1 Jon 3:5 - Yesus Aqa Anjam Bole

⁵ Niŋgi qalie, Kristus a gago une kobotqa bej. A segi une saiqoji.

1 Jon 3:5 ပူးပေါင်းရင်းမြစ်များ

Matyu 1:21

Deqa aqa aŋgro mel ŋambabqas. A na aqa segi tamo uŋasari naŋgo une kalil kobotetnjrsim naŋgi eleŋqas. Deqa ni aqa ñam Yesus waiyqam.”

Luk 23:41

Aqo aiyel une tamo. Deqa iga kere moreŋqom. Ariya Yesus aqa jejamuq di une bei saiqoji.”

Luk 23:47

Onaqa qaja tamo naŋgo gate koba a Yesus degsi mondor titosiq moiej di unsiqa a Qotei aqa ñam soqtosiqa marej, “Bole, Yesus aqa jejamuq di une bei saiqoji.”

Jon 1:29

Nebeonaqa Yesus a walwelosiq Jon aqa areq beqnaqa unsiqa marej, “Niŋgi uniye. Tamo di a Qotei aqa Kaja Du. A na qujai tamo uŋgasari mandamq endi unub qaji naŋgo une kobotetnjrqajqa bej.

Jon 1:31

E nami a qa qaliesai. Ariya Israel tamo uŋgasari naŋgi a qa qalieqajqa deqa e bosim ya na tamo naŋgi yansnjreqnum.”

Jon 14:30

“Mandam endeqa gate koba Satan a beqnu. Deqa e olo anjam olekoba titsiy merŋgoqnsiy sqasai. Satan a na e gulube bei ebqa keresai.

Jon 8:46

E une yonum niŋgi degsib are qaleqnub e? Niŋgi degsib are qalqab di niŋgi ijo une babtiye. Ariya e anjam bole marqai di niŋgi kiyaqa ijo anjam nuŋgo areqaloq di siŋgilatosaieqnub?

2 Korin 5:21

Kristus a une yosaieqnu. Ariya Qotei na iga aqaryaigwa marsiq deqa a gago une kalil osiqa Kristus aqa qawarq di atnaqa a une tamo bulej. Iga Yesus beteryosim aqa siŋgila na iga Qotei aqa segi tamo uŋgasari tiŋtiŋ sqajqa deqa osiq gago une kalil osiqa Kristus aqa qawarq di atej.

1 Timoti 1:15

Kristus Yesus a na iga tamo uŋgasari une yeqnum qaji iga eleŋqa marsiq deqa mandamq aiej. Anjam di bole. Tamo kalil naŋgi qusib marqab, “Bole.” O Timoti, e nami une gargekoba yoqnem deqa e na une tamo kalil naŋgi tulaŋ buŋnjroqnem.

1 Timoti 3:16

Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

Hibru 1:3

Yesus a na Qotei aqa riaŋ koba iga osorgeqnu. Yesus aqa so ti Qotei aqa so ti ombla kerekere. Aqa anjam siŋgila ti unu deqa anjam dena a na iŋgi iŋgi kalil siŋgilatejunu. A na gago une kobotetgosiqa laŋ qureq oqsiq Qotei siŋgila koba ti unu qaji aqa baŋ woq di awejunu.

Hibru 4:15

Iga segi siŋgila saiqoji. Deqa iga na gago une aqa siŋgila kobotqa keresai. Ariya gago atra tamo kobaquja unu agi Yesus. Deqa iga endegsi are qalqasai, Yesus a gago une qa iga aqaryaigwa keresai. Iga degsi are qalqasai. Satan na iga walawalaigoqnsiqa uneq waigwa laqnu dego kere Satan na Yesus dego uneq waiyqa maroqnsiq walawalaiyoqnej. Ariya Yesus a segi une saiqoji.

Hibru 7:26

Yesus a atra tamo kobaquja dego deqa a na iga tulaŋ aqaryaigwa kere. A gaigai Qotei aqa segi kumbra boleq di sosiq dauryeqnu. A une bei saiqoji. A Qotei aqa ŋamgalaq di tamo tulaŋ boledamu. Qotei na a osi oqsiq laŋ qureq di awotej unu deqa a une tamo naŋgo ambleq di sosai. A isaq di unu.

Hibru 9:26

A bati gargekoba degyoqnej qamu Qotei na nami mandam atej bati deqa a jaqatiŋ oqnsiq bosi bosiq agi bini a olo jaqatiŋ eqnu qamu. Ariya diŋo bati jojomqo deqa Kristus a bati qujai qa mandamq aisiq a gago une kobotqa marsiq aqa segi jejamu osiq Qotei atraiyej.

