John 7:37 - Annaahk John Manistsitsinikatahpi Jesus Manistsipaitapiihpiai 1979

^37-39 O̱ki. Ki a̱nnika ki a̱i̱ʼstsaaiksistsikowa omi̱i̱stska o̱mahksiksistsikoistsi. A̱nnihkayi ksistsiko̱i istohkana̱o̱ʼtotamaʼpiwa. Ki a̱nnaoʼka oma̱a Jesus ita̱i̱poyiwa. Sota̱msaisttoowa. Itoto̱i̱sskskaniiwa aohki̱i̱ ma̱a̱hkitsopoyaʼpanissi mani̱stsspiayi amo̱ska Natowo̱ttakiska. A̱a̱niiwa, “O̱ki. Itsstsi̱i̱yi ksisto̱aawa kitsi̱totoisapsspoaawa a̱nni kita̱i̱ʼnakihpoaawa. Sta̱momaiʼtookik. Kita̱komiiksistssimihpoaawa. Ni̱tohkanaomaiʼtookiiksi a̱kohtoʼtsikimsskaawa aohki̱i̱ iihtani̱paitapiioʼpi. A̱kanistohtoʼtsikimsskaawa omi̱i̱ksi a̱o̱maiʼtakiiksi a̱nni aʼsi̱i̱tahtai. A̱nniai niitsi̱tssi̱naiʼpi omiistsi nato̱yisi̱naakssiistsi.” Oma̱a Jesus ota̱a̱ʼnissi aohki̱i̱ niitapa̱niwa Natowo̱ttaki. Niitapa̱niiwa a̱o̱maiʼtakiiksi a̱kitohkotayaawa Natowo̱ttaki. Anniihka otsi̱tanistoohpihka ma̱tomaohkotawaiksi a̱o̱maiʼtakiiksi Natowo̱ttaki. Ma̱tomiitaoʼto̱oyinai takaa Jesus ma̱tomainaya̱ttsaawaatsi.

John 7:37 ပူးပေါင်းရင်းမြစ်များ

John 1:23

Oma̱a John itani̱i̱wa, “Ki̱tssksiniihpoaawa niitssi̱naaihpi osi̱naakssini annaahk issko̱o̱htsika a̱waatoyiʼpoyiiwahka Isaiahahk. Itssi̱naihpa na̱i̱kayissiinapaniiwa ota̱kitsstsissi saoʼki̱oohtsi a̱kitoohtoawa. A̱kitaniiwa ‘A̱kaisopoatsistotoohsik. Kitsi̱naaiminnoona a̱i̱tamaakoʼtoowa.’ Niisto̱wakaoʼka annaahk na̱i̱kayissiinapsskoawahka a̱kitoohtoawahka.” A̱nniayii a̱a̱niiwa John.

John 14:6

Itani̱i̱wa Jesusa “Niisto̱wa a̱nnahkaoʼka annaahka kita̱kohtohkoitoʼtoohpoaawahka. Niisto̱wa a̱nnahkaoʼka moka̱moʼtaʼpssi. Niisto̱wa a̱nnahkaoʼka o̱mohtsiistapitsstsiihpi manipa̱i̱tapiʼssini. Oma̱a mata̱piiwa ikka̱msaohtohkoyikisi niisto̱i ma̱takohkoitoʼto̱owaatsi ninni.

John 4:10

Jesus itsipo̱ʼtanistsiiwa̱yi “Kima̱tssksiniihpa A̱ʼpistotookiwa otsiksi̱sstoohkotahpi mata̱piiksi. Ki kima̱tssksinookihpa nita̱mihpi niisto̱wa kita̱o̱hko̱iʼnaakato aohki̱i̱. Ki̱tssksini̱i̱htopiaawa kita̱ko̱kamaanikki. Ki ka̱a̱hkstaʼohtohkotohtopi a̱waawakoyi aohki̱i̱yi iihto̱ʼtsipaitapiiyoʼpi.”

John 4:11

Oma̱a aaki̱i̱wa itani̱i̱wa “Ki ma̱tsitsstsi̱i̱hpa ka̱a̱hkohtottakihpi ki a̱a̱mo maksi̱sskommi iksi̱pisttanisstsiiwa. Tsima̱a kita̱kohtsitotta̱kihpa a̱a̱mohka a̱waawakoyi aohki̱i̱?

John 4:14

Omi̱i̱ksi nita̱o̱hkotaiksi a̱waawakoyi aohkii ma̱takatto̱noaiʼnakiwaiksi. A̱a̱mohka nita̱o̱hkotahpiaawaihka aohki̱i̱yihka a̱kaissksohpipaaitapiiyaawa. Ami̱i̱ksi ni̱tohkotaiksi amohka aohki̱i̱yihka a̱kohtsawo̱noaissiksipaitapiiyaawa.”

John 5:40

Ki kimi̱ssksawaisstaahpoaawa ka̱a̱hkomaiʼtookssoaawayi ka̱a̱hkohtohkotohsoayi amoohka manipa̱i̱tapiiʼssinihka, amoohkkita̱yiikaʼkimatoohpoayihka.

John 6:35

Jesus itani̱stsiiwaiksi “Niisto̱ahkaoʼka amoohka napayi̱nihka. Mata̱piiksi a̱kohtoʼtsiitaaksipaitapiiyaawa. Kana̱o̱hpoʼkiisapooyiksi niisto̱yi a̱komiiksistsawattsisttsoʼkiniiyaawa ki ni̱tohkanaomaiʼtookiiksi ma̱takonoaiʼnakiwaiksa.

John 6:37

Ni̱nna nita̱kohkokka to̱kskammiksi mata̱piiksi kii akohkanaomatapomaiʼtakiiyaawa. Ki oma̱a mata̱piiwa ikkamo̱matapomaiʼtakisi nima̱taksstsimimma̱waatsiksi.

John 6:55

Nitsi̱i̱manistoohpa amoohka nita̱waanistoʼpihka nosto̱mi aa̱wahsini kii nitsa̱a̱pani anista̱piwa a̱a̱hkohtaisimioʼsi.

John 7:28

O̱ki. A̱nniai Jesus sota̱mitsipiima omii o̱mahkitawaatsi̱moihkaaoʼpi. A̱i̱sohkssitsipssatsiiwa omi̱i̱ksi ota̱i̱ssksinima̱atsaaiksi manista̱ksokaʼpoohto̱yihpiaiksi. A̱a̱niiwa, “Oki. Kanistsi̱ksimsstaahpoaawa, ka̱a̱hkssksinookihpoaawa kii no̱mohtoʼtoohpii. Kitsi̱pahtsiiksimsstaahpoaawa. Kita̱o̱kamoʼtanistohpoaawa iitsstsi̱i̱hpa nitsipo̱o̱hsapsskooki. A̱nnahkayi no̱mohtoʼtoo. Nima̱ta̱wattaistoohpa. Osto̱yi nitsipo̱o̱hsapsskooka. Ki kiisto̱aawa kima̱tssksinoaawaawaatsiksi.