An hoŋ irin gol sunda an laɗ u bik kon ndaɗta u loɓ ma an loɓ tan kay a li sun ndaɗtana na ni, tle asina halaŋŋi ɦawaa, jak ki ni u semeɗna ɦawaa. Tlesuu lasi ga kay ndaŋgara ii faɗta wanna ni va ka huɗi.
An hin ɓak tan hurun kurufu ana, dlara li sa ma giniŋŋa hin lan an ni na lay. An hin li a sa ma wi dlara ni kay mege? An hin ɓak tan ana halaŋ ca ni ŋga tara ɦawaa.
Kay ndaɗta kak ma kak iirina ka irin jiviɗi, kay tle may suu suu warna lasi kay ndaŋgara wanna ka irin jiviɗi. Asi halaŋŋi ɦawaa, hin jak ki ni u semeɗna.
Lini nam sa ma wi dla kala ma giniŋ kala ni, sa ka wiɗi. Nam hin mbuɗ ni malaŋ sunda an laɗ wandara halaŋ. Sunda an laɗ u yal man ma ga kay ndaŋgara u faɗta tanina. Halaŋ ca ni ŋga tara ɦawaa.
Na ɗaŋ may Lona va ma sana minimma ni nam ɦamma, yalna, wira u furira. Na may sa ma li dla cora nam tinim a tok yam tlena, nam hin ɦasi ki maŋ sa ma nam minimma. Ndaɗta halaŋ ca ni ŋga tara, hin jak ki ni u semeɗna.
An fi gursura u gi lorra cocoo. Begera vi mulinara ura vi mbassa daŋga zeɗ zeɗta. Suu wi soolla ɦayna njufiina u boyogina vo varan cocoo. Furira vi suu warnara halaŋ ki varanu, boyogi suu jivi cocona ki toki ni varanu.
Kay dlara li sa warna li yoorina ni na lay, hani fun taɗ na dew. Sa warna miɗ may, yoona miɗ ni na may. Asi halaŋŋi u musukka hurusiya. Ŋgolla vi sa warna kay yoorinara ni ɦawaa. Halaŋ ca ni ŋga tara.
Sana vay dam na dew daŋ, wayam kaɗi lay, goorom kaɗi lay, nam li sunda wanni koɗ ta kaɗi, bege ka ndakambi lay, ka joɓ tam ana tle asina an lasi na ni maŋ gegeraɗi lay. Halaŋ ca ni ŋga tara, hin jak ki ni u semeɗna.
