Malasi 3:5 - Yálá laawoo hɛɓɛ (dc)

⁵ A tɛ̨ą, Yai-Laa Mɛ̨nį Kəlee ŋą Hééɓomun nwoo ka, yɛ diɛ: Ŋą́ pa, ŋą́ hee ka lɔwai, ŋą́ ka mąą mɛ̨nįɠaa hutɔɔ. Ŋą́ haŋą həɠə-hɛn nąmįną diɛ a mąą hulaa; diɛi da kɛ wɛli hon ɉi, diɛ di kwɛla a lɛɛ, diɛ kólo kɛ nuą hvɛla kulɔ di yəi, diɛ too təlilɛa da galaninŋaa mɛ̨i, diɛ nwɛ̨ąą yee kpɛlaan, diɛ hɛn gulɔ di yəi; ɛlɛɛ, da nuąi di hva ɲɔw mą́ą́.

Yálá laawoo hɛɓɛ

⁵ A tɛ̨ą, Yai-Laa Mɛ̨nį Kəlee ŋą Hééɓomun nwoo ka, yɛ diɛ: Ŋą́ pa, ŋą́ hee ka lɔwai, ŋą́ ka mąą mɛ̨nįɠaa hutɔɔ. Ŋą́ haŋą həɠə-hɛn nąmįną diɛ a mąą hulaa; diɛi da kɛ wɛli hon ɉi, diɛ di kwɛla a lɛɛ, diɛ kólo kɛ nuą hvɛla kulɔ di yəi, diɛ too təlilɛa da galaninŋaa mɛ̨i, diɛ nwɛ̨ąą yee kpɛlaan, diɛ hɛn gulɔ di yəi; ɛlɛɛ, da nuąi di hva ɲɔw mą́ą́.

Bible

⁵ Ŋ̀wála-wâla kélee Yâwɛɛ a môi ǹyɛɛi, “Ŋa pâi pâi kápɔ ŋá kámɛnii ŋáa tée, ŋá sêre-faa kɛ́ ŋɔ́nɔ é pîlaŋ bóniŋ kɛ́-ƃelai dîa da ŋ̀ulu-wulu kɛ́-ƃelai, ǹɛ́ɛ-sere-faa kɛ́-ƃelai, da diai da díi-kɛ́-ƃelai dífela-fei mîi a wôya perei, diai da díŋɛi nàɣiŋ bɔɔ-nɛyãai mɛi, dee-lônii, ǹɔii da kpɛ́ni su-ƃelai, é pɛ́lɛ diai dîa dífa ƃaa-kɛ́-maa tɛ̀ɛ ḿbɔi.

Malasi 3:5 ပူးပေါင်းရင်းမြစ်များ

Zɛnɛse 20:11

Abrahamə ə nwoo ŋąąpənə, yɛ mą: «Ə kɛ gwə́i ɓɛ nɔi nuą di hva ɲɔw Yálá ɓa, gɛ́ diɛ: ‹Gbəli hu, di kaa pai báái, nɛ̨́ą mąą mɛ̨nį ɓa.›

Zɛnɛse 42:18

Voló ɉaaɓa yələ, yɛ diɛ: «Mɛ̨nį gáá ɉu hvɛlii kaa, ka gɛ, ka nwun mąą a ɓo. Mąąhɔlɔɓo, ɲą́ą́ gbɛli, ŋą ɲɔw Yálá ɓa.

Nehemi 5:15

Nɔi ɲąąwooɓo nuą tɔlɔɔ-tɔlɔɔɠaai kɛ dɔ́wɔ, di kɛi too nɔi lonnii mɛ̨i, diɛ kɔ̨nɔ̨n gulɔ di yəi, da lɔɔ, ɛlɛɛ yili pulu diɛ wali kwələ pow nąąn ɉəɠə di yəi. Di yee pɔ nuą kpɛli mąn, di kɛi hee nuą mɛ̨i. Kɛlaa nwɛi, və́ tíwɔ́ tii, mąąhɔlɔɓo, ŋį́ ɲɔw Yálá ɓa.

