KOLOSÉ 1:10 - Bahasa Manggarai New Testament

¹⁰ Ali hitu, mosé de méu naun olo mai ranga Diha agu henan oné nai Diha. Oné sanggén gori de méu, manga cir wua ata di'ad agu tambang beka pecings latang te Mori Keraéng.

KOLOSÉ 1:10 ပူးပေါင်းရင်းမြစ်များ

YOHANÉS 15:16

Toé méu ata lir Aku, maik Aku ata lir méu. Aku poli wérét méu kudut méu ngo agu cir wua, agu wuas hitut temer kin, kudut apa situt tegi le méu oné Ema Daku le ngasang Daku, téings Liha oné méu.

YOHANÉS 15:8

Oné apa ho’o te bong Ema Daku, ngong émé méu do wuas, agu ali hitu dé ga méu ata nungku Dakum.”

YOHANÉS 17:3

Ho’oy mosé tédéng lén hitu, ngong isé pecing Ité, Mori hitut ca kanang kali ata tu’ungn, agu pecing hi Yésus Kristus ata wuat tu’ung Litéy.

ROMA 1:13

Asé ka’én, ngoéng daku kudut pecing le méu, te aku poli dongkalin nuk kudut mai cumang méu – maik dengkir te ho’on manga mtaung do’ong agu dungket – kudut oné bahi-réha méu aku ita cir wua, cama ného oné bahi-réha uku situt iwod ata toé Yahudi.

ROMA 4:12

Abraham kolé te ciri ema de sanggéd ata sunat, ngong isét toé hanang sunat, maik ata lut kolé lé’é imbi di Abraham, empo dité, du hia toé di sunat.

ROMA 6:4

Ali cebong le waé serani hitu ité poli boak agu mata cama-cama agu Hia, nenggitu kolé ité ngancéng mosé oné mosé weru. Cama ného hi Kristus poli pandé to’o kolé oné mai ata mata le angos de Mori Keraéng Ema.

2 KORINTUS 2:14

Maik wali di’a kamping Mori Keraéng, ata titong mtaung ami ata nai ca anggit agu hi Kristus oné salang ontong Diha. Létang laing ami Hia wécak bengé, wiga pecing Hia lata nia-nia kaut wan.

2 KORINTUS 4:6

Ai Mori Keraéng hitut poli curup, “Oné mai nendep te par gérak!” Hia kolé ata widang gérak’N oné nai dité. Wiga nuk dité ita betuan mengit de Mori Keraéng hitut néra oné ranga di Kristus.

2 KORINTUS 5:9

Landing hitu kolé ami wuli-weki kudut ami henan oné nai Diha, koném lari ka’éng oné weki ho’o ko ami ka’éng be pé’angn.

2 KORINTUS 9:8

Mori Keraéng ngancéng téing sanggéd widang latang te méu, kudut méu toé géong oné sanggéd cao-ca, ngot manga labid latang te pandé di’a agu campé tau.

ÉFÉSUS 1:17

Tegi kolé laku oné Mori dité Yésus Kristus, kudut Hia widang koé Nai Nggeluk te si’ang Mori Keraéng oné méu wiga méu pecing tu’ung Hiam.

ÉFÉSUS 2:10

Ité ho’o ata dédék de Mori Keraéng ai nai ca anggit hi Kristus Yésus kudut pandé sanggéd gori di’a, ata bolon polig ambin le Mori Keraéng. Ngoéng Diha kudut ité selamak moséd.

ÉFÉSUS 4:1

Aku hi Paulus, ata bui landing keturu Mori Keraéng, toing méu: mosé koém ného taras ata poli pilé le Mori Keraéng.

ÉFÉSUS 4:13

Ali hitu, sanggéd taung ité ciri ca anggit kali oné ca imbi, agu baé pa’éln latang te Anak de Mori Keraéng. Ité ciri bisat, ata tambang cuku tambang besikd ného hi Kristus.

ÉFÉSUS 5:10

Mping koém gori ata henan oné Mori Keraéng.

ÉFÉSUS 5:15

Landing hitu, nuk di’a-di’a, riko koé ba wekis. Néka mosé ného ata bapa, maik mosé koé ného ata nggalas nai.

ÉFÉSUS 5:2

Meu momang tau, ného hi Kristus Yésus poli momang méun. Hia poli condo wekiN latang te ité, cama ného takung hélang ata bengén wiga cembes nain Mori Keraéng.

PILIPI 1:11

Mosé de méu penong molor le pandé de weki run hi Yésus Kristus, wiga ngancéng bong agu naring Mori Keraéng.

