John 15:10 - Annaahk John Manistsitsinikatahpi Jesus Manistsipaitapiihpiai 1979

¹⁰ O̱ki. Ikkama̱nistaiʼtsiminoainiki, nitoka̱kihtsimaanistsi, kita̱kohtitsayipoʼtsiihpoaawa kita̱komimmohsoaayi. Niiʼto̱i nanista̱nistaiʼtsiihpiaawa ni̱nna otoka̱kihtsimaanistsi ki a̱nnihkayii no̱mohtsayipoʼtsiihpa nita̱komimmi̱yisi.

John 15:10 ပူးပေါင်းရင်းမြစ်များ

John 10:18

Ma̱takitsstsiiʼpa ni̱tsskohtoistotooki na̱a̱hksiʼnssi. Niisto̱wa nita̱kawattsskskaaʼtsimatoʼpa na̱a̱hksinssi. Niisto̱wa nini̱ʼtsitapiiyi nita̱kohkottsskskaʼtsimatoʼpa. Ki nini̱ʼtsitapiiyi nita̱kohkottsskskaʼtsimatoʼpa na̱a̱hkssksipaitapiʼssi. Ki a̱nniai nanisto̱kakihtsimakka annaahka ni̱nnahka.”

John 12:49

Takaa niisto̱wa nima̱tawattsiʼpoyiihpa. Annaahka nito̱ʼtsskookahka ni̱nnahka nita̱a̱nikka na̱a̱hkstsinaaʼnistsiʼpoyissi.

John 14:15

Kii ikkama̱komimmokiinoainiki kita̱kitanistaiʼtsiihpoaawa nitoka̱kihtsimaanistsi.

John 14:21

Oma̱a maʼtsi̱ma nitoka̱kihtsimaanistsi, ki niita̱i̱ʼtsimaistsi, ki a̱nnahkaoʼka nita̱komimmokahka. Ki oma̱a nita̱komimmoka, ota̱kitakomimmoka ni̱nni, ki niisto̱wa nita̱kakomimmawa. Nitakitaistama̱atsoohsatawa.”

John 14:23

Jesus itani̱i̱wa, “O̱ki, kana̱i̱tapiiwa nita̱komimmokiksi, a̱kanistaiʼtsimiawa nita̱a̱niihpistsi. Ota̱kitakomimmokoaawa ni̱nni. Ni̱nna ki nisto̱wa nita̱kitoʼtoohpinnaan omi̱i̱ksi. Nita̱kitaisksohpokaʼpaissiimannaaniaawa.

John 14:31

Ki a̱nnohka, ta̱kaistamaatsaawa o̱tapiʼssini nita̱komimmahsi ni̱nni; nanista̱niiyihpi ni̱nni, a̱nniai nita̱kanisttsi. Oki̱h. A̱a̱hkonomatapaaoʼpa.”

John 17:4

Niisto̱wa a̱nnohka nitsi̱taʼpaitapiiʼssi anno̱o ksa̱a̱hkommi nitsi̱tohkanawanisttotsiihpiaawa ki̱tohkokkihpistsi na̱a̱hkaʼpoʼtsissaawa. Ki a̱nniayi nanista̱i̱stamaatstohkatoʼpa kani̱stsspsspi.

John 4:34

Sota̱maniiwa oma̱a Jesus, “Nita̱waanisttotsiihpa otsitsi̱i̱htaanistsi annaahka nito̱ʼtsskoohkahka, annaahka A̱ʼpistotookiwahka, kii nita̱akohkanaiksistaʼpoʼtsiihpa ota̱ʼpoʼtakssini. A̱a̱mohka nita̱wanisttotsiihpihka, ki a̱nnihkayii nimi̱i̱ksi̱stsoahsini.

John 8:29

Ki annaahka nito̱ʼtsskookahka, ni̱nnahka ni̱tohpokaʼpaissiimoka. Nima̱tsiʼtsitaisskikkaatsiksi. Takaa ta̱i̱ssksawanisttotsiihpi kana̱ʼpaisistsi iihta̱yaahsiʼtakia̱ttsaahpistsi.”

John 8:55

Kiisto̱aawa kima̱tomaikakssksinoawaawa. Niisto̱wa nino̱o̱hkssksinoaawa. Nita̱a̱niihtopi nitsawa̱i̱ssksinoahsi nita̱a̱ksayiipitsi, a̱nni kiisto̱aawa kanista̱i̱sayiipitsspoaawayi. Ki nino̱o̱hkssksinoawa, ki nitanista̱i̱ʼtoawa ota̱a̱niihpistsi.