Vilip 3:16 - Verikariano Vou Na Baki

¹⁶ Mia kito monoka rovokar batitig naina napano robinimei robo eaio ruei, kanio maka rivu ka rojoru retitiravolar denio bereio.

Vilip 3:16 ပူးပေါင်းရင်းမြစ်များ

Kolosia 2:6

Jibe na, bior kito romidu Kristo Yesu be kanado Tubo ruei, bogo nonovio mia reiel dam̃ariga ea naio ga,

Navisip̃eiano 3:3

“ ‘ “Tibe na, monoka kuvisidomial bereio iliano novo nalo napano m̃a kumijogio a napano kumijevio ruei. Kumonmonealo bo dam̃ariga, a kuvilig kenemiu meuliano rimei bereio, bior ver kuvitevijo re, mia nemijikia never vatitig rivu van kamiu ka mia nemijikia namaluvo ka kamiu tavukia toro na vinauano tai, napano mia kuvijikia lele re.

Kalesia 6:16

Naruei kiniou nobolkouo ka nalo napano mia adukar iliano nei, napano mia amei ave Atua kiano kulo Israel nalo garuei rimemedu, neberenio mia Atua kiano tum̃aroano a natinieiiano to vijalo.

Romo 15:5

Jibe na, kiniou nojo nobolkouo ban Atua ka kamiu, kar naio naruei be burupati na jidomiano tebievi, naio naruei mijikia tunukakar toro kiano meuliano. Nebika ka naio rila ka kamiu kuvitu kuvitakii Kristo Yesu kiano bajago, kuvitu rivu vio takurano vija bajago na vironiano,

Vilip 4:2

Kiniou nomijog bova ka namialio ka monoka neil ve telisu van kanado tira juo nei, Yuotia naio Sintike. Naljuo ajum̃a abilvilii ealo toru laka, tenene na neber ka kamiu ka nojidom ka naljuo monoka ala kanalo jidomiano rivatove, rimei ve takurano ea kanado Tubo.

Vilip 2:2

Naruei bior naio mila bo laka ban kito jibe na ruei, nejidom notusol iliano, nebika den kamiu ka kuvan lie vo. Neber bo ka kamiu, kuvijamo ka kenemiu bajago na rivan kamiu, mia naio rive verare ka Kristo kanano bajago na rivan kamiu. A mia kamiu tiniemiu titii kamiu naio rive verare ka na naio tinien jii kamiu, a mia kenemiu iliano vija kenemiu jidomiano ve takurano. Ver neial ka kuvila tibe na, mia nojog rivu, nasaaro mia nasaaro.

Vilip 1:27

Mia kito maka rejikia rimemedu vo ka mia tum̃abe ka kiniou, naruei nojidom ka mia kuvisidomial re kiniou, mia kuvisidomial ga kamiu. Kuviel ea m̃arabo na bo naio memedu ka kamiu tomu na Ioluano Vou na bo na Kristo. Vede nemijikia noyotuba ka kamiu, p̃eli na maka nejikia neviedu, mia bo ka lilianiano naio bokar burutilinieku ber kumitum̃a kumitu jikili bo, ka niunumiu nalo be takurano, kenemiu jidomiano takurano ga ka kuvitumolu kuvitu vio takurano ga, kuvila vio sikili ka namoneano na Ioluano Vou na bo naio monoka tovulu.

Romo 12:16

ver kamiu kuvija kulo dolu nalo, kamiu monoka kuvitu vatitig vijalo, napano ve kenemiu jidomiano ve takurano ga, ver kuvim̃au vija kulo dolu nalo, kuvidu re kamiu kuvitu mave kalo kuver kamiu kubo, a kamiu kuvisaaro ka im̃auano na tertelisu nalo a kuvisaaro ka kuviasol vija tomu nalo na tertelisu, ver kuvila titai nalo, a kuvisidomii re ka kube masou, a kuvila kenemiu jidomiano to yetano,

Kalesia 5:7

Beamu kiniou nemial kamiu kumitikiti bo laka, ana vonganei, maka bunu tibe na. Atua naio bio kamiu beamu ruei, ana nejidom nevika ka keinia toro napano naio berbure m̃arabo ka kamiu bereio, mila ana maka bunu kumonea ilirianiano? !Kiniou nemijikia maka ve Atua na!

Kolosia 4:2

Kamiu kuvisikili ka volkouano bogo nonovio, mia monoka kubolkouo napano mia kuvisidomii vatitig vite nalo ka kuverenio ea volkouano, a ka mia kenemiu iviso river sivaiano van Atua.