Zôo 31:12

Yili a kɛ kɛ a nwɔ̨n, yii a lɛɛ níi kələn ɉii ə nwún na pili, Ə li nwɔ́ wuluɠaai kəlee paa kpɔ, ə həli la ɉamu ɓa.

Zôo 7:2

Bələi kpɔlɔ luwɔ a vii too la nįnįn mu, bələi kpɔlɔ koló kɛ mun a vɛla mąąkpɔn na,

Mąątɛ̨nɛ̨ 36:1

Nwələ ɲɛ̨itɔwɔmun, Yai-Laa nwɔ tímun Davidə nwɔ wələ woo.

Mąątɛ̨nɛ̨ 81:8

Ɓɛlɔwai ə́ kɛi tomą la mɔ̨nɔ̨ hu, ŋą́ ə́ kulɔ ɉu, ŋą́ ə́ woo mu hon, ŋį́ ɓo a nóɔ tulɔ hvąŋą hu, ŋį́ ə́ hu kɔɔn Meriba yá kwɛlɛ.

Mąątɛ̨nɛ̨ 96:13

'ka gɛ tii Yai-Laa tɔwɔ, mąąhɔlɔɓo, gaa pai, gaa pai lɔi ɲąąwooɓoi. Gaa pai yɛnɛ̨ɛ̨ ɲąąwooɓoi a tələnmolaa, da nu huwuɠaa, yɛ bələi ɉąŋąąi la.

Mąątɛ̨nɛ̨ 98:9

'Ka gɛ tii Yai-Laa tɔwɔ, mąąhɔlɔɓo, gaa pai lɔi kiti teei, gaa pai yɛnɛ̨ɛ̨ kiti teei a tələnmolaa, ə mą kɛ nu huwuɠaa.

Lɛɛ gbɔwɔ ɓa 1:17

Kɛlaa, vɛlɛɛlee kɛ nɛ̨ąą tii, di ɲɔw Yálá ɓa, di hvo gɛ, di hvo lɛɛ dɔɔmun nwoo ɲą. Di hvo kɛi ɉinąą paa.

Lɛɛ gbɔwɔ ɓa 18:21

Ɛlɛɛ, ə́ ɲɛ̨i laa nuą lɔwai, ə́ nu ɓɛlɛmąąɠaa həɠə, diɛ ɲɔw Yálá ɓa; nuą diɛ pɛli laai di la, di hvo kɛ a nɔ gwəi hɛn ɉon nuą, ə́ di hee nuą nwun na. Ə́ daɠaa hee nu waa tɛitɛi nwun na, ə́ daɠaa hee nunwun dɛitɛi nwun na, ə́ daɠaa hee nu pow lɔɔli lɔɔli nwun na, ɛlɛɛ, ə́ daɠaa hee nu pow pow nwun na.

Lɛɛ gbɔwɔ ɓa 20:7

«'Hvó Yai-Laa ə wɔ Yálá laa ɓo kpɛli-kpɛli. Mąąhɔlɔɓo, nui a naa ɓo kpɛli-kpɛli, Yai-Laa a mąą nui hutɔɔ.

Lɛɛ gbɔwɔ ɓa 22:20

«‹'Hvo ə́ yee pənə nwɛ̨ą hu, mąąhɔlɔɓo, kaa kpɛli ka kɛ a nwɛ̨ąą Eziptə lɔi hu.

Hanwon 16:6

Ɲɛ̨imąąwɛli kaa da lɛɛ nwoomulaa da nɛ̨ŋɛ̨n nwaa, Yai-Laa nwɔ ɲɛ̨i ɲɔw mąąlaa yɛ nu pulu tɔɔ mɛ̨nį ɲɔ̨n ma.

Hanwon 8:13

Nui a mɛ̨nį ɲɔ̨n nwɛli kpɛɛ mą, a kɛ tii, aa ɲɔw Yai-Laa ɓa. Ɲą́ą́ nwɛ́i, kpɔwɔ ŋąą kɛnɛ̨ da ɲɛ̨itɛ di wɛli hvo mą́ą́. Túwɔ́ pələ ɲɔ̨n da lɛɛ hvaa, di wɛli hvo mą́ą́.

