Agu néka rantang méu agu isét ngancéng ala weki, maik toé manga kuasad te ala wakars, rantang kéta kali Hiat manga kuasan te calang wakar agu weki oné api neraka.
Sanggéd taung so’o curups Laku agu méu le rapang molés. Te cai leson, Aku toé kolé curup agu méu le rapang molé, maik tulak kéta keréba hi Ema agu méu.
Lélo, kudut cai leson, ngot polig cain, te méu mbihi-mbehar ngo néténg osang de rus, agu méu te pencang Aku hanang koég. Maik toé hanang koég Aku, ai hi Ema loréng Akuy.
Maik manga kaut rapak leson agu te ho’on poli cain ga, té isét suju laing tu’ungn kudut suju hi Ema oné Nai agu molor, ai hi Ema lélak ata situt suju nenggitu.
Tara nenggitun tombo data tu’an, ai isé rantang ata Yahudis, ai isét Yahudi poli ce naid céing ata tura Hia hi Mésias, ata hitu néka ka’éng cama agu iséy.
Du Anak Jimbal hitu nggé’i roku hitut te liman, ita laku bewa-mai compang sanggéd wakar disét poli mbeléd, landing le keréba reweng de Mori Keraéng lut saka-si disé.