Qotei wo Kaja Du wo naŋgo segi tamo unub.

Uli Anjam 5:9

Wagme qolqe naŋgi ti gate kokba naŋgi ti bosib Kaja Du aqa areq di siŋga pulutosibqa lou bunuj na endegsib louoqneb, “O Kaja Du, ni buk di osimqa kandel aqa namur buk qandratejunu qaji di waqtqa kere. Di kiyaqa? Ni lumnab moisim ino leŋ aiej dena ni na ino segi tamo uŋgasari naŋgi awainjrsimqa Qotei aqa baŋq di ateleŋem unub. Od, tamo uŋgasari leŋ segi segi qaji, anjam maro segi segi qaji, jejamu segi segi qaji, sawa segi segi qaji naŋgi ni na awainjrsimqa Qotei aqa baŋq di ateleŋem unub.