1 Jon 2:15 - Yesus Aqa Anjam Bole

¹⁵ O was qu, niŋgi mandam endeqa kumbra qa tulaŋ arearetŋgaiq. Tamo a mandam endeqa kumbra qa arearetqas di a olo Abu Qotei qa arearetqasai.

1 Jon 2:15 ပူးပေါင်းရင်းမြစ်များ

Matyu 4:8

Degsi minjnaqa Satan na Yesus olo osiqa mana goge kobaq oqsiqa goge dia Yesus tigeltosiqa sawa sawa kalil mandor kokba naŋgi na taqatejunub qaji naŋgo siŋgila ti ñoro ti kalil di Yesus osoryosiqa minjej,

Matyu 6:24

Osiqa Yesus a olo anjam endegsi minjrej, “Tamo qujai a tamo kokba aiyel naŋgo sorgomq di sqa keresai. A na tamo kobaquja bei qalaqalaiyosim olo tamo kobaquja bei jeutqas. Bei aqa anjam dauryoqnsim olo bei qoreiyoqnqas. Dego kere niŋgi mandam qa iŋgi iŋgi ti Qotei ti turtnjrsib naŋgo sorgomq di sqa keresai.”

Luk 16:13

“Tamo qujai a tamo kokba aiyel naŋgo sorgomq di sqa keresai. A tamo kobaquja bei qalaqalaiyosim olo tamo kobaquja bei qa are ugeiyqas. Bei aqa anjam dauryoqnqas. Bei qoreiyqas. Dego kere niŋgi silali ti Qotei ti ombla turtsib naŋgo sorgomq di sqa keresai.”

Jon 15:19

Niŋgi mandam endeqa tamo qamu tamo uŋgasari mandamq endi unub qaji naŋgi na niŋgi qalaqalaiŋgonub qamu. Agi naŋgi na naŋgo segi aŋgro naŋgi qalaqalainjreqnub dego kere. Ariya niŋgi mandam endeqa tamo sai. E na niŋgi giltŋgem deqa niŋgi mandam endeqa kumbra urateb. Utru deqa mandam endeqa tamo uŋgasari naŋgi na niŋgi jeutŋgeqnub.

Rom 12:2

Niŋgi mandam tamo naŋgo kumbra dauryosib walwelaib. Qotei na areqalo bunuj eŋgoqnimqa niŋgi kumbra bunuj dauryoqniye. Osib kumbra dena niŋgi Qotei aqa areqalo geregere qalieqab. Agi niŋgi kumbra bole ti kumbra Qotei a tulaŋ areareteqnu qaji de ti kumbra tulaŋ tiŋtiŋo de ti geregere qalieqab.

Galesia 1:10

Niŋgi kiersib are qaleqnub? E anjam endi neŋgreŋyonum di mandam tamo naŋgi e qa boleqajqa kio Qotei a e qa boleqajqa kio deqa neŋgreŋyonum e? Mandam tamo naŋgi e qa boleqajqa deqa e waueqnum e? Niŋgi quiye. Mandam tamo naŋgi e qa boleqajqa deqa e waueqnum qamu e Kristus aqa wau tamo bolesai qamu.

Efesus 2:2

Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu.

1 Timoti 6:10

Tamo deqaji naŋgi silali koba oqajqa tulaŋ arearetnjreqnu. Naŋgo kumbra di agi kumbra uge uge kalil naŋgo utru. Kumbra dena tamo qudei naŋgi titnjreqnaqa naŋgi Yesus qa naŋgo areqalo siŋgilatqa uratoqnsib gulube gargekoba iteqnub.

Jems 1:27

Iga Kristen tamo uŋgasari iga kumbra bole endeqaji yoqnqom. Iga na aŋgro mandum naŋgi ti uŋa qobul naŋgi ti geregereinjroqnsim naŋgo gulube kalil qoboiyetnjroqnqom. Osim iga gago segi walwel geregere taqatosim mandam endeqa kumbra jigat kalil uratekritqom. Iga kumbra degsi yoqnqom di iga Qotei aqa ŋamgalaq di Kristen tamo boledamu une saiqoji sqom.

Jems 4:4

Uŋa bei na aqa gumbuluŋ uratosiq olo tamo bei ombla sambala kumbra yeqnub dego kere niŋgi Qotei uratobuloqnsib kumbra uge uge yeqnub. Niŋgi quiye. Tamo bei a mandam qa kumbra qa tulaŋ areboleboleiyqas di a olo Qotei jeutqas. Niŋgi di qaliesai kio? Deqa tamo bei na mandam qa kumbra kadoiyqas di a Qotei ti jeu sqas.

1 Jon 3:17

Tamo bei a mandam endeqa iŋgi iŋgi koba koroiyosimqa ariya aqa was bei iŋgi saiqoji soqnim unsim a aqaryaiyosaiamqa iga endegsi qalieqom, Qotei aqa qalaqalaiyo kumbra tamo di aqa are miligiq di sosai.

1 Jon 4:5

Gisaŋ tamo naŋgi di mandam qaji tamo. Deqa naŋgi mandam kumbra qa segi anjam mareqnub. Mareqnab mandam qaji tamo naŋgi naŋgo anjam qusib dauryeqnub.

1 Jon 5:10

Tamo bei a Qotei aqa Ŋiri qa aqa areqalo siŋgilatqas di aqa Ŋiri qa anjam dego aqa are miligiq di siŋgilatim sqas. Ariya tamo bei a Qotei aqa anjam aqa areqaloq di siŋgilatqasai di a na Qotei aqa ñam ugetosim Qotei a gisaŋ tamo qa minjobulqas. Di kiyaqa? A Qotei aqa Ŋiri qa anjam Qotei na iga mergeqnu qaji di aqa areqaloq di siŋgilatosai deqa.