Hebraeˊ 2:18 - Plang (Blang)

¹⁸ Kopti yam hk'eupˊ Eun kuˊ copˊlong naˊ, Eun pun ri hkamˊ hk'aˊ tukhka naˊ meun. Kop awnˊ na, Eun cang teumˊkawm peue buih hk'eupˊ kuˊ copˊlong naˊ ce yeut.

Hebraeˊ 2:18 ပူးပေါင်းရင်းမြစ်များ

Luˊka 22:28

Meuh peˊ peue utˊ maeeˊ Uiˊ yam pun Uiˊ ri hkamˊ kuˊ tukhka naˊ.

Luˊka 22:53

Utˊ Uiˊ maeeˊ peˊ nang kangˊhkungˊ ka nya hk'oˊ munˊ keuting naˊ keuyuit, peˊ hkuinˊ mheutˊ ri ti Uiˊ. Daecti yam maetˊmaenˊ naˊ a meuh yam peˊ, a meuh yam tiˊca duimˊlawng naˊ uˊpeung ka.”

Yoˊhan 10:29

Kuiingˊ Uiˊ kuˊ ap konˊyungˊ awnˊ ce ri Uiˊ naˊ keuting Eun hk'aiˊ ku ceu gawmˊeucˊ naˊ. Aˊnhawˊ hkuinˊ kaw cang rimˊ ri ti konˊyungˊ awnˊ ce hk'aiˊ dak tiˊ Eun Kuiingˊ Uiˊ naˊ.

1 Kawˊrinhtuˊ 10:13

Hk'aˊ copˊlong pon lheuˊ hk'aiˊ kuˊ tawn hk'eupˊ peue naˊ a hkuinˊ kaw laee kueˊ ri peˊ. Peucawoˊ kati keutawnˊ Eun. Eun hkuinˊ kaw taeˊ peˊ hk'eupˊ kuˊ copˊlong kaw peˊ hkamˊ unˊ pe naˊ. Daecti yam hkamˊ peˊ kuˊ copˊlong naˊ, punta kaw peˊ cang keutawnˊ hk'aˊruim ka hk'aˊ copˊlong naˊ pun, Eun kaw tuilˊ peˊ isˊ hk'aˊ kaw pucti heulˊ naˊ yeut.

Hpiˊliˊpiˊ 3:21

Hk'aˊnaee cu Eun tiˊca kuˊ cang yeuh ku ceu gawmˊeucˊ naˊ utˊ hk'aˊruim tiˊca Eun naˊ, Eun kaw plinˊ jawngkuiˊ tuˊ tem nyawkˊ eˊ naˊ meuh seunˊ jawngkuiˊ tuˊ kueˊ munhpungˊ keuting Eun naˊ.

2 Tiˊmoˊse 1:12

Meuh a kopti aenˊ a naˊ, uiˊ pun ri tukhka yeuhkiˊ. Daecti uiˊ unˊ kaic, kopti yawng uiˊ Cawoˊ yumˊ ri naˊ Eun. Uiˊ yumˊ kaw Eun roksaˊ kuˊ ap uiˊ ri Heun naˊ rot ti seunyi Yesuˊ Hkrit kaw Eun lih naˊ.

Hebraeˊ 5:2

Peue jhawpˊ rit keuting naˊ kopti ce ku kawlˊreng kloe yeut, ce kaw kah ri tukyak ri peue unˊ yawng maeeˊ peue kleucˊ hk'aˊ ri naˊ ce.

2 Petruˊ 2:9

Kopti yeuh a keutitˊ naˊ, Peucawoˊ Eun ciˊ kaw teumˊkawm peue leupaws seumeuˊ naˊ ce pon hk'aiˊ hk'aˊ copˊlong naˊ yeuh saˊnhawˊ naˊ, Eun yawng a. Eun ciˊ kaw hk'awngˊ, Eun ciˊ kaw suip ri ciyang peue unˊ leupaws seumeuˊ naˊ ce yeuh saˊnhawˊ heulˊ rot ti yam seunyi kaw tawsˊ aˊmu naˊ, Eun ku yawng a.

Yuˊda 1:24

Sukˊseunˊ Peucawoˊ Cawoˊ cang roksaˊ peˊ unˊ va peˊ htangˊmeul naˊ Eun. Eun va peˊ heulˊ nanggalˊ ka vang kueˊ munhpungˊ Eun naˊ ri plotˊlon naˊ maeeˊ hk'aˊ renˊkawn keuting nyawkˊ naˊ.

Tuhˊ ri tuilˊ 3:10

Kopti yeunˊhkam mi ri hotˊ leukahˊ tuilˊ Uiˊ naˊ, yam kuˊ long ri nawk naˊ punta kaw a long ri nawk peue utˊ pang bhenˊ keuteˊ naˊ ce a rot pang bhenˊ keuteˊ naˊ ku duihˊ naˊ, Uiˊ ku kaw yeuh mi lawtpon hk'aiˊ cu ka naˊ.