JAMES 4:11 - Bahasa Manggarai New Testament

¹¹ Asé-ka’é daku, néka manga pocu taus méu! Céing ata pocu agu maja asé-ka’é ca imbin, hia mbéis agu maja wintuk de Mori Keraéng. Émé hau maja wintuk de Mori Keraéng, hau dé ga toé ata pandé lorong wintuk de Mori Keraéng, maik ciri adak ata beté-bicar.

JAMES 4:11 ပူးပေါင်းရင်းမြစ်များ

LUKAS 6:37

“Méu kolé néka bicar atam, wiga méu kolé toé bicarm le Mori Keraéng. Méu néka wahéng ata, wiga méu kolé toé wahéngm le Mori Keraéng. Méu paka ampong ata, wiga méu kolé tiba ampongm.

ROMA 2:1

Landing hitu, oé manusia, céing kéta hau, tara beté-bicar ata bana. Hau toé manga tanjéng te kambé weki rum. Ai ali beté-bicar ata, hau te beté-bicar weki rum. Ai hau hitut beté-bicar ata bana, pandé apa ata camas.

ROMA 2:13

Ai toé ata séngét wintuk Taurat ata molor oné ranga de Mori Keraéng, maik ata pandé wintuk Taurat, hitus kali ata molord.

ROMA 7:7

Émé nggitu gi, apa ata kudut tombo lité? Cala manga ndékokn wintuk Taurat hitu? Toé ta! Ali lut wintuk Taurat aku pecing ndékok. Ai aku kolé toé pecing apa belek hitu, émé wintuk Taurat toé ré’ing “Néka belek!”

1 KORINTUS 4:5

Landing hitu néka beté-bicar émé toé di hitu redun, ngong émé toé di mai Mori Keraéng. Hia te pandé gérak apa situt ceha oné nendép, agu Hia kudut totos apa situt nanéng oné nai. Du leson tai, néténg ata kudut tiba naring de Mori Keraéng.

2 KORINTUS 12:20

Ai simpung daku, émé maik aku, repéng laku méu toé ného ngoéng daku agu méu repéng aku toé ného hitut ngoéng de méu. Simpung daku du hitu aram manga kéta ata léwang-tau, guér tau, mas tau, nuk kaut sékék de ru, pocu ata, kérong tau, mésé-nai agu ngaur tau.

ÉFÉSUS 4:31

Pandé mora kéta taung sanggéd beti nai, mek agu rabo, léwang agu loér tau, pocu tau ko sanggéd ba weki ata da’atd.

2 TIMOTÉUS 3:11

Nenggitu kolés winad, poro ata hiangs lata, toé pocu ngasang datas, poro metek naid agu ngancéng imbi latas oné sanggéd cao-ca.

2 TIMOTIUS 3:3

Isé toé pecing momang tau, toé ngoéng te hambor, ngoéngd kali pandé wau ngasang data, toé ngancéng nipu weki ru, gutek, toé ngoéng siot di’ad.

TITUS 2:3

Nenggitu kolés iné-wai tu’a, paka seber koés te ngaji, néka pocu ata, néka inung tuak, maik ciri guru te toing sanggéd taung ata di’ad.

JAMES 1:16

Asé-ka’én ata momang laku, néka wéléngm!

JAMES 1:19

Asé-ka’én ata momang laku, nuk di’a-di’a curup ho’o: gélang koé te séngét, maik héjol koé te tombo agu ta’ong te rabo.

JAMES 1:25

Wintuk de Mori Keraéng besikn, agu manga mberes kudut céla manusia. Ata situt céca agu pinga di’a cang agu pandé sanggéd wintuk situ, toé séngét kaut agu lampuk hémongd, ata situ te tiba berkak de Mori Keraéng oné sanggéd pandéd.

JAMES 2:8

Molorn pandé de méu, émé totos le méu wintuk Adak hitut tulis oné Kitab Nggeluk: “Momang ga cama manusia, ného momang weki ru.”

JAMES 5:10

Asé-ka’én, lorong agu tunti koé ta’ong susa de sanggéd nabi ata poli ba keréba le ngasang de Morin.

JAMES 5:7

Asé-ka’én, ta’ong koém dengkir cai de Mori! Damang lélo le méu, co’oy ta’ong data ciwal uma te géréng dani situt méséng oné-mai umad. Isé kolé ta’ong dengkir cai usang cekeng rencak agu usang cekeng wéla.

JAMES 5:9

Asé-ka’én, méu néka jugut agu maja cama taus, boto wahéng le Mori Keraéng. Nuk dé, ho’o wa ranga gi Adak atat beté-bicar.

1 PETRUS 2:1

Landing hitu oké-koés sanggéd da’at, sanggéd nggapét, sanggéd pisik, jogot agu pocu.