Azaya 57:3

Ka wɛi, 'ka lɛɠɛɓɛ, dɔlu kpɛ nɛ̨ɛ̨nu lonnii, wɛli hon ɉilɛnu, da wɛlikɛnɛ̨ɛ̨nu di lon.

Ɉeremi 23:10

Di kəlee di kaa a wɛli hon nuą nɔi tii hu, nɔi kaa haa wɔlɔ ɓoi, diɛ nɛ̨ŋɛ̨n naa kɛ, gala tɛlinŋaa daa kpala gbomoi, mɛ̨nį ɲɔ̨n mə da mąą gilɛ həɠə, hulu mɛ̨nį ɓə di hvaŋąlɔɔ mą diɛ gɛ.

Ɉeremi 27:10

Lɛɛ ka tii di kaa gɛi káá; Di káá ka mąą kwɛai ka wɔ lɔi ɓa. Gáá pai ka taɠa taɠai, káá haa.

Ɉeremi 27:9

«A kɛ tii, ka hvo ka wəli tɔɔ ka wɔ mɛ̨nį ɓoɔ gɛɛ tɔwɔ nuą woo ɓa, da ka wɔ tɔli kpɛ nuą, da ka wɔ hįi woo hukulɔ nuą da ka wɔ ɲɛ̨ąkpɛ nuą, da gwɛlɛɛn gɛ nuą diɛ, diɛi tii kɛi kaa: 'Ká hvo pai lɛɛi Babilonə tɔɔmun yee mu.

Ɉeremi 29:23

Di wɔ nɛ̨ŋɛ̨n kaa a mɛ̨nįi bələ hva ɓo Israɛlə lɔi hu; di kaa wɛli mɛ̨nį hu da di ɓɛlaa di nɛ̨ąni, diɛ mɛ̨nį ɓo a náá a lɛɛ; ya pa, və́ mɛ̨nį ta ɓo li diɛ. Gbaɠala kaa mą́ą́, ɛlɛɛ, gɛla ɓaa ɲą́ą́ gbinįi. Ɲą́ą́ Yai-Laa nwóó li!»

Ɉeremi 42:5

Nąąlɔwai, diɛ Ɉeremi ɓa: «Yai-Laa kaa a kɛla haŋąą, dələnmoɔi. Wooi lɔpee gaa pai moi yɛ́, a ku mąą mɛ̨nį, bələ kpɔlɔ ɓə kwa gɛ la.

Ɉeremi 5:2

Nuą di mą kɛ di kwɛlai diɛ kɛ: «Kpɔ Yai-Laa laa hu.» Daa di kwɛla a lɛɛ.

Ɉeremi 5:29

Yai-Laa yɛ diɛ: Mɛ̨ni kɛ pələ a kɛ tii, a kɛ tii, vá mɔ̨ɔ̨ di hutɔɔ? Ŋą́ nwą́ną kulɔ nu huwu taaləi tii ɓa!

Levetekɔ 19:13

«Hvó ə yee pənə ə́ ɓɛlan gaa lon ɉu, hvo too mɛ̨i. Kóló kɛ mun vɛla hvo lɛɛ ə́ yəi yələ hvo ɓɔ.

Levetekɔ 20:10

«Nui a laa a mɛlan nɛ̨ą, da nu hveelɛi tii paa.

Levetekɔ 20:27

«Nui lɔpee, ə kɛ a hulɔnu ə kɛ a nɛ̨ɛ̨nu a nwɔ mɛ̨nį laa həli ɲąmuątaa tɔlukpɛ nuą diɛ, mąąnɛ̨ɛ̨ di mąą nui paa; da lɛɛ ɉɔɔi a kwɛni, ə lɛɛ ɉu ə haa. Di ɲąmą wulu a lɛɛ di kpɔwɔ nwuɔ̨.»

Levetekɔ 20:6

«Nui lɔpee a li ɲąmuątaa tɔlukpɛmun da pɔɔli mąą tɔlukpɛ mɛ̨nį ɓa, yɛ gbɔwɔ mąąiɓi la tii, ŋą́ hee mąą nu hu, ŋį́ gulɔ nɔi nuą lɔwai.

