Navisip̃eiano 22:6 - Verikariano Vou Na Baki

⁶ Ana nailiano nei naio mil ban kiniou, berinavo “Vite nalo na m̃a komial lo p̃eli komijoglo, amemedu laka, mia iorou amei ave riano nonovio. Burum̃ara kiado Tubo, naina be Atua nanua m̃a naverialiano na beamu amim̃au ea moroano na Niununo, naio miila kumemi kanano nailiano nalo numiyotuba kaso ka nuvisi vite nalo nei vanso. Naio mila jibe na bior napano naio jidom ka kanano tomu nalo monoka ajikia vite nalo napano mia ayotuba vesiou re.”

Navisip̃eiano 22:6 ပူးပေါင်းရင်းမြစ်များ

Navisip̃eiano 1:1

Niosi na be visip̃eiano ka venia napano mia naio riyotuba ea legiano nalo napano mia amei navo. Atua naio jidom ka kanano tomu na im̃auano nalo na yetemeriba monoka ameravo rivu ka vite nalo nene, naruei, jian jikiaiano nene ban Yesu Kristo, karina Yesu naio miila kiano nailiano tai miyotuba ka kanano toro na im̃auano nei Jone, naio mila vite nalo nene amiyotuba ka naio ea kanano visip̃eiano tai.

Navisip̃eiano 21:5

Iliano nei bisi, ana toro lu na m̃a jo jotano mave naio berial, berinavo “Nao be riano laka kiana! Mia kiniou nala vite nonovio rimei ve terivou bereio!” A jusol bereio berial memedu ban kiniou, berinavo “Naina naruei mia kiniou never iliano tai vanso napano naio be riano bo, napano jau komijikia komonmoneaio rivu, mia bo jau kovivitauia kario.”

Navisip̃eiano 19:9

Ana nailiano napano ju bija kiniou ea bogo na mil ban kiniou, berinavo “Mia kiniou never iliano tai vanso kovivitauia kar toa kanamo niosi na. Iliano nene jibe nei, ber toro napano mia avio ka naio tusol lo ka sinaniano na jokoluolu na soriano na nunu solbouo, mia naio rijog rivu mia rivu laka.” Ana naio jusol iliano nei bereio, berinavo “Naina naruei be Atua kanano ilirianiano napano be riano laka.”

2 Pitere 1:21

Nina bior napano verialiano nalo nei, maka lele amaluvo den toro kiano jidomiano, mia Atua kiano Niununo naio mim̃au ea tomu nalo, naio jukamu kalo ka averial Atua kanano verialiano.

Im̃auano 3:18

Mia nina naio be Atua kanano m̃arabo ka rila iliano nalo napano naio berial nanua ruei nalo amei ve riano. Ea iliano na kanano naverialiano nalo, naio berialio ruei ka mia Naverikariano na kanano naio monokanio rijog rivova ea mokotenano.

Luka 1:70

Nina kiano verikariano nanua, naverialiano nalo aberialio, aber

Navisip̃eiano 18:20

Ana bior napano burum̃ara vio va nei naio mijoru jibe na, iliano tai miyotuba mave, berinavo “Ea vio mave, burum̃ara saariano a jogvuiano. Kamiu namoneano lu nalo, a atevi nalo, a Atua kiano naverialiano nalo, kamiu kumijikia kuvilivu ka naio ve toru, bior ka napano naio jibure tira va nei ruei, jian meran ban naio bior vovaiano nalo nanua m̃a mila ban kamiu beamu.”

2 Pitere 3:2

Nojidom never bo ka kamiu kuvitu tiniemiu maio dam̃ariga ka iliano nalo na naverialiano lu nalo re nua, bija bunu tuboiano vou napano kiado Tubo Naioruriano naio jian ban kumemi kenemiu atevi nalo, ka kumemi nuver lilian van kamiu.

Abe Kulo Ju 12:9

Mia beamu, kito robiniu, bogo na karam̃ano ajum̃a amila vironiano ban kito, maka rosidomio, be riano, voniganei robitilubario ka nalo amemedu ga, mia mila na rabamenealo loa laka. Tibe na ana bo ka ravatove ka niunudo na naio be karam̃alo, rasaaro ka venia na naio mila miyotuba ka kito, bior naina naruei be m̃arabo na meuliano.

Romo 1:2

Ioluano Vou nene, naio ju joomo ea iliano nalo na vivitauiano lu nalo na Atua kanano ruei, nina ea verialiano nalo na napano kanano naverialiano nalo aberialio nua nua binimei.

Navisip̃eiano 22:7

Mia Yesu kiano iliano ea vio nei ban kiano tomu nalo, naio jel jibe nei, berinavo “Kamiu kuvitikar! Mia vesiou re, mia kiniou nemei noyotuba ka kamiu bereio. Toro napano bokar vatitig iliano na visip̃eiano nalo na kanaku niosi nei, mia rivu laka van naio, mia naio mijikia rijog rivu ve toru.”

1 Korin 14:32

Iliano novo tai jo, napano memedu ka nalo na abokar moroano nalo nei napano Niununo Lu jianio. Iliano na ber jibe nei, ber Niununo napano jian iliano ban toro, naio maka tutua toro na, mia monoka takii toro nei kiano masouano, napano mia verial iliano nei.

Mataiu 13:41

napano mia Kulorinio Kenerinio, naio riila kiano nailiano nalo ka avan ka avar bulag vite nalo napano amila toro mijoru ea kariano, vija tomu nalo na amila bijuku vovaiano nalo, ka mia nalo ajikia atu re bunu naliko tomu nalo na kiano navenatuboiano.

Luka 16:16

Iliano dolu tai napano Yesu berenio, naio berinavo “Beamu, Niosi Moruo jo, napano niosi nalo na Mosis kanano bija niosi nalo na naverialiano nalo kanalo juaio, bano-o binimei bokar bogo na Jone Baruei. Jone mim̃au bano-o bisi ana vonganei Ioluano Vou na bo na Atua kanano navenatuboiano naio binimei, naruei ajum̃a amioliolu ka janea vio reraio, mia tomu nam̃a ajidom ka ava jouro eaio na aju amila vio jikili ka ajogkario.

2Tesa 1:7

Nalo amila kamiu kumitu kubar bogokouo laka, a mia naio rila ribisi, mia naio rijai kamiu yako, a rijai bunu kumemi ea vio nei napano kumemi bunu numitu nubinua saba tealo. Bogo na reial ka burum̃ara sebi vilivili ea vio yauo, remijikia ka mila m̃arabo na Atua kiano ka riila Tubo Yesu taluvo ea tiniabene rimei ea yetemeriba, vija kiano nailiano nalo na jikili, ka mia naio rivuru bulag kito den jaleleano nalo na yetemeriba.

1 Korin 7:29

Bilbilu nalo, kiniou neber jibe nei bior napano bogo bulati ga ju ka Tubo rimei bereio, mia maka tomu ve telabo ka ala kiano im̃auano. Tibe na, bo lie verver tomu nalo napano abe koalo nalo ala tibe maka asoro, mia nalo amijikia ala Tubo kiano im̃auano ve telabo.

Im̃auano 12:11

Ana ea bogo nei ga, Pitere bitilubar ka vaio napano nailiano nei mila banio, ana berinavo “!Tomnei! !Riano laka nei! Nemijikia naruei ka napano Atua miila kanano nailiano nei binimei ka rivinalar kiniou den Erot jum̃ano, a ka rivurular kiniou den vite na bova nalo napano kulo Israel nalo aju ajidomio kia ga ka aber mia ala van kiniou.”

Navisip̃eiano 4:1

Iorou ka napano kiniou nemial vite nalo nei, nemial bereio m̃aratavo tai ka ava joomo ea vio mave naio juvavo jo ea miraku. Ana nomijog bereio jooa na mil ban kiniou beamu, naio mil burutomoruo javukia pasimeduo, ana naio ber ka kiniou, berinavo “Jau komei mave nei beamu vo, mia kiniou nelaso keial vite nalo napano mia amaluvo iorou.”

Navisip̃eiano 21:9

Iliano nei bisi, ana nailiano nalo nei nua tai kalo, nanua m̃a abar basidobidobi aluo na jogvaiano aluo na maariano na yetemeriba, naio binimei bio kiniou. Naio berinavo “Jau komei beamu vo, mia nalaso jau keial tira na soriano, nina be Nunu Solbouo koano.”

Navisip̃eiano 22:1

Karina, nailiano jiloglog parinio uei na meuliano ka kiniou. Nemial napano be uei novo nene, naio meravo mia meravo, naio jo mieraro miyotuba jikar ea vio lu na Atua napano Nunu Solbouo juaio.

Navisip̃eiano 22:16

“Kiniou Yesu, nemiila kiaku nailiano na biedu ka riverial iliano nalo na vanso, ka jau komijikia kava kesian van kanaku lotuano nalo. Naverikariano napano aberkar ka mia rimaluvo ea tormoruo parinio tubo Teviti re nua, kiniou nei. Kiniou nei nebe M̃ejegi, m̃arivitano napano berial ka vaataro ka viorijen mermeravo.”