John 7:13 - Annaahk John Manistsitsinikatahpi Jesus Manistsipaitapiihpiai 1979

¹³ Ki ami̱i̱ksi mata̱piiksi ma̱tohtsitsiʼpoyii omi̱i Jesus otsi̱takaitapiʼssi. Iiko̱maisstonnoyiiyaawa omi̱i̱ksi isto̱ʼtotamaʼpssiiksi Jews ma̱a̱hkitsitoohtoyissaawa.

John 7:13 ပူးပေါင်းရင်းမြစ်များ

John 19:38

O̱ki. A̱nnika oma̱a ni̱naawa, a̱a̱nistawa Joseph, osto̱yi iihto̱ʼtoowa omii aka̱i̱tapisskoi Arimathea. Iihtsapo̱o̱wa Jesus. Ki a̱i̱simiomaiʼtakiwa. Takaa iiko̱maisstonnoyiiwa omiiksi isto̱ʼtotamaʼpssiiksi Jews. Sota̱motoinoyiiwa Pilate. A̱a̱nistsiiwa omi̱i Pilate ikka̱mohkottoʼtsisi Jesus osto̱mi. Ki o̱tsskaakanikkayi. Ki a̱nniayii sota̱motooʼtsima Jesus osto̱mi.

John 20:19

O̱ki. Natoyi̱i̱ksistsikoi koʼko̱i ki a̱nni̱ksaoʼkiaawa omi̱i̱ksi Jesus oma̱nikapiimiksi itsi̱psta̱o̱piiyaawa na̱a̱pioyii. I̱kstonnoyiiyaawa omi̱i̱ksi isto̱ʼtotamaʼpssiiksi Jews. Ki a̱nnihkayii niita̱ʼpiyoʼkimiaawa omiistsi kitsi̱mistsi. O̱ki. Ki a̱nnika Jesus itsito̱ʼto̱owa i̱tsspiipoyiiwaiksi. Ita̱i̱ksimatsimmiiwa̱i̱ksi. A̱a̱niiwa, “Ki̱tohkotohpoaawa iʼta̱a̱maʼpii.”

John 3:2

Si̱i̱pioksisawa̱aatsiiwa ami̱i Jesus. Sota̱manistsiiwa̱yi “O̱ki a̱i̱ssksinimaatstohki. Ni̱tssksiniʼpinnaan kito̱ʼtssko̱yissi A̱ʼpistotookiwa ka̱ahkitssksinimaatstohkssi. Taka̱a kika̱taiʼsspommo̱yihtopi A̱ʼpistotookiwa kima̱takohkottanisttotsiihpa a̱a̱mostsi kipisa̱taistamatstohkssiistsi.”

John 7:1

O̱ki ki a̱nnika oma̱a Jesus ita̱ʼpawaawahkaawa omiim Galilee. Ma̱taahsiʼtakiwa ma̱a̱hkitaʼpaissii omiim Judea takaa omi̱i̱ksi isto̱ʼtotamaʼpssiiksi Jews iiksi̱i̱kaʼkimaayaiksi ma̱a̱hksiʼni̱yissaiksi.

John 7:11

O̱ki. Omi̱i̱ksi isto̱ʼtotamaʼpssiiksi Jews ita̱ʼpaissammiiyaawa Jesus omiim otsi̱taohkanaʼpssatoohpiaawa o̱mahksiksistsikoi. A̱a̱niiyi, “Tsima̱a̱hta a̱a̱hkitaʼpaitapiiwahtaoʼtsiksi.”

John 7:15

Ki Omi̱i̱ksi isto̱ʼtotamaʼpssiiksi Jews iksi̱pisatsimmiiyaawa Jesus. A̱a̱niiyaawa, “Haa! Ma̱tssksinima̱atsaawa oma̱a ni̱naawa. Tsa̱a̱hta a̱a̱hkanistaohkottssksinimaatstohkiwahta a̱nni.”

John 9:22

Ki a̱nniai a̱a̱niiyaiksi o̱nni ki o̱ksisstsi. A̱a̱mohka iihtani̱i̱yaawa otsto̱nnoahsaawa omi̱i̱ksi isto̱ʼtotamaʼpssiiksi Jews. Omi̱i̱ksi istoʼtotamaʼpssiiksi Jews a̱kaisapaʼkootsiiyaawa a̱kohkottsayitsstsiihpa a̱a̱hkanii Jesus a̱nniskaoʼkinai A̱ʼpistotookiwa anniiska o̱mohtakohkoikiihpiska. Itoka̱kihtsimaayaawa ikkami̱tsstsiihki a̱a̱hkanii, osto̱yi a̱kohtsitsiksiwa̱attsaawa otsi̱tawaatsimoihkaahpoaawa ma̱a̱hksisamsawattsitatsi̱moihkaani.

John 9:34

O̱ki a̱nniayi oma̱a ni̱naawa oso̱tamanikkaiksi, “Kiisto̱wa kitsi̱i̱kaisopokokaʼpitapiiyi kitsi̱tsipokayihpi. Ki a̱nnohka kita̱i̱ssaakssksinimaatsookihpinnaan. Sta̱msaksit!”