Mise 1:2

Yɛ diɛ: Hį́i kəlee, 'ka ka wəli tɔɔ! Lɔi, ə pɛlɛ ɉu hɛnŋąą diɛ, aa həli kaa! Nąmu Yálá kaa bɔ ə ka hɔn mo! Yai-Laa, yaa tii nwɔ pɛlɛ́ mąąhəɠɛɛ mui.

Habakukə 1:12

Yai-Laa ə həɠə kpɔ yɛnɛ̨ɛ̨ pɛli yələ ɓa, ə həli la yiihu ɓa, kɛlaa yɛ́ lɔ ɓə a nwɔ́ Yálá? Nwɔ Yálá mąąhəɠɛɛ, yili ɓa ku hvo pai haai! Yai-Laa, yɛ́ ɓə a ku mą́ą́kpɛ kwɛni. Yɛ́ ɓə nuą tii həɠə ɉu, ə́ di kɛ a ku hutɔɔ hvaɠa, di ə́ nwąną kulɔ kuɔ.

Zakari 11:12

Yili ɓə gɛ, gɛ́ diɛ: «A nɛ̨ɛ̨ kaa, ka vɛ́la kulɔ; ka wala kɛ bɔ, ka nɛɛlaa.» Kɛlaa, di vɛ́la kulɔ a wali kwələ pow haaɓa.

Malasi 1:6

Ɲą́ą́ Yai-Laa Mɛ̨nį Kəlee ŋą Hééɓomun, mɛ̨nįi gáá moi ɉaláá laa həli nuą diɛ, ya ka, gɛ́ diɛ: «Lon a nąn mąąwiɛ, luwɔ yɛ nąmu mąąwiɛ. Akɛtii, ɲą́ą́, və́ mɔ̨ɔ̨ a ka nąn, da ka Nąmu? Gɛ pələ kaa ləi, yai, ka hva mą́ą́wiɛ? Ka kɛ mɛ́lɛkpɛɛi mą́ą́, kaa kɛ mą: ‹Lə mɛ̨nį ɓə ku ɓɛlɛkpɛɛ yɛ́ ɉu?›

Malasi 2:14

Ka kɛ mąąnįn kɛ kɛi, kaa kɛ mą: Lə mɛ̨nį ɓa, Yálá hvo kɛa bɔ? Mąąhɔlɔɓo, ká ká woo kwɛlɛ ka láŋą nɛ̨ɛ̨ ɓa, Yálá kaa a kɛla ká yaa ka lɔwai; Ya pa, yáá kpįnįi ɓə ɉəɠə ɉu, ə kɛ a ə́ nɛ̨ą, a ə́ hiɛ gee pulu. Kɛlaa ya ka, yáá vulu, yáá nɛɛ.

Malasi 2:17

Ka wɔ woo hukulɔ tamąą a kɛ Yálá hvįikpɛɛi. Kɛlaa, a kɛ lɔi tii, kaa kɛ mą: «Lə mɛ̨nį ɓə kwa kɛ viikpɛɛi ɉu?» Kɛi ŋɛ̨i ka mo mą: «Yálá ɲɛ̨i lɛlɛɛ hee mɛ̨nį, mɛ̨nį ɲɔ̨n gɛ mun ma, yɛ nu taaləi tii mąątɛ̨nɛ̨.» Káá kɛ nwɔ̨nɔ̨ mą: «Tələnmo Yálá wɔɔ?»

Lukə 23:40

Kɛlaa, mɛ̨nį ɲɔ̨n gɛ mun ŋɛ̨i kɛ ɲee lɛlɛɛ hu, ə haŋą mɛlan ma, yɛ mą: «Akɛti hva ɲɔw Yálá ɓa? Ə́ kɛ hɔn ga ŋɛ̨i ə́ kaa mąą mɔ̨nɔ̨ mįi,

Lomaŋ 3:8

A kɛ ti kani, lə mɛ̨nį ɓa gu hva túwɔ́ pələ ɲɔ̨n gulɔ, ə gɛ, mɛ̨nį lɛlɛɛ ə kulɔ ɉu? Yɛ bələi laakala kɛ nuą da gɛ kuɔ mo la? Nuą ti hvɛla ɓaa a gaho.