Hibru 9:28

Dego kere Kristus a bati qujai qa tamo gargekoba naŋgo une qoboiyetnjrqa marsiqa aqa segi jejamu osiq Qotei atraiyej. Ariya mondoŋ a olo laŋ qureq dena bosimqa a tamo uŋgasari naŋgo une olo kobotetnjrqasai. A bosim tamo uŋgasari a qa tariŋeqnub qaji naŋgi oqas.

1 Pita 1:18

Niŋgi qalie, nami niŋgi nuŋgo moma naŋgo kumbra uge uge dauryoqneb. Ariya Qotei a nuŋgo kumbra ugeq dena niŋgi olo awaiŋgej. Mandam qa ñoro ti gol ti silva ti koboqas qaji dena niŋgi awaiŋgosai.

1 Pita 1:20

Tulaŋ nami Qotei a mandam atosaisosiqa a Kristus qa qalieosiqa a giltej. Kristus na niŋgi awaiŋgwajqa deqa marsiq a giltej. Ariya bini bati endeqa diŋo bati jojomqo deqa Qotei a niŋgi qa osiqa Kristus qariŋyonaq bej.

1 Pita 2:22

Kristus a une bei yosaioqnej. Aqa medabu na gisaŋ anjam bei dego marosaioqnej.

1 Pita 2:24

Kristus a gago une kalil qoboiyosiqa aqa segi jejamuq di atsiqa a ŋamburbasq di iga qa gaiŋej. Iga gago une kalil torei uratosim ŋambile sosim kumbra tiŋtiŋ yoqnqajqa deqa osiqa ŋamburbasq di iga qa gaiŋej. Jeu tamo naŋgi na Yesus qalougetosib jaqatiŋ koba yeb. Onaqa aqa jaqatiŋ dena a na iga olo boletgej.

1 Pita 3:18

Niŋgi Kristus qa are qaloqniye. Kristus a tamo tiŋtiŋo. Ariya a na tamo uŋgasari uge uge naŋgo sawa osiq naŋgo une qa osiq moiej. A na niŋgi joqsim Qotei aqaq oqwajqa deqa osiq niŋgi qa moiej. A bati qujai qa moiej deqa a olo moiqa keresai. A tamo bulyosiqa mandamq endi soqnej. Sonaqa jeu tamo naŋgi na a qalnab moiej. Ariya a olo subq na tigelosiqa a mondor ti soqnej.

1 Jon 1:2

Ŋambile di boleq donaqa iga unem. Iga ŋambile deqa mare mare laqnum. Ŋambile di gaigai sqas. Nami ŋambile di aqa Abu wo sosiqa boleq donaqa iga unem. Deqa iga a qa niŋgi merŋgeqnum.

1 Jon 1:7

Qotei a suwaŋoq di unu dego kere iga dego suwaŋoq di walwelqom di iga Qotei aqa tamo uŋgasari kalil naŋgi ti areqalo qujaitosim sqom. Soqnimqa Qotei aqa Ŋiri Yesus aqa leŋ aiej qaji dena gago une kalil kobotetgoqnimqa iga aqa ŋamgalaq di tamo bole une saiqoji sqom.

1 Jon 2:1

O ijo aŋgro kiñilala, niŋgi une yaib deqa e na anjam endi neŋgreŋyosim niŋgi qa qariŋyonum. Ariya nuŋgo ambleq di tamo bei a une yimqa aqaryaiŋgo tamo Yesus Kristus a na tamo di aqaryaiyqas. Yesus a aqa Abu ombla sosiqa a gaigai kumbra tiŋtiŋ yeqnu.

1 Jon 2:2

A gago une kobotosiqa Qotei aqa minjiŋ taqal waiyej. A iga segi aqaryaigwa osiq wau di yosai. Tamo uŋgasari kalil mandamq endi unub qaji naŋgi dego aqaryainjrqa marsiq wau di yej.

1 Jon 2:29

Niŋgi qalie, Kristus aqa kumbra kalil tiŋtiŋo. Deqa niŋgi endegsib qalieoiye. Tamo kalil kumbra tiŋtiŋ yeqnub qaji naŋgi Qotei aqa segi aŋgro bole tiŋtiŋ unub.

1 Jon 3:8

Satan a nami une atsiq boqnej agi bini degsi unu. Deqa tamo a une atoqnqas di a Satan aqa tamo sqas. Ariya Qotei aqa Ŋiri a Satan aqa wau kobotqa bej.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.