1 Jon 3:16 - Yesus Aqa Anjam Bole

¹⁶ Yesus a aqa segi ŋambile uratosiq iga qa moiej. Aqa kumbra dena a na iga qalaqalaiyo kumbra osorgej. Deqa iga dego gago Kristen was naŋgi qa are qalsim gago segi ŋambile uratosim naŋgi qa moreŋqom.

1 Jon 3:16 ပူးပေါင်းရင်းမြစ်များ

Matyu 20:28

E Tamo Aŋgro. Niŋgi ijo kumbra qalieosib degsib dauryoqniye. Tamo naŋgi na e aqaryaibosib wauetbqajqa e deqa bosai. E na tamo naŋgi wauetnjrqa bem. E na tamo uŋgasari gargekoba naŋgi aqaryainjrsiy ijo segi ŋambile uratosiy naŋgi eleŋqai. E deqa bem.”

Jon 10:11

E kaja naŋgo Mandor bole. Deqa e na kaja naŋgi aqaryainjrqa osiy ijo segi ŋambile uratosiy moiqai.

Jon 10:15

Ijo Abu a e qa qalie. E ijo Abu qa qalie. Dego kere e ijo segi kaja naŋgi qa qalie. Naŋgi dego e qa qalie. Deqa e na kaja naŋgi aqaryainjrqa osiy ijo segi ŋambile uratosiy moiqai.

Jon 13:34

Endego e dal anjam bunuj eŋgwai. Dal anjam bunuj agiende. Niŋgi nuŋgo was naŋgi qalaqalainjroqniye. E niŋgi qalaqalaiŋgeqnum dego kere niŋgi kamba dego nuŋgo was naŋgi qalaqalainjroqniye.

Jon 3:16

“Qotei aqa Ŋiri qujai unu. Qotei na tamo uŋgasari kalil mandamq endi unub qaji naŋgi tulaŋ qalaqalainjrsiq deqa aqa segi Ŋiri qujai di naŋgi enjrej. A endegsi are qalej, ‘Tamo uŋgasari kalil ijo Aŋgro qa naŋgo areqalo siŋgilatqab qaji naŋgi di padalqasai. Naŋgi ŋambile gaigai sqab.’ Qotei a degsi are qalsiq deqa aqa segi Ŋiri qujai naŋgi enjrej.

Aposel 20:28

O ijo was niŋgi nuŋgo segi segi jejamu geregere taqatosib Qotei aqa tamo uŋgasari naŋgi dego geregere taqatnjroqniye. Qotei aqa tamo uŋgasari naŋgi kaja bul. Qotei na aqa segi Ŋiri Yesus Kristus aqa leŋ na naŋgi awainjrej. Deqa niŋgi na naŋgi geregere taqatnjroqnsibqa naŋgo mandor bole soqniye. Wau di Qotei aqa Mondor na niŋgi eŋgej.

Rom 16:4

Nami jeu tamo naŋgi na e lubqa laqnab naŋgi aiyel moiqa ulaosaiosib deqa e aqaryaibeb. Deqa e naŋgi qa osim Qotei biŋiyeqnum. E segi sai. Kristen tamo uŋgasari sawa sawa kalilq di unub qaji naŋgi dego naŋgi aiyel qa osib Qotei biŋiyeqnub.

Rom 5:8

Ariya iga une tamo sonamqa Kristus a iga qa moiej. Aqa kumbra dena Qotei na iga osorgwo, a iga tulaŋ qalaqalaigeqnu.

2 Korin 4:12

Deqa moio a gagoq di waueqnu. Ariya ŋambile a nuŋgoq di waueqnu.

Efesus 5:2

Kristus a na iga tulaŋ qalaqalaigosiq deqa aqa segi ŋambile uratosiq iga qa moiej. Dego kere niŋgi dego qalaqalaiyo kumbra dauryosib walweloqniye. Atra tamo naŋgi atraiyo iŋgi iŋgi sabaŋ quleq bolequja di oqnsib Qotei atraiyeqnub dego kere Kristus a na aqa segi ŋambile Qotei atraiyosiq moinaqa Qotei a deqa tulaŋ areboleboleiyej.

Efesus 5:25

O tamo, Kristus a na aqa segi tamo uŋgasari naŋgi tulaŋ qalaqalainjrsiq deqa aqa segi ŋambile uratosiq naŋgi qa moiej. Dego kere niŋgi na nuŋgo uŋgasari naŋgi tulaŋ qalaqalainjroqniye.

