Hebreu 13:15 - Yálá laawoo hɛɓɛ (dc)

¹⁵ Yili ɓa, Jesus pɔ pələ, 'ká gu mąąwiɛ haláá kulɔ Yálá ɓa a yələ kəlee, mukulaa ɓaa: 'Ká gu kɛ lɔ Naa tɛi.

Yálá laawoo hɛɓɛ

¹⁵ Yili ɓa, Jesus pɔ pələ, 'ká gu mąąwiɛ haláá kulɔ Yálá ɓa a yələ kəlee, mukulaa ɓaa: 'Ká gu kɛ lɔ Naa tɛi.

Bible

¹⁵ Mɛni ma kwaa laa-maa-tɛ-sala kúla Ɣâla ma a tãi kélee zarâi, ǹyaa ƃa ǹáa tóli-wooi nyíi a kúla núu lái.

Hebreu 13:15 ပူးပေါင်းရင်းမြစ်များ

Kɔlɔnikɔ Veerɛi 29:31

Ezekiasə ə bələ həɠə, yɛ nɔi lonnii diɛ: «Ə həli káá! Kaai kpɔ ka yee laa hvɛɛ a Yai-Laa kɔ́ hɛn, 'ka ká mąąlɛɠɛ ɓɛ, 'ka pa a haláá hɛn, a kɔ́ɓo hɛnŋąą Yai-Laa nwɔ pɛlɛ́i mu.» Nɔi lonnii di pa a haláá hɛnŋąą da naa gwəi mɛ̨inɛ̨ɛ̨, nuąi kpɔ di lii nɛ̨ɛ̨i kɛ di kwəi, di kɛi pa a haláá hɛnŋąą da gəlee kələn.

Kɔlɔnikɔ Veerɛi 33:16

Manase ə tinɛ̨n ə Yai-Laa kɔ́i bɛli, ə liilaa halááɠaa kulɔ da mąąwiɛ haláá. Ə mo Ɉuda nuą diɛ, di tí Israɛlə nwɔ Yálá Yai-Laa ɓa.

Kɔlɔnikɔ Veerɛi 7:6

Ɉaláá laa həli nuą di kɛ tɔɔni di tɔɔi. Yai-Laa ŋą hvɛliɠaai di kɛ léviɠaa yəi, a vɛliɠaai tii Davidə ə di pɛlii Yai-Laa mąąwiɛ mɛ̨nį ɓai. Mąąhɔlɔɓo nwɔ wɛlikɛmąąlaa ɲɛ̨n və mą. Ɓɛlɔwai kɛ Davidə a kɛli mo la léviteɠaa diɛ diɛ Yálá mąątɛ̨nɛ̨i, ɉaláá laa həli nuą di kɛ tɔɔnįn di kwɛlɛ diɛ dulú hvɛɛ, ɛlɛɛ Israɛlə nuą kəlee di kɛ tɔɔnin.

Ɛsdrasə 3:11

Di kɛi nwələ too, diɛ di kee woo mu hon, diɛ kɛ mą: mąąwiɛ da kɛnɛ̨ laa kaa Yai-Laa ɓa; Mąąhɔlɔɓo, nwɔ mɛ̨inɛ̨ɛ̨, da nwɔ lii nɛɛ gwəi laa kpon ɉu kwɛaai Israɛlə ɓa. Di kɛi yili ɓo tii, mąąhɔlɔɓo, di kɛi Yai-Laa hee pɛlɛ́ tɔɔ.

Nehemi 12:40

Nwələ too nuą kpulu hveelɛi tii di tɔɔ Yálá hee pɛlɛ́ mu, ə mą kɛ ɲą́ą́ kwa daa ɲąąwooɓo nuą bələ tɔ̨nɔ̨i tii kɛ bɔi.

Nehemi 12:43

Di haláá kpɛa kpɛa kulɔ a mąą yələi tii, nu kəlee kwəinɛ̨ɛ̨ mąąhɔlɔɓo, Yálá aa kɛ kwəinɛ̨ɛ̨ kɛnɛ̨ tɛɛ di pɔ. Nɛ̨ąą da lɛapɛlɛɛɠaa diɛ kpɛli, di kwəinɛ̨ɛ̨i kɛ, gwəinɛ̨ɛ̨i tii di kɛi gulɔ Ɉerusalɛmə, bələ ə li kwɛa la.

Mąątɛ̨nɛ̨ 118:19

'Ka tələnmo kponŋaa laa ɓo dɔ́wɔ, ŋį́ lɔ laa, ŋį́ Yai-Laa laa mąąwiɛ.

Mąątɛ̨nɛ̨ 119:108

Yai-Laa, nwɔ́ hvɛli wooɠaai, gáá naa həlii yɛ́, 'ə́ yee hee mu, Ə́ liiɓa mɛ̨nįɠaa lɛ mą́ą́.

