1 Jon 1:6 - Yesus Aqa Anjam Bole

⁶ Iga endegsi marqom, “E Qotei ombla areqalo qujaitosim unum.” Marsimqa ariya iga olo ambruq di walwelqom di gago anjam di gisaŋ. Deqa iga kumbra bole dauryosaieqnum.

1 Jon 1:6 ပူးပေါင်းရင်းမြစ်များ

Matyu 7:22

Mondoŋ Qotei na tamo naŋgo une qa peginjrqajqa bati bamqa tamo uŋgasari gargekoba naŋgi ijo ulatamuq di tigelosib endegsib merbqab, ‘O Tamo Koba, iga ino ñam na anjam mare mare laqnem. Iga ino ñam na mondor uge uge winjroqnsimqa maŋwa gargekoba yoqnem.’ Naŋgi ijo ulatamuq di tigelosib degsib merbqab.

Jon 11:10

Ariya seŋ aisiq qoloqo sawa ambruqo. Deqa tamo naŋgi walwelqa keresai. Maŋgalqab.”

Jon 12:35

Onaqa Yesus na minjrej, “Puloŋ a nuŋgo ambleq di sokiñalaysim niŋgi olo uratŋgwas. Puloŋ a nuŋgo ambleq endi unu. Deqa niŋgi puloŋ di osib puloŋq na laqniye. Yimqa ambruiŋgwasai. Tamo ambruq na laqnu qaji a ambruq di sosim qabitqas kio? Di a qalieqasai.

Jon 12:46

E puloŋ bulosim mandamq aiem. Deqa tamo uŋgasari kalil e qa naŋgo areqalo siŋgilatqab qaji naŋgi ambruq di sqasai.

Jon 8:12

Yesus a uŋa degsi minjnaq gileqnaqa a na tamo uŋgasari naŋgi olo endegsi minjrej, “E mandam endeqa puloŋ. Tamo a e daurbqas di a ambruq di walwelqasai. A suwaŋoq di walweloqnsim ŋambile gaigai sqas.”

Jon 8:55

Ariya niŋgi a qa qaliesai. Ariya e segi a qa qalie. E a qa qaliesai degsi marqai di e niŋgi bul gisaŋ tamo sqai. E a qa qalieosim deqa agi aqa anjam dauryeqnum.

1 Timoti 4:2

Bati di gisaŋ tamo naŋgi boqnsib gisaŋ anjam di tamo uŋgasari naŋgi minjroqnqab. Tamo naŋgi di naŋgo areqalo tulaŋ niñaqejunu. Deqa naŋgi naŋgo segi une poinjrqa keresai.

Jems 2:14

Es ijo was qu, tamo bei a mareqnu, “E Kristus qa ijo areqalo siŋgilateqnum.” A degsi maroqnsiq ariya a kumbra bole bei yala babtosaieqnu. Laŋa medabu na anjam mareqnu. Deqa tamo di Qotei na oqasai.

Jems 2:18

Ariya tamo bei a endegsi marqas, “Tamo qudei naŋgi Kristus qa naŋgo areqalo siŋgilateqnub. Ariya tamo qudei naŋgi olo kumbra bole bole yeqnub.” Degsi marimqa e na kamba minjqai, “Ni Kristus qa ino areqalo siŋgilatqa maronum. Ariya ni kumbra bole bei babtosaieqnum. Deqa e kiersiy qalieqai, ni Kristus qa ino areqalo siŋgilateqnum? E qalieqa keresai. Ariya e Kristus qa ijo areqalo siŋgilatoqnsiy kumbra bole dego turtsiy yoqnqai di ni e nubsim merbqam, ‘Bole, ni Kristus qa ino areqalo bole siŋgilateqnum.’”

1 Jon 1:10

Iga endegsi marqom, “E nami une yosaioqnem agi unum.” Degsi marqom di iga Qotei aqa ñam ugetosim a gisaŋ tamo qa minjobulqom. Deqa aqa anjam gago are miligiq di sqa keresai.

1 Jon 1:3

Iga Anjam di gago ŋamdamu na unoqnem. Iga a quoqnem. Deqa iga a qa niŋgi dego merŋgeqnum. Yim niŋgi qusibqa iga ti areqalo qujaitosim sqajqa deqa. O was qu, iga gago Abu Qotei wo aqa Ŋiri Yesus Kristus wo naŋgi ti koba na areqalo qujaitosim unum.

1 Jon 1:8

Iga endegsi marqom, “E une yosaieqnum.” Degsi marqom di iga gago segi jejamu gisaŋyonum. Deqa anjam bole gago are miligiq di sqa keresai.

1 Jon 2:4

Tamo bei a marqas, “E Qotei qa bole qalieonum.” Marsim ariya a Qotei aqa dal anjam dauryosaieqnu. Di a gisaŋ tamo. Aqa are miligiq di anjam bole sosai.

1 Jon 4:20

Tamo bei a marqas, “E Qotei tulaŋ qalaqalaiyeqnum.” Degsi marsimqa ariya a olo aqa Kristen was naŋgi yala qalaqalainjrosaieqnu. Deqa tamo di a gisaŋ tamo. A na aqa Kristen was naŋgi ŋamgala na unjreqnu. Ariya a na naŋgi qalaqalainjrosaieqnu. Deqa a na Qotei ŋamgala na unosaieqnu qaji a dego qalaqalaiyqa keresai.