1 Jon 1:1 - Yesus Aqa Anjam Bole

¹ Anjam ŋambile unu qaji a nami soqnej. Iga Anjam deqa mare mare laqnum. Anjam di iga quoqnem. Gago ŋamdamu na unoqnem. Gago baŋ na dego ojoqnem.

1 Jon 1:1 ပူးပေါင်းရင်းမြစ်များ

Luk 24:39

Endi e di. Niŋgi ijo baŋ bile unsib ijo siŋga unsib baŋ waiysib ijo jejamu ojsib poiŋgwas, e damu ti tanu ti. Ariya buga a damu ti tanu ti saiqoji.”

Jon 19:35

E Jon. Naŋgi kumbra di yonabqa e ijo segi ŋamdamu na unem. Deqa e bini mare mare laqnum. Anjam e mareqnum qaji endi bole. E segi qalieonum, e anjam bole mareqnum. Deqa niŋgi ijo anjam endi qusib Yesus qa nuŋgo areqalo siŋgilatiye.

Jon 20:27

Osiqa Tomas minjej, “O Tomas, ni ino baŋ gei na ijo baŋ bile qameb qaji aqa pirigi qamsim une. Ino baŋ waiysim ijo jar baŋga aqa pirigi dego oje. Areqalo aiyeltaim. Areqalo qujaitosim e qa ino areqalo siŋgilat.”

Jon 5:26

Ijo Abu a segi ŋambile qa utru. E aqa Ŋiri. A na e siŋgila ebej deqa e dego ŋambile qa utru.

Jon 8:58

Onaqa Yesus na kamba minjrej, “Niŋgi quiye. E bole merŋgwai. Abraham a ŋambabosaisonaqa e nami Qotei ombla soqnem.”

Aposel 1:3

Nami Yesus a jaqatiŋ koba osiq moiej. Osiqa olo subq na tigelosiqa aqa segi aŋgro naŋgoq di brantoqnsiqa maŋwa gargekoba yeqnaqa naŋgi unoqneb. Unoqnsib maroqneb, “Bole, Yesus a subq na tigelqo. A ŋambile unu.” Bati 40 qa Yesus a mandamq di sosiqa aqa aŋgro naŋgoq di brantoqnej. Brantoqnsiqa Qotei a tamo uŋgasari naŋgo Mandor Koba sosiqa naŋgi taqatnjrejunu anjam di minjroqnej.

Aposel 4:20

Aqo aiyel medabu getentqa keresai. Kumbra kalil gago ŋamdamu na unoqnem qaji deqa iga maroqnsim laqnqom. Anjam kalil gago dabkala na quoqnem qaji di dego iga maroqnsim laqnqom. Iga uratqa keresai.”

Hibru 2:3

Ariya bini Qotei na iga oqajqa marsiq wau kobaquja yej. Deqa iga Qotei aqa wau di qoreiyqom di iga awai uge turqom. Awai di iga britosim jaraiqa keresai. Namoqna Tamo Koba Yesus a segi na iga oqajqa anjam di maroqnej. Onaqa tamo naŋgi aqa anjam di quoqneb qaji naŋgi na kamba olo iga endegsib mergoqneb, “Anjam di bole.”

1 Jon 4:14

Abu Qotei a na tamo uŋgasari kalil mandamq endi unub qaji naŋgi eleŋqa osiq deqa aqa Ŋiri qariŋyonaq mandamq aiej. Aqa kumbra di iga unsim deqa mare mare laqnum.

1 Jon 5:7

Tamo qalub naŋgi Yesus aqa kumbra qa anjam palonteqnub.

Uli Anjam 1:11

Leleŋosiq merbej, “Kumbra kalil ni unqam qaji di neŋgreŋyosim qariŋyimqa tamo uŋgasari qure 7-pelaq dia Yesus aqa ñam qa koroosib loueqnub qaji naŋgoq gilqas. Tamo uŋgasari agi Efesus qureq dia, Smerna qureq dia, Pergamum qureq dia, Taiataira qureq dia, Sardis qureq dia, Filadelfia qureq dia, Laodisia qureq dia Yesus aqa ñam qa koroosib loueqnub qaji naŋgoq qariŋyim gilem.”

Uli Anjam 1:8

Tamo Koba Qotei siŋgila koba ti unu qaji a marej, “E segi qujai namoq di unum. E segi qujai bunuq di sqai.” Qotei a degsi marej. Agi a segi qujai nami soqnej. A bini unu. A olo bunuqna bqas.

Uli Anjam 19:13

A gara olekoba dena kabuosiqa gara di leŋq di tuqtej. Aqa ñam endegsib mareqnub, “Qotei aqa Anjam.”

Uli Anjam 2:8

Yesus a na e degsi merbsiqa olo endegsi merbej, “Smerna qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E segi qujai namoq di unum. E segi qujai bunuq di sqai. Nami e moiem. Bini e olo ŋambile unum. E na anjam endi ni qa qariŋyonum.