Mąątɛ̨nɛ̨ 18:49

Yá gúlɔ ɲówóɠaa yəi, yɛ́ ɲéé tɛɛ gɔ́yɔwɔɠaa diɛ; yɛ́ gúlɔ wɛa nuą yəi.

Mąątɛ̨nɛ̨ 50:14

Haláái mąąnɛ̨ɛ̨ ə́ gulɔ Yálá ɓa, ya ɓaa: Ə́ gɛ mɛ̨inɛ̨ɛ̨ hu kɔlɔn, ə́ wooi ə́ gwɛlɛ Hɛn Gəlee mɛ̨imun ma, ə́ bɔ mɛ̨nį kɛ.

Mąątɛ̨nɛ̨ 50:23

Nui a mɛ̨inɛ̨ɛ̨ hu kɔlɔnŋąą kɛ a nwɔ haláá hɛn, gaa mą́ą́wiɛi, ɛlɛɛ, nui a ɉiɛ pələ ɲɛlɛ kɛ, ya ɓə ŋą́ Yálá ŋą ɓalo mɛ̨nįi ɲąąnɛ̨ɛ̨ lɛ mą.

Azaya 57:19

Gɛ́ kwəinɛ̨ɛ̨ wələ lɔ di la. Yai-Laa yɛ diɛ: Liilaa, liilaa 'ə kɛ nui kwɛala mą, 'ə kɛ lɔ nwɔ̨nɔ̨ kpuɔlamun mą, a tɛ̨ą, gáá pai di ɓaloi!

Ɉeremi 33:11

kwəinɛ̨ɛ̨ wələɠaa mɛ̨n ɉii laa, da yɛlɛ wooɠaa, nɛ̨ą həɠə mun nwɔ wələ woo yɛ tɔɔ. Hilɛtai nɛ̨ɛ̨nu nwɔ mąną kaa tin yɛ tɔɔ. Nuąi pai a hɛɠɛɛɓo halááɠaa Mɛ̨nį Kəlee ŋą Hééɓomun Yai-Laa yəi bɛlɛ́n, di wɔ hvɛ́li woo yɛ tɔɔ laa, diɛ kɛ mą: 'Ká Yai-Laa Kɔlaɠa Nwun Ną́mu laa too a wələ, mąąhɔlɔɓo, nwɔ mɛ̨nį lɛlɛɛi, nwɔ wɛlikɛmąąlaa ɲɛ̨n deei hvo mą. «A tɛ̨ą, ŋą́ pənə ŋą́ nɔi ŋɛ̨i tɔɔ, ə pənə ə kɛ yɛ bələi ə kɛ la tɔlɔɔ. Ɲą́ą́ Yai-Laa nwoo li.»

Ɉeremi 33:18

Lévi huwu hu haláá laa həli mun və pai kpɛɛi laa, yɛ tɔɔ nííla, yɛ haláái da gəlee kələn, nulu tɛ; yɛ gɔ́ hɛnŋaa kələn. Yɛ ɉalááɠaa kulɔ a yələ kəlee.»

Osia 14:2

Israɛlə! Pənə ə́ pa wɛ, Yai-Laa ə́ wɔ Yálái pɔ, mąąhɔlɔɓo, ə́ kɛ nɛ̨ŋɛ̨n aa ə́ too.

Levetekɔ 7:12

Akɛ da bɛlɛ Yálá hɛɠɛɛɓo taatɛlɛɛ ɓa, ɉɛn mąąnɛ̨ɛ̨ di paa la a ɉɛɠɛɛɓo kɛ hɛn, ya ɓaa: nwɔmįi dɛ hɛn və ɉu, bɛliɛ a wulɔ. Lɛɠɛi dɛ hɛn və ɉu wulɔ puɔ mą, da nwɔmįi ɓɛla ɲąą kɛnɛ̨ ɲɔwɔnŋąą a wulɔ, dɛ hɛn və kɛ ɉu.

Lonon mo 7:62

Hɛni kpələ kɔ́wɔ tɔ̨nɔ̨, yɛ ɓo a kilə pow (10), naa hvɛɛ a wulɔ kun nɛ̨ɛ̨;

Maafîu 11:25

Nąąlɔwai, Jesus ə nwooɠaa ŋɛ̨i ɓo, yɛ diɛ: «Oo Ną́n Yálá, gáá ə́ hɛɠɛɛɓoi kpɔ kɛnɛ̨, yɛ́i ə́ kaa a yələkɔlɔn da lɔi di Nąmu. Gáá ə́ hɛɠɛɛɓoi, mąąhɔlɔɓo, yaa mɛ̨nį ŋɛ̨i loo kilimąą nuą diɛ da mɛ̨nį kɔ́lɔn nuą, yaa nɛ lɛapɛlɛɛɠaa diɛ.

