John 14:24 - Annaahk John Manistsitsinikatahpi Jesus Manistsipaitapiihpiai 1979

²⁴ O̱ki, ki oma̱a nika̱taaʼkomimmoka osto̱yi ma̱takanistaiʼtsima nita̱a̱niihpistsi. Ki a̱nnohka kito̱o̱htookihpoaawaistsi kita̱a̱nistohpoaawaistsi, nima̱tawattanistoohpiaawa; nito̱ʼtsskookahka, ni̱nnahka otsi̱ʼpoahsinaistsi.

John 14:24 ပူးပေါင်းရင်းမြစ်များ

John 14:10

Kaahkstama̱i̱ʼsayiʼtookihpoaawa nomohpipa̱i̱tapiiʼssi ni̱nna, ki ni̱nna omohpipa̱i̱tapiiʼssi niisto̱yi. Kii amo̱stska kita̱a̱nistohpoaawaistska nima̱tawattanistoohpiaawa. Ni̱nna iihpipa̱itapiiwa niisto̱i kii omi̱i̱stsi nita̱wanisttsiihpistsi, oosto̱yi a̱nnahkaoʼka a̱wattanisttotsimaistsi.

John 14:15

Kii ikkama̱komimmokiinoainiki kita̱kitanistaiʼtsiihpoaawa nitoka̱kihtsimaanistsi.

John 14:25

O̱ki. A̱nnohka kitsi̱tohpokaʼpaissiimohsoayi kitsi̱tanistohpoaawa a̱a̱mostska.

John 3:11

Kita̱kanisto niitsi̱i̱yi. Niisto̱nnaan no̱mohta̱i̱ʼpoyiihpinnaan ni̱tssksiniihpinnaanistsi kii nita̱i̱tsinikatoohpinnaan nitsini̱i̱hpinnaanistsi, ki kiisto̱aawa kima̱taisskaakomaiʼtookihpinnaan nita̱waaniihpinnaanistsi.

John 3:34

A̱ʼpistotookiwa anniiska oto̱ʼtsskoayiska, Jesusiska a̱i̱ʼpoatoominayi otsi̱ʼpoahsistsi annaahka A̱ʼpistotookiwahka. A̱ʼpistotookiwa ma̱tohkoissikihtsiiwa mani̱stohkotahpi Jesusi Natowo̱ttaki. Ki a̱nnihkayii Jesus iihtohko̱ttsiʼpoatoomi A̱ʼpistotokiiyi otsi̱ʼpoahsists.

John 5:19

Ki a̱nnihkayii Jesus iihtani̱stsiiwaiksi anniihka o̱mohtaniihpihka “Ni̱nna ma̱ta̱o̱noaiksistaʼpoʼtaki ki a̱nnihkayii nino̱o̱hkattohtaʼpaoʼtaki i̱makssikopiiksistsikosi.” A̱a̱nistsiiwaiksi, “Nitohkoyimi̱yissi A̱ʼpistotookiwa no̱mohtanistaʼpaissi osto̱yi manista̱ʼpaisspi. Nima̱tawawattanisttotsiiʼpaatsi niisto̱wa. Osto̱yi ta̱waistama̱atsooka manista̱ʼpaisspi niʼto̱i̱ na̱a̱hkoohkattanistaʼpaissi. Ki nitsi̱tawanisttotsiiʼpi nanista̱waistamattsi̱yihpi.

John 5:38

Kima̱tohtaikiihpoaawa A̱ʼpistotookiwa ota̱a̱niihpi. Ki a̱nnihkayi ko̱mohtsawaakomaiʼtookihpoaawa. Niisto̱akaoʼka anniska oto̱ʼtsskoayiska.

John 7:16

Jesus sota̱manistsiiwaiksi, Nima̱tohtaissksinima̱atstohkihpa niisto̱wa niksi̱msstaanistsi. Annaahka A̱ʼpistotookiwahka, nito̱ʼtsskookahka a̱nnahkaoʼka o̱mohtoʼtsstsiihpiaawa nitssksini̱maatstohkssiistsi.

John 7:28

O̱ki. A̱nniai Jesus sota̱mitsipiima omii o̱mahkitawaatsi̱moihkaaoʼpi. A̱i̱sohkssitsipssatsiiwa omi̱i̱ksi ota̱i̱ssksinima̱atsaaiksi manista̱ksokaʼpoohto̱yihpiaiksi. A̱a̱niiwa, “Oki. Kanistsi̱ksimsstaahpoaawa, ka̱a̱hkssksinookihpoaawa kii no̱mohtoʼtoohpii. Kitsi̱pahtsiiksimsstaahpoaawa. Kita̱o̱kamoʼtanistohpoaawa iitsstsi̱i̱hpa nitsipo̱o̱hsapsskooki. A̱nnahkayi no̱mohtoʼtoo. Nima̱ta̱wattaistoohpa. Osto̱yi nitsipo̱o̱hsapsskooka. Ki kiisto̱aawa kima̱tssksinoaawaawaatsiksi.

John 8:26

Ki iika̱kaoi nanista̱akohtsiʼpoyihpi kiisto̱aawa; ika̱kawoyi ko̱mohtakokakihtsimatohpoaawaistsi; kii, ki anna̱a̱hka nito̱ʼtsskookahka iiko̱kamoʼtaʼpssiwa, ki a̱nnohka nika̱a̱kanistawa mata̱piiwa nita̱a̱ni̱yihpistsi annaahka nito̱ʼtsskookahka.”

John 8:28

Ki a̱nnihkayi Jesus iihtani̱stsiiwaiksi, “Niisto a̱nnaoʼka annaahka Mata̱piiwahka. Kiisto̱aawa aiʼsspipipo̱ʼtookiinoainiki ki a̱nnikayii kita̱kitssksiniʼpoaawa niisto̱akaoʼka. Kii ma̱tsitsstsiihpa nita̱wattanisttotsiihpi. Nika̱ksaanistoohpiaawa nita̱i̱ssksinimaatsiyihpi ni̱nna.

John 8:38

Niisto̱wa a̱nnoohka no̱mohtaiʼpoyii omi̱i̱stsi nitsini̱ʼpinnaanistsi ni̱nna. Kiisto̱aawa kita̱waanisttotsiihpoaawa kita̱a̱niyihpoaawaistsi ki̱nnoaawa.”

John 8:42

Jesus sota̱maniiwa, “Kita̱o̱nimmawawahtopi A̱ʼpistotookiwa kita̱kakomimmokihpoaawa. A̱ʼpistotookiwa a̱nnahkaoʼka no̱mohtoʼtoo. Ki a̱nnohkai a̱nnoma tsi̱taʼpaitapiiyi. Nima̱tawattsitoʼtoohpa. Osto̱yi nito̱ʼtsskooka.