PILIPI 1:27

Mosé de méu paka helek lorong Keréba Di’a di Kristus. Wiga, émé maik aku, ita laku; agu émé toé maik aku, dengé kin laku te méu cedek kis hesés oné nai ca anggit agu tuka ca léléng te rébok latang te imbi hitut todo oné mai Keréba Di’a.

PILIPI 4:18

Te ho’on aku poli tiba sanggén taung sékék oné-mai méu, ngot céwé do nitu main. Sanggéd taung katu de méu lut hi Épafroditus polis tibad laku ga. Sanggéd téing de méu situ ného néndong de takung latangt Mori Keraéng, agu tibas Liha ali cembes-nai.

KOLOSÉ 2:19

wiga toe nai ca anggit agu hi Kristus ata tu'a laing. Be wa mai perénta de Kristus, igold sanggén weki agu pongo ciri ca ali celi agu ruék, lorong ngoéng de Mori Keraéng.

KOLOSÉ 2:6

Méu poli tiba hi Kristus Yésus, Mori dité. Landing hitu, poro kong kin méu nai ca anggit agu Hiam.

KOLOSÉ 3:20

Oé anak-anak, lorong koé ata tu’as oné sanggéd cao-ca, ai hitu ata henan oné Morin.

KOLOSÉ 4:5

Oné woé-joé de méu agu sanggen ata situt toé imbi, nggalas koé mosés agu paké di’a sokor ata mangan.

TÉSALONIKA 2:12

Tegi tu’ung lami, kudut mosé de méu lorong ngoéng de Mori Keraéng ata bénta méu nggere-oné osangN agu mengit Diha.

TÉSALONIKA 4:1

Cemoln ga, asé-ka’én, toing agu titong dami latang te méu le ngasang de Mori Yésus: Méu poli dengé oné-mai ami, co’o ata di’an mosé de méu kudut pandé nisang nai de Mori Keraéng. Toing hitu, bo kali poli lorongn le méu ga, maik céwé di’an kolé émé méu pandé tu’ung-tu’ung kéta-mai wa-mai nain.

2 TIMOTIUS 2:4

Cengata serdadu hiot lari tili-mboétn, toé nuk mosé de weki run, ali hitu hia henan oné nai de tu’ad serdadu.

TITUS 3:1

Langga kid isé, kudut isé lorong pemerénta agu sanggéd ata cau kuasa, lorong agu mengkek te pandé sanggéd gori di’a.

TITUS 3:14

Sanggéd weki serani dité oné nuca Keréta, paka laséng koét pandé gori ata di’ad, kudut ngancéng haéng sékék lété bari agu sékék latang te ata bana. Pandé nenggo’o, kudut manga betuan mosé disé.

IBRANI 11:5

Landing le imbin, hi Hénokh tara héndéng nggere-éta Surgan, wiga toé matay, ai Mori Keraéng poli téti hian. Ai lut Surak Nggeluk, du toéd tétin, hi Henokh kopn oné Mori Keraéng.

IBRANI 13:16

Néka hémong pandé di’a agu campé tau, ai hitus takung ata patun oné Mori Keraéng.

IBRANI 13:21

Nahé Mori Keraéng pandé jemut méu ali sanggéd ata di’an ata sékékn, te méu kudut lorong ngoéng Diha, lut hi Yésus Kristus. Latang te Hia dé, mengit tédéng lén! Amén.

2 PÉTRUS 1:8

Émé sanggéd taung gauk di’a situ manga do kétas oné méu, toét-toé méu ciri seber agu cir lahé oné pecing hi Yésus Kristus, Mori dité.

2 PÉTRUS 3:18

Ciri tu’a koém ga oné tabing agu imbi hi Yésus Kristus, Mori agu Ata sambé dité. Latang te Hia dé mengit, te ho’on agu tédéng lén.

1 YOHANÉS 3:22

Sanggéd taung tegi dité sendos Liha, ai ité lorong sanggéd peréntaN agu pandé cembes naiN.

1 YOHANÉS 5:20

Pecing lité te Anak de Mori Keraéng poli cain agu widang nggalas latangt ité, kudut baé lité Mori Keraéng hitut molor. Ali hitu, ité nai ca anggit agu Mori Keraéng agu Yésus Kristus AnakN. Ho’oy Mori Keraéng ata tu’ungn agu ho’oy mosé tédéng lén hitu.

3 YOHANÉS 1:6

Polig téing saka-sin lisé momang de hau oné beréha weki serani. Di’an kolé émé campé isé le hau du lakod. Wintuk de hau hitu pandé cembes nai de Mori Keraéng.