1 Jon 2:27 - Yesus Aqa Anjam Bole

²⁷ Ariya niŋgi Kristus aqa Mondor Bole eb agi nuŋgoq di unu. Deqa niŋgi powo bei qa truquosaieqnub. Deqa e anjam bei totoryosiy niŋgi merŋgwasai. Qotei aqa Mondor a segi na anjam kalil niŋgi merŋgeqnaqa qusib poiŋgeqnu. Qotei aqa Mondor aqa anjam di gisaŋ sai. Di anjam bole. Deqa niŋgi Mondor aqa anjam di qusib poiŋgim Kristus beteryosib soqniye.

1 Jon 2:27 ပူးပေါင်းရင်းမြစ်များ

Matyu 13:11

Onaqa Yesus na kamba minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Anjam di aqa utru uliejunu. Di e na babtitqa ijo aŋgro niŋgi segi utru qalieqab. Ariya Qotei na tamo uŋgasari naŋgi di yawo anjam aqa utru osornjrqasai.

Jon 14:16

Amqa e na ijo Abu minjitqa a na Aqaryaiŋgo tamo bei qariŋyimqa nuŋgoq bosim siŋgilatŋgwas. Osim bati gaigai niŋgi koba na sqas.

Jon 14:17

Aqaryaiŋgo tamo di a anjam bole qa Mondor. Tamo uŋgasari mandamq endi unub qaji naŋgi Mondor di oqa keresai. Naŋgi a unosaieqnub. Naŋgi a qa qaliesai dego. Ariya niŋgi a qa qalie. A niŋgi koba na unub. Bunuqna a bosim nuŋgo are miligiq di sqas.

Jon 14:26

Bunuqna Aqaryaiŋgo tamo a niŋgi qa bosim siŋgilatŋgwas. A Qotei aqa Mondor Bole. Ijo Abu na a qariŋyim ijo ñam na bosim anjam kalil niŋgi merŋgekritqas. Osim nuŋgo areqalo tigeltetŋgimqa anjam kalil e nami niŋgi merŋgoqnem qaji deqa olo are qalqab.

Jon 16:13

Ariya anjam bole qa Mondor a bosimqa nuŋgo areqalo gereiyetŋgimqa niŋgi anjam bole kalil poiŋgekritqas. A aqa segi areqalo na anjam merŋgwasai. A anjam quoqnsim di segi niŋgi merŋgoqnqas. Osim kumbra mondoŋ branteleŋqas qaji di dego ubtsim merŋgoqnqas.

Jon 4:14

Ariya e na tamo naŋgi ya anainjrqai di naŋgi bunu ya qarnjrqasai. Ya e na anainjrqai di naŋgi uyibqa naŋgo are miligiq di ya ani bul polyoqnimqa naŋgi ŋambile gaigai sqab.”

Jon 6:45

Qotei aqa medabu o qaji tamo naŋgi nami anjam endegsib neŋgreŋyeb unu, ‘Qotei a na tamo uŋgasari kalil naŋgi aqa kumbra osornjroqnim naŋgi a qa qalieoqnqab.’ Deqa tamo uŋgasari kalil ijo Abu aqa anjam quoqnsib a qa qalieeqnub qaji naŋgi ijoq beqnub.

1 Korin 2:12

O was qu, iga mandam qaji mondor osai. Iga Mondor Bole Qotei aqaq dena bej qaji di em. Deqa iŋgi iŋgi kalil Qotei na iga egeqnu qaji di Mondor na iga osorgeqnu deqa iga qalie.

1 Korin 2:13

Iga iŋgi iŋgi deqa anjam marsim laqnum. Iga mandam qaji tamo naŋgo powo osim dena anjam marosaieqnum. Qotei aqa Mondor na iga powo egeqnu dena iga anjam mareqnum. Qotei aqa Mondor aqa anjam di iga na tamo naŋgi Qotei aqa Mondor ti unub qaji naŋgi segi minjreqnum.

2 Korin 1:21

Qotei a segi na iga ti niŋgi ti siŋgilatgeqnaqa iga Kristus beteryosim siŋgila na unum. A na qujai iga aqa segi tamo sqa marsiq giltgej.

Kolosi 2:6

Niŋgi nami Tamo Koba Kristus Yesus osib nuŋgo areq di ateb. Deqa niŋgi a ombla walweloqniye.

1 Tesalonaika 2:13

Iga Qotei aqa anjam niŋgi merŋgeqnam niŋgi quoqnsib endegsib marosaioqneb, “Anjam di mandam tamo naŋgo anjam.” Niŋgi degsib marosaioqneb. Niŋgi quoqnsib maroqneb, “Bole, anjam di Qotei aqa anjam tiŋtiŋ.” Niŋgi degsib maroqneb deqa Qotei aqa anjam di nuŋgo are miligiq di siŋgila na waueqnu. Di kiyaqa? Niŋgi Kristus qa nuŋgo areqalo siŋgilateqnub deqa. Deqa iga gaigai niŋgi qa are qaloqnsim Qotei biŋiyeqnum.

1 Tesalonaika 4:9

E na niŋgi Qotei aqa tamo uŋgasari naŋgi qalaqalainjrqajqa deqa anjam bei neŋgreŋyqasai. Di kiyaqa? Qotei na qalaqalaiyo kumbra di niŋgi osorŋgekritej koboqo.

1 Timoti 2:7

Qotei a na e aqa anjam marsiy laqajqa deqa osiq e giltbej. Deqa e aqa anjam marqajqa wau ti. E bole mermonum. E gisaŋosai. E sawa bei bei qaji tamo uŋgasari naŋgi qa gilsiy Qotei aqa anjam minjroqnitqa naŋgi qusib Kristus qa naŋgo areqalo siŋgilatosib aqa anjam bole poinjrqajqa deqa osiqa e wau ebej.

1 Pita 1:23

Niŋgi iŋgi meli bunuj bulosib ŋambile bunuj eb. Iŋgi meli ugeqas qaji dena niŋgi ŋambile osai. Iŋgi meli gaigai sqas qaji dena niŋgi ŋambile eb. Iŋgi meli bunuj di Qotei aqa anjam. Anjam di ŋambile ti. A gaigai sqas.

1 Jon 2:28

Od, ijo aŋgro, niŋgi Kristus beteryosib soqniye. Yim deqa mondoŋ a olo brantimqa iga jemaigwasai. Iga are siŋgilatosim aqa ulatamuq di tigelesqom.

1 Jon 3:24

Tamo bei a Qotei aqa dal anjam dauryqas di a Qotei beteryesqas. Qotei a kamba dego tamo di beteryesqas. Qotei na aqa Mondor Bole iga egej deqa iga qalieonum, Qotei na iga betergejunu.

2 Jon 1:2

Anjam bole di gagoq di unu. Anjam di bati gaigai gagoq di sqas. Deqa iga niŋgi tulaŋ qalaqalaiŋgeqnum.