1 Jon 2:1 - Yesus Aqa Anjam Bole

¹ O ijo aŋgro kiñilala, niŋgi une yaib deqa e na anjam endi neŋgreŋyosim niŋgi qa qariŋyonum. Ariya nuŋgo ambleq di tamo bei a une yimqa aqaryaiŋgo tamo Yesus Kristus a na tamo di aqaryaiyqas. Yesus a aqa Abu ombla sosiqa a gaigai kumbra tiŋtiŋ yeqnu.

1 Jon 2:1 ပူးပေါင်းရင်းမြစ်များ

Luk 10:22

Yesus a degsi Qotei pailyej. Osiqa marej, “Ijo Abu na iŋgi iŋgi kalil ijo baŋq di ateleŋej unu. E segi Qotei aqa Ŋiri. Tamo bei a e qa qaliesai. Ijo Abu a segi e qa qalie. Tamo bei a ijo Abu qaliesai dego. E segi ijo Abu qa qalie. Ariya e na tamo qudei naŋgi ijo Abu osornjrqa areibqas di osornjrqai. Yimqa naŋgi dego ijo Abu qa qalieqab.”

Jon 10:15

Ijo Abu a e qa qalie. E ijo Abu qa qalie. Dego kere e ijo segi kaja naŋgi qa qalie. Naŋgi dego e qa qalie. Deqa e na kaja naŋgi aqaryainjrqa osiy ijo segi ŋambile uratosiy moiqai.

Jon 13:33

O ijo aŋgro niŋgi quiye. E niŋgi koba na sokiñalaysiy uratŋgitqa niŋgi e qa ŋamoqnqab. Qure e oqwai qaji di niŋgi oqwa keresai. Ijo anjam di e nami Juda tamo naŋgi minjroqnem agi bini niŋgi dego olo merŋgonum.

Jon 14:16

Amqa e na ijo Abu minjitqa a na Aqaryaiŋgo tamo bei qariŋyimqa nuŋgoq bosim siŋgilatŋgwas. Osim bati gaigai niŋgi koba na sqas.

Jon 14:6

Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai.

Jon 21:5

Onaqa a na nenemnjrej, “O ijo aŋgro, niŋgi qe onub e?” Onaqa naŋgi na minjeb, “Eo. Iga qe osai.”

Jon 5:14

Onaqa nebeonaq Yesus a atra tal miligiq gilsiqa tamo a na boletej qaji a di sonaqa itosiqa minjej, “Ni que. E ni boletmonum. Deqa ni olo une bei ataim. Gulube kobaquja bei ino jejamuq di olo branto uge.”

Jon 5:36

“Ariya anjam e palonteqnum qaji dena Jon tulaŋ buŋyejunu. Wau kalil ijo Abu na e yosiy kobotqajqa ebej qaji wau dena Jon aqa wau tulaŋ buŋyejunu. E wau di yeqnum deqa tamo uŋgasari naŋgi unoqnsib endegsi poinjreqnu, ijo Abu na e qariŋbonaq bem.

Jon 6:27

Jejamu qa iŋgi a koboqas. Niŋgi iŋgi deqa wauaib. Iŋgi gaigai sqas qaji deqa niŋgi wauoiye. Iŋgi dena niŋgi ŋambile gaigai sqab. Ŋambile gaigai sqajqa iŋgi di e Tamo Aŋgro na niŋgi anaiŋgwai. Ijo Abu Qotei na e giltbej deqa e na iŋgi di anaiŋgwai.”

Jon 8:11

Onaqa uŋa dena Yesus minjej, “Od, Tamo Koba, tamo bei na ijo une qa olo merbosai.” Onaqa Yesus na minjej, “E dego ino une qa mermqasai. Deqa ni gile. Olo une bei ataim.”

Aposel 7:52

Nuŋgo moma naŋgi kumbra endegsib yoqneb. Naŋgi na Qotei aqa medabu o qaji tamo kalil naŋgi ugeugeinjroqnsib ñumoqneb. Bei uratosaioqneb. Kalil ñumoqneb. Qotei aqa medabu o qaji tamo naŋgi na nuŋgo moma naŋgi anjam endegsib minjroqneb, ‘Kumbra Tiŋtiŋ Yeqnu Qaji Tamo a bqas.’ Degsib minjreqnab naŋgi quqwa uratoqnsib naŋgi ñumoqneb. Ariya Yesus a bonaqa niŋgi na nuŋgo moma naŋgo kumbra di dauryosib Yesus osib jeu tamo naŋgo baŋq di atnabqa naŋgi na qalnab moiej.

Rom 5:10

Iga Qotei ti jeu sonamqa aqa Ŋiri a jeu kobotqa marsiq moiej. Deqa aqa wau dena iga bini Qotei ombla geregere unum. Ariya Qotei aqa Ŋiri a olo ŋambile unu. Deqa iga bole qalieonum, aqa ŋambile dena Qotei na iga olo oqas.

Rom 6:15

Iga olo dal anjam aqa sorgomq di sosai deqa iga kierqom? Qotei a iga qa are tulaŋ boleiyej kumbra di aqa sorgomq di iga unum. Deqa uŋgum, iga une yoqnqom e? Sai.

Rom 8:34

Deqa tamo yai na iga gago une aqa awai uge olo oqa mergwas? Tamo dego bei sosai. Kristus Yesus a moisiq olo subq na tigelej. Deqa bini a Qotei aqa baŋ woq di awejunu. Awesosiqa iga qa Qotei pailyeqnu.

1 Korin 15:34

Deqa niŋgi nanari kumbra uratosib areqalo bole ti sosib olo une yoqnaib. Niŋgi quiye. Nuŋgo ambleq di tamo qudei naŋgi Qotei qalieosaiunub. Niŋgi deqa jemaiŋgwajqa deqa e anjam di niŋgi merŋgonum.

2 Korin 5:21

Kristus a une yosaieqnu. Ariya Qotei na iga aqaryaigwa marsiq deqa a gago une kalil osiqa Kristus aqa qawarq di atnaqa a une tamo bulej. Iga Yesus beteryosim aqa siŋgila na iga Qotei aqa segi tamo uŋgasari tiŋtiŋ sqajqa deqa osiq gago une kalil osiqa Kristus aqa qawarq di atej.

Galesia 4:19

O ijo aŋgro, niŋgi quiye. Uŋa aŋgrotqa osiq jaqatiŋyeqnu dego kere e niŋgi qa are jaqatiŋbeqnu. Di kiyaqa? Ijo areqalo agiende. Kristus a Qotei aqa aŋgro tiŋtiŋ unu dego kere niŋgi dego Qotei aqa aŋgro tiŋtiŋ soqniye.

Efesus 2:18

Kristus aqa wau na iga koba na Mondor qujai ejunum. Deqa iga are qujaitosim unum. Mondor dena gam waqtetgej deqa iga gaigai gago Abu Qotei aqa ulatamuq di brantoqnqom.

Efesus 4:26

Niŋgi minjiŋ oqimqa ariya niŋgi geregere ŋam atiye. Niŋgi olo une ato uge. Niŋgi urur minjiŋ kobotiye. Niŋgi minjiŋ ti soqnib seŋ aiaiq.

1 Timoti 2:5

Iga qalie, Qotei a segi qujai Qotei bole. Kristus Yesus a segi qujai tamo uŋgasari naŋgi ti Qotei ti naŋgo ambleq di tigelesosiqa yeba waiyej unu.

1 Timoti 3:14

O Timoti, e ni qa urur bosiy numqajqa are koba unu. Ariya e are qalonum, e mati anjam endi neŋgreŋyosiy ni qa qariŋyqai.

Hibru 9:24

Iga qalie, Kristus a mandam qaji atra tal tamo naŋgi na gereiyeb qaji di miligiq gilosai. Mandam qaji atra tal di Qotei aqa atra tal bole laŋa sigitejunu. Kristus a laŋ qureq oqej. Deqa bini a Qotei aqa areq di sosiqa iga qa waueqnu.

Jems 1:27

Iga Kristen tamo uŋgasari iga kumbra bole endeqaji yoqnqom. Iga na aŋgro mandum naŋgi ti uŋa qobul naŋgi ti geregereinjroqnsim naŋgo gulube kalil qoboiyetnjroqnqom. Osim iga gago segi walwel geregere taqatosim mandam endeqa kumbra jigat kalil uratekritqom. Iga kumbra degsi yoqnqom di iga Qotei aqa ŋamgalaq di Kristen tamo boledamu une saiqoji sqom.

Jems 3:9

Gago kumbra agiende. Iga gago medabu na gago Tamo Koba Abu Qotei aqa ñam soqtoqnsim olo puluoqnsim medabu qujai dena tamo uŋgasari naŋgi misiliŋnjreqnum. Tamo uŋgasari naŋgi di Qotei na gereinjrsiqa aqa segi so boleq di atej.

1 Pita 2:22

Kristus a une bei yosaioqnej. Aqa medabu na gisaŋ anjam bei dego marosaioqnej.

1 Pita 3:18

Niŋgi Kristus qa are qaloqniye. Kristus a tamo tiŋtiŋo. Ariya a na tamo uŋgasari uge uge naŋgo sawa osiq naŋgo une qa osiq moiej. A na niŋgi joqsim Qotei aqaq oqwajqa deqa osiq niŋgi qa moiej. A bati qujai qa moiej deqa a olo moiqa keresai. A tamo bulyosiqa mandamq endi soqnej. Sonaqa jeu tamo naŋgi na a qalnab moiej. Ariya a olo subq na tigelosiqa a mondor ti soqnej.

1 Jon 3:18

O ijo aŋgro kalil, niŋgi quiye. Iga laŋa anjam maro na segi Kristen tamo naŋgi qalaqalainjrqom di keresai. Iga naŋgi bole qalaqalainjrsim kumbra bole bole enjroqnqom.

1 Jon 3:5

Niŋgi qalie, Kristus a gago une kobotqa bej. A segi une saiqoji.

1 Jon 3:7

O ijo aŋgro kalil, niŋgi geregere ŋam atoqniye. Tamo bei na bosim niŋgi gisaŋgo uge. Tamo a kumbra tiŋtiŋ dauryqas di a Qotei aqa ŋamgalaq di tamo tiŋtiŋo sqas. Kristus a tamo tiŋtiŋo unu dego kere.

1 Jon 4:4

O ijo aŋgro kalil, niŋgi Qotei aqa tamo. Mondor Bole a nuŋgoq di unu. Ariya gisaŋ mondor a mandam tamo naŋgoq di unu. Mondor Bole a na gisaŋ mondor di tulaŋ buŋyeqnu. Deqa niŋgi na dego gisaŋ tamo naŋgi di gotraŋnjreqnub.

1 Jon 5:17

Kumbra uge kalil tamo naŋgi yeqnub qaji di une. Ariya tamo naŋgo une qudei qa Qotei na naŋgi moiotnjrosaieqnu.

1 Jon 5:21

O ijo aŋgro kalil, niŋgi gisaŋ qotei kalil naŋgi torei qoreinjrsib isaq giliye.

3 Jon 1:4

Ijo aŋgro naŋgi anjam bole dauryeqnub e di quoqnsim deqa e tulaŋ areboleboleibeqnu. Ijo arebolebole dena arebolebole kalil tulaŋ buŋyejunu.