Filipai 2:17

O was qu, nuŋgo areqalo Yesus qa siŋgilateqnub qaji di niŋgi Qotei atraiyobuleqnub. Jeu tamo naŋgi na e lubib ijo leŋ wain bul aiqas de ti nuŋgo areqalo de ti turtosiy dena Qotei atraiyobulqai. E moiqai di uŋgum. E deqa tulaŋ areboleboleibqas. Osiy niŋgi ti koba na areboleboleigim sqom.

Filipai 2:30

Epafroditus a Kristus aqa wau ojsiq deqa a moiqa jojomej. A aqa segi jejamu bole sqajqa deqa are qalosaioqnej. Agi niŋgi na Epafroditus wau yonabqa a na e aqaryaiboqnej. A wau deqa segi are qaloqnej.

1 Tesalonaika 2:8

Osim iga niŋgi tulaŋ qalaqalaiŋgoqnem. Deqa iga nuŋgo silali yaiŋgwajqa are qalosaioqnem. Iga Qotei aqa anjam bole niŋgi merŋgwajqa are koba qaloqnem. Di segi sai. Iga gago segi ŋambile dego uratosim niŋgi aqaryaiŋgwajqa are qaloqnem. Di kiyaqa? Niŋgi gago kadoi bole deqa.

Taitus 2:13

Osim iŋgi tulaŋ boledamu iga mondoŋ oqom qaji di unqajqa areboleboleigoqnimqa tariŋoqnsim sqom. Yesus Kristus a segi Qotei. A siŋgila koba. A na iga eleŋej. Mondoŋ a wala bole ti riaŋ koba ti Qotei aqa siŋgila ti di osim laŋ qureq dena bqas. Iga di unqajqa tariŋoqnsim unum.

1 Pita 1:18

Niŋgi qalie, nami niŋgi nuŋgo moma naŋgo kumbra uge uge dauryoqneb. Ariya Qotei a nuŋgo kumbra ugeq dena niŋgi olo awaiŋgej. Mandam qa ñoro ti gol ti silva ti koboqas qaji dena niŋgi awaiŋgosai.

1 Pita 2:24

Kristus a gago une kalil qoboiyosiqa aqa segi jejamuq di atsiqa a ŋamburbasq di iga qa gaiŋej. Iga gago une kalil torei uratosim ŋambile sosim kumbra tiŋtiŋ yoqnqajqa deqa osiqa ŋamburbasq di iga qa gaiŋej. Jeu tamo naŋgi na Yesus qalougetosib jaqatiŋ koba yeb. Onaqa aqa jaqatiŋ dena a na iga olo boletgej.

1 Pita 3:18

Niŋgi Kristus qa are qaloqniye. Kristus a tamo tiŋtiŋo. Ariya a na tamo uŋgasari uge uge naŋgo sawa osiq naŋgo une qa osiq moiej. A na niŋgi joqsim Qotei aqaq oqwajqa deqa osiq niŋgi qa moiej. A bati qujai qa moiej deqa a olo moiqa keresai. A tamo bulyosiqa mandamq endi soqnej. Sonaqa jeu tamo naŋgi na a qalnab moiej. Ariya a olo subq na tigelosiqa a mondor ti soqnej.

1 Jon 2:6

Tamo bei a marqas, “E Qotei beteryejunum.” Degosim a kumbra kalil Yesus yoqnej qaji di dauryosim yoqnem.

1 Jon 2:9

Tamo bei a marqas, “E suwaŋoq di unum.” A degsi marsimqa ariya a olo Kristen was bei qa are ugeiyqo. Di a suwaŋoq di sosai. A ambruq di unu.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 5:9

Wagme qolqe naŋgi ti gate kokba naŋgi ti bosib Kaja Du aqa areq di siŋga pulutosibqa lou bunuj na endegsib louoqneb, “O Kaja Du, ni buk di osimqa kandel aqa namur buk qandratejunu qaji di waqtqa kere. Di kiyaqa? Ni lumnab moisim ino leŋ aiej dena ni na ino segi tamo uŋgasari naŋgi awainjrsimqa Qotei aqa baŋq di ateleŋem unub. Od, tamo uŋgasari leŋ segi segi qaji, anjam maro segi segi qaji, jejamu segi segi qaji, sawa segi segi qaji naŋgi ni na awainjrsimqa Qotei aqa baŋq di ateleŋem unub.