Dutɛrɔnome 15:13

Ka ɓo mą, mąąnɛ̨ɛ̨ ə həɠə ka pɔɔli, kɛlaa, ka hvo nɛɛ laa hvo li a ɲeehowolo.

Dutɛrɔnome 18:10

Mąą hvo nɛ̨ɛ̨li, nu ta hvo kɛ ka lɔwai, yɛ kɛ gaa non gulɔi a haláá, yɛ gələn; nu ta hvo kɛ a tɔlikpɛmun; a wala kɛ tii, yɛ ɲɛ̨ąkpɛ, yɛ kɛ gaa hįį woo mukulɔi,

Dutɛrɔnome 24:17

Ka hvo nwɛ̨ą, a wala kɛ tii təli lon nwɔ tɛ̨ą mɛ̨nį pili ɉu. Ka hvo galanin mąąhəɠə hon a tolaa.

Dutɛrɔnome 27:19

«‹Nui a nwɛ̨ą, təlilon da galanən di wɔ tɛ̨ą mɛ̨nį pili ɉu! Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!›

Dutɛrɔnome 5:11

«'Ka hvo Yai-Laa ka wɔ Yálái laa ɓo kpɛli-kpɛli mɛ̨nį hu; mąąhɔlɔɓo, nui a Yai-Laa laa ɓo kpɛli-kpɛli mɛ̨nį hu, Yai-Laa hva nɛɛ lɔ tii, yii hvo ɉutɔɔ li.

Tɛsalonikə dɔlɔɔ 4:6

nu ta hvo kɛ gaa mɛlan vului, yɛ mɛ̨nį nwąnąą laa mą mɛ̨nįi ŋɛ̨i hu, gbala ə tɔɔ, gu Nąmu a yili kəlee gwələ kulɔ, yɛ bələi ku gbɛa mo la káá, kuɔ mąąlaŋąn.

Hebreu 13:4

Hílɛtai yíi mɛlɛ ə kɛ mą nu kəlee ɲɛ̨i ɓa, ɛlɛɛ, hilɛtai gbin, hvo kɔhɔɓo; mąąhɔlɔɓo, túwɔ́ pələ ɲɔ̨n gulɔ nuą, da wɛlikɛ nuą, Yálá kaa pai di kiti teei.

Zĩi 5:12

Mɛ̨nį kəlee ə mą kɛ, nąn nonnii, 'ká hvo ká kwɛla a yələkɔlɔn da lɔi, a wala kɛ ti, a hɛn ɉuwui lɔpee gəlee ta. Ká wɔɔ «ee!» ə kɛ a «ee!» Ká wɔɔ «kpaa!» ə kɛ a «kpaa!» Ya ɓə a gɛ, ká hva too la kitii hu.

Zĩi 5:4

'Ká ɓɛ kaa tai! Nuąi kɛi kólo kɛ ka yəi ɲɛa, di halai ká ká yee kanąn mą, gaa tomąi, góló kɛ nuą wɔlɔ woo aa too Mɛ̨nį Kəlee ŋą Hééɓomun nwəlii.

M̀ɛni-lɛɛi 21:8

Yii ɓaa ɲɔw nuą, diɛi di hvo kulɔ di woo ɓa, diɛi a tuwɔ pələ ɲɔ̨n gulɔ nuą, a nu paa nuą, a hiɛnɔwai kɛ nuą, a kaahɛn ɉəɠə nuą, a hali kɔ nuą, ɛlɛɛ, da lɛɛ nuą; di wɛi nąą ɓaa nwɔ̨n máɠa hu; yili ɓə a haa veelɛnąą.»

M̀ɛni-lɛɛi 22:15

'Ká kulɔ ɲɛnɛ̨ɛ̨ pələ, yilɛɠaa, ɛlɛɛ, kaahɛn ɉəɠə nuą, tuwɔ pələ ɲɔ̨n gulɔ nuą, ɛlɛɛ, da nu paa nuą, hali kɔ nuą, ɛlɛɛ, da nuąi lɛɛ wɛli kaa diɛ, ɛlɛɛ, diɛ lɛɛ kɛ!