Lukə 10:21

Nąąlɔwai tii hu kpɔlɔ, Kili-Mąąhəɠɛɛ əgɛ, Jesus kwəi ə nɛɛ kpɔ kɛnɛ̨, ə mo yɛ mą: «Oo Nąn Yálá; yələkɔlɔn da lɔi di pɛli mun, gáá ə́ hɛɠɛɛɓoi, mąąhɔlɔɓo, mɛ̨nįi yaa noo kilimąą nuą da mɛ̨nį kɔ́lɔn nuą diɛ, yaa gulɔ ponoŋą, nɛapɛlɛɛ ŋɛ̨i diɛ. Oo Nąn Yálá, ə́ yili kɛ tii, mąąhɔlɔɓo, yili ɓə kɛ a ə́ liiɓa.

Ɉaan 10:9

Ɲą́ą́ ɓə gáá a bɛlɛ́ laaləi, nui a tɛɛ bɔ́ɔ́ li pələ, nwun mąą a ɓo. A lɔ, yɛ kulɔ, ə lɛɛ, yɛ kɔ̨nɔ̨n ɉɔlɔɓo.

Ɉaan 14:6

Jesus yɛ mą: «Ɲą́ą́ ɓə gáá a bələ gɛ́ ɓo a tɛ̨ą, gɛ́ ɓo a yɛnɛ̨ɛ̨ kpɛɛ hvo mą. Nu ta hva pɛli lii Ną́n Yálá pɔɔli akɛ hvo tɛɛ li ɲą́ą́ bɔ pələ.

Lomaŋ 12:1

Ną́n nonnii, gáá ká hvaŋąlɔi Yálá nwɔ ɲɛ̨imąąwɛli kaa laa hu, gɛ́; 'Ká ká kpɔwɔ kulɔ a haláá vulú mąą, mąąhəɠɛɛ, nwɛli ə ɓo Yálá ɓa. Yili ɓə gaa a kwɛli hvilɛn ŋąąi viɛlaɓoɔ.

Lomaŋ 6:19

Ka wɔ hvii kpɛɛ laa mąą mɛ̨nį ɓa, gáá nwooɠaai ŋɛ̨i ɓoi kaa a nu kiliŋąhiɛ. Pələi ti tɔlɔɔ ka ka kpinį kəlee kɛ la a mɛ̨nį ɲɔ̨n nwɔ luwɔ, kaa ka kwɛli tee Yálá ɓa, yiihu kɛa ka ka kpinįi kəlee kɛ a tələnmolaa nwɔ luwɔ, ə gɛ, ka wɔ yɛnɛ̨ɛ̨ kɛ pələ ə kɛ a Yálá liiɓa.

Ifisiɛŋ 2:18

Ɛlɛɛ, Kristə háálai ɓə, guɔ mąn, diɛi tii mąn, gwa pɛli lɛɠɛi la gu Nąn Yálá ɓa, Kili-Mąąhəɠɛɛ tanɔ̨n ti hu.

Kolosə 1:12

'ká gu Ną́n mąmąɓo, yai gɛ, guɔ gu wɔɔ hɔlɔɓo nu mąąhəɠɛɛɠaa kwɛlin ɉu, yələkwəi.

Hebreu 12:28

Yii kani, dɔɔlaai kala hvo mą gwaa ɉɔlɔɓo, 'ká gu gu yee kanąn kani mɛ̨inɛ̨ɛ̨i lii ɓa kpɔ kpąą; mɛ̨inɛ̨ɛ̨ tii pɔ pələ, 'ká gu tí Yálá ɓa, yɛ bələi a nɛ̨ɛ̨la mą, kpɔwɔ mąąyɛɛ laa hu da ɲɔw mąą laa hu.

Hebreu 7:25

Ɛlɛɛ, nuąi da di mąąlɛɠɛ Yálá ɓa, yaa ɉáálai, a pɛli mą ə di nwun mąąɓo, gbala ə tɔɔ, yaa tii gaa lɔ laa a yələ kəlee, yɛ di mąą mɛ̨nį laa həli a nɛlɛɛ kɔlɔi.

Piɛrə dɔlɔɔ 2:5

Káá kpɛlimąn, yɛ kwɛnį hvulúmąąɠaa, 'ká lɔ kani bɛlɛ́ tɔɔ mɛ̨nį hu, yai a Kili hee pɛlɛ́, əgɛ, ká kɛ a haláá laa həli kpɔn mąąhəɠɛɛ, káá Yálá mąąwiɛ haláá laa həli, a háálai Yálá a ɲee hee mu, Jesus Kristə háálai.

Piɛrə dɔlɔɔ 4:11

Nu ta a kɛli pələ ɓo, ə kɛ a Yálá laa woo laa həli mɛ̨nį; nu ta a kɛli ə́ wɔɔ mąątíi kɛ, gɛ a hvaŋąi Yálá a dɛɛ bɔ, ya ɓə a gɛ, Jesus Kristə háálai, Yálá ə mąąwiɛ laa hɔlɔɓo kpɔ a neelee, yai, mąąwiɛ laa, hee mɛ̨i laa kaa a nwɔɔ a yələ kəlee mɛ̨nį. Yálá ə kɛ ti!