John 2:22 - Annaahk John Manistsitsinikatahpi Jesus Manistsipaitapiihpiai 1979

²² Ki a̱nnika po̱o̱hsapoohtsika ota̱i̱ʼssksipoaaohsi Jesus oma̱nikapiimiksi i̱tsskssksinimiaawa omiihka ota̱a̱niihpihka. Ki a̱nnihkayii iihtsito̱maiʼtsimiaawa omii nato̱i̱si̱naakssini ki ota̱a̱niihpi Jesus.

John 2:22 ပူးပေါင်းရင်းမြစ်များ

John 12:16

A̱a̱mohka Jesus ota̱nisttsiihpi omi̱i̱ksi oma̱nikapiimiksi ma̱tsitotsistapiʼtsi̱maiksaawa. A̱nnika po̱o̱hsapoohtsika Jesus a̱aʼksinayattsaahsi a̱nnihkayii itssko̱tsistapiʼtsimiaawa ki itssksini̱miaawa omi̱i Jesus ota̱a̱nisttsiihpi a̱nnihkaoʼka anniihka itsi̱kayissiinaapsskohkatoohpihka omii nato̱isi̱naakssini. Noohka̱ttsskotsistapiʼtsimiaawa ota̱a̱nisttotomoahpiaawa Jesus.

John 14:26

Ki oma̱ahka kita̱ka̱i̱sspommokoaawahka oma̱a̱hka natowo̱ttakahka, kita̱kssksinima̱atsookoaawa kana̱ʼpaisistsi. Kita̱ksspommookoaawa ka̱a̱hksskssksinissoaayi kana̱ʼpaisistsi kita̱a̱nistohpoaawaistsi. Oma̱a Natowo̱ttaka, a̱nniskaoʼkinai ota̱koʼtsskoai ni̱nna. Niisto̱yi a̱kohtoʼtsskoyiiwayi.

John 16:4

A̱nnohka kitsi̱kayissanistohpoaawa ota̱yakanisttsiihpiaawa. Ki a̱nniai aa̱oʼtsstsiisi otsi̱takanistaʼpaisspiaawa kita̱kitsaakiaissksinihpoaawa kitsi̱i̱kaanistohpoaawayi. Anni̱i̱hka istsitsa̱omatapaaoʼsi a̱a̱mohka kima̱tsitanistohpoaawa, takaa kitsi̱tohpokaʼpaissiimohpoaawa.

John 2:11

O̱ki. A̱a̱mohkayii otsi̱stsitsawaistamatstohkssina opisata̱ʼpssina oma̱a Jesus. A̱nnima itani̱sttotsimayi omiim aka̱i̱tapissko i Cana. Istaka̱i̱tapisskowa omii Galilee. Kii a̱nnimayii ita̱i̱stamatstohkatooma mani̱stsspsspi ki oma̱nikapiimiksi otsi̱tomatapomaiʼtookaiksi.

John 2:17

A̱nnika omi̱i̱ksi oma̱a Jesus oma̱nikapiimiksi itssko̱tsistapiʼtsimiaawa omi̱i̱stsi naato̱i̱sinaakssiistsi niitsi̱kayissiinaapsskohkatoohpi oma̱a Jesus ota̱kanistayiikaʼkimatoohpi o̱mahkitawaatsi̱moihkaoʼpi. Itssi̱naiʼpa aatsi̱moihkaani, “A̱yo A̱ʼpistotooki, nita̱kohtoksistotookowa tanista̱yikaʼkimatoohpi koko̱o̱wayi. Niitsao̱kamoʼtsistotsiihpi ni̱i̱taʼpohtokiʼtaki, ki a̱nnihkayii ta̱kohtoksistotookowa.”