Navisip̃eiano 21:6 - Verikariano Vou Na Baki

⁶ Ana naio mil du kia ga, berinavo “Kiaku im̃auano nonovio, nemila nonovio biniu ruei! Kiniou nebe motoru a nebe natumaariano, kiniou natikariano a najuluvatiano. Toro na m̃a midou jerio, mia noviov m̃ano uei tai ea burupati uei na meuliano, nesian van naio rimunuio tibe na ga.

Navisip̃eiano 21:6 ပူးပေါင်းရင်းမြစ်များ

Jone 4:10

Naruei ana Yesu naio berdop̃e berinavo “!Tira, verver jau komijikia ga ijaiano na bo napano Atua naio jidom sian vanso! !Verver jau komijikia ga ka kiniou nebe kei nei ga nam̃a nebika uei denso! Ver tibe na, vede maka ve kiniou na nebika uei denso, ana mia jau kovika uei den kiniou. Mia bogo na ver jau kovika uei den kiniou, nemijikia nesian uei na be uei na ridu meuliano vanso.”

Navisip̃eiano 7:17

bior nunu solbouo napano naio jo iviso ea vio lu nene mave, mia naio rivaganlo, rivuru m̃arabo kalo avan ea burupati uei na meuliano, ana mia Atua naio riolkon nono jogumiralo den miralo.’ ”

Jone 4:14

Mia toro na naio rimunu uei nei napano nemijikia nesianio vanio, karina mia naio maka rijikia midouser naio bereio. Mia uei napano naio rimunuio, mia rimei tibe ka burupati uei bereio joomo ea kiano iviso, ve uei na meuliano napano maka ve togio eaio, naio jom̃a mieraro den naio dam̃ariga, maka rijikia tabo bogo tai.”

Romo 8:32

Kito romial ka Atua tinien jii laka ka kito banbano-o mijamo ka auebin kenerinio memedu kar kito, ana ver jaaro ka rila burum̃ara tonovo nei ban kito jibe nei, mia jaaro bunu ka sian tenalo dolu novnovo nalo rivan kito.

Navisip̃eiano 22:17

Mo Atua niununo naio mijog iliano nalo nei, naio ber ka Yesu, berinavo “Bo ga, jau komijikia komei!” Tira na ju ka soro kanio, naio berinavo “Nao, bo ka jau komei naruei!” A toro kei napano naio mijog iliano nalo nei, bo ka naio bunu riverialio, riverinavo “O Yesu, ver jau komei ga!” Mia kei napano midou jer, kuvetavo ka m̃aratavo kanio ka naio mijikia riviedu joomo. Toro napano naio jidom rimei, mia naio mijikia rivokar m̃ano uei na meuliano, jibe ka kanano jidomiano kurano tai ga.

Navisip̃eiano 1:8

Bo ka kito rovatove ka Tubo Atua, Atua Sop̃i na moroano, naio napano jo beamu, naio jo banei, a mia naio tobo to, napano kiano ilitemiano tai naio ber jibe nei, berinavo “Kiniou nei nebe burupati, kiniou nei nebe juluvati!”

Romo 3:24

Mia bo ga, bior Kristo Yesu naio bulu bulag kito ruei, mila na Atua rila kito romemedu ea mirano, jibe ka jidomiano tai napano naio jian ban kito, binimei ea kiano tinieseseiano ga.

Navisip̃eiano 22:13

Kiniou nebe motoru a nebe bajulkuti, kiniou nojukamu a nojo iorou, kiniou nebe natikariano bija namaroano.

Navisip̃eiano 16:17

Bisi na, nailiano aluo nene naio kija miyon bulag kiano basidobidobi, mia naio miyon bulagio ba janea vio vio yauo mave. Ana iliano tai miyotuba ea jobaro lu joomo ea yimo lu na mave ka bogo na, naio miaga mave berinavo “Vonganei naruei be bogo na juluvati vite nonovio ribisi.”

Navisip̃eiano 1:17

Nemial toro nene jibe na, tomnei, mila kiniou jibe ka nam̃aro garuei, nomijoru yetano ea jaano. Mia naio jian jum̃ano meruo binimei jokol kiniou, naio berinavo “Jau komerou re ka kiniou, kiniou nei nebe natikariano mia nebe najuluvatiano.

1 Korin 2:12

Maka niununo tai na yetemeriba nei ga napano riverialio ka kito, mia Niununo Lu nei napano jaluvo den Atua binimei, naio naruei mila kito robitilubar vatitig jidomiano nonovio nalo napano Atua jo jian ban kito.

Navisip̃eiano 10:6

Ana naio ber kanano iliano na jikili tai, naio berkar ea naio napano meul jo jobo jo siano, napano m̃a naio jii vio mave bija venia na m̃a ajuaio, bija yetemeriba nei bija venia na m̃a ajuaio, bija tei, bija venia na m̃a ajuaio. Iliano na kanano naio ban jibe nei, naio berinavo “Vonganei naruei maka bunu ve bogo na kotororea!

1 Korin 3:12

A bogo napano amim̃auka yimo mave ea burupati yimo nene, p̃eli tealo amim̃auka niogo p̃eli veriniogo p̃eli veru jikili, p̃eli tealo amim̃auka iesi p̃eli surukiaro p̃eli m̃aburi.

Navisip̃eiano 1:11

“Venia napano mia jau kealio, keial kovivitauia bulagio rivan ea niosi tai, karina jau kotuvan rivan tanea lotuano nalo na tanobuku na vio Esia, ka ajikia avulukuio. Lotuano nalo na, nalo aluo, be Eveso, Simena, Pekamam, Taitera, Satisi, Vilatelvia bija Leotesia.”

1 Korin 3:21

Tibe na, monoka rove m̃arou re ka jidomiano nalo na yetemeriba. Nalo maka ajikia ala vite tai rivu ka kamiu leleio, bior napano Atua jian nonovio kiano ilivuiano novo ban kamiu ruei.

1 Korin 3:5

Verver kuvisidom kuververii kumemi juo Apolos siememi, bo ka kuvisidomiio vatitig ka kumemi juo nube toro na jum̃abe? Kumemi juo nube Tubo kiano toro ga, ka nuvila im̃auano napano naio midu joa jumememi, ka rila ka kamiu kuvijikia kumonea naio.

Jone 4:11

Naruei tira nei naio mijog vite na, naio bika den Yesu, berinavo “Toro na toru, jau maka ve kanamo titai ka jau koviov ka uei nene, mia bulukuei nene naio bululuo batove laka. Tibe na, uei na meuliano nam̃a jau kojom̃a koberenio na, mia jau koviovio tum̃abe, p̃eli na mia jau koviovio ea vio be?

Navisip̃eiano 3:14

“Na maaro, jau monoka kovivitauia m̃esi tai riva van nailiano na lotuano na komeli na vio Leotesia, kover tibe nei, koverinavo ‘Iliano napano biedu ban kamiu naio binimei den naio napano naio be parinio ka vite nonovio, napano naio ga mijikia river “Tibe na.” Naio biekouo be riano ea Atua va vokar napano kiano burukija riou, a naio rive tubo ka yetemeriba nonovio napano Atua naio jiio.