1 Jon 4:9 - Yesus Aqa Anjam Bole

⁹ Qotei aqa Ŋiri qujai unu. Qotei na aqa Ŋiri di qariŋyonaq mandamq aiej. Yim iga aqa ñam na ŋambile gaigai sqajqa deqa. Qotei aqa kumbra dena iga osorgej, a na iga tulaŋ qalaqalaigeqnu.

1 Jon 4:9 ပူးပေါင်းရင်းမြစ်များ

Mak 12:6

Onaqa wau lanja a endegsi are qalej, ‘Ijo segi aŋgro qujai e na tulaŋ qalaqalaiyeqnum qaji di qariŋyit aiqas di naŋgi a qalqasai. Naŋgi aqa anjam quetqab.’

Luk 4:18

“Tamo Koba Qotei na e giltbej deqa aqa Mondor ijoq di unu. A na e giltbosiqa endegsi merbej, ‘Ni na tamo uge uge naŋgi ijo anjam bole plaltosim minjroqne.’ Agi Qotei na e qariŋbonaq mandamq aiem deqa e na tamo uŋgasari naŋgo segi une na siŋgila na ojejunu qaji naŋgi Qotei aqa anjam bole minjroqnitqa naŋgo une uratoqnqab. E na tamo ŋam qandimo unub qaji naŋgi boletnjroqnitqa naŋgi olo ŋamdamu poinjroqnqas. Tamo naŋgi naŋgo jeu tamo na ugeugeinjreqnub qaji naŋgi aqaryainjroqnitqa naŋgo gulube kobooqnqas.

Jon 10:10

“Bajiŋ tamo naŋgi iŋgi bei qa bosaieqnub. Naŋgi kaja bajiŋosib ñumqajqa deqa beqnub. Ariya e degyqa bosai. E na kaja naŋgi ŋambile enjritqa naŋgi ŋambile sqajqa e deqa bem.

Jon 14:6

Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai.

Jon 3:16

“Qotei aqa Ŋiri qujai unu. Qotei na tamo uŋgasari kalil mandamq endi unub qaji naŋgi tulaŋ qalaqalainjrsiq deqa aqa segi Ŋiri qujai di naŋgi enjrej. A endegsi are qalej, ‘Tamo uŋgasari kalil ijo Aŋgro qa naŋgo areqalo siŋgilatqab qaji naŋgi di padalqasai. Naŋgi ŋambile gaigai sqab.’ Qotei a degsi are qalsiq deqa aqa segi Ŋiri qujai naŋgi enjrej.

Jon 3:18

Qotei na tamo naŋgi Yesus qa naŋgo areqalo siŋgilateqnub qaji naŋgi peginjrqasai. Ariya tamo naŋgi Yesus qa naŋgo areqalo siŋgilatosaieqnub qaji naŋgi Qotei na peginjrqas. Di kiyaqa? Naŋgi aqa segi Ŋiri aqa ñam qa naŋgo areqalo siŋgilatosai deqa.

Jon 5:23

E wau di yeqnum deqa tamo kalil naŋgi ijo Abu aqa ñam soqteqnub dego kere naŋgi ijo ñam dego soqtetboqnqab. Di kiyaqa? E Qotei aqa Ŋiri deqa. Tamo naŋgi ijo ñam soqtosaieqnub qaji naŋgi ijo Abu e qariŋbej qaji aqa ñam dego soqtosaieqnub.

Jon 6:29

Onaqa Yesus na kamba minjrej, “Qotei aqa wau agi merŋgwai. Niŋgi tamo Qotei na qariŋyej qaji a qa nuŋgo areqalo siŋgilatiye. Tamo di agi e segi.”

Jon 6:51

E segi ŋambile qa bem bole laŋ qure uratosim mandamq aiem qaji. Tamo bei a bem di uyqas di a ŋambile gaigai sqas. Bem di agi ijo segi jejamu. E na tamo uŋgasari mandamq endi unub qaji naŋgi ijo segi jejamu naŋgi anainjrit uyqab. Uysib naŋgi ŋambile sqab.”

Jon 6:57

Ijo Abu ŋambile unu qaji a na e qariŋbej deqa aqa siŋgila na e segi dego ŋambile unum. Dego kere tamo naŋgi ijo jejamu ti ijo leŋ ti uyqab di naŋgi dego ijo siŋgila na ŋambile sqab.

Jon 8:29

Ijo Abu e qariŋbej qaji a e ombla sosiqa taqbejunu. A na e uratbosaieqnu. Di kiyaqa? E gaigai kumbra kalil a tulaŋ areareteqnu qaji di yeqnum.”

Jon 8:42

Onaqa Yesus na minjrej, “Qotei a nuŋgo Abu qamu niŋgi e qalaqalaibonub qamu. Di kiyaqa? E Qotei aqaq dena bem deqa. E ijo segi areqalo na bosai. Qotei na e qariŋbonaq bem.

Jon 9:3

Onaqa Yesus na kamba minjrej, “Tamo di aqa segi une na sai. Aqa ai wo abu wo naŋgo une na sai dego. Qotei na tamo di boletimqa aqa wau di boleq dimqa tamo uŋgasari naŋgi unsib Qotei aqa ñam soqtqab. Utru deqa tamo di ai miligiq na ŋam qandimo ŋambabej.

Rom 8:32

Qotei na aqa segi Ŋiri Yesus getentosai. A na qariŋyonaq iga kalil aqaryaigwa bosiq moiej. A na aqa segi Ŋiri Yesus iga egej deqa iga qalieonum, a na iŋgi iŋgi kalil dego iga egoqnqas.

Hibru 1:5

Nami Qotei na aqa Ŋiri Yesus endegsi minjej, “Ni ijo segi Aŋgro. Bini e ino Abu unum.” Osiqa olo anjam bei dego aqa Ŋiri qa endegsi marej, “E aqa Abuqai. A ijo Aŋgro sqas.” Ariya Qotei na aqa laŋ aŋgro naŋgi anjam degsi minjrosaioqnej.

1 Jon 3:16

Yesus a aqa segi ŋambile uratosiq iga qa moiej. Aqa kumbra dena a na iga qalaqalaiyo kumbra osorgej. Deqa iga dego gago Kristen was naŋgi qa are qalsim gago segi ŋambile uratosim naŋgi qa moreŋqom.

1 Jon 4:10

Qotei a qalaqalaiyo kumbra qa utru. Deqa iga endegsi are qalqasai, iga namoqna Qotei qalaqalaiyem. Di sai. Qotei a namoqna iga qalaqalaigej. Osiqa aqa Ŋiri qariŋyonaq mandamq aisiqa gago une kobotosiqa Qotei aqa minjiŋ taqal waiyej.

1 Jon 4:16

Kumbra dena iga bole qalieonum, Qotei na iga tulaŋ qalaqalaigeqnu. Aqa qalaqalaiyo kumbra di gago are miligiq di unu. Deqa iga Qotei qa gago areqalo siŋgilateqnum. Qotei a segi qalaqalaiyo kumbra qa utru. Tamo a qalaqalaiyo kumbra dauryqas di a na Qotei beteryesqas. Yim Qotei na a kamba dego beteryesqas.

1 Jon 5:11

Kumbra dena Qotei na iga osorgej, aqa anjam bole. Qotei na iga ŋambile gaigai sqajqa marsiq iga ŋambile egej. Ŋambile di aqa utru Qotei aqa Ŋiri aqaq di unu.

1 Jon 5:13

E na anjam endi neŋgreŋyosim niŋgi tamo uŋgasari Qotei aqa Ŋiri aqa ñam qa nuŋgo areqalo siŋgilateqnub qaji niŋgi qa qariŋyonum. Yim niŋgi qalieqajqa, niŋgi ŋambile